Read basketo ሳጻ 11 Bible Online

ሳጻ 11 - basketo bible

ሳጻ 11

¹ዓኒ̇ፖ ዎሃ ኣባክ ዋንዳቦ ማ̈ቂ̇ዝ ሾምባቃ ማይጺዝ ጉፋ ፔታ̇ን ታ̈ብ ኢማ̇ሪ ታኮ “ዲንዳ̇ቤ፤ ጾ̈ሳ̇ ኬ̈ንዲኬ ካ̈ሻ̇ ቤሲ̇ን ዋቤ፤ ኢና ጎሽቲ̇ዝ ኣሳንር ፋይዳቤ፤

²ጾ̈ሳ̇̈ ኬ̈ን ቡጊዲምባር ዎ ሳ̈ዚን ኣሻ̇ቤ፤ ዪን ኣይሁድ ባዮ̇ ኣሳንቦ ኢሚ̇ንቲኖ ቤስ̇ ማ̈ቂ̇ኖኮታቦ ኢዞ ዋፔ፤ ኣይሁድ ባዮ̇ ኣሳን ጌ̈ሻ̈̇ ካታሚን ጋርታ ኦይዲ ታጶ ናምኢ ኣጋን ፌ ኮዪኖ̈ዲፌ̈ን ዬሬ።

³ታ ማርካን ናምኣን ኣዛ̇ና ኣፊላ ማኣሪ ፔቲ̇ ሙኩላኬ ናምኢ ጼ̈ታኬ ሌሂ ታጳ ቃም ካ̈ያ ሶ̈ላምፔ̈ን ቴ ኢንታ̇ብ ዎልቃ ኢማ̇ንዳ” ጌይዴ።

⁴ዪን ናምኢ ማርካን ሳ̈ዳ ጎዳ ቲ̈ን ኤቂ̇ዛን ናምኢ ዎይራ ሚንኬ ናምኢ ፎኢን ጋዲ̇ዝ ማቅራዛን፤

⁵ኦ̈ናካር ኢንታ ጋልዳ ኢ̈ታ ባዝ ኣባክ ዬልንዳብ ኮዬጌዪን ታማ ኢንታ ኖ̈ኒን ጋርታ̇ፖ ኬስካ̇ሪ ኢንታ ጻላ̈ታን ሚቺ̇̈ሬ፤ ኢንታ ይሳንዳብ ኮዪዝ ኣሲ ዎይ ዪኒ̇ፌ̈ን ዓይቂ̇̈ሬ።

⁶ኢንቲ ካ̈ያ ካ̈ዪዝ ቃማ̇ን ጊዳ̇ ኢሪ ኬዳካ̇ይፌ̈ን ኣፎ̈ ሳ̈ዚን ዪብጺ̇ዝ ሲልጣ̈ና ኢንታ̇ብ ዎ። ማ ዋ̈ን ሱ̈ ማሃንዳ̇ብኬ ኢንቲ̇ ኮዪኖንዲፌ̈ኒ ሳ̈ዝ ጋልዳ ዱማ ዱማ ጴች ኢ̈ታ ሜታ ዬልንዳቦ ኢንታ̇ብ ሲልጣ̈ና ዎ።

⁷ኢንቲ ፌ ማርኪቲን ዉርሲኖፖ̇ ዓኒ ቶ̈ራ ዎሳሊ ባዮ̇ ጴች ዶ̈ቺ̇ን ጋርታፖ̇ ኬስኪ̇ኖ ማ̈ታባዛ̈ዲ ኢንታ̇ባር ኦሊንታ̇ር ጋማሪ ኢንታ ዎ̈ሬ።

⁸ኢንታ ኣሂንዳሬ ምሳሊባር ሶዳ̇ማ ዎይ ጊብጻ ጌይንታ̇ ጼይጊንታ̇ዝ ጴቻ ካታሚን ጋርታ ኣሲ ሺቂዝ ቤሳ̇ ጋልዳ ቶጚንታ̇̈ሬ፤ ዪና̇ ካታሚንዳ ሚን ኢንታ ጎዳ ሶቲንቲ̇ኖ ካታሚንዶ̇።

⁹ዱማ ዱማ ኮቻንኬ፥ ዜርን፥ ዱማ ዱማ ኖ̈ና ሶ̈ሊዝ ኣሳንኬ ዎርዣን ዓይዚ̇ ቃምኬ ባጋ̇ክ ኢንታ ኣሂን ቤቂ̇̈ሬ፤ ኢንታ ኣሂን ዱ̈ኪንታካ̇ይፌኒ ካዪ̈ሬ።

¹⁰ዪን ናምኢ ናባን ሳ̈ዝ ጋልዶ ኣሳን ዋ̈ዪኖኮታቦ ሳ̈ዝ ጋልዳ ዶኢዝ ኣሳን ናባን ዓዪቂምባር ኡፋይቲ̇̈ሬ፤ ኢንቲ ዓይቂኖ ቃሚ̇ን ፌ̈ብ ባ̈ልፌ̈ን ማሃር ቦንቺ ኡፋይባር ዎልዎልኣ ኪልስ ኢሚ̇ ዎቲ̈ሬ።

