Read basketo ሳጻ 12 Bible Online

ሳጻ 12 - basketo bible

ሳጻ 12

¹ዓኒ̇ፖ ዎሃ ጴች ጋራ̇ሚሲዝ ማላ̇ ኣፋ ቤንቲ̇ዴ፦ ኣዋ̈ፊን ኣፊላፌ̈ን ማኢኖ፥ ኣጋኒን ጋልዳ ፌ ቶህባር ዬኖ፥ ታጶ ናምኢ̇ ቤ̈ርሳን ኣኪሊላፌ̈ን ፌ ቆሚ̇ን ጋልዳ ጋዲ̇ኖ ፔቲ̇ ማጫ̇ዶ̈ራ ቤንታ̇ዴ።

²ኢዛሬ ዎዳዶን ዬሊዝ ኬሊ̇ ኢዝቦ ኡኪ̇ን ጋርስ ቂንታሙታ̇ ዉይሳ̈ሬ፤

³ማ ዪና̇ ኢዝፌ̈ን ሜላ ማላ̇ ኣፋ ቤንቲ̇ዴ፦ ታብዛ ቆም̇ኬ ታጳ ኡሺንቺ ዎ ዞቃ ጴች ዳዋ ቤንቲ̇ዴ፤ ኢ ፌ ቆማን ጋልዳ ታብዛ ዛዉዳ ጉጲኔ፤

⁴ፌ ጎልሲምባራ ቤርሳን ጋርታ̇ፖ ሲሲን ኣፋፖ ጎ̈ቻ̇ር ሳ̈ዳ̇ ቶጚዴ፤ ኣሲን ዬሌጌይን ኢዝ ናኣ ቆ̈ንዳብ ቆፓ̇ሪ ዳዋዲ ኣሲን ቲ̈ን ኣ̈ር ኤቂ̇ዴ።

⁵ኣሲንዳሬ ኣላማ ጋልዶ ዎርዣ ዎይዳ ፌ ሲልጣ̈ናባር ጋማር ኣቂሲዝ ኣቲናእ ዬላዴ፤ ኢዝ ናኣዲ ጾ̈ሳ̇̈ካኬ ጾ̈ሳ̇ ዙፋ̈ናኮ ፉዳ ኤኪንቲ̇ዴ።

⁶ኣሲንዳ̇ሬ ዎጻ̇ር ባራሃ ጋርታ̇ ሉካ̇ዴ፤ ኢና ፔቲ ሙኩላኬ ናምኢ ጼታኬ ሌሂ ታጳ ቃም ኮሺንቺ ሙሲ ና̈ጊ ቤቃ̇ምፔ̈ኖ ቤስ̇ ጾ̈ሲ ኢዝቦ ጊ̈ጊሲኔ።

⁷ኣፋ ኦሊ ዲንዲ̇ዴ፤ ሚካ̈ልኬ ኢ ጻና ዎ ኪ̈ታንቻ̇ን ዎልኣ ማ̈ቃ̇ሪ ዳዋ̈ባር ኦሊንቲዴ፤ ዳዋ̈ዳሬ ፌ ጻና ዎ ኪ̈ታንቻ̇ንባር ዎልኣ ማቃር ኢንታ̇ባር ኦሊንቲ̇ዴ።

⁸ዎቲናካሬ ዳዋዳኬ ኢ ኪታንቻ̇ን ጋሚንቲ̇ዴ፤ ዪኒፖ ዎሃ ዳዋባኬ ኢ ኪታንቻ̇ንቦ ኣፋ ዶኢዝ ቤሲ̇ ኢንታ̇ብ ዪዴ።

⁹ዳዋ ጴቻ̇̈ዲ ቶ̈ራ ሳ̈ዳ ቶጚንቲ̇ዴ፤ ኢያሬ ኣላሚን ዎይ ባሊዛ ዳብሎ̈ሳ ዎይ ሴ̈ጣና ጌይ ጼይጊንቲ̇ዛ ሚኖ ሾ̈ሻ̈̇ዳ፤ ኢ ቶ̈ራ ሳ̈ዳ ቶጚንቲ̇ዴ ማ ኢ ኪ̈ታንቻ̇̈ንሬ ኢባር ዎልኣ ቶጚንቲ̇ዴ።

