Read basketo ሳጻ 4 Bible Online

ሳጻ 4 - basketo bible

ሳጻ 4

¹ዓኒ̇ፖ̇ ዎሃ ታ̈ኒ ኣፋ ቴ ቲ̈ኒን ጋርታ̇ ፊርቂንቲ̇ኖ ካራ ዎዶን ቤቃ̇ዴ፤ ታ̈ኒ ዓኒፖ̇ ቲ̈ን ሲስኪ̇ኖ ሞይዛፌ̈ኖ ጊርሳ̈ዲ ታ̈ኮ “ዓኒ̇ፖ ዎሃ ማ̈ቂ̇ዝ ባዛን ቴ ኔ̈ና ቤይሲዛኮታ̇ቦ ዓይ ፉዳ ኬስካ̇ቤ” ጌይዴ

²ኤሊ̇ባራ ታ̈ኒ ጌ̈ሻ̇ ኣያ̇ናባር ኦ̈ሂንታ̇ዴ፤ ማ ኣፋ ዙፋ̈ና ቤቃ̇ዴ፤ ኢዝ ጋልዳ ፔቲ ኣሲ ዶኢኔ።

³ዙፋ̈ኒን ጋልዳ ዶኢኖ̈ዲ ያስፒዲናኬ ሴርዲኖ̈ና ጌይዝ ቦንቺንቲ̇ኖ ሹቻንፌ̈ኒ ፎኢ̈ሬ፤ ዙፋ̈ኒን ቡጊዲንባራ ቦቺንቲ̇ኖ ጫ̈ላ ሹች ማይጺዝ ዙላ̇ ዎ።

⁴ዪና̇ ዙፋ̈ኒን ቡጊዲምባ̇ራ ላምታም ኦይዲ̇ ዙፋ̈ናን ዎ፤ ዪን ዙፋ̈ናን ጋልዳ ቦ̈ርስ ኣፊላ ማኣር ፌ ቆ̈ሚን ጋልዳ ዎርቃባር ኮቺ̇ኖ ኣኪሊላ ጋዲ̇ኖ ላምታም ኦይዲ ጪጛሻን ዶኢኔ።

⁵ዙፋ̈ኒን ጋርታ̇ፖ ዜ̈ሊን፣ ጊርስኬ ዳዳ ኬስኪ̇ዴ፤ ዙፋ̈ኒን ቲ̈ን ፎኢዝ ዣባ̇ ታብዛ ዎ፤ ኢንታሬ ጾ̈ሳ̇̈ ኣያ̇ና ታብዛን።

⁶ዙፋ̈ኒን ቲ̈ኒን ጋልዳ ጺላ̇ክ ጊልዢዥ ጌይኖ ማስቶ̈ታ ባሃ̈ራ ማይጺዝ ባዚ ዎ፤ ዙፋ̈ኒን ጊዳ̇ ማ ኢዝ ቡጊዲምባ̇ራ፥ ቲ̈ን ጎይኬ ጋስ ጎይ ዎይሊን ኣ̈ፊ ዎ ሼምፓባሮ ኮቺንታን ኦይዲ̇ ዎ።

⁷ኢንታ̇ ጋርታ̇ፖ ፔታ̇ና̈ዲ ዞብ̇ ማይጺ̈ሬ፤ ናምኢዳ ጌ̈ን ማይጺ̈ሬ፤ ዓይዚዲ ኣሳ ዴ̈ማ ማ̈ይጺዝ ዴ̈ማ ኢ̈ብ ዎ፤ ኦይዲዲ ፋሪዝ ኣርጊን ማይጺ̈ሬ።

⁸ዪን ኦይዲ ኮቺንታ̇ን ኢንታ ቆሚ̇ን ቆሚ̇ን ኢንታ̇ብ ሌሂ ካፓ̇ ዎ፤ ኢንታ ጋሊ̇ን ዎይኬ ኢንታ ካ̈ፒ̇ን ጋርሲን ዎይ ኣ̈ፊ ኩሚኔ። ኢንታ̇ር ቃምኬ ጋላስኬ፥ “ጌ̈ሻ̈̇ዶ! ጌ̈ሻ̈̇ዶ! ጌ̈ሻ̈̇ዶ! ሚናፓር ዎ፥ ዓታር ዎ፥ ጊዳክ ዬይዛ፥ ዎይን ዳንዳኢኖ ጎዳ ጾ̈ሳ̇̈̇ዶ!” ጋዚ̈ን ኣሺባ̈ሴ።

⁹ዪን ኮቺንታ̇ን ዙፋ̈ኒን ጋልዳ ዶኢኖቦኬ ሜናብ ዶኢዛ̈ቦ ቦንች፣ ጋላታኬ ጴቺቲስኬ ኢ̈ብ ሺሻ̇ምባራ ዎይ ጋላስ፥

¹⁰ላምታ̇ም ኦይዲ̇ ጪጛሻን ሜናብ ዶኢዛ̈ቦ፥ ዙ̈ፋና ጋልዳ ዶኢኖ ኢ ቲ̈ኒን ጋልዳ ፌ ዴሚንባር ጉፕ ጋ̈ሪ ኢ̈ብ ሞ̈ኪንቲ̇̈ሬ፤ ፌ ኣኪሊላሬ ዲንር ኢ ዙ̈ፋኒን ቲ̈ን ጋዳ̇ሪ፥

¹¹“ኑ ጎዳ̈ዳኬ ኑ ጾ̈ሳ̇̈̇ዶ! ዎይ ባዝ ኔ ኮቺ̇ኖኮታ̇ቦ፥ ባዝ ዎይዳር ኮቺንቲ̇ኖዲኬ፥ ሼምፓ ዲጚኖ̈ዲ ኔ ጌይን ማ̈ቂ̇ኖኮታ̇ቦ፥ ጴቺ̈ቲ፣ ቦንችኬ ዎልቃ̇ሬ ኔ̈ ኤካ̇ንዳብ ቤይሳ̈ሬ” ጌይሬ።