Read basketo 2 ጴጥ 3 Bible Online

2 ጴጥ 3 - basketo bible

2 ጴጥ 3

¹ታ ላጋ̇ንሶ! ታ ዓና̇ ዪንታ̇ብ ጻ̈ፋዚንዳ ናምኢ ኪ̈ቲንዶ፤ ዪን ናምኢ ኪ̈ታን ዪንታ̇ብ ጻ̈ፊኖንዳ፥ ዪንታ̇ቦ ኮሽ ቆፊ ዶኣምፔ̈ኒ ቲ̈ኒታር ባርኪንዳቦ።

²ዓኒ̇ፖ ቲ̈ን ጌ̈ሻ̇ ናባን ሶ̈ሊኖ ቃ̈ሊንዲኬ ማ ዪንታ̇ ሃዋ̈ራታን ጎይባራ ዲጚኖ ኑ ጎዳ ኑ̈ና ፋዛ ኪ̈ቲን ቆፓ̇ምፔ̈ኒ ቴ ኮያ̈ሬ።

³ዎይ ባዛፖ ቲ̈ን ዪንቲ ዪኖ̇ ቆፒ̇ብቴ፤ ዉርሲ ላይን ጋርታ̇ ዪንታ̇ ጋልዳ ቃልዳ ቃልዲዝ ኣሳንኬ ኢንታ̇ ኢ̈ታ ኢኒ̇ን ጋ̈ዚን ኦ̈ሙታ ዬዝ ኣሳን ዬይሬ።

⁴ዪን ኣሳን “ጎዳ ዬሱ̈ሲ ዬይኔ ጋ̈ካ? ዓት ዎይዳ? ቲ̇ኖ ባቢንታ̇ን ዓይቂ̇ኖፖ ኤ̈ሪ ዎይ ባዚ ሚን ጾ̈ሲ̇ ኮቺ̇ኖንዲፌ̈ን ዎ” ጌይሬ።

⁵ኣፎ ሳ̈ዚን ሚን ጾ̈ሳ̇ ቃ̈ላባር ኮቺንቲ̇ኖንዲኬ፥ ሳ̈ዶ̇ ሳ̈ዚንዳር ኮቺንቲ̇ኖንዳ ዋ̈ ጋርታ̇ፓኬ ዋ̈ባራ ማ̈ቂ̇ኖን ኤሪ̈ርዶሪ ካ̈ዲ̈ሬ።

⁶ሚን ዎ ኣላሚንዳ ዋ̈ባር ቆ̈ንታ̇ር ዪኔ።

⁷ዪና̇ ቃ̈ሊን ኢዝባራ ዓት ዎ ኣፎ ሳ̈ዛንኬ ሳ̈ዶ̇ ሳ̈ዚንዳ፥ ጾ̈ሳ̇̇ ጎሽቲባ̈ሶ ኣሳን ያዝ ፊርዳ ቃሚ̇ን ዬሊ̇ዚ ዲራስ ታማባር ሚጫ̇ንዳቦ ና̈ጊንታ̇ር ዎ።

⁸ታ ላጋ̇ን! ጎዳ ቲ̈ን ፔቲ̇ ቃሚ̇ ሙኩላ ላይፌ̈ኒ፥ ሙኩላ ላይ ፔቲ̇ ቃምፔ̈ን ማ̈ቂ̇ኖን ዪኖ̇ ቦቲጛፒ̇ቴ።

⁹ፔቲ̇ ፔቲ̇ ኣሳን ቆፓ̇ዚንዲፌ̈ኒ ጎዳ ሶ̈ሊኖ ታስፋ ቃ̈ሊን ፎታንዳቦ ጋምኢባ̈ሴ፤ ዎቲናካር ኣሲ ዎይ ማ̈ሪቲባር ማ̈ቃ̇ምፔ̈ንኬ ኦ̈ናካር ያካ̇ይፌ̈ኒ ኮያሪ ዪንታ̇ኮታ̇ቦ ጋርዢኔ።

¹⁰ጎዳ ዬንቲ̇ንዳ ሶ̈ላፌ̈ኒ ኣሲ ቆፓካይዶ̈ን ዬ̈ሬ፤ ዪና̇ ጋላሲ̇ን ኣፎ ሳ̈ዚንዳ ጴች ጊርስባር ያ̈ሬ፤ ኢዝ ጋርታ̇ ዎ ባዚ ዎይ ታማባር ሚጫ̇ር ዪ̈ሬ። ሳ̈ዶ ሳ̈ዚንዲኬ ኢዝ ጋልዳ ዎ ባዝ ዎይ ሚጪ̇̈ሬ።

¹¹ዪዚ ዪን ዎይ ዪ̈ፌ̈ን ዪ̈ርኮ ዪንቲ̇ ጌ̈ሺ̇ቲባርኬ ጾ̈ሳ̇̇̈ቦ ኢ̈ጪ̇ሙታ ዶኣንዳቦ ኮሺ̇ባ̈ሳ?

