Read basketo ሳጻ 17 Bible Online

ሳጻ 17 - basketo bible

ሳጻ 17

¹ታብዛ ዋ̈ንጫን ኤ̈ኖ ታብዛ ኪ̈ታንቻ̇̈ን ጋርታፖ ፔታ̇ና̈ዲ ታ̈ክ ዬ̈ሪ “ዓይ ዬቤ! ዎይሊን ዋ̈ን ጋልዳ ዶኢኖ ኦሎላ ጋዳ̇ዚን ጴች ኣሲን ጋልዳ ዬላ̇ዝ ፊርዲን ቴ ኔ̈ና ቤይሳንዳ፤

²ሳ̈ዝ ጋልዶ ካ̈ቲንታ̇ንሬ ኢዝባር ኦሎላ ጋዲ̇ኔ፤ ሳ̈ዝ ጋልዳ ዎ ኣሳንሬ ኢዝኮን ኦሎላ ዎይና ጂንባር ማሲቲኔ” ጌይዴ።

³ዓኒ̇ፖ ዎሃ ታ̈ኒ ጌ̈ሻ̇ ኣያ̇ናባር ኦ̈ሂንታ̇ር ዎዶን ኪ̈ታንቻ̇̈ዲ ታ̈ና ቲ̈ናር ባራሃ ኤጚዴ፤ ኢና ኢ ጋሊ̇ን ዎዪን ጋልዳ ቆ̈ሳ ሱም ጻ̈ፊንቲ̇ኖ ታብዛ ቆም̇ኬ ታጳ ኡሺንቺ ዎ ዞቃ ማ̈ታ ባዝ ጋልዳ ዶኢኖ ፔቲ ማጫ̇ ቴ ቤቃ̇ዴ።

⁴ኣሲንዳ ዞቃኬ ጩ̈ላ̇ ማይጺዝ ኣፊላ ማኢኔ፤ ዎርቃኬ ቦንቺንቲ̇ኖ ሹችባር ማ ኢንቁ ጌይዝ ኣልኣ ጌጻንባር ፌ̈ና ቆይሲሲኔ፤ ፌ ኩሽታ ሺሪዝ ባዝባርኬ ኢዝ ኦሎሊንባር ኩሚኖ ዎርቃባር ኮቺ̇ኖ ዋንጫ ኤ̈ኔ።

⁵ኢዝ ዴ̈ሚን ጋልዳ “ኦሎላ ጋዲዝ ኣሳንኬ ሳ̈ዝ ጋልዶ ቄ ባዛብ ዎይ ኢንዲ ማ̈ቂ̇ኖን ጴቺን ባ̈ቢሎ̈ኖ” ጌይዝ ሚስጢራ ሱም ጻ̈ፊንቲ̇ኔ።

⁶ዪና̇ ኣሲንዳ ጌ̈ሽ̇ ኣሳን ሱ̈ንባርኬ ዬ̈ሱ̈ሳብ ማርኪቲኖኮታ̇ብ ዓይቂ̇ኖ ኣሳን ሱ̈ንባራ ማሲቲንዶን ቴ ቤቃ̇ዴ፤ ቴ ኢዞ ቤቃ̇ራ ዎይሊን ጋራ̇ሚንታ̇ዴ።

⁷ዎቲናካር ኪ̈ታንቻ̈̇ዲ ታ̈ኮ “ኔ̈ኒ ኣባብ ጋራ̇ሚንታ̇̈ራ? ቴ ኔ̈ብ ኣሲንኮ ሚስጢሪንዲኬ ኢዛ ዶኢኖ ታብዛ ቆማ̇ንኬ ታጳ ኡሺንቺ ኢ̈ብ ዎ ማ̈ታ ባዛ̈ኮ ሚስጢሪን ቴ ኔ̈ና ኤርሳንዳ፤

⁸ኔ ቤቂ̇ኖ ማ̈ታባዛ̈ዲ ዓኒ̇ፖ̇ ቲ̈ን ዎዶሪ ዓት ባዬ̇፤ ዎሃ ዎሳሊ ባዮ̇ ጴች ዶ̈ቺ̇ን ጋርታፖ ኬስኪ̈ሬ፤ ማ ዪብ ሉኪ̇̈ሬ፤ ሳ̈ዚን ኮቺንቲ̇ኖፖ ኤ̈ሪ ኢንታ ሱምንዳ ሼምፓ ማጻ̈ፋ ጋልዳ ጻ̈ፊንታካ̇ይዶር ሳ̈ዝ ጋልዳ ዎ ኣሳን ማ̈ታ ባዛ̈ ቤቃ̇ሪ ጋራ̇ሚንቲ̇̈ሬ። ዪ ማ̈ታ ባዛ̈ዲ ዓኒ̇ፖ ቲ̈ን ዎ፤ ዓት ባዪ፤ ማ ዎሃ ዬ̈ይዛ̈ዳ።

