Read bassa UMOZHIGO 3 Bible Online

UMOZHIGO 3 - bassa bible

UMOZHIGO 3

¹Uhwa incɛ wee hwuri usunda ehilo ye elele na AGWANGWAMA na shɛ Agwatana karɛ. Ibɛ uhwa ata heŋteni biyikwo ata, bɛɛ hiɛŋ, Iwɛ-tɛkana ga hilŋ maa Agwatana hiɛŋ, Ta ya ma tụ'walụ ti i'wɛ'wɛ itimɛ gɛ?

²Nazhɛ biyikwo ata jishijɛ uhwa ata, bɛɛ hiɛŋ, E ti leneni maa ta ya tụ'walụ ti i'wɛ'wɛ ye elele nɛ namɛ ni itimɛ gɛ.

³Ama Agwatana hiɛŋ, Ta ya ma tụ'walụ tụ ụ'wụ'wụ ata shikeni na ashashɛ itimɛ gɛ o, okwo tutumongono kede to tumongono shibwonu ti zhɛ to 'wo.

⁴Ama uhwa hiɛŋ biyikwo ata, Shɛ iwɛ-tɛkana maa hi zhɛ hio 'wo tilɛɛ o.

⁵Agwatana mepi maa gunu na ahiɛ yɛ tụ hwayɛ, eshe hiŋ zhɛ a kapɛshɛngwa, hia sha gana bwa, hia mapa iyi ibiye ni iyi iwɛ.

⁶Aka na te biyikwo ata heŋshi maa tụ'walụ tụ ụ'wu'wụ ata tɛ zhɛmɛ tiya, ta a pilanụ kaa igbɛtɛtɛ, te e eri ta nda du kaa maa bụtụ incɛ. Bee cwe tụ'walụ ta ata baa yɛ, bee peni du bwolo bwa, baa yɛ.

⁷Gunu ata ta a yɛ tụ, e eshiciji ya maa a namɛ mohondo, aa tata ambɛ owowo aa la ne embi aba.

⁸Aka na ta a hwụjɛ bụlama ba AGWANGWAMA na shɛ Agwatana tu boo rungo ni itimɛ ɛtɛ nụ ụrụmɛ, ibɛ po bụtụ ata, te biyikwo bwa gezhigeni bu, ee zhe aa swacɛ ni i'wɛ'wɛ nɛ namɛ ni itimɛ ɛtɛ.

⁹Ibɛ po AGWANGWAMA na shɛ Agwatana suyanɛ butubwenyi ata, bɛɛ hiɛŋ bụ, Cee abụ namɛɛ?

¹⁰Bɛɛ jishijɛ bụ, bɛɛ hiɛŋ, N hwụjɛ bụlama bụ ni itimɛ gɛ, ibɛ po inyɛsɛ n shɛ, Ngaa swacɛ, iwɛnɛ tu Ngaa namɛ mohondo.

¹¹Agwatana hiɛŋ bụ, Gaaba ibi mbishi maa bu namɛ mohondoo? Bɛ yɛ suu tụ'walụ tụ ụ'wụ'wụ ata Ngɛɛ bi hiɛŋ la ta ya?

¹²Nazhɛ bụtụ ata hiɛŋ bụ, Biyikwo ga ebi m peni, ubwa m peni tụ'walụ tụ ụ'wụ'wụ ata Ngaa yɛ.

¹³Nazhɛ AGWANGWAMA na shɛ Agwatana heŋteni biyikwo ata, bɛɛ hiɛŋ, Imbe po abɛ njɛ ijɛɛ? Biyikwo ata hiɛŋ, Uhwa n helekeci ibɛ po Ngaa yɛ.

¹⁴Ibɛ po AGWANGWAMA na shɛ Agwatana hiɛŋ uhwa ata, E bi keleni-unu uhwuri iyimabiga ye elele, tu usunda ehilo we elele, iwɛ ijɛ abɛ njɛ, ibɛ po unu-tukalana ga zhɛ wa ima usunda ehilo we elele, keeni iyimabiga. Te kwuni nu hwayɛ, na amɛ bụ ɛbi zhɛ bu no hombilo. Upwupwutu ɛbi zhɛ bu na ya tutu tu'wo tụ bụ.

¹⁵N zhɛ ma bila uwuru na ashashɛ bụ ne biyikwo, ta ashashɛ miaụŋ mu bwa na miaụŋ mụ bụ. Miaụŋ mu bwa mi zhɛ mu no rukoto uhiuhiu bu, gabụ du bi zhɛ bu na lụmanga oshikwuru aba.

¹⁶Nazhɛ AGWANGWAMA hiɛŋ biyikwo ata, N zhɛ ma kaana amɛ-tụhaŋtụ bụ duwa no ofubo bu ti'yaga, nụ ụngwụ-tuhwuga ɛbi zhɛ ba mata miaụŋ, bwolo bu zhɛ na bu dwa eshe, ubwa kaa zhɛ ba 'yaga ụhwada bụ.

¹⁷Bɛɛ hiɛŋ bụtụ ata, E keleni cɛnjɛ unu iwɛ bụ, iwɛnɛ abụ hwụjɛ-unu biyikwo bu, abɛ yɛ tụ'walụ tụ ụ'wụ'wụ ata Ngɛɛ bi hiɛŋ la ta ya o. Bi zhɛ bu na hwaŋ itimɛ duwa tutu tu'wo tụ bụ, nazhɛ ɛbi zhɛ bu na 'yaga iyimɛyɛ nɛ zhɛ mo bu gombo tiya.

¹⁸Tu'untwo keeni esepi zhɛ nɛ unshɛ ni ibɛ, abuba ɛbi zhɛ bu na ya.

¹⁹Bi zhɛ bu na nda ugondu duwa maa bwezhi, nazhɛ cɛnjɛ ti zhɛ ta bu matanga iyimɛyɛ tutu bu to gwulo na tuba, iyi nɛ po na tuba aa ga bɛ njɛ la, upwupwutu abɛ shɛ, nu upwupwutu ata ɛbi zhɛ bo gwulo.

²⁰Ga Adam[2] po biyikwo bwa izeci ti ge Ivi,[3] iwɛnɛ tu baa shɛ bino bi iyi-uumwa kpaaŋ.

²¹Nazhɛ AGWANGWAMA na shɛ Agwatana ndanɛ Adam ne biyikwo bwa n-nduka nu u'waba usunda, bee hwuŋtengeni aŋ.

²²Nazhɛ AGWANGWAMA na shɛ Agwatana hiɛŋ, Hioko bụtụ shɛwa ya gana tu, bee mepi iyi ibiye ni iyi iwɛ, hwuwayɛ go bɛ shɛ shɛ ba ya ya tụ'walụ tụ ụ'wụ'wụ ata uraiŋ maa nama unyizo-nom o.

²³Iwɛbɛ po AGWANGWAMA na shɛ Agwatana becinji bu ni itimɛ ɛtɛ Idɛn, maa ga bu na hwaŋ itimɛ na cɛnjɛ te ebe aa ga njɛ bụ na tuba.

²⁴Nazhɛ baa gɛgɛcɛnjɛ iyi-uumwa keeni utokwobi na shɛ gana bụratụ bu ulwa na wa jɛsharaga zalụ hweehwe, geri bu uwaŋna-banụ bi itimɛ ɛtɛ Idɛn, iwɛ maa kede bụtụ be elele gwumwongonu ya nụ ụ'wụ'wụ ata uraiŋ o.