Read basketo ሳጻ 15 Bible Online

ሳጻ 15 - basketo bible

ሳጻ 15

¹ሜላ ጴችኬ ጋራ̇ሚሲዝ ማላ̇ ታ̈ኒ ኣፋ ቤቃ̇ዴ፤ ኢንታ̇ሬ ዉርሲ ማ̈ቂ̇ኖ ታብዛ ጎይላን ኤ̈ኖ ታብዛ ኪ̈ታንቻ̇̈ን። ዪን ዉርሲ ጌዪንቲ̇ኖንዳ ጾ̈ሳ̇ ጎይሊን ፎቲንታ̇ዚንዳ ዪንባር ማ̈ቂ̇ኖኮታ̇ቦ።

²ዪኒ̇ፖ ዓኒ ታማባር ቡሺንቲ̇ኖ ማስቶ̈ታ ባሃራ ማይጺዝ ባዝ ቴ ቤቃ̇ዴ፤ ማ ማ̈ታ ባዛ̈ዲኬ ኢ ሚሲሊንዶ ማ ኢ ሱ̈ምን ፋይዲን ማሊ̇ን ጋሚኖ ኣሳን ቴ ቤቃ̇ዴ፤ ጾ̈ሲ ኢንታ̇ብ ኢሚ̇ኖ ዚምቢን ኤ̈ሪ ማስቶ̈ታ ባሃ̈ሪን ላፍ ኤቂ̇ኔ።

³ጾ̈ሳ̇̈ ኣሽካራ ሙ̈ሳ ዬንዲኬ ዶራ̈ ማዝሙሪን ዬጺ̇̈ዴ። ኢንቲ̇ ዬጺ̇̈ርዶሪ፥ “ዎይን ዳንዳኢኖ ጎዳ ጾ̈ሳ̇̇̈ዶ! ኔ ኦ̈ሳ̈ዲ ጴችኬ ኣስ ጋራ̇ሚሲዝ ባዜ፤ ዎርዣን ካ̈ታዶ! ኔ ኦ̈ኖ ኦ̈ሲንዳ ጺላ̇ኬ ኪንኬ፤

⁴ጎዳ̈ዶ! ኔ̈ብ ኢ̈ጪ̇ባ̈ሶዲኬ ኔ ሱ̈ምን ቦንቺ̇ባ̈ሶ ኦ̈ኖ? ኔ ሙታ̇ ጌ̈ሼ̇፤ ኔ̈ኮ ኪን ፊርዳ̈ዲ ኣስ ዎይ̈ቦ ቤንቲ̇ኖኮታ̇ቦ፥ ዎርዣን ዎይ ኔ ቲ̈ን ዬ̈ሪ ኔ̈ብ ሞ̈ኪንቲ̇̈ሬ” ጌይዴ።

⁵ዪኒ̇ፖ ዎሃ ቴ ቤቃ̇ምባራ ማርካ ዱንካ̈ና ማ̈ቂ̇ኖ ጾ̈ሳ̇̈ ኬ ኣፋ ፊርቂንቲ̇ዴ።

⁶ታብዛ ጎይላን ኤ̈ኖ ታብዛ ኪ̈ታንቻን ጾ̈ሳ̇̈ ኬ̈ ጋርታፖ ኬስኪ̇ዴ፤ ኢንቲ ጌ̈ሽ̇ኬ ቦልቂዝ ቦ̈ርስ ኣፊላ ማኢኔ፤ ፌ ቲራ ጋልዳ ዎርቃባር ኮቺ̇ኖ ኣፊላ ማኢኔ።

⁷ሼምፓባሮ ኮቺንታን ኦይዳ̇ን ጋርታ̇ፖ ፔታ̇ና̈ዲ ታብዛ ኪ̈ታንቻንቦ ሜናብ ዶኢዝ ጾ̈ሳ̇̈ ኢ ጎይሊንባር ኩሚኖ ታብዛ ዎርቃ ዋ̈ንጫን ኢንታ̇ብ ኢሚዴ።

⁸ጾ̈ሳ̇̈̇ ኬ̈ዳሬ ጾ̈ሳ̇̈ ቦንቻ̇̈ዲኬ ጾ̈ሳ̇̈ ዎልቃኮታ̇ቦ ጩይዥባር ኩሚዴ፤ ታብዛ ኪ̈ታንቻን ኤ̈ኖ ታብዛ ጎይላን ፎቲንቲዝ ዲራስ ኦ̈ናካር ጾ̈ሳ̇̈ ኬ ጋርታ ጌላንዳብ ዳንዳኣካ̇ዬ።