Read basketo ሳጻ 2 Bible Online

ሳጻ 2 - basketo bible

ሳጻ 2

¹ኤፊሶ̈ና ዎ̈ሳ ኬ̈ን ኪ̈ታንቻ̇̈ቦ ዪዝ ጋ̈ር ጻ̈ፋቤ፦ “ታብዛ ቤ̈ርሳን ፌ ኡሻቻ ኩሽታ ኤ̈ኖ̈ዲኬ ታብዛ ዎርቃ ማቅራዛን ጊዳ̇ ቢሪንቲ̇ዛ̈ዲ ሶ̈ሊኖ ሶ̈ላ፤

²ኔ ኦ̈ሲንዶ፣ ኔ ዋ̈ዪንዲኬ ኔ ጋርዢን ታ̈ኒ ኤራ̈ሬ፤ ኢ̈ት ኦ̈ዝ ኣሳን ቤቃ̇ራ ሜላ̇ ኣሻ̇ር ኣ̈ካዮንዶ፥ ማ ሃዋ̈ራታ ባዪዶሪ ፌ̈ና ሃዋ̈ራታ ጌይዛን ኮሺንቻ ቤቃ̇ራ ኢንታ ማቃ ማቂ̇ዝ ኣስ ማ̈ቂ̇ኖን ኔ ዲጚኖን ቴ ኤራ̈ሬ።

³ኔ ጋርዣባር ሚ̈ጚኖንዲኬ ቴ ሱምንኮታ ሜታ ኤኪ̇ኖን ቴ ኤራ̈ሬ። ዪና̇ ዎይን ጋርታ ኔ̈ኒ ዳ̈ቡራካ̇ዬ።

⁴ዎቲናካሬ ቴ ኔ ጋልዳ ሺሪንቲ̇ኖ ፔቲ̇ ባዚ ዎ፤ ኢዛሬ ሚኖ ካንን ኔ ኣሺ̇ኖንዶ፤

⁵ኔ̈ኒ ዎዛርፌ̈ኖ ጴች ኢንዳ ጋልዳፖ ጎርጎራ ኬዲ̇ኖኮ ኔ̈ኮን ቆፓ̇ቤ! ማ̈ሪቲ ጌላቤ! ቲ̈ን ኔ ኦ̈ሙታ ዎ ኦ̈ሲን ኦ̈ቤ፤ ኔ̈ኒ ማ̈ሪቲ ጌላካ̇ይ ኣቴጌይን ኔክ ሉካ̇ራ ኔ ማቅራዚን ኢዝ ቤሲ̇ን ጋልዳፖ ቴ ዲንሬ።

⁶ዎቲናካሬ ኔ̈ና ኣንጂሺዝ ባዚ ፔታ̇ኒ ዎ፤ ኢዛሬ ቴ ኢጻ̇ዚን ኒቆላዋ̈ን ኢ̈ታ ኦ̈ሲን ኔ̈ናር ኢጺ̇ኔ።

⁷ጌ̈ሻ̇ ኣያ̇ና̈ዲ ዎ̈ሳ ኬ̈ንቦ ሶ̈ላዝ ባዚንዶ ዋ̈ይ ዎ ኣሲ ሲስካ̇ጋ̈ቤ! ጋሚዝ ና̈ሳ̈ቦ ኣፋ ጋና̇ታ ጋርታ ዎ ሼምፓ ኢሚ̇ዝ ሚን ኣ̈ፊን ኢ ሞ̈ምፔ̇̈ን ቴ ዎታንዳ።

⁸ሴምሪኔ̈ሳ ዎ̈ሳ ኬ̈ ኪ̈ታንቻ̇̈ቦ ዪዝ ጋ̈ር ጻ̈ፋቤ፦ ቲ̈ኖዳሬ ዉርሲዳ̇ር ኢያ ማ̈ቂ̇ኖ፥ ዓይቃ̇ሪ ማ ዓይቃ ጋርታ̇ፖ ዲንዳር ሼምፓባር ዎዲ ሶ̈ሊኖ ሶ̈ላ፤

⁹ኔ ሜቲንዲ̇ኬ ኔ ዎርባዪቲን ታ̈ኒ ኤራ̈ሬ፤ ማ̈ቂ̇ናካሬ ኔ ዱሬ፤ ኣይሁዳ ዜር ባዪዶሪ ፌ̈ና ኣይሁዳ ዜር ጌይዛን፥ ሴ̈ጣናባር ማ̈ባራ ማ̈ቃ̇ር ዎን ኔ ሱምን ኢ̈ሲ̇ኖን ቴ ኤራ̈ሬ።

¹⁰ኔ̈ና ጊዳክ ዬላ̇ዝ ሜቲምቦ ኢ̈ጫፔ፥ ዪዚ ሴ̈ይጣኖ ዪንታ̇ ፋታ̇ናንዳብ ኮያሪ ዪንታ̇ ጋርታፖ ፔታ̇ን ፔታ̇ናን ቃሺ ኣ̈ል ጌልሲ̈ሬ፥ ታጳ ቃም̇ ዪንቲ ሜታ ኤኪ̇̈ሬ፤ ኔ ዓይቂ̇ዝ ዲራስ ኣማ̇ኒንቲ̇ኖ ማ̈ቃ̇ቤ፤ ሼምፓ ኣኪሊላ ቴ ኔ̈ብ ኢማ̇ንዳ።

