Read bassa UMOZHIGO 2 Bible Online

UMOZHIGO 2 - bassa bible

UMOZHIGO 2

¹Gabata azuba keeni unyizo hwuwowu tɛnda, ti iyi elele nɛ zweni nu bwa.

²Agwatana kwunanjɛ ugondu na baa njɛ, nụ ụjita ucenje, nụ ụjita ata ucenje, boo to du ụhinjaŋụ nu ugondu we elele na baa njɛ.

³Nazhɛ Agwatana peni ụjita ata ucenje uwebiye, baa njɛ uŋ tijilo, iwɛnɛ ti yaa shɛ nụ ụjita ata baa kwunanjɛ ugondu we elele na baa njɛ, ibɛ po boo to ụhinjaŋụ.

⁴Gana na aa njɛ azuba tu unyizo hwɛɛ ta. Ibɛ shɛ nụ ụjita na AGWANGWAMA na shɛ Agwatana njɛ cɛnjɛ tu unyizo keeni azuba.

⁵Ambɛ elele keeni i'wɛ'wɛ swoswoswo ta unshɛ shɛ la nu unyizo na aka ata o, iwɛnɛ ta AGWANGWAMA na shɛ Agwatana ta njɛ shɛ la maa eshilo ngbi na cɛnjɛ tu unyizo, bụtụ kaa du ta zasaba la maa bu na hwaŋ itimɛ o.

⁶Ama uzhikwozhikwo ubwa mwe na cɛnjɛ, wee lemicinji cɛnjɛ kpaaŋ.

⁷Na aba ibɛ nazhɛ AGWANGWAMA na shɛ Agwatana mo bụtụ[1] nu upwupwutu cɛnjɛ, bee hwulupeni bu ihwungwɛ ni inyɛnu ibwɛ, ibɛ po bụtụ shɛ ya buumwa.

⁸Nazhɛ AGWANGWAMA na shɛ Agwatana jwe itimɛ ni Idɛn, zalụ bu uwaŋna-banụ, bee shiri bụtụ ata boo mo apata.

⁹AGWANGWAMA na shɛ Agwatana njɛ maa ga ụ'wụ'wụ we elele na pilanụ igbɛtɛtɛ, tu unaa na zhɛmɛ iwɛ iyimɛyɛ unshɛ. Ụ'wụ'wụ uraiŋ keeni ụ'wụ'wụ na wa nda maa bụtụ mepi iyi ibiye keeni iyi iwɛ shikeni du na ashashɛ itimɛ ɛtɛ.

¹⁰Urefu uko banɛ ni Idɛn maa u no zwogono itimɛ ɛtɛ meni, te kwuni apata woo bogotogwu, waa shɛ erefu eneshi.

¹¹Ɛ hiɛŋ izeci una uko Pison, ubwa shɛ una ata rungwutwonu cɛnjɛ tu Havila no ofwo na azhɛnarɛya namɛ.

¹²Azhɛnarɛya cɛnjɛ ta ata zhɛmɛ, bdɛlium na shɛ gana utayɛ, keeni onikis namɛ apata.

¹³Ɛ hiɛŋ izeci Urefu uyebi Gihon, una ata ubwa rungwutwonu cɛnjɛ tu Kush kpaaŋ.

¹⁴Ɛ hiɛŋ izeci Urefu ụtatụ Hidɛkɛl, una ata ubwa wa fwunga geri bu uwaŋna-banụ ba Asiria. Ɛ hiɛŋ izeci Urefu uneshi Yufretis.

¹⁵Nazhɛ AGWANGWAMA na shɛ Agwatana shiri bụtụ ata ni itimɛ Idɛn iwɛ maa bu na hwaŋ iŋ, keeni maa bu na ngbaraka iŋ.

¹⁶Nazhɛ AGWANGWAMA na shɛ Agwatana peni bụtụ ata unu, bɛɛ hiɛŋ, M bu leneni maa na ya tụ'walụ ti i'wɛ'wɛ ye elele nɛ namɛ ni itimɛ gɛ na ahaŋsa oko.

¹⁷Ama ta ya tụ'walụ tu u'wụ'wụ ata wa nda maa bụtụ mepi iyi ibiye keeni iyi iwɛ kwukwuŋ, iwɛnɛ po nụ ụjita na abɛ yɛ ma tuta bi zhɛ bo 'wo tilɛɛ.

¹⁸Nazhɛ AGWANGWAMA na shɛ Agwatana hiɛŋ, I zhɛshɛ maa butubwenyi nama bwooko gba o, N zhɛ ma ndana bụ bụtụ timbiyono na teni cɛŋ nu bwa.

¹⁹Nazhɛ AGWANGWAMA na shɛ Agwatana mo Isundɛ ehilo ye elele, ta shanụnụ sha azuba she elele na cɛnjɛ, bee suje iŋ pa bụtụ ata maa pagana iŋ izeci, izeci elele nɛ bụtụ ata po iyi-uumwa ye elele, asha izeci ibɛ tɛ ya.

²⁰Ibɛ po bụtụ ata po iyimabiga, ta shanụnụ, ti isundɛ ehilo ye elele kpaaŋ izeci, ama bụtụ ata zasa bụtụ bi yebi na teni cɛŋ nu bwa maa bu no mbiyono bu o.

²¹Nazhɛ AGWANGWAMA na shɛ Agwatana keri bụtụ ata malabụ mụ 'wụtụ, baa vwɛ ikpɛngɛ bụtụ ata tu boo woto malabụ, bee gwuricinje tu'waba bee urigeni.

²²Nazhɛ AGWANGWAMA na shɛ Agwatana njɛ biyikwo ni ikpɛngɛ ebe bɛɛ vwɛ na tu'waba ta bụtụ ata, baa shapɛ bụ pa bụtụ ata.

²³Nazhɛ bụtụ ata hiɛŋ, Hwuwayɛ go inɛ gɛ shɛ ya u'umpwo na banɛ no o'umpwo mi, keeni usunda-tu'waba na banɛ nu usunda-tu'waba mu, ɛ zhɛ ɛ hiɛŋ bụ, Biyikwo, iwɛnɛ tɛ ɛ bɛcinjɛ bụ no olugwo butubwenyi.

²⁴Iwɛbɛ po bụtụ ba ganga bishi bwa no bino bwa maa togwu ne biyikwo bwa, maa a shɛ usunda-tu'waba uko.

²⁵Ebe yebi ata namɛ mohondo, ta bụtụ ata ne biyikwo bwa, aba kaa njɛ shɛ ezuye o.