Read basketo ሳጻ 1 Bible Online

ሳጻ 1 - basketo bible

ሳጻ 1

¹ዓና̇ ሳጺንዳ ኡክ̇ ኬል̇ባር ማ̈ቃ̇ዝ ባዚን ፌ ኣሽካራንቦ ቤይሳምፔ̈ን ጾ̈ሳ̇̇̈ዲ ዬ̈ሱ̈ስ ክርስቶ̈ሳብ ኢሚ̇ኔ፤ ዬ̈ሱ̈ስ ክርስቶ̈ሳሬ ፌ ኪ̈ታንቻ ሚሻሪ ፌ ኣሽካራ ዋ̈ኒ̇ሳብ ዓና̇ ሳጺን ቤይሲዴ።

²ዋ̈ኒ̇ሳሬ ጾ̈ሳ̇̈ ቃ̈ሊን ጎይ፥ ዬ̈ሱ̈ስ ክርስቶ̈ሲ ቤይሲኖ ኪን ባዚን ጎይኬ ማ ፌ ቤቂ̇ኖ ባዛን ዎይ ማርኪቲዴ።

³ዪና̇ ዎይ ፎቲንታዝ ኬሊ̇ን ኡክ̇ ማ̈ቂ̇ኖኮታ̇ቦ ዓና̇ ቲንቢታ ቃ̈ሊን ናባ̇ቢዝ ኣሲ ኣንጂ̇ንቲኖ̈ዳ! ማ ዪና̇ ቃ̈ሊን ሲስካ̇ሪ ኢዝ ጋርታ ጻ̈ፊንቲ̇ኖን ኦ̈ሳ ጋልዳ ፌ̈ሺ̇ዛን ኣንጂ̇ንቲ̇ኖን።

⁴ቴ ዋ̈ኒሲ ኢ̈ሳ ጋዳ̇ ዎ ታብዛ ዎ̈ሳ ኬ̈ንቦ፦ ሚናር ዎ፤ ዓታ̇ር ዎ፤ ጊዳክ ዬይዛ ጾ̈ሳ̇ ጋልዳፖ፥ ማ ኢ ዙፋ̈ና ቲ̈ን ዎን ታብዛ ኣያ̇ናን[1] ጋልዳፖኬ ዓይቃ ጋርታፖ ዲንዳባር ቲ̈ን ኡስ̇ ማ̈ቂ̇ኖ፥ ሳ̈ዝ ጋልዶ ካ̈ቲንታን ዎይ ኣቂሲዛ፥ ኣማ̇ኒንቲ̇ኖ ማርካ ማ̈ቂኖ ዬሱ̈ስ ክርስቶ̈ሳ ካንንዲኬ ኢ ሳሪቲን ዪንታ̇ብ ማ̈ቆ̇ ጋ̈ሬ። ኑ̈ና ካኖ̈ቤኬ ፌ ሱ̈ንባራ ኑ ናጋሪን ጋልዳፖ ኑ̈ና ናጻ ኬሲ̇ኖ̈ንቦ፥

⁶ጾ̈ሳ̇ ኢ ባ̈ባ̈ቦ ኦ̈ምፔ̈ን ኑ̈ና ካ̈ቲንታ̇ኬ ቄ̈ሳክ ማሂኖ ዬ̈ሱ̈ስ ክርስቶ̈ሳብ ቦንችኬ ዎልቃኬ ሜናብ ኢ̈ብ ማ̈ቆ̇! ኣሚንኤ።

⁷ቤቂ̇ብቴ! ኢ ሻ̈ራባር ዬይሬ፤ ሜላ ኣቲ̇ን ኢያ ጫዲ̇ኖ ኣሳንሬ ኣታካ̇ይዶር ዎይ ኢያ ቤቂ̇̈ሬ፤ ሳ̈ዝጋልዶ ዎርዣ ዎይ ኢኮታ̇ቦ ዬ̈ኪ̇̈ሬ፤ ኣ ዪ ዎይ ማ̈ቂ̇̈ሬ! ኣሚንኤ።

⁸ሚናፖ ዎ፥ ዓታ̇ር ዎ፥ ጊዳክ ዬይዛ ዎይን ዳንዳ̇ኢዛ ጎዳ ጾ̈ሳ̇̈ዲ “ኣልፋሬ ኦሜ̈ጋር ታ̈ና[2]!” ጌይሬ።

⁹ዬሱ̈ሲ ጋርዢኖ ጋርዢን፥ ኢ ኤኪ̇ኖ ሜቲንዲኬ ኢ ካ̈ቲቲንዶ ዪንታ̇ባር ዎልኣ ኤኪ̇ዛ ቴ ዪንታ̇ ኢሻ ዋ̈ኒሲ ጾ̈ሳ̇̈ ቃ̈ሊን ጊሻ̇ብኬ ዬሱ̈ሳብ ማርኪቲኖኮታ̇ቦ ቃሺ ኣስፌ̈ን ማ̈ሳሪ ፊጥማ ጋ̈ዝ ዴሴቲን ጋልዳ ታ̈ና ኤ̈ጚን ቴ ኢና ዎዶን፤