¹²ዪዚ ዪንቲ̇ ጾ̈ሳ̇ ቃሚ̇ን ዬንቲ̇ን ሹ̈ናባር ና̈ጊዛንኬ ኤሊ̇ ዬ̈ምፔ̈ኒ ኦ̈ዝ ኣስ ማ̈ቂ̇ብቴ፤ ዪና̇ ቃሚ̇ን ጋላስ ኣፎ ሳ̈ዚን ታማባር ሚጫ̇ር ያ̈ሬ፤ ኢዝ ጋርታ̇ ዎባዚ ዎይ ታማ ሶ̈ላባር ቴልጊ ዪ̈ሬ።

¹³ዎቲናካር ጾ̈ሲ ኑ̈ብ ኢሚ̇ኖ ታስፊንዲፌ̈ኒ ጺሊ̇ቲ ኢዝ ጋርታ ዶኢዝ ኦራስ ኣፎ ሳ̈ዝኬ ሳ̈ዶ̇ ሳ̈ዝ ኑ ና̈ጊ̈ሬ።

¹⁴ዪ̈ኮታ̇ቦ ታ ላጋ̇ን! ዪና̇ ዎይ ማ̈ቃ̇ዝ ቃሚ̇ን ዪንቲ̇ ናጋ ጋልዳ ዎኮ፥ ዪንቲ ኢ̈ታ ባዝኬ ማዛ ባዝ ዪንታ̇ ጋልዳ ባይዶን ኢባር ኮሽ ዎዶን ዪንታ̇ ዲጛምፔ̈ኒ ሚ̈ጛር ዶኢብቴ።

¹⁵ጎዳ ዬ̈ካ̇ይ ጋምኢኖንዳ ኣሲ ፋጻምፔ̈ኒ ማ̈ቂ̇ኖን ኤሪብቴ፤ ካንቲ̇ኖ ኑ ኢሻ ጳውሎ̈ሲ ኢ̈ቦ ኢሚንቲ̇ኖ ኤሪንዲፌ̈ኒ ዪንታ̇ብ ጻ̈ፊኖንዳ ዓኖ̇።

¹⁶ኢ ፌ ጻ̈ፊኖ ኪ̈ታን ጋልዳ ዓን ባዛን ጻ̈ፊኔ። ኢ ኪ̈ታን ፔታ̇ን ፔታ̇ናን ጋርታ ኣሳብ ኤሊ̇ ጌሊባ̈ሶ ባዚ ዎ። ኤሪ ጉ̈ጺኖንኬ ጌዳክ ዓኒክ ጌይዝ ኣሳን ሜላ ጌ̈ሻ ማጻ̈ፋን ዎቢ̇ሳዚንዲፌ̈ኒ ዓን ኢ̈ኮንር ዎቢ̇ሲ̈ሬ፤ ኢንቲ̇ ዓኖ̇ ዎታዚንዳ ዪቦ።

¹⁷ዪ̈ኮታ̇ቦ ታ ላጋ̇ን! ዪኖ̇ ዪንቲ̇ ቲ̈ኒታሪ ኤሪኖኮታ̇ቦ ውጫ ኣሳን ዪንታ̇ ባሊንዳብ ኮያዚምባራ ዪንቲ̇ ሚ̈ጛር ኤቂ̇ኖን ጋልዳፖ ኬዳካ̇ዮ̈ዲፌ̈ኒ ና̈ጊንቲ̇ብቴ።

¹⁸ዪኒ̇ፓ ኑ ጎዳ ኑ̈ና ፋዛ ዬሱ̈ስ ክርስቶ̈ሳ ኮሺ̇ቲንዲኬ ኢያ ኤሪሙታ ዪንባር ዲጪ̇ብቴ፤ ኢ̈ቦ ዓታ̇ር ማ̈ቂ̇ን ሜናብ ቦንች ማ̈ቆ̇! ኣሚንኤ።