Read basketo ሳጻ 13 Bible Online

ሳጻ 13 - basketo bible

ሳጻ 13

¹ዪኒ̇ፖ ዓኒ ፔቲ̇ ማ̈ታ ባዚ ባሃራ ጋርታ̇ፖ ኬስካ̇ምባር ቴ ቤቃ̇ዴ፤ ኢ̈ቦ ታጳ ኡሺንችኬ ታብዛ ቆሚ̇ ዎ፤ ኢ ኡሺንቻን ጋልዳሬ ታጳ ዛዉዳ ዎ፤ ኢ ቆማን ዎይን ጋልዳሬ ጾ̈ሳ̇ ቆ̈ዝ ሱም ዎ።

²ቴ ቤቂ̇ኖ ማ̈ታ ባዛ̈ዲ ማ̈ሂ ማይጺ̈ሬ፤ ኢ ቶሃን ዲብ ጋዝ ማታ ባዚን ቶሃን ማይጻ̈ሬ፤ ኢ ኖ̈ናዳሬ ዞብ̇ ኖ̈ና ማይጺ̈ሬ። ዳዋ̈ዲ ፌ ዎልቂንዲኬ ፌ ዙፋ̈ኒንዶ ማ ጴች ሲልጣ̈ና ዪ ማ̈ታባዛ̈ቦ ኢሚ̇ዴ።

³ማ̈ታ ባዛ ቆማ̇ን ጋርታፖ ፔታ̇ናዲ ዎብ ዬ̈ልዝ ኪሲ ኢ ጋልዳ ዎ ማይጺ̈ርዶን ቤቃ̇ዴ፤ ዎቲናካሬ ዓይቃብ ዬልዛ ማይጻዝ ኪሲንዳ ፋጺኔ፤ ኣላማ ጋልዳ ዎ ኣሲ ዎይ ጋራ̇ሚንታሪ ዪ ማ̈ታባዛ ዎሂን ዬዴ።

⁴ዳዋ̈ዲ ዪ ማ̈ታባዛቦ ሲልጣ̈ና ኢሚ̇ኖኮታ̇ቦ ኣሲ ዎይ ዳዋ̈ቦ ጎሽቲ̇ዴ፤ “ዪ ማ̈ታባዛባር ዎልፌ̈ን ማ̈ቃ̇ንዳብ ዳንዳኢዛ ኦ̈ኖ? ኢባር ኦሊንታ̇ንዳብ ዳንዳኢዛ ኦኖ?” ጌዪሙታ ኢ̈ቦ ጎሽቲ̇ዴ።

⁵ኦቲራ ቃ̈ላኬ ቆ̈ሳ ሶ̈ሊ̇ዝ ኖ̈ና ዪ ማ̈ታባዛ̈ቦ ኢሚ̇ንቲ̇ዴ፤ ኦይዲ ታጶ ናምኢ ኣጋን ፌ ኮዪኖባዝ ኦ̈ምፔ̈ኒ ሲልጣ̈ና ኢ̈ብ ኢሚ̇ንቲ̇ዴ።

⁶ኢ ጾ̈ሳ̇ዳኬ ጾ̈ሳ̇̈ ሱምንዶ፣ ጾ̈ሳ̇ ዶኣዝ ቤሲንዲ̇ኬ ማ ኣፋ ዶኢዛን ቆ̈ሳ ኤ̈ዴ።

⁷ጌ̈ሽ̇ ኣሳን ኦሊንታ̇ሪ ጋማምፔ̈ን ዎልቃ ኢ̈ብ ኢሚ̇ንቲ̇ዴ፤ ኣሳ ኮቺ̇ኬ ኣሳ ዜር ዎይ፤ ዱማ ዱማ ኖ̈ና ሶ̈ሊዛንን ጋልዳኬ ዎርዣ ዎይ ጋልዳ ሲልጣ̈ና ኢ̈ብ ኢሚ̇ንቲ̇ዴ።

⁸ኣላሚን ኮቺንቲ̇ኖፖ ኤር ኢንታ ሱምን ሹኪንቲ̇ኖ ዶራ ሼምፓ ማጻ̈ፊን ጋልዳ ጻ̈ፊንታካ̇ዮን ኣላሚን ጋልዳ ዎ ኣሳን ዎይ ዪ ማ̈ታ ባዛ̈ቦ ጎሽቲ̇̈ሬ።

⁹ዋይ ዎ ኣሲ ዎኮ ዪኖ̇ ሲስኮጋ̈ቤ!

