Read basketo ሳጻ 5 Bible Online

ሳጻ 5 - basketo bible

ሳጻ 5

¹ዙፋ̈ና ጋልዳ ዶኢኖ̈ዲ፥ ጋርታ̇ ጎይኬ ጋሳ ጎይ ኢዝ ጋልዳ ጻ̈ፊንቲ̇ኖ ታብዛ ቤስ̇ ጋልዳ ማይታማባር ኣሻ̇ጊኖ ማጻ̈ፋ ፌ ኡሻቻ̇ ኩሽታ̇ ኤ̈ንዶን ቤቃ̇ዴ።

²ኢናፖ ሚ̈ን ኪ̈ታንቻ̇ ፔታ̇ንዶሪ ፌ ቆ̈ ሾክ̇ ዎታሪ “ማይታማን ቢላ̇ንዳብኬ ማጻ̈ፊን ፊርቃ̇ንዳብ ዳንዳኢዝ ሲልጣና ዎ ኦ̈ኖ?” ጋ̈ሪ ሶ̈ላምባር ቤቃ̇ዴ።

³ዎቲናካሬ ኣፋሬ ሳ̈ዳ̇ሬ ዎይ ሳ̈ዝ ጻና ጋርታ̇ር ማ̈ቂ̇ን ማጻ̈ፊን ፊርቃ̇ንዳብኬ ኢዝ ጋርቶ̇ን ቤቃ̇ንዳብ ዳንዳኢዝ ኣሲ ኦ̈ናካር ዪዴ።

⁴ማጻ̈ፊን ፊርቃ̇ር ኢዝ ጋርታ ዎን ቤቃ̇ንዳብ ዳንዳኢዝ ሲልጣ̈ና ዎ ኣሲ ቤንታካ̇ዮኮታ̇ቦ ቴ ዎይሊን ዬ̈ካ̇ዴ፤

⁵ዪና ኢዝባራ ጪጛሻን ጋርታፖ ፔታ̇ና̈ዲ ታ̈ኮ “ኔ ዬ̈ካፔ! ዓዲሼ ቤቃ̇ቤ፥ ዳ̈ዊታ ዜር ጋርታ̇ፖ ዬይኖ ዪሁዳ ዜር ማ̈ቂ̇ኖ ዞባ̇ ኢ ጋሚኔ፥ ኢ ማጻ̈ፊን ፊርቃንዳብኬ ታብዛ ማይታማን ቢላ̇ንዳቦ ዳንዳኢ̈ሬ” ጌይዴ።

⁶ዪኒ̇ፖ ዓኒ ዙፋ̈ኒንቦ ሼምፓባሮ ኮቺንታን ኦይዳ̇ንቤኬ ጪጛሻን ጊዳ̇ ሹኪንቲ̇ኖ ዶሪ ማይጺዝ ዶሪ ኤቂ̇ንዶን ቤቃ̇ዴ፤ ዪ ዶራ̈ቦ ታብዛ ኡሺንችኬ ታብዛ ኣ̈ፊ ዎ፥ ኢንታ̇ሬ ኣላማ ዎይ ጋልዳ ኪ̈ቲንታ̇ር ሉኪ̇ኖ ጾ̈ሳ̇ ኣያ̇ና ታብዛን።

⁷ዶራ ዬ̈ሪ ዙፋና ጋልዳ ዶኢኖ ኡሻቻ ኩሺን ጋርታፖ ማጻ̈ፊን ኤኪ̇ዴ።

⁸ኢ ማጻ̈ፊን ኤኪ̇ን ኦይዲ ኮቺንታ̇ንኬ ላምታ̇ም ኦይዲ ጪጛሻን ዶራ ቲ̈ን ፌ ዴ̈ማ̈ባር ጉጲጚዴ፥ ኢንቲ ዎይን ፌ ኩሽታ ዚምቢኬ ኢዝ ጋርታ̇ ኢጻ̈ና ኩሚኖ ዎርቃባር ኮቺ̇ኖ ሙዳ̈ያ ኤኔ፥ ዪና̇ ኢጻ̈ኒንዳ ጌ̈ሻ̇ ኣሳን ዎ̈ሲ̇ዝ ዎ̈ሳ።

⁹ኢንቲ̇ ኦራ ማዝሙራባራ፦ “ኔ̈ኒ ማጻ̈ፊን ኤካ̇ንዳብኬ፥ ኢዝ ጋልዳ ዎ ማይታማን ፊርቃ̇ንዳቦ ኔ̈ብ ቤይሲ̈ሬ፤ ኣባ ጌይን ኔ̈ኒ ሹኪንታ̇ራ ኔ ሱ̈ንባር ኣሳ ዜር ጌይዛ ዎይ ጋርታፖ፥ ሳ̈ዝ ኤ̈ሺ̇ን ጋልዳ ኣሲ ሶ̈ሊንቲ̇ዝ ኖ̈ና ዎይ ጋርታፖ፥ ኣሳ ኮች ጌይዛ ዎይ ጋርታፖ፥ ዎ̈ርዣ ዎይ ጋርታፖ፥ ኣሳ ናኣን ጾ̈ሳ̇ቦ ዎዛንዳቦ፥ ኔ̈ኒ ሹኪንቲ̇ኔ።

¹⁰ኔ ኢንታ ኑ ጾ̈ሳ̇̇̈ቦ ኦ̈ምፔ̈ኒ ካ̈ቲንታኬ ቄ̈ሳኬ፥ ማ̈ቃ̇ምፔ̈ን ዎታዴ፤ ኢንቲ ሳ̈ዝ ጋልዳ ካዉቲ̈ሬ” ዪዝ ጌዪ ዬጺ̇ዴ።

¹¹ቴ ጌዳ ቤቃ̇ምባራ ዙ̈ፋኒንቦ፥ ኮቺንታ̇ንቤኬ ጪጛሻንቦ ቡጊዲንባራ ዎይሊን ኪ̈ታንቻን ጊርሲን ሲስካ̇ዴ፤ ኢንታ̇ሬ ፋይዲርኮ ዎይሊን ሙኩላኬ ዎይሊን ሚ̈ሎ̈ና ማቂ̇̈ሬ።

¹²ኢንቲ̇ ጴች ጊርስባራ፥ “ሹኪንቲ̇ኖ ዶራዲ ዎ̈ልቃ፥ ዱሪቲ፥ ኤሪቲ፥ ሚንቲ፥ ጴቺቲ፥ ቦንችኬ ጋላታ ኤካ̇ንዳብ ኢ̈ብ ቤይሲ̈ሬ” ጌዪ ዬጺ̇ዴ።

¹³ኣፋኬ ሳ̈ዳኬ፥ ሳ̈ዝ ጻ̈ናኬ ባሃራ ጋርታ ዎ ኮቺንታን ዎይ፥ “ዙ̈ፋኒን ጋልዳ ዶኢኖ̈ባኬ ዶራ̈ቦ፥ ጋላታ፥ ጴቺቲ፥ ቦንችኬ ዎልቃ ሜናብ ኢ̈ብ ማ̈ቆ!” ጋ̈ዚን ሲስካ̇ዴ።

¹⁴ኦይዲ ሼምፓባሮ ኮቺንታ̇ንሬ “ኣሚንኤ!” ጌይዴ፤ ላምታም ኦይዲ ጪጛሻንሬ ፌ ዴ̈ሚንባር ኢ ቲ̈ን ኬዳ̇ሪ ኢ̈ብ ሞ̈ኪንቲ̇ዴ።