Read basketo ሳጻ 18 Bible Online

ሳጻ 18 - basketo bible

ሳጻ 18

¹ዓኒ̇ፖ ዎሃ ጴች ሲልጣ̈ና ዎ ሜላ ኪታንቾ ኣፋፖ ሶ̈ባምባር ቴ ቤቃ̇ዴ፤ ኢ ቦንቻ ቦልቃ̇ሪ ሳ̈ዚን ፎኢሲዴ።

²ፌ ቆ ሾክ̇ ዎታሪ “ጴቺ̇ን ባ̈ቢሎና ላ̈ሊ̇ንታ̇ር ያዴ! ላ̈ሊ̇ንታ̇ር ያዴ! ሴ̈ጣና ዶኢዝ ቤስ̇ ማ̈ቃ̇ዴ! ኢታ ኣያ̇ናን ኣቂዝ ቤስ̇ ማ̈ቃ̇ዴ! ሺሪዛንኬ ጌ̈ሽ ጊዳካ̇ዮ ካፋን ዶኢዝ ቤስ̇ ማ̈ቃ̇ዴ፤

³ኣባ ጌይን ኢዛ ኣስ ማሲሲዝ ኦሎላ ዎይና ጂን ዎርዣ ዎይ ኡሺ̇ኔ፤ ሳ̈ዝ ጋልዶ ካ̈ቲንታ̇ን ኢዝባር ኦሎላ ጋዲ̇ኔ፤ ኢዛ ዎይ ባዚ ኢዝቦ ዎይሊን ኮሽኪን ዶኣንዳብ ኢኒ̇ቲዛኮታ̇ቦ ሳዛ ጋልዶ ዛላ ዛልኢዝ ኣሳንር ዱሪቲዴ” ጋ̈ሪ ዉይሲዴ።

⁴ሜላ ቆ̈ሬ ኣፋፖ ዪዝ ጋ̈ር ሶ̈ላምባር ሲስካ̇ዴ፤ ኢዛ ኦ̈ኖ ናጋሪን ዪንቲ ኦ̈ካይፌ̈ኒ፤ ኢዝ ጋልዳ ዬ̈ዝ ሜቲንዳር ዪንታ̇ር ኤካካ̇ይፌ̈ኒ፥ “ቴ ዎርዣን! ኢዝ ጋርታፖ ኬስኪ̇ብቴ!

⁵ኢዝ ናጋራ ናቲንታር ኣፋ ዬሊ̇ኔ፤ ጾ̈ሲ̇ ኢዝ ናጋራን ቆፒ̇ኔ፤

⁶ኢዛ ኢሚ̇ኖንዲፌ̈ን ዪንታ̇ር ኢዝቦ ኢሚ̇ብቴ፤ ኢዛ ዪንታ̇ ጋልዳ ኦ̈ኖ ኢ̈ት ኦ̈ሲምቦ ናምኢ ኩሽ ማሃር ኢዝቦ ጪጊ̇ብቴ፤ ኢዛ ዱማ ዱማ ኡሻ̇ን ቡሺኖ ዋንጪን ጋርታ፤ ናምኢ ኩሽ ጫ̈ጚቻ̇ር ኢዝኮ ዋንጪን ጋርታ ቡሺብቴ፤

⁷ኢዛ ፌ̈ና ቦንቺሻ ሚሻ̇ ጋዲ̇ኖንዲፌ̈ኒ፤ ዪንታ̇ር ዪና̇ ኢዝፌ̈ኒ ኢዞ ቢጻ ቤይሲብቴ፥ ኢዝቦ ሞርኢ ኢሚ̇ብቴ፤ ኢዛ ፌ ቡዳ ጋርታ፤ ‘ታ̈ኒ ካ̈ቲፌ̈ን ማ̈ቃ̇ር ዶኢኔ፤ ታ̈ኒ ኣስኒ ባዮ̇ ማጫ̇ ጊዳካዬ፤ ታ̈ና ሞርኢሲዝ ባዚ ዉርሲ ዬሊ̇ባሴ’ ጌያ ኬርፋ̈ሬ።

⁸ዪ̈ኮታ̇ቦ ኢዝ ሜታን ዎይ ኢዝ ጋልዳ ፔቲ̇ ቃም̇ባር ዬይሬ፤ ዓይቃኬ ሞርኢ ጋፋሬ ኢዝ ጋልዳ ዬይሬ፤ ኢዛ ታማባር ሚጫ̇̈ሬ፥ ኢዝ ጋልዳ ፊርዲዛ፤ ጎዳ ጾ̈ሳ̇ ዎልቃማ̈ዳ”