¹⁰ካ̈ቲንታ̇ንዳብ ዎ ኣሲ ካ̈ቲንቲ̇̈ሬ፤ ማሻ̇ባር ዓይቃ̇ንዳብ ዎ ኣሲ ማሻ̇ባር ዓይቂ̇̈ሬ ዪዚ ጌ̈ሽ̇ ኣሳንቦ ዪኒ̇ ኬሊምባ̇ራ ኣማ̇ናኬ ጋርዣክ ኮሺ̇̈ሬ።

¹¹ሜላ ማ̈ታ ባዚ ሳ̈ዳ̇ፖ ኬስካምባ̇ር ቴ ቤቃ̇ዴ፤ ዶሪፌን ናምኢ ኡሺንቺ ኢ̈ብ ዎ፤ ማ ሶ̈ላዚንዳ̇ ዳዋ̈ፌን ሶ̈ሊ̈ሬ።

¹²ዪ ማ̈ታ ባዛ̈ዲ ቲ̈ኖ ማ̈ታ ባዛ ሲልጣ̇̈ኒን ኤካ̇ሪ ኦ̈ሬ፤ ኢያሬ ሳ̈ዚንዲኬ ኢዝ ጋልዳ ዎን ዎይ ቲ̈ኖ ማ̈ታ ባዛ̈ቦ ጎሽታ̇ምፔ̈ን ዎቲዴ፤ ዪ ቲ̈ኖ ማ̈ታባዛ̈ዲ ዓይቃብ ዬልዝ ኪሲን ጋርታ̇ፖ ፋጺኖ̈ዳ።

¹³ዪ ናምኢ ማ̈ታ ባዛ̈ዲ ጴች ታ̈ሚ̇ራ̈ታ ኦ̈ዴ፤ ኣሲ ዎይ ቤቃ̇ምባራ ታማ ኣፋፖ ሶ̈ቢሲዴ።

¹⁴ቲ̈ኖ ማ̈ታ ባዛ ሱምባር ማላ̇ ባዛን ኦ̈ምፔ̈ን ሲልጣ̈ና ኢ̈ብ ኢሚ̇ንቲ̇ኖኮታ̇ቦ ሳ̈ዝ ጋልዳ ዎ ኣሳን ባሊዴ፤ ማሻ̇ባር ጫዲንታሪ ፋጺኖ ማ̈ታ ባዛ ቦንቻ̇ቦ ሚሲላ ኮቻ̇ምፔን ኢንታ ኪ̈ቲ̇ዴ።

¹⁵ናምኢ ማ̈ታ ባዛ̈ዲ ቲ̈ኖ ማ̈ታ ባዛ ሚሲሊምቦ ሼምፓ ኢማ̇ምፔ̈ን ሲልጣ̇̈ና ኢ̈ብ ኢሚ̇ንቲ̇ዴ፤ ሚሲላ̈ብ ሼምፓ ኢሚ̇ንቲ̇ኖ̈ዲ ሚሲላ̈ዲ ሶ̈ላንዳብ ዳንዳኣምፔ̈ንኬ ኢብ ጎሽቲ̇ባ̈ሶን ዎይ ዎምፔ̈ኔ።

¹⁶ናምኢ ማ̈ታ ባዛ̈ዲ ጊላ̇ንር ማ̈ቆ̇ ጴቻንር፤ ዱራንር ማ̈ቆ̇ ዎርባያንር፤ ኣይላ ጊዳካ̇ዮንር ማ̈ቆ ኣይላንር ዎይን ፌ ኡሻቻ ኩሽ ጋርታ̇ ዎይ ፌ ዴ̈ማ ጋልዳ ዎልቃባር ማላ̇ ኤካ̇ምፔ̈ኒ ዎቲዴ።

¹⁷ዪኒባራ ማ̈ታ ባዛ ሱ̈ምን ቤይሲዝ ማሊ̇ን ዎይ ኢ ሱ̈ምን ፋይዲን ኤካካ̇ዮ ኣሲ ኦ̈ናካር ጌዳ ዎጛንዳባር ማ̈ቆ̇ ዓኒ ዎጛር ኤካ̇ንዳቦ ዳንዳኢባ̈ሴ።

¹⁸ዪዚ ዓኒ̇ ጋልዳ ኤራ ኮሺ̇̈ሬ፤ ቆፓ̇ር ዳንዳኢዝ ኣሲ ማ̈ታ ባዛ ፋይዲን ፋይዲ ኤሮ ጋ̈ቤ። ዓና ፋይዲን ኢዛ ፔቲ ኣሳ ሱ̈ም፤ ፋይዲንዳ̇ሬ ሌሂ ጼታኬ ሌሂ ታጶ ሌሄ።