¹¹ጌ̈ሻ̇ ኣያ̇ና̈ዲ ዎ̈ሳ ኬ̈ንቦ ሶ̈ላዝ ባዚንዶ ዋይ ዎ ኣሲ ሲስካ̇ጋ̈ቤ! ጋሚዝ ና̈ሳ̈ዲ ናምኢ ዓይቂ̇ንዳ ኢያ ዬላ̇ባሴ።

¹²ጴርጋሞ̈ና ዎ̈ሳ ኬ̈ን ኪ̈ታንቻ̇̈ቦ ዪዝ ጋ̈ር ጻ̈ፋቤ፤ ናምኢ ጎይን ዎይ ሌ̈ፊንቲ̇ኖ ማሺ̇ ኤ̈ኖ ሶ̈ሊኖ ሶ̈ላ፤

¹³ኔ̈ኒ ሴ̈ይጣና ዶኣዝ ቤሲ̇ን ዋ̈ኒ̇ን ጋርታ̇ ዎን ቴ ኤራ̈ሬ፤ ማ̈ቂናካሬ ቴ ሱምን ኔ̈ኒ ሚ̈ን ኤ̈ኔ፤ ኔ ታ̈ና ኣማ̇ናዚን ኣሻካ̇ዬ፤ ታ̈ቦ ኣማ̇ኒንቲ̇ኖ ማርካ ማ̈ቂ̇ኖ ኣንቲጳሳ ጌይዛ̈ዲ ዪንታ̇ ካታሚን ሴ̈ጣና ኢና ዶኣዚን ጋርታ ኣሳን ኢያ ዎኖ ኬሊ̇ንባራር ኔ ታ̈ና ኣማ̇ናዚን ኣሻ̇ካዬ።

¹⁴ዎቲናካሬ ታ̈ና ሺሪኖ ፔቲ̇ ፔቲ̇ ባዚ ኔ ጋልዳ ዎ፤ ዪና̇ሬ ና̈ሳ ባ̈ላ̈ማ ቲሚርቲ̇ንባር ኣማ̇ኒዝ ፔቲ̇ ፔቲ̇ ኣሳን ዪንታ̇ ጋርታ ዎ፤ ዪ ባ̈ላ̈ማ ጌይዛዲ ኢስሬ̈ላ ዎርዣ̈ዲ ጻ̈ላሃብ ዣሪሺኖ ፊሽ ሞ̈ምፔ̈ኒ ማ ኦሎላ ጋዲሙታ̇ ጾ̈ሳ̇ ቲ̈ን ናጋራ ኦ̈ምፔ̈ን ባ̈ላ̈ቃ ዞሪኖ ኣሴ።

¹⁵ዪና̇ ኢዝፌ̈ኒ ኒቆ̈ላዋን ቲምርቲ̇ንባር ኣማ̇ኒኖ ኣሳንር ዪንታ̇ ጊዳ̇ ዎ፤

¹⁶ዪ̈ኮታቦ ማ̈ሪቲ ጌላቤ! ዪፖ ኣቴጌዪን ታ̈ኒ ኤሊ ኔክ ዬ̈ራ ቴ ኖ̈ና ጋርታፖ ኬስኪ̇ዝ ማሻ̇ባራ ቴ ኢንታ ጫዳ̇̈ሬ።

¹⁷ጌ̈ሻ̇ ኣያ̇ና̈ዲ ዎ̈ሳ ኬ̈ንቦ ሶ̈ላዝ ባዚንዶ ዋ̈ይ ዎ ኣሲ ሲስካ̇ጋ̈ቤ! ጋሚዝ ና̈ሳቦ ኣ̈ቺንቲኖ ማና̇[4] ጋልዳፖ ኢማ̇ንዳ፤ ማ ኤኪ̇ዝ ና̈ሳ ኢ̈ፖ ሜላ ኣሲ ኦ̈ናካር ኢዛ ኣብዝኮ ኤሪባ̈ሶ ኦራ ሱሚ ጻ̈ፊንቲ̇ኖ ቦ̈ርስ ሹቻ̇ር ኢ̈ብ ኢማ̇ንዳ።

¹⁸ታ̈ጢ̈ሮና ዎ̈ሳ ኬ̈ን ኪ̈ታንቻ̇̈ቦ ዪዝ ጋ̈ር ጻ̈ፋቤ፦ ታማ ላ ማይጺዝ ኣፊ ዎዳኬ ቦልቂዝ ና̈ሳ ሲሊን ማይጺዝ ቶሂ ኢብ ዎ̈ ጾ̈ሳ̇̈̇ ናኣ̈ዲ ሶ̈ሊኖ ሶ̈ላ፤

