Read basketo 2 ጴጥ 1 Bible Online

2 ጴጥ 1 - basketo bible

2 ጴጥ 1

¹ኑ ጾ̈ሳ̇ፔኬ ኑ̈ና ፋዛ ዬሱ̈ስ ክርስቶ̈ሳ ጋልዳፖ ቤንቲ̇ዝ ጺሊ̇ቲ ጎይባራ ኑ̈ኮንዲፌ̈ኒ ቦንቺ̇ንቲኖ ኣማ̇ና ዲጚኖንቦ፥ ዬሱ̈ስ ክርስቶ̈ሳቦ ኣይላኬ ሃዋ̈ራኬ ማ̈ቂ̇ኖ ቴ ሲሞ̈ን ጴ̈ጥሮ̈ሲ ዓና̇ ዪንታ̇ብ ጻ̈ፊኔ።

²ዪንቲ̇ ጾ̈ሳ̇̈̇ዳኬ ኑ ጎዳ ዬሱ̈ሳ ኤሪዝ ኤሪባራ ካንኬ ሳሪቲ ዪንታ̇ቦ ዎይሎጋ̈ቤ።

³ፌ ቦንችባርኬ ፌ ኮሺ̇ቲንባራ ኑ̈ና ጼይጊኖ ጾ̈ሳ̇̇ ኢያ ኑ ኤሪኖኮታ̇ቦ ኢ ጾ̈ሲቲ ዎልቂንዳ ሼምፓ ዲጛንዳብኬ ጾ̈ሳ̇ቦ ጎሽታ̇ንዳብ ኮሺ̇ዝ ባዛን ዎይ ኑ̈ብ ኢሚ̇ኔ።

⁴ኑ̈ኒ ኢ ቦንቺ̇ንባርኬ ኢ ኣሽኪቲንባራ ዎይሊን ጴችኬ ቦንቺንቲ̇ኖ ታስፋ ዲጚኔ፤ ዪኒ ጎይባራ ዪንቲ̇ ኢ̈ታ ኢናንኮታ̇ ጾ̈ሲ ዓኒ̇ ኣላሚን ጋልዳ ኤሄይዝ ጎይሊን ጋልዳፖ ቡ̈ታ̇ሪ ጾ̈ሳ̇ ጾ̈ሲቲን ጋልዳፖ ኤኪ̇ዝ ኣስ ማ̈ቂ̇ኔ።

⁵ዪኒ̇ኮታ̇ቦ ዪንታ̇ ኣማ̇ኒን ጋልዳ ኮሺ̇ቲ፣ ኮሽቲ̇ን ጋ̈ልዳ ኤራ፣

⁶ኤሪን ጋልዳ ፌ̈ና ኢ̈ታ ባዝ ጋልዳፖ ና̈ጊ፣ ማ ኢዝ ጋልዳ ዳ̈ንዳኣ፣ ዳንዳኢን ጋ̈ልዳ ጾ̈ሳ̇̇̈ቦ ጎሽቲ፣

⁷ጾ̈ሳ̇̇̈ቦ ጎሽታዚን ጋልዳ ዎልዎልኣ ካንቲ፣ ዎልዎልኣ ካንታ̇ዚን ጋልዳ ኣስ ዎይ ካ ጉጂ̇ብቴ̇።

⁸ዪን ባዛን ዪንታ̇ቦ ዎይሊን ዎኮ ዪንቲ ኑ ጎዳ ዬሱ̈ስ ክርስቶ̈ሳ ኤራምፔ̈ኒ ኣ̈ፍ ካጺ̇ባ̈ሶ ኣስ ማ̈ቃካ̇ዮ̈ድፌ̈ኒ ዪንታ̇ ና̈ጊ̈ሬ።

⁹ባዝ ዪን ኢ̈ንታ̇ብ ባዮ̇ ኣሳን ጎት ዎባዝ ቤቃ̇ንዳብ ዳንዳኢባ̈ሶ ኣ̈ፊ ዎቤ̇። ሚን ኢ ጋልዳ ዎ ናጋራን ጋርታፖ̇ ጌ̈ዥጊኖንዳር ቦቲጚኔ።

¹⁰ዪ̈ኮታ̇ቦ ቴ ኢሺንታ̇ንሶ! ዪንቲ̇ ጼይጊንቲ̇ኖንዴኬ ማራጺንቲ̇ኖን ሚ̈ንንዳቦ ቲ̈ኖንፖ ሺ ሚ̈ጚብቴ̇፤ ዪንቲ̇ ዪኖ̇ ዎቴጌይንዶ ዉ̈ርሲ ዪንታ̇ ኣማ̇ኒን ጋልዳፖ ኬዲ̇ባ̈ሴ።