¹¹ዎቲናካሬ ዓይዚ̇ ቃምኬ ባጊ̇ን ኣ̈ኖፖ ዓኒ ሼምፓ ኢሚ̇ዝ ካሳ ጾ̈ሳ̇ ቲ̈ናፖ̇ ዬ̈ሪ ኣሃን ጋርታ̇ ጌሊዴ፤ ኢንታ̇ር ዲንዳር ኤቂ̇ዴ፥ ኢንታ ቤቂ̇ኖ ኣሳንር ዎይሊን ኢ̈ጪ̇ዴ።

¹²ኢናፖ ዓኒ ዪን ናምኢ ናባን “ዓይ ፉዳ ኬስኪ̇ብቴ!” ጌይዛ ጴች ጊርስ ኣፋፖ ሲስኪ̇ዴ፤ ኢንታ ጻላ̈ታን ቤቃ̇ዚምባራ ኢንቲ̇ ሻ̈ራባር ፉዳ ኣፋ ኬስኪ̇ዴ።

¹³ዪና̇ ኢዝባራ ሳ̈ዚ ጴች ኤንኢዴ፤ ካታሚን ታጳ ኩሺን ጋርታፖ ፔቲ ኩሺን ዪርዳዴ፤ ዪና̇ ሳ̈ዚን ኤንኢ̇ኖንባራ ታብዛ ሙኩላ ኣሲ ዓይቂ̇ዴ፤ ዓይቃ ጋርታፖ ቡ̈ቲ̇ኖንሬ ዎይሊን ኢ̈ጪ̇ዴ፤ ኣፋ ዎ ጾ̈ሳ̇̇̈ ቦንቺ̇ዴ።

¹⁴ኢንታ ባዚ ኣዬ̇! ጌይኖን ናምኢን ኣ̈ዴ፤ ዓት ዓይዚ ኣዬ! ጋ̈ዚን ኤሊ̇ባር ዬ̈ሬ።

¹⁵ታብዚ ኪ̈ታንቻዲ ፌ ኤ̈ኖ ሞይዚን ፉጊ̇ዴ፤ ኣፋሬ “ኣላሚን ጋልዳ ካ̈ቲቲ ዎይ ጎዳ ኑ ጾ̈ሳ̇ዴይኬ ክርስቶ̈ሴይ ማ̈ቂ̇ኔ፤ ኢ ሜናብ ካዉቲ̈ሬ” ጌይዛ ጴች ጊርሳን ሲስኪንቲ̇ዴ።

¹⁶ጾ̈ሳ̇̈ ቲ̈ን ፌ ዙፋ̈ናን ጋልዳ ዶኢኖ ላምታም ኦይዲ ጪጛሻንሬ ፌ ዴ̈ሚንባራ ጉጲጛሪ ጾ̈ሳ̇̈ቦ ጎሽቲ̇ዴ፤

¹⁷ጎሽቲሙታ̇ዶ̈ሪ፥ “ሚናፓ̇ር ዎዲ፥ ዓታ̇ር ዎዲ፥ ዎይን ዳንዳኢዛ ጎዳ ጾ̈ሳ̇̈̇ዶ! ጴቻ̇ ሲልጣ̈ኒን ኔ ኤ̈ኖኮታ̇ብኬ፥ ካዉቲኖኮታቦ ኑ ኔ̈ና ጋላቲ̈ሬ።

¹⁸ዎርዣን ጎይሊዴ፤ ኔ ጎይላዝ ኬሊ̇ን ዬላ̇ዴ፤ ዓይቂ̇ኖ ኣሳንር ፊርዳ ኤካ̇ዝ ኬሊ̇ንዳር ዬላ̇ዴ፤ ኔ ኣሽካራን ናባንቤኬ፤ ጌ̈ሻ̇ ኣሳንቦ ማ ኔ ሱምን ቦንቺ̇ዛንቦ፥ ጊላ̇ንቤኬ ጴቻ̇ንቦ፥ ኢንታ ኦ̈ሲን ጋቲን ኔ ኢንታ̇ብ ኢማ̇ዝ ኬሊ̇ን ዬላ̇ዴ፥ ሳ̈ዚን ይሲኖን ኔ ኢንታ ይሳዝ ኬሊ̇ን ዬላ̇ዴ” ጌይዴ።

¹⁹ኣፋ ዎ ጾ̈ሳ̇̈ ኬ̈ዳር ፊርቂንቲ̇ዴ፤ ኢ̈ኮ ጫ̈ቃ ታ̈ቦቲንዳር ዪና̇ ጾ̈ሳ̇̈ ኬ̈ን ጋርታ̇ ቤንታ̇ዴ። ዳዳ ጊርቂዴ፤ ዜ̈ሊንር ዜ̈ሊጚዴ፤ ሳ̈ዛር ኤንኢዴ፤ ጴች ሻቻ̇ር ኬዲ̇ዴ።