Read basketo 3 ዋ̈ኒ̇ 1 Bible Online

3 ዋ̈ኒ̇ 1 - basketo bible

3 ዋ̈ኒ̇ 1

¹ቴ ኪንባራ ካዲዛ፥ ካንቲ̇ኖ ጋ̈ዮ̈ሳቦ ቴ ዶምዛ ሚሺኖ ኪ̈ታ፦

²ቴ ላጋ̇̈ዶ! ኔ ዶኢን ኔ̈ብ ጌ̈ዛምፔ̈ኒ፥ ኔ ጋሊ̇ንባር ኔ ኮሽ ዶኣምፔ̈ኒ ቴ ኔ̈ብ ዎ̈ሳ̇̈ሬ።

³ኔ̈ኒ ኪንንቦ ኣማ̇ኒንቲ̇ኖ ኣስ ማ̈ቂ̇ኖንዲኬ ኪን ጎይ ዬሙታ ዎን ፔቲ̇ ፔቲ̇ ኣማ̇ኒኖ ኣሳን ዬ̈ር ታ̈ብ ሶ̈ሊን ታ̈ና ዎይሊን ኡፋይሲ̇ኔ።

⁴ቴ ናኣን ኪን ጎይ ዬሙታ̇ ዎን ሲስካ̇ዚምፖ ሺ ሜላ ታ̈ና ኡፋይሲ̇ዝ ባዚ ባዬ̇።

⁵ቴ ላጋ̇̈ዶ! ኢንቲ̇ ኔ ኢንታ ኤራባሶ ዛቃ̇ ማ̈ቂ̇ናካሬ ኣማ̇ኒኖ ኣሳንቦ ኣማ̇ኒንቲ̇ኖ ኮሽ ኦ̈ሳ ኔ ኢንታ̇ብ ኦ̈ሬ።

⁶ኢንታ̇ሬ ኔ̈ኒ ኢንታ̇ብ ካንባራ ኦ̈ኖ ኮሽ ኦ̈ሲንዶ ኢንቲ ጾ̈ሳ̇ ዎርዣ ቲ̈ን ኔ ባዝ ማርኪቲኔ፤ ዓታ̈ር ኔ̈ኒ ጾ̈ሳ̇ ኡፋይሲ̇ዝ ጎይባራ ኢንቲ ሉካ̇ዝ ጎይምቦ ኮሺ̇ዝ ባዝባራ ኢንታ ማ̈ዳር̇ኮ ኮሼ̇።

⁷ኢንቲ ክርስቶ̈ሳቦ ኦ̈ንዳብ ኬስኪ̈ርዶሪ ኣይሁድ ባዮ̇ ኣሳን ጋልዳፖ ኣባካር ኤካካ̇ይዶር ሜላ̇ ኬስኪ̇ኔ።

⁸ዪዚ ኑ̈ኒ ኪን ኦ̈ሲን ኢንታ̇ባር ዎልኣ ኦ̈ንዳቦ ዪንፌ̈ኖ ኣሳ̈ን ሞኪ̇ ኤካ̇ንዳብ ኮሺ̇̈ሬ።

⁹ታ̈ኒ ዎ̈ሳ ኬ̈ንቦ ዳ̈ብዳ̈ቢ ጻ̈ፋዴ፤ ዎቲናካር ኢንታብ ኣላቃ ማ̈ቃ̇ንዳብ ኮዪዛ ዳ̈ትራ̈ፊሲ ኑ ጋ̈ዚን ሲስካ̇ብዳ ጌይዴ።

¹⁰ዪኒ̇ኮታ̇ቦ ቴ ዪንታ̇ክ ሉኬ̇ጌይን ኢ ኑ̈ና ቆ̈ ኢ̈ታ ባዝ ኑ ጋልዳ ሶ̈ሊኖንዶ ቴ ዎይንቦ ሶ̈ላንዳ፤ ኑ̈ና ቆ̈ኖን ኢብ ጉ̈ጻካ̇ይዶን ኢ ፌ ቆማ̇ቦ ኣማ̇ኒኖ ኣሳን ሞኪ̇ ኤኪ̇ባ̈ሴ፤ ሞኪ̇ ኤካ̇ንዳብ ኮዪዛን ካዪ̈ሬ፤ ሞኪ̇ ኤኪ̇ኖን ዎ̈ሳ ኬ̈ፖ ኢንታ ዳኪ ኬሲ̇̈ሬ።

¹¹ቴ ላጋ̇̈ዶ! ኮሽ ኦ̈ዛን ማይጻብዶኬ ኢ̈ት ኦ̈ዛን ማይጻፔ̇። ኮሽ ኦ̈ዛን ጾ̈ሳ̇ ኣሴ፤ ኢ̈ት ኦ̈ዝ ኣሲ ጾ̈ሳ̇ ቤቃካ̇ዬ።

¹²ዲማ̈ጥሮ̈ሳቦ ኣስ ዎይ ኮሽ ማርኪቲ̈ሬ፤ ኪንንዳ ኢዛ ፌ̈ቦ ኢ̈ብ ማርኪታ̈ሬ፤ ኑና̈ር ኢብ ማ̈ርኪቲ̈ሬ፤ ኑ ማርኪታዝ ማርኪቲንዳ ኪን ማ̈ቂ̇ኖን ዪንቲ ኤሪ̈ሬ።

¹³ቴ ኔ̈ብ ጻ̈ፊዝ ባዚ ዎይሊን ዎዶኒ ዳብዳ̈ቢባር ጻ̈ፋንዳብ ኮያባሴ።

¹⁴ቴ ዓት ኡክባር ኔ̈ና ዬላ̇ር ቤቃ̇ንዳብ ታስፋ ጋዲ̇ኔ፤ ዪኒባራ ኖናባር ቴ ኔ̈ብ ሶ̈ላንዳ።

¹⁵ዪዚ ሳራ ዶኣቤ፤ ዓይዲ ዎ ኣማ̇ኒኖ ኣሳን ኔ̈ና ሳሮ ጌ̈ይኔ፤ ማ ኔ̈ናሬ ሴክ̇ ዎ ኣማ̇ኒኖ ኣሳን ፔታ̇ን ኣሻካ̇ይ ዎይን ሳሮ ጋ̈ቤ።