¹⁰ፔቲ̇ ጋላስ ኢዝ ቃሚ̇ንዳ ጎዳ ቃም̇ዶን ታ̈ኒ ዪኒ ጋላሲ̇ን ጾ̈ሳ̇ ኣያ̇ናባር ኦ̈ሂንቲ̇ንዶን ጴች ሞይዛ ጊርስፌ̈ኖ ባዝ ጋስ ቴ ኡንካ ጎይ ሲስካ̇ዴ፤

¹¹ዪና̇ ጊርሲን ታ̈ኮ፤ “ኔ̈ኒ ቤቃ̇ዚንዶ ማጻ̈ፋ ጋልዳ ጻ̈ፋራ ኤፍሶ̈ና፣ ሴርሜኔሳ፣ ጴርጋሞ̈ና፣ ታጥሮ̈ና፣ ሴርዴ̈ሳ፣ ፊላ̈ዴልፋኬ ሎዶ̈ቃ ዪን ታብዛ ዎ̈ሳ ኬ̈ን ጋርታ ሚሻቤ” ጌይዴ።

¹²ዪኖ̇ ታ̈ብ ሶ̈ሊዛ ኢ ኦ̈ናኮ ኤራንዳቦ ጋስ ቢሪንታ̇ር ቤቃ̇ዴ፤ ቴ ቢሪንታ̇ምባራ ዎርቃባር ኮቺ̇ኖ ፎኢን ጋዲ̇ዝባዝ ታብዛ ቤቃ̇ዴ።

¹³ዪን ፎኢን ጋዲ̇ዝ ባዛን ጊዲ̇ን ጋርታ ኣሳ ናኣ ማይጺዛ ቤቃ̇ዴ፤ ኢ ፌ ቶሂን ዬልር ጳሪን ኣፊላ ማኢኔ፥ ፌ ቲሪምባራ ዎርቃባር ኮቺ̇ኖ ኣፊላ ቃቺ̇ኔ።

¹⁴ኢ ቆ̈ማ̈ዲኬ ኢ ቆ̈ማ̈ ጋልዶ ኢሲን ሻቻ̇ፌ̈ኒ ቦ̈ርሴ፤ ኢ ኣ̈ፋንሬ ታማ ላፌ̈ኔ።

¹⁵ቶሃንሬ ታማ ዬርጭ ጋርታ ጌላር ሶ̈ሊኖ ና̈ሳ ሲላ ማይጻ̈ሬ፤ ኢ ቆ̈̇̈ዳሬ ጴች ዋ̈ፌ̈ን ጊርቂ̇̈ሬ።

¹⁶ፌ ኩሺን ኡሻቺ̇ን ጋርታ ታብዛ ቤ̈ርስ ኤ̈ኔ፤ ናምኢ ጎይን ዎይ ሌ̈ፊንቲ̇ኖ ማሺ̇ ኢ ኖ̈ና ጋርታፖ̇ ኬስኪ̈ሬ፤ ማ ኢ ዴ̈ማ̈ዳሬ ጋላስ ኣዋኣፍፌ̈ን ፎኢ̈ሬ።

¹⁷ቴ ኢያ ቤቃ̇ራ ዓይቂ̇ኖ ኣስፌ̈ን ማ̈ቃ̇ራ ኢ ቶሂን ጻና ኬዳ̇ዴ፤ ኢያር ፌ ኡሻቻ̇ ኩሺን ታ ጋልዳ ጋዳ̇ሪ ታ̈ኮ ዪዝ ጌይዴ “ኢ̈ጫፔ፤ ቲ̈ኖ̈ዳሬ ጋሶ̈ዳሬ ታ̈ና፤

¹⁸ታ̈ኒ ሼምፓባር ዶኢዛ̈ዳ፤ ቴ ዚንቃንታ̇ ዓይቂ̇ንዶን፤ ዎቲናካሬ ዓ̈ዲሼ ዓት ሜናብ ሼምፓባር ዎ፤ ዓይቃ ጋልዳኬ ሲኦ̈ላ ጋልዳ ሲልጣ̇̈ና ታ̈ብ ዎ።

¹⁹ዪዚ ኔ ቤቂ̇ኖንዶ፤ ዓት ዎንዲኬ ቢርት ጋስ ዬ̈ዚን ጻ̈ፋቤ።

²⁰ቴ ኡሻቻ̇ ኩሺን ጋርታ ኔ ቤቂ̇ኖ ታብዛ ቤ̈ርሳንኬ ታብዛ ዎርቃ ጋልዳፖ ኮቺ̇ኖ ማቅራዛን ቢርሺቺንዳ ዓኖ̇፦ ታብዛ ቤ̈ርሳን ታብዛ ዎ̈ሳ ኬንቦ ኪ̈ታንቻን[3]፤ ፎኢን ጋዲ̇ዝ ታብዛ ኢቃን ታብዛ ዎ̈ሳ ኬ̈ን።