¹¹ዪኒ̇ ጎይባራ ሜናብ ዶኣዝ ኑ ጎዳ̈ዲኬ ኑ ጋ̈ላ̇ ዬሱ̈ስ ክርስ̇ቶ̈ሳ ካ̈ቲቲን ጋርታ ጌላንዳቦ ኩም ሲልጣ̈ና ዪንታ̇ብ ኢሚንቲ̇̈ሬ።

¹²ዪን ባዛን ዪንቲ ኤራሪ ዪንቲ̇ ኤ̈ኖ ኪንንባር ሚ̈ጛር ዶኢኖ ማ̈ቂ̇ናካሬ ታ̈ኒ ዪን ባዛን ዪንታ̇ ቆፊሳዚን ኣሻ̇ባሴ።

¹³ታ̈ኒ ሼ̈ምፓ̇ባር ዎ ኬሊ̇ንባር ዎይ ዎይ ጋ̈ላስ ዪንታ̇ ባርኪ̇ዚንዳ ኮሽ ማይጻር ታ̈ብ ቤንታ̇̈ሬ።

¹⁴ኑ ጎዳ ዬሱ̈ስ ክርስቶ̈ሲ ታ̈ና ቤይሲኖንዲፌ̈ኒ ቴ ጋ̇ምኣካ̇ይ ዓይቃ̇ዚን ኤራ̈ሬ።

¹⁵ቴ ዓት ዋ̈ያዚንዳ ዓይቃባር ቴ ዪንታ̇ ጋልዳፖ ፋጊንቲ̇ናሬ ዪንቲ̇ ዪን ባዛን ዎይ ጋላስ ቆፓ̇ምፔ̈ኔ።

¹⁶ኑ̈ኒ ኑ ጎዳ ዬሱ̈ስ ክርስቶ̈ሳ ዎልቂ̇ንዲኬ ኢ ዬ̈ዚን ዪንታ̇ብ ሶ̈ሊኖንዳ ኢ ቦንቺ̇ንዶ ኑ ኣ̈ፊንባር ቤቃ̇ርዶኬ ኣሲ ኬሲ̇ኖ ቶሳ ሲስካ̇ር ጊዳካ̇ዬ።

¹⁷ኣፋፖ “ቴ ኢባር ኡፋይቲዛ ቴ ካዝ ናኣ ዓ̈ዳ!” ጌይዝ ጊርሲ ኢ̈ብ ዬይኖምባራ ኢ ጾ̈ሳ̇ ባ̈ባ̈ ጋልዳፖ ቦንችኬ ጴቺቲ ዲጚኔ።

¹⁸ኑ̈ኒ ኢባራ ኣንጂንቲ̇ኖ ኢንዲ̇ን ጋ̈ልዳ ዎንባራ ዪና̇ ኣፋፖ̇ ዬይኖ ጊርሲን ኑ ኑ ቆሚ̇ን ሲስኪ̇ኔ።

¹⁹ባዝ ዪን ዎይ ናባን ኑ̈ብ ሶ̈ሊኖ ባዛን ኪን ማ̈ቂ̇ኖን ኤርሲ̈ሬ፤ ዪ̈ኮታ̇ቦ ዪንቲ̇ ም ቤስ̇ ጋርታ ጋዲ̇ኖ ፎኢንን ያካ̇ዮ̈ዲፌ̈ን ና̈ጋዚንዲፌ̈ኒ ናባን ሶ̈ሊኖ ባዚን ዪና̇ ኢዝፌ̈ኒ ኮሺንቻክ ና̈ጊብቴ̇፤ ዪንቲ̇ ዪኖ̇ ዎታዚንዳ ጋማ ዳርኢዝ ዲራስኬ ሳ̈ዚ ዎንታ̇ንዳቦ ዎታዚምባራ ቤ̈ንታ̇ዝ ቤ̈ርሲ̇ን ዪንታ̇ ቡ̈ዲን ጋርታ ቤንቲ̇ዝ ዲራሴ።

²⁰ዪንቲ ባዝ ዎይፖ ቲ̈ን ቆፓ̇ንዳብ ኮሻ̇ዚንዳ ጌ̈ሻ̇ ማጻ̈ፋ ጋልዳ ጻ̈ፊንቲ̇ኖ ካ̈ያን ዎይ ኦ̈ናካር ፌ̈ብ ማይጺኖንዲፌ̈ን ቢላ̇ንዳብ ዳንዳኢባ̈ሶንዶ።

²¹ኣባ ጌይን ካ̈ያ ጌይዛ ዎይ ኣሳ ቆፊባር ዬ̈ካ̇ዬ፤ ዎቲናካሬ ኣሳን ጌ̈ሻ̇ ኣያ̇ና ኢንታ̇ ቲ̈ኒን ጾ̈ሳ̇̇ ጋልዳፖ ኤካ̇ር ሶ̈ሊኖ ባዜ።