Read basketo 1 ጴጥ 4 Bible Online

1 ጴጥ 4 - basketo bible

1 ጴጥ 4

¹ዪዚ ክርስቶ̈ሲ ፌ ኣሲቲንባራ ሜታ ኤኪ̇ኖኮታ̇ቦ ዪንታ̇ሬ ኦላ ማሳ̇̈ራ ጊጺ̇ኖ ኣስፌ̈ኒ ዪና̇ ቆፊን ጊጻ̇ሪ ዲንዲብቴ፤ ኣባ ጌይን ፌ ኣሲቲንባር ሜታ ኤኪ̇ዝ ኣሲ ናጋራ ኦ̈ሳ ኣሺ̇ኔ።

²ዪ̈ ና̈ሳ̈ዲ ዓኒ̇ፖ ጌዳ ፌ ዶኣዝ ላይን ጋርታ̇ ጾ̈ሳ̇ ኡፋይሳ̇ንዳብዶኬ ፌ ኢ̈ታ ኢኒ̇ን ኩምንዳብ ዶኢባ̈ሴ።

³ጾ̈ሳ̇̇ ኤሪባ̈ሶ ኣሳን ዎታዚንዲፌ̈ኒ ኣሲቲ ኢ̈ታ ኢኒ̇ን ኩምሙታ፣ ማሲቲሙታ፣ ዎልኣ ሺ̈ቃር ኡሽኪ̇ ማሲታሪ ዶጚ ዬጺ̇ሙታ̇፣ ማቃ ጾ̈ሳ̇̇ብ ጎይኒሙታ ኣ̈ኖ ቲ̈ኖ ኬሊ̇ን ዪንታ̇ብ ጊዶጋ̈ቤ።

⁴ዎቲናካር ዓት ዪን ፋባ̈ሶ ኢ̈ታ ባዛን ኢንታ̇ባር ዎልኣ ኦ̈ባ̈ሶኮታ̇ቦ ጋራ̇ሚንቲ̇̈ሬ፥ ማ ዪንታ̇ ቆ̈̈ሬ።

⁵ዎቲናካሬ ኢንቲ̇ ሼምፓባሮን ጋልዳኬ ዓይቂ̇ኖን ጋልዳ ፊርዳ̇ንዳብ ጊ̈ጊንቲ̇ኖ ኢ̈ቦ ማ̈ልሳ ኢሚ̈̇ሬ።

⁶ዪዚ ዓይቂ̈̇ኖ ኣሳንባር ኣታካ̇ይዶን ዎጛላ ሳባ̇ኪንቲ̇ኖንዳ ዓኒ̇ኮታ̇ቦ፤ ዪዚ ኢንታ ኣሲቲንባራ ኣሳ ጋ̈ልዳ ዬላ̇ዝ ፊርዲን ዎይ ኢንታ̇ ጋልዳ ዬላ̇̈ሬ፤ ዎቲናካሬ ኣያ̇ናባራ ጾ̈ሳ̇ ዶኣዚንዲፌ̈ኒ ሼምፓባር ዶኢ̈ሬ።

⁷ዪዚ ዎይ ባዛብ ውርሲን ዬሊ̇ኔ፤ ዪንቲ ሚ̈ጛሪ ዎ̈ሳ̇ንዳብ ዳንዳኣምፔ̈ኒ ኮሺንቺ ቆፒ̇ዝ ቡ̈ዳ ዪንታ̇ብ ዶኦጋ̈ቤ፤ ማ ዪንቲ̇ ዪንታ̇ብ ኮሻ̇ዚንዲፌ̈ን ዶኢብቴ̇።

⁸ካን ዎይሊን ናጋራ ካጚዛኮታቦ ዎይ ባዛፖ ሺ ዎልዎልኣ ሚ̈ጛር ካንቲ̇ብቴ።

⁹ጉንዱማካ̇ይዶሪ ዎልዎልኣ ዛቃ̇ፌ̈ኒ ሞኪ̇ብቴ።

¹⁰ጾ̈ሳ̇ ጋልዳፖ ዪንታ̇ብ ኢሚንቲ̇ኖ ዱማ ዱማ ኪልሳን ኮሽ̇ ጎይባራ ኦ̈ሳ ጋልዳ ፌ̈ሺሙታ ዪንቲ̇ ዎይን ዪንታ̇ብ ኢሚ̇ንቲ̇ኖ ኪልሲንባራ ሜላን ማ̈ዲ̇ብቴ።