⁹ኢዝባር ኦሎላ ጋዲ̇ኖ ኢዝ ኢ̈ታ ኢኒ̇ን ፎቲሙታ ዶኢኖ ሳ̈ዝ ጋልዶ ካ̈ቲንታ̇ን ኢዛ ሚጫ̇ምባር ኬስኪ̇ዝ ጩይዣ ቤቃ̇ሪ ኢዝ ጊሻ̇ብ ዬ̈ኪ ሙዲዲ̈ሬ።

¹⁰ኢዝ ጋልዳ ዬሊ̇ኖ ኢ̈ታ ሜቲንቦ ኢጫ̇ሪ ጎት ኤቃ̇ሪ “ኣ̈ሽ ጴች ካታሚንዴ! ኣ̈ሽ ሚ̈ን ካታሚን ባ̈ብሎ̈ኔ! ኔ ጋልዳ ፊርዶ ፔቲ̇ ሳኣታ ጋርታ ዬይኖኮታ̇ቦ ኔ ባዚ ኣዬ̇! ኔ ባዚ ኣዬ̇!” ጌይዴ።

¹¹ዓኒ̇ፖ ጌዳ ኢንቲ̇ ማርካባ ጋልዳ ጫ̈ናር ኤሄይኖ ባዛን ኢንታ ጋልዳፖ̇ ዎ̈ጚዝ ኣሲ ባዮ̇ኮታ̇ቦ ሳ̈ዝ ጋልዳ ዛ̈ላ ዛልኢዝ ኣሳንሬ ኢዝቦ ዬኪ̇፥ ኢዝ ጊሻ̇̈ብ ሙዲዲ̈ሬ።

¹²ኢንታ ማርካባ ጋልዳ ጫኒ̇ንቲ̇ኖዲ፦ ዎርቃ̇፣ ቢራ፣ ቦንቺንቲ̇ኖ ሹቻ̇̈፣ ኢንቁ ጌይዝ ጌ̈ጻ፣ ኮሽ̇ ሊ̈ቅ ኣፊላ፣ ጩ̈ላ ማይጺዝ ኣፊላ፣ ዞቃ ኣፊላ፣ ሜላር ኣልኣ ኣፊላኬ ኮሻ̇ ሳ̈ዊ ዎ ሚ ዎይ፣ ዳንካርስ ኣቻ̇ባርኬ ኣልኣ ሚባራ፣ ማ ና̈ሳባራ፣ ሲላባራ፣ ኣልኣ ቦ̈ርስ ሹችባራ ኦ̈ንቲ̇ኖ ኢቃ ዎይ፤

¹³ቃራፋኬ ዱማ ዱማ ቂማማን፣ ካርባ፣ ሳውቂ̇ዝ ቂባ̈ታ፣ ኢጻ̈ና፣ ዎይና ጃ፣ ዎይራ ዛይታ፣ ል̇፣ ዜርቃ፣ ሜሃ፣ ዶሪ፣ ፋራ፣ ፋራባር ጎቺ̇ዝ ጋ̈ሪ፣ ኣይላኬ ሜላ ኣሳንር ዪን ዎይዬ።

¹⁴ዛላ ዛልኢዝ ኣሳንሬ ኢዝኮ “ኔ ኢኒ̇ቲኖ ኮሽ̇ ባዛን ዎይ ኔ ጋልዳፖ ጎቲ̇ኔ፤ ኔ ቆሊንንሬ፥ ኔ̈ና ቆይሲሲኖ ኔ ጌ̈ጻን ዎይ ዪኔ፤ ዪዚ ዓኒ̇ፖ ጌዳ ዪን ዎይ ዉርሳ ኔ ዲጛባሴ” ጌይሬ።

¹⁵ዪን ባዛን ኢዝቦ ዎጛር ዱር ማ̈ቂ̇ኖ ዛላ ዛልኢዝ ኣሳን ኢዝ ሜቲን ቤቂ̇ ኢ̈ጫ̇ሪ ጎት ኤቂ̇̈ሬ፤ ዬ̈ኪ̇ሙታኬ፤ ሞርኢ ሙታ̇ዶሪ፥

¹⁶“ሊ̈ቅ ኣፊላኬ ጩ̈ላ̇ ኣፊላ ማ ዞ̈ቃ ኣፊላሬ ማኣዚንዴ፥ ዎርቃኬ ቦንቺንቲ̇ኖ ሹች ማ ኢንቁ ጋ̈ዝ ጌ̈ጺንባር ፌ̈ና ቆይሲሳዚን ጴቻ̇ ካታሚንዴ! ኔ ባዚ ኣዬ̇! ኔ ባዚ ኣዬ̇!