¹⁰ዪኒፖ ዓኒ̇ ኣፋፖ̇ ፔቲ̇ ጴች ጊርሲ፤ “ዪዚ ጾ̈ሳ̇ ኣስ ፋዝ ኬሊ̇ን ዬሊ̇ኔ! ዪዚ ጾ̈ሳ̇ ፌ ካ̈ቲቲንዲክ ፌ ዎልቂንዲክ ቤይሲኔ! ዪዚ ሲልጣ̈ናሬ ኢ ክርስቶ̈ሳብ ማ̈ቂ̇̇̇ኖን ቤይሲኔ! ኑ ኢሺንታ̇ን ኑ ጾ̈ሳ̇̈ ቲ̈ን ጋላስኬ ቃም̇ኬ ሞ̈ቲዛ̈ዲ ቶጚንቲ̇ኔ፤

¹¹ኢንቲ ዶራ̈ ሱ̈ንባርኬ ፌ ሶ̈ሊኖ ማርኪቲ ቃ̈ሊንባራ ኢያ ጋሚኔ፤ ኢንቲ̇ ፌ ሼምፒ̇ምቦ ሚጪንታ̇ካይዶር ፌ̈ና ዓይቃብ ኣ̈ ኢሚ̇ኔ፤

¹²ዪ̈ኮታቦ ኣፎ ሳ̈ዚንዲኬ ኢዝ ጋርታ ዶኢዛን ዎይ ዪንታ̇ብ ኡፋይስ ማ̈ቆ̇ጋ̈ቤ! ጊላ̇ ቃሚ̇ ሙታ ኢ̈ብ ኣቲ̇ኖን ኤሪኖኮታ̇ቦ ሴ̈ጣኖ ዎይሊን ጎይልባራ ዪንታ̇ክ ሶ̈ቢኔ፤ ዪዚ ሳ̈ዚንዲኬ ባሃሪንዲኬ ዪንታ̇ ባዚ ኣዬ̇!” ጌይን ሲስካ̇ዴ።

¹³ዳዋ̈ዲ ሳ̈ዳ̇ ፌ ቶጚንቲ̇ኖን ቤቃ̇ሪ ኣቲናእ ዬሊኖ ማጪ̇ን ዳኪ̇ዴ፤

¹⁴ኣሲን ማጪ̇ንዳ ባራሃ ጋርታ ፌ̈ብ ጊ̈ጊንቲ̇ኖ ቤሲ̇ንኮ ፋራር ሉካ̇ምፔ̈ን ጴች ኣርጊን ካፓ̇ ማይጺዛ ናምኢ ካ̈ፓ̇ ኢዝቦ ኢሚ̇ንቲ̇ዴ፤ ዪና̇ሬ ኢዛ ዳዋ ቲ̈ናፖ ጎታ̇ራ ዓይዚ ላይኬ ባጋክ ሙያ ኡሽካ̇ ኮሽ ና̈ጊንታ̇ ዶኣምፔ̈ኔ።

¹⁵ኣሲን ዲኦ ኢዞ ሞምፔ̈ኒ ጋ̈ሪ ሾ̈ሻ̈̇ዲ ፌ ኖ̈ና ጋርታ̇ፖ ጴች ጎጊ̇ዝ ዋ ኢዝ ዎሂን ሚሺዴ።

¹⁶ዎቲናካሬ ሳ̈ዚንዳ ኣሲን ማ̈ዳ̇ዴ፤ ሳ̈ዚንዳ ፌ ኖ̈ኒን ዓካራ ዳዋ ሚሺኖ ዋ̈ን ኡሽካ̇ዴ።

¹⁷ዳዋ̈ዲ ኣሲን ጋልዳ ዛልቃ̈ሪ ኣቲ̇ኖ ኢዝ ዜርንባር ኦሊንታ̇ንዳብ ሉኪ̇ዴ፤ ኢንታ̇ሬ ጾ̈ሳ̇̈ ኪ̈ታን ናጊዛንኬ ዬ̈ሱ̈ሳ ባዚን ማርኪቲዛን።

¹⁸ዳዋ̈ዳር ባሃሪን ቡጊድ ሻ̈ማ ጋልዳ ኤቂ̇ዴ።