¹¹ታ̈ማርሲዝ ኣሲ ኢ ጾ̈ሳ̇ ቃ̈ሊን ታማ̈ርሳዚን ቆፓ̇ር ታ̈ማ̈ርሶጋ̈ቤ፤ ኦ̈ ማ̈ዲዛ̈ዳሬ ጾ̈ሲ ኢቦ ኢሚ̇ኖ ዎልቃባር ኦ̈ጋ̈ቤ፤ ዪዚ ዪኒ̇ባራ ጾ̈ሳ̇̇̈ዲ ዬሱ̈ስ ክርስቶ̈ሳ ጎይባራ ባዝ ዎይባራ ጋላቲንቲ̈̇ሬ፤ ቦንችኬ ዎልቃኬ ሜናብ ኢ̈ብ ማ̈ቆ̇! ኣሚንኤ።

¹²ቴ ላጋ̇ን! ታማፌ̈ኖ ጴች ሜታ ዪንታ̇ ዬሌ̇ጌይን ኦራ̈ ባዝፌ̈ን ማሃሪ ጋራ̇ሚንታፒ̇ቴ።

¹³ዎቲናካ̈ር ክርስቶ̈ሳ ቦ̈ንቺ̈ን ቤንታ̇ዝ ጋላስ̇ ዪንቲ̇ ዎይሊን ኡፋይታምፔ̈ኒ ክርስቶ̈ሳ ኤኪ̇ኖ ሜቲን ኤኪ̇ኖኮታ̇ቦ ኡፋይቲ̇ብቴ̇።

¹⁴ዪንቲ ክር̇ስቶ̈ሳ ሱምንኮታ̇ቦ ቆ̈ሲንቴጌይንዶ ቦንች ኣያ̇ና ዪ̈ዳሬ ጾ̈ሳ̇̇ ኣያ̇ና̈ዲ ዪንታ̇ ጋልዳ ሼምፒ̇ዛኮታቦ ኡፋይቲ̇ብቴ።

¹⁵ዪንታ ጊዳ̇ ኦ̈ናካር ማ̈ቂ̇ን ሼምፓ ዎሪ፣ ዉ̈ቃ̇ሪ፣ ኢ̈ታ ባዝ ኦ̈ሪ ማ ኢያ ጌልሲባ̈ሶ ባዝ ጋርታ̇ ጌላሪ ሜታ ኤኪ̇ዝ ኣስ ማ̈ቃፖ̇ጋ̈ቤ።

¹⁶ኢ ክርስቶ̈ሳ ኣማ̇ኒኖኮታ̇ቦ ሜ̈ታ ኢያ ዬሊ̇ኖ ኣሲ ዎኮ ዪ ና̈ሳ ክርስቶ̈ሳ ሱ̈ምን ቶ̈ኪ̇ኖ ኣስ ማ̈ቂ̇ኖኮታ̇ቦ ጾ̈ሳ̇ ጋ̈ላቶጋ̈ቤዶኬ ዬ̈ልቃፖ̇።

¹⁷ፊርዳ ዬይዝ ቃሚ̇ ኡኪ̇ኔ፤ ዓና ፊርዲን ጾ̈ሳ̇ ኣማ̇ኒዝ ኣሳን ጋልዳ ቲ̈ኒታር ዣማ̇ራ̈ሬ። ዪዚ ፊርዲን ዣማ̇ራዚንዳ ኑ ጋልዳኮ ጾ̈ሳ̇̇ ዎጛላብ ኪ̈ቲንቲ̇ባ̈ሶ ኣሳን ዉርሲንዳ ኣ ማ̈ቃ̇ርዶኔ?

¹⁸ጌ̈ሻ ማጻ̈ፋ ጋልዳ፦ “ጺላ̇ ኣሲ ሜታባር ፋጺ̈ርኮ ጾ̈ሳ̇̇̈ቦ ጎሽቲባ̈ሶ ናጋራንቺ̇ ኢንታ̇ ባዚን ኣ ማ̈ቃ̇̈ንዶኔ?” ጌይሬ።

¹⁹ዪ̈ኮታ̇ቦ ጾ̈ሳ̇ ቆፊንዲፌ̈ኒ ሜታ ኤኪ̇ዝ ኣሳን ፌ ኣሲቲን ዎይ ኣማ̇ኒንቲ̇ኖ ዎይ ኮቺ̇ኖ ጾ̈ሳ̇̇̈ቦ ዓዳራ ኢማ̇ሪ ኮሽ ባዝ ኦ̈ዚን ኣሻ̇ፖጋ̈ቤ።