¹⁷ዪፌ̈ኖ ዎይሊን ቆሊን ፔቲ ሳኣ̈ታ ጋርታ ዪኔ!” ጌይሬ ማርካ̇ባ ሃላፋን ዎይ፣ ማርካባባር ሉኪ̇ዝ ኣሳን ዎይ፣ ማርካባ ጋልዳ ኦ̈ዝ ኣሳን፣ ባሃ̈ራ ጋልዳ ዛላ ዛልኢዝ ኣሳን ዎይ ጎት̇ ኤቂ̇̈ሬ፤

¹⁸ኢዛ ሚጫ̇ዚምባ̇ራ ኬስኪ̇̇ዝ ጩይዣ ቤቃ̇ሪ “ዓና̇ ጴች ካታሚን ማይጺዛ ሜላ ካታማ ዉርሲ ዎ?” ጌዪሙታ ዉይሲዴ።

¹⁹ፌ ቆማ̇̈ ጋልዳ ቡልኣ ቃኪ̇̈ሬ፤ ዬ̈ኪሙታ̇ኬ ሞርኢሙታዶ̈ሪ “ዪና ጴች ካታሚንዳ ኢዝ ባዚ ኣዬ̇! ኢዝ ባዚ ኣዬ̇! ባሃራ ጋልዳ ማርካባ ኢንታ̇ብ ዎን ዎይ ኢዝ ቆሊንባራ ዱር ማ̈ቂ̇ዴ፥ ዎቲናካር ፔቲ̇ ሳኣታ ጋርታ ዪ ዎይ ዪዴ፤

²⁰ኣፋ ሳ̈ዚንዴ! ኢዛ ዪኖኮታ̇ቦ ኔ ኡፋይታ̇ቤ! ጾ̈ሲ̈ ዪንታ̇ኮታ̇ቦ ኢዝ ጋልዳ ፊርዲኖኮታ̇ቦ፥ ጎዳ ጌ̈ሻ ኣሳንኬ ሃዋ̈ራንኬ ናባን! ዪንታ̇ብ ኡፋይስ ማ̈ቆ̇ጋ̈ቤ!” ጌዪሙታ̇ ዉይሲ̈ሬ።

²¹ኢናፖ ፔቲ ሚ̈ን ኪ̈ታንቻ̇̈ዲ ጴች ዎጽ ሹች ማ̈ቃ̇ምፔ̈ኖ ፔቲ̇ ሹች ኤካ̇ሪ ባሃ̈ራ ጋርታ ዡጊዲሙታዶሪ፥ “ጴቻ ካታሚን ባ̈ቢሎ̈ና ዎልቃባር ሱጊንታ̇ራ ዓኒ̇ፌ̈ን ኬዳ̇̈ሬ፤ ዓኒ̇ፖ ጌዳ ኢዛ ዉርሳ ቤንታ̇ባሴ፤

²²ዬኬ ዚምቢ ጊርስኬ፥ ሹልሹላ ጊርስኬ ሞይዛ ጊርሲ፥ ዓኒ̇ፖ ዎሃ ኔ ጋርታ̇ ሲስኪንቲ̇ባ̈ሴ፤ ዱማ ዱማ ኩሽ ኦ̈ስ ኦ̈ዝ ኣሲ ዓኒ̇ፖ ጌዳ ኔ ጋርታ̇ ዶኢባ̈ሴ፤ ዎንቲ̇ዝ ዎጽ ጊርሳር ዓኒ̇ፖ ጌዳ ኔ ጋርታ ሲስኪንቲ̇ባ̈ሴ።

²³ዓኒፖ ጌዳ ኔ ጋርታ̇ ታማ ፎኢን ፎ̈ኢባ̈ሴ፤ ኢሳ̇̈ኮንዲኬ ኢሲ̇ንኮንዲክ ቆ̈ ዓኒ̇ፖ ጌዳ ኔ ጋርታ̇ ሲስኪንቲ̇ባ̈ሴ፤ ኔ ኣ̈ል ዛላ ዛልኢዝ ኣሳን ኣላማ ጋልዳ ኤሪንቲ̇ኖ ጴች ኣሳንዶር ኣቲ̇ዴ፥ ኔ ኔ ቢታ̈ባራ ዎርዣ ዎይ ባሊዴ።

²⁴ናባንኬ ጌ̈ሻ ኣሳን ሱ̈ን፤ ማ ሳ̈ዝ ጋልዳ ኣሲ ኢንታ̇ ዎኖ ኣሳን ዎይን ሱ̈ን ኢዝ ጋርታ̇ ቤንቲ̇ኔ” ጌይዴ።