Read basketo ሳጻ 10 Bible Online

ሳጻ 10 - basketo bible

ሳጻ 10

¹ኢናፖ ሻ̈ራ ማኢኖ ሜላ ሚን ኪ̈ታንቻ ኣፋፖ̇ ሶ̈ባምባ̇ር ቴ ቤቃ̇ዴ፤ ፉዳ ኢ ቆማ̇ጋልዳ ዙ̈ላ ቢሪንቲ̇ኔ፤ ኢ ዴ̈ማ̈ባራ ኣዋ̈ኣፍፌ̈ኔ፤ ኢ ቶሃን ታማ ቱ̈ሳፌ̈ኔ።

²ዪ ኪ̈ታንቻ̇̈ዲ ፊርቂንቲ̇ኖ ጊላ̇ ማጻ̈ፋ ፌ ኩሽታ ኤ̈ኔ፤ ፌ ቶሂን ኡሻቺ̇̈ን ባሃ̈ራ ጋልዳ፤ ዓዲርሲ̇ን ሳ̈ዝ ጋልዳ ጋዳ̇ር ኤቂ̇ዴ፤

³ዲዝ ዞ̈ብፌ̈ኒ ጴችባር ዉይሲዴ፤ ኢ ዉይሳምባራ ታብዛ ዳዳን ፌ ጊርሲን ሲሲ̇ዴ።

⁴ታብዛ ዳዳን ፌ ጊርሲ̇ን ሲሲ̇ኖፖ ዓኒ ታ̈ኒ ቴ ሲስኪ̇ኖን ኤሊ̇ር ጻ̈ፋንዳብ ቆፓ̇ዴ፤ ዎቲናካሬ “ታብዛ ዳዳን ሶ̈ሊኖን ሚስጢራባር ኤ̈ብዶኬ ጻ̈ፋፔ̇” ዪዝ ጌይዝ ጊርስ ኣፋፖ ቴ ሲስካ̇ዴ።

⁵ኢናፖ ባሃራ ጋልዳኬ ሳ̈ዝ ጋልዳ ኤቂ̇ንዶን ቴ ቤቂ̇ኖ ኪ̈ታንቻ̇̈ዲ ፌ ኩሺን ኡሻቺ̇ን ፉዳ ኣፋ ሾክ̇ ዎታሪ

⁶ሜናብ ዶኢዛ፣ ኣፎ ሳ̈ዚንዶ፣ ሳ̈ዶ ሳ̈ዚንዲኬ ባሃ̈ራኬ ማ ኢንታ ጋርታ ዎ ባዛን ዎይ ኮቺ̇ኖ ጾ̈ሳ̇ ሱምባራ ጫ̈ቃ̇ሪ “ታብዚ ኪ̈ታንቻ̇̈ዲ ፌ ሞይዚን ፉጊ̇ዝ ጋላሳን ጾ̈ሲ ፌ ኣሽካራን ናባንቦ ኤሪሲኖንዲፌ̈ኒ ጾ̈ሳ̇ ሚስጢሪን ፎቲንታ̇̈ርዶኬ ዓኒ̇ፖ ጌዳ ጋምኢባ̈ሴ!” ጌይዴ።

⁸ዪኒ̇ፖ ዓኒ ታ ዓታር ኣፋፖ̇ ሲስኪ̇ኖ ቆ̈ዲ ዓታ̇ር ማ̈ቃ̇ር ታ̈ኮ “ባሃ̈ራ ጋልዳኬ ሳ̈ዝ ጋልዳ ኤቂ̇ኖ ኪ̈ታንቻ ኩሺን ጋርታ̇ ዎ ፊርቂንቲ̇ኖ ማጻ̈ፊን ሉካ̇ር ኤካ̇ቤ” ጋ̈ር ታ̈ብ ሶ̈ሊዴ።

⁹ታ̈ኒ ኪ̈ታንቻ̇̈ኮ ሉካ̇ራ “ጊላ̇ ማጻ̈ፊን ታ̈ብ ኢማ̇ቤ” ጋ̈ዴ፤ ኢያሬ ታ̈ኮ “ዓይሺ! ኤካ̇ራ ሞቤ፤ ኢዛ ኔ ጋርታ̇ ጫ̈ጛሬ፥ ኔ ኖ̈ኒ̇ታ ኤ̈ስፌ̈ን ቃ̈ጻ̈ሬ” ጌይዴ።

¹⁰ታ̈ናሬ ማጻ̈ፊን ኪ̈ታንቻ ኩሽታፖ̇ ኤካ̇ራ ሞ̈ዴ፤ ኢዛር ቴ ኖ̈ኒታ̇ ኤስፌ̈ን ቃ̈ጻዴ፤ ዎቲናካር ቴ ሙያ ቆ̈ኖፖ ዓኒ ቴ ጋርታ ቃጻ̇ዴ።

¹¹ዪኒፖ ዓኒ “ዱማ ዱማ ኣሳ ዜርባዝ፣ ዎይሊን ዎርዣንባዝ፣ ዱማ ዱማ ኖ̈ና ሶ̈ሊዝ ኣሳንባዝኬ ካ̈ቲንታንባዝ ኔ̈ኒ ዓታ̇ር ማሃር ካ̈ያ ካ̈ያንዳ̇ብ ኮሻ̇̈ሬ” ጋ̈ሪ ታ̈ብ ሶ̈ሊዴ።