Read bassa UMOZHIGO 15 Bible Online

UMOZHIGO 15 - bassa bible

UMOZHIGO 15

¹Na aba na ti ijɛ ndanjɛ, AGWANGWAMA mbishi Abram n-ndumwa no ozobu, bɛɛ hiɛŋ, Abram, ta nda inyɛsɛ o, Gamba n shɛ ijilɛni bụ, titeni tụ bụ ti zhɛ to gombo duwa.

²Ama ga Abram hiɛŋ bụ, Oo AGWANGWAMA na shɛ Agwatana, imbe kwuuŋ ɛbi zhɛ bu ma m panaa? N zasa kaa yɛu o, ge Eliɛzɛ, bụtụ ga bu Damaskos, ubwa kaa zhɛ ba ya hwuŋ ogwu mi.

³Ga Abram hiɛŋ bụ, Hioko, bu m peni shi kaa miaụŋ, bujama ga ee meci ni ihwɛ mi ubwa zhɛ ba ya hwuŋ ogwu mi.

⁴Nazhɛ AGWANGWAMA mbishi bu, bɛɛ hiɛŋ, Shɛ bụtụ ga zhɛ ba ya hwuŋ ogwu bu o, yɛu bụ ye eyi ikɛnyi bụ, ubwa zhɛ ba ya hwuŋ ogwu bu.

⁵Ibɛ po AGWANGWAMA bɛcinjɛ bụ no tupohondo, bɛ hiɛŋ bụ, Mbiyana tụla, makana okwo bi eri ba rɛta mkpasu ma ata. Yaa shɛ ebi eri ba rɛta mụ, asha gabata du ajalalo bu zhɛ a sha.

⁶Baa tɛtanɛ n-ndumwa mu na AGWANGWAMA mbishi bu rishe, ibɛ po Agwatana rɛcɛ iŋ no ofwo ubwa maa i teni cɛŋ.

⁷Nazhɛ AGWANGWAMA hiɛŋ Abram, Gamba n shɛ AGWANGWAMA na ubu bɛcinjɛ nu Uu, na cɛnjɛ tu Babulon, maa ma bụ pana cɛnjɛ tu ga maa 'yaga tụ.

⁸Ama ga Abram hiɛŋ bụ, Oo AGWANGWAMA na shɛ Agwatana, gana naa Ngɛɛ zhɛ ma mapa maa Gamba n zhɛ ma 'yaga tụụ?

⁹AGWANGWAMA hiɛŋ bụ, N shapɛrɛganɛ unoyikwo buna na namɛ shiywa shɛ tatụ te e meci bu, keeni unoyikwo biywoywo na namɛ shiywa shɛ tatụ te e meci bu, nu udagba na namɛ shiywa shɛ tatụ te meci bu, keeni ikwucime keeni biywoywo bu ulukwukwu.

¹⁰Ga Abram sugeni bu ga ijɛ ɛtɛ kpaaŋ, bee jejeji iŋ iyebi yebi, bee shepi zalụ zalụ bee kwutenji nu unya, ama bi jejeji shi shanụnụ sha ata towuŋ towuŋ o.

¹¹Aka na to ogwulu kezhe aa patanganɛ usunda ata ee ge jejeji, ga Abram unzhi aŋ.

¹²Aka na tu uwaŋna zhɛ utwonuo, ga Abram leyi malabụ mụ 'wụtụ, baa kwụbɛ te tishi tu ko tụ 'wụtụ tu na tɛ shɛ bụ inyɛsɛ ti zhaganɛ bụ.

¹³Nazhɛ AGWANGWAMA hiɛŋ Abram, Mapa gom maa ajalolo bu zhɛ a sha hwuŋ alashɛ na cɛnjɛ tu na tɛ shɛ shɛ ma ta aba, ɛ zhɛ a sha ajama apata, ɛ zhɛ a nda aŋ umungwuta shiywa akpakwụ-eyebi.

¹⁴Ama N zhɛ ma pana udenji ata aa shɛ ajama aba ulwapɛ, nazhɛ ɛɛ zhɛ a banɛ apata ni i'wɛŋnɛ i'wɛtwɛ.

¹⁵Inɛɛ bụ shɛ bi zhɛ ba inga tebiye nazhɛ 'wi, ɛ zhɛ kaa mo bu no na amɛ-olom.

¹⁶Uwaŋnɛ wa aba uneshi ubwa zhɛ we gwure epe, iwɛnɛ to tugworozwo ta A'amo tu ta ulwa sụ tutu uce.

¹⁷Aka na tu uwaŋna teni, ụjita shi, ibɛ ulwa nshikwo keeni bụratụ bu ulwa twatwagwụ wee keshici na ashashɛ usunda ata ee ge jejeji.

¹⁸Nụ ụjita ata, nazhɛ AGWANGWAMA twa-unu na Abram, bɛɛ hiɛŋ, M pwonuo ajalalo bu cɛnjɛ tu ga, te kwuni nu Urefu Ijipti tutu i ci Urefu ata ụ'wụtụ Yufretis.

¹⁹Aba zhɛ a 'yaga ta cɛnjɛ te Eken, ne Ekenez keeni Akadmon.

²⁰Nɛ Ɛhit, nɛ Ɛpɛrɛz, nɛ Ɛrɛf.

²¹Na A'amo, ne Ekenan, na Agɛgash keeni Ɛjɛbus.