¹⁹ኔ ኦ̈ሲንዲ̇ኬ ኔ ካንንዶ፤ ኔ ኣማ̇ኒንዲኬ ኔ ታ̈ቦ ዳ̈ቡሪኖንዶ ማ ኔ̈ኒ ጋርዣባር ሚጚኖን ቴ ኤራ̈ሬ፤ ኔ ኦ̈ሲን ዎሆንዳ ቲ̈ኖምፖ ሺዚን ቴ ኤራ̈ሬ።

²⁰ዎቲናካሬ ኔ ጋልዳ ቴ ኢጺ̇ዝ ባዚ ፔታ̇ኒ ዎ፤ ዪ̈ና̇ሬ ፌ̈ና ‘ናቢ’ ጋ̈ዝ ኣሲን ኤልዛ̈ቤሎ ኢዝ ኢ̈ታ ኦ̈ሲን ቤቃ̇ራ ኣባካር ጋ̈ካ̇ይዶራ ኢዞ ሜላ̇ ኣሺ̇̈ኔ፤ ኢዛ ታ ኣሽካራን ኦሎ̈ላ ጋዳምፔ̈ንኬ ጻላሃብ ሹኪ̇ኖ ኣይሽ ሞ̈ምፔ̈ን ታማሪሳር ባሊኔ።

²¹ኢዛ ማ̈ሪቲ ጌላምፔ̈ኒ ጋ̈ራ ቴ ዋይሲን፥ ኢዛ ፌ ኦሎሊን ኣሻ̇̈ራ ማ̈ሪቲ ጌላንዳብ ኮያካ̇ዬ።

²²ዪ̈ኮታ̇ቦ ቴ ኢዛ ሱርቃ̇ዝ ኣርሲን ጋልዳ ኢና ቴ ኢዞ ዓርጋባር ቡካ̇ንዳ፤ ኢዝባር ኦሎላ ጋዲ̇ኖ ኣሳን ፌ ኢ̈ታ ኦ̈ሲን ጋልዳፖ̇ ማ̈ቃ̇ሪ ማ̈ሪቲ ጌላር ታ̈ክ ማ̈ቃካ̇ይ ኣቴ̇ጌይን ዎይን ጋልዳ ሚን ሜታ ቴ ኢንታ̇ ጋልዳ ኤሄ̈ሬ።

²³ኢዝ ናኣንር ቴ ዎንዳ፤ ኣሳ ቆፊኬ ኣሳ ኢና̇ ዎይ ማራማ̇ሪዛዲ ታ̈ና ማ̈ቂ̇ኖን ዎ̈ሳ ኬ̈ን ዎይ ኤሪ̈ሬ፤ ታ̈ኒ ዪንቲ̇ ዎይንቦ ዪንታ̇ ኦ̈ሲንዲፌ̈ን ዪንታ̇ብ ኢማ̇̈ሬ።

²⁴ታ̈ጢሮ̈ና ዎን ዪና̇ ኢ̈ታ ቲምርቲ̇ን ኤካካ̇ዮን ዎይኬ ማ ፔቲ̇ ፔቲ̇ ኣሳን ‘ዓና̇ ሴ̈ጣናኮ ጴች ሚስጢራ’ ጌዪ ጼይጋዝ ባዚንዶ ኣማ̇ኒባ̈ሶ ኣሳን ዪንታ̇ቦ ቴ ሜላ ዎይሊን ዴ̈ጺ̇ዝ ባዝ ዪንታ̇ ኪ̈ታ̇ባሴ፥

²⁵ዪንቲ̇ ቴ ዬይዝ ዲራስ ዪንታ̇ብ ዎ ኣማ̇ኒን ሚ̈ንር ኤ̈ብቴ̇።

²⁶ጋሚዛ̈ቦ፥ ማ ቴ ኦ̈ሲን ጋልዳሬ ዉርሲን ዬሊ̇ዝ ዲራስ ሚ̈ጚዛቦ ዎርዣን ጋልዳ ቴ ኢ̈ብ ሲልጣ̈ና ኢማ̇ንዳ።

²⁷ኢ ኢንታ̇ ጋሚ ዎልቃባር ኣቂሲ̈ሬ፤ ሺልካፌ̈ን ቆጺ̇ ሊ̈ቂሲ̈ሬ። ዪና̇ ሲልጣ̈ኒንዳ ቴ ቴ ባ̈ባ̈ ጋልዳፖ̇ ኤኪ̇ኖ ሲልጣ̇̈ኒንዲፌ̈ኒዬ።

²⁸ኢ ጋሚኖን ቴ ኤርሳንዳቦ ቴ ኢቦ ዎን ቤ̈ርስ ኢማ̇ንዳ።

²⁹ጌ̈ሻ̇ ኣያ̇ና̈ዲ ዎ̈ሳ ኬ̈ንቦ ሶ̈ላዝ ባዚንዶ ዋይ ዎ ኣሲ ሲስካ̇ጋ̈ቤ።