Read bassa UMOZHIGO 14 Bible Online

UMOZHIGO 14 - bassa bible

UMOZHIGO 14

¹Shɛgwuma shi neshi, ga Amrafɛl agwuma Shaina, na Ariok agwuma Ɛlasa, nɛ Kɛdolaomɛ agwuma Ɛlam keeni Tidal agwuma Goim.

²Shi zhe shaa sukakanɛ Shɛgwuma shi nya shɛ ta nu ujasa: ge Bera agwuma Sụdụm, ne Bisha agwuma Gụmụra, na Shainab agwuma Adma, nɛ Shɛmibɛ agwuma Zɛboim keeni agwuma Bila, (ibɛ gɛtɛtɛ i shɛ Zoa).

³Atwa ga kpaaŋ twa nu ulomu Sidim (ibɛ gɛtɛtɛ i shɛ Itekwu Manɛ).

⁴Shiywa umpwa-na-shɛba-shi-yebi a shɛ ajama Kɛdolaomɛ, ama nu uywa u'umpwa-nu-ba-tatụ aa lacɛ ya.

⁵Ti yaa namɛ shiywa umpwa-na-shɛba-shi-neshi, gɛ Kɛdolaomɛ keeni shɛgwuma shi nya shɛ na shi medenji bu, shɛ zhajɛ ne ejeshi aba, ee kebi Arifɛim a na namɛ na Ashtɛrot-kanaim keeni Ezuzim a na namɛ nu Ham, keeni Emim a na namɛ nu Shave-kariataim.

⁶Keeni Aho a na namɛ ni ihiŋhiŋ Ishɛmɛ ya aba, nɛ ɛ hiɛŋ Sei tutu Ɛl-param a na namɛ no tugwungwu tụ ụshɛka.

⁷Nazhɛ ee gwuri me kwunyi kwunyi, aa zhajɛ Ɛn-mishpat (ibɛ gɛtɛtɛ i shɛ Kadɛsh), ee kebi cɛnjɛ ta Amɛlɛk keeni du A'amo a na jɛjɛ nu Hazazon-tama.

⁸Nazhɛ agwuma Sụdụm, na agwuma Gụmụra, na agwuma Adma, na agwuma Zɛboim keeni agwuma Bila (ibɛ gɛtɛtɛ i shɛ Zoa), ee beni aa twa nu ujasa nu Ulomu Sidim.

⁹Medenji Kɛdolaomɛ agwuma Ilam, ne Tidal agwuma Goim, na Amrafɛl agwuma Shaina keeni Ariok agwuma Ɛlasa, shɛgwuma shɛ ga shi neshi shi sukakanɛ shɛgwuma shɛ ta nu ujasa.

¹⁰Ogodo na 'yajɛ tuko kaa barɛ nu Ulomu Sidim. Gana na ta shɛgwuma shi Sụdụm keeni Gụmụra shi gezhiji, emeseyi aba oko 'waŋ no ogodo ata, ibɛ po atwa vwɛ aba gezhiji, ee zhe nu nshama.

¹¹Ibɛ po atwa i'ime ya aba suji i'wɛŋnɛ ya atwa Sụdụm keeni inɛ ya atwa Gụmụra kpaaŋ keeni iyimɛyɛ ya aba, ee hwuri.

¹²Ee shepi du Lụt, yɛu buhongwu Abram, na ga jɛjɛ nu Sụdụm ti i'wɛŋnɛ ibwɛ ee hwuri.

¹³Nazhɛ bụtụ bu ko na bananganɛ nu ujasa ata zhajɛ, bee mbishi Abram Bihibru ata, na namɛ to dongwu i'wɛ'wɛ ɛtɛ ekpekpeshi inɛ Mamre na shɛ Bu'amo ata, yɛu-bino Ɛshkol keeni Anɛ. Atwa ga lemeni Abram amɛ.

¹⁴Aka na ti ga Abram hwụjɛ maa ujasa yɛ ba yɛu buhongwu bwa, bee zeriji atwa ubwa a na seshi ujasa, atwa kpakwụ-ni-dipi-yebi-ne-eshe-umpwa-na-ba-tụndatụ (318), a na ee meci ni ihwɛ ibwɛ. Baa sanɛ bee urigeni aŋ tutu Dan.

¹⁵Boo dwotwogonu atwa ubwa nụ ụjita maa aa sukakanɛ aŋ keeni miaụŋ mu bwa mu ugondu, bee kebi aŋ, bee urigeni aŋ tutu Hoba, tuzuba tu Damaskos.

¹⁶Nazhɛ bee gwuricinje i'wɛŋnɛ ye elele, bee gwuricinje du yɛu buhongwu bwa ga Lụt medenji i'wɛŋnɛ ibwɛ, keeni eyikwo keeni atwa ata hwɛɛ.

¹⁷Na aba na tu ga Abram gwure no olugwo na bɛɛ kwunɛ Kɛdolaomɛ keeni shɛgwuma shɛ na shɛ namɛ nɛ Kɛdolaomɛ. Nazhɛ agwuma Sụdụm beni maa taga bụ uhwaŋna nu Ulomu Shave (ibɛ i shɛ Ulomu wa agwuma).

¹⁸Gɛ Mɛlkizɛdɛk agwuma Salɛm suje iyimɛyɛ keeni meni mu tụ'walụ ta afwafwa. Ubwa kaa shɛ bunongbo bụ 'wụtụ ba Agwatana na Hwuri Kpaaŋ.

¹⁹Bee peni Abram uwebiye bɛɛ hiɛŋ, Ga Agwatana na Hwuri Kpaaŋ, na njɛ azuba keeni cɛnjɛ tu unyizo peni Abram uwebiye!

²⁰Go zhemonjino Agwatana na Hwuri Kpaaŋ, ubwa na njɛ maa eri atwa i'ime bu. Ibɛ po ga Abram peni bu iyi-u'umpwa iyi elele nɛ bɛɛ lɛshijɛ nu ujasa ata.

²¹Nazhɛ agwuma Sụdụm hiɛŋ Abram, M peni atwa ga maa suji tuba i'wɛŋnɛ iwɛ ikɛnyi bụ.

²²Ama ga Abram hiɛŋ agwuma Sụdụm, N to AGWANGWAMA na shɛ Agwatana na Hwuri Kpaaŋ, na njɛ azuba keeni unyizo,

²³maa N zha shɛ ma lashɛga okwo uhwohwo bizhe uko, kwo kaa u'waba ubida uko, kwo kaa iyi elele nɛ i shɛ inɛɛ bu o. Iwɛ aka na ɛbi zhɛ bɛ hiɛŋ hwuŋ maa, Gamba n njɛ Abram bɛzhɛgba.

²⁴N zha shɛ ma shapa iyi elele, semi iyi nɛ miaụŋ mi tisemberi mi yɛwa kiri keeni urobwo wa atwa na zhe ne mi. Ga ga Anɛ, nɛ Ɛshkol keeni Mamre, a na m mepeni iwɛ suji urobwo wa aba.