⁹“ዪዚ ዓኒ̇ ጋልዳ ኤራ ኩሚኖ ቆፊ ኮሺ̇̈ሬ፤ ታብዛ ቆማ̇ን፥ ኣሲን ኢንታ ጋልዳ ዶኢኖ ታብዛ ኢንዳ̇ን፤

¹⁰ኢንታ̇ሬ ታብዛ ካ̈ቲንታን፤ ኢሺ̇ናን ኬዲ̇ኔ፤ ፔታ̇ና̈ዲ ዓት ዎ፤ ሜላ̈ዲ ቢርት ዬ̈ካ̇ዬ፤ ኢ ዬ̈ሪ ጊላ̇ ጋምኣንዳ̇ብ ኮሺ̇̈ሬ።

¹¹ቲ̈ን ዎ̈ዲ ዓት ባዮ̇ ማ̈ታ ባዛ̈ዲ ላሚ ካ̈ታ̈ዳ፤ ኢ ታብዛን ጋርታፖ ፔታ̇ና̈ዳ፤ ኢያር ዪብ ሉኪ̈̇ሬ።

¹²“ኔ̈ ቤቂ̇ኖ ታጳ ኡሺንቻ̇̈ን ቢርት ካዉታካ̇ዮ ታጳ ካ̈ቲንታ̇ን፤ ዎቲናካሬ ፔቲ̇ ሳኣ̈ታቦ ማ̈ታ ባዛ̈ባር ካዉታምፔ̈ን ሲልጣ̈ና ዲጚ̈ሬ።

¹³ዪን ታጳ ካ̈ቲንታ̇ን ፔቲ̇ ቆፊ ኢንታ̇ብ ዎ፤ ኢንቲ ፌ ዎልቂንዲ̇ኬ ፌ ሲልጣ̈ኒን ማ̈ታ ባዛ̈ቦ ኢሚ̇̈ሬ፤

¹⁴ኢንቲ ዶራ̈ ጋልዳ ኦል ዲንሬ፤ ዎቲናካሬ ዶራ̈ዲ ጎዳንቦ ጎድኬ ካ̈ቲንታ̇ንቦ ካ̈ት ማ̈ቂ̇ኖኮታ̇ቦ ኢንታ ጋሚ̈ሬ፤ ማ ኢባር ዎን ጼይጊንቲኖን፥ ማራ̇ጺንቲ̇ኖንኬ ኣማ̇ኒንቲ̇ኖ ኣሳን ኢባር ዎልኣ ጋሚ̈ሬ” ጌይዴ።

¹⁵ኪ̈ታንቻ̇̈ዳሬ “ኦሎላ ጋዳ̇ዝ ኣሲን ኢንታ ጋልዳ ዶኢን ኔ ቤቂ̇ኖ ዋ̈ን ዎርዣንኬ ዱማ ዱማ ኣሳን፥ ዱማ ዱማ ኮቻ̇ንኬ ዱማ ዱማ ኖ̈ና ሶ̈ሊዝ ኣሳን።

¹⁶ማ̈ታ ባዛ̈ዲኬ ኔ ቤቂ̇ኖ ታጳ ኡሺንቻ̇̈ን ኦሎላ ጋዳ̇ዝ ኣሲን ኢጺ̇̈ሬ። ኢዞ ዪሲ̈̇ሬ ማ ኢዝቦ ዎ ባዝ ዎይ ኤካ̇ሪ ኢዞ ካላ̇ ኣሺ̇̈ሬ፤ ኢዝ ኣይሺ̇ን ኢንቲ ሙይሬ ማ ታማባር ኢዞ ሚቺ̇̈ሬ።

¹⁷ኢ ቆፊን ፎቲንታ̇ምፔ̈ኒ ዪና̇ ቆፊን ኢንታ ቡ̈ዲን ጋርታ ጋዲ̇ኖ̈ዲ ጾ̈ሳ̇̇̈ዳ፤ ዪ̈ኮታ̇ቦ ጾ̈ሳ̇ ቃ̈ላ ፎቲንቲ̇ዝ ዲራስ ኢንቲ̇ ዎልኣ ፔቲ ቆፊ ዎ ማ̈ቂ̇̈ሬ፥ ፌ ካ̈ቲቲ ሲልጣ̈ኒን ማ̈ታባዛ̈ብ ኢሚ̇̈ሬ።

¹⁸ኔ ቤቂ̇ኖ ኣሲንዳ ሳ̈ዶ ካ̈ቲንታን ጋልዳ ካውታዚን ጴች ካታሚንዶ” ጌይዴ።