Read bassa UMOZHIGO 30 Bible Online

UMOZHIGO 30 - bassa bible

UMOZHIGO 30

¹Aka na ti ge Rechɛl kwụbɛ maa bi metenji shi Jekob miaụŋ o, ibɛ po baa nda isɛbwɛngwɛ na batagwụ bwa. Bɛɛ hiɛŋ Jekob, M peni miaụŋ, shibwonu N zhɛ mo 'wo!

²Nazhɛ isɛbwɛ Jekob ishijɛ ne Rechɛl, bɛɛ hiɛŋ bụ, Gamba suu n shɛ Agwatana na kepeni tumata tụ bụ uhwaŋna?

³Nazhɛ ge Rechɛl hiɛŋ, Ge Bilha, yɛu-yo-o nɛ namɛ ni i'ɛlɛ mi nɛ, zhaga woto nu bwa, maa mata yɛu maa Ma 'waŋna, maa Ma 'yaga miaụŋ tedure nu bwa.

⁴Bee peni ga Jekob yɛu ɛtɛ yo o nɛ namɛ ni i'ɛlɛ ibwɛ ge Bilha, ge Jekob weci nu bwa.

⁵Ge Bilha le ofubo bee metenji bu yɛu-ye-eyi.

⁶Nazhɛ ge Rechɛl hiɛŋ, Agwatana n dumwangwanua ụshɛrɛya mu, Baa hwụjɛ du rụhwụŋ ri mi, bee m peni yɛu-ye-eyi, iwɛbɛ po boo po iŋ izeci ti ga Dan.[36]

⁷Nazhɛ yɛu-yo-o nɛ namɛ ni i'ɛlɛ Rechɛl ge Bilha le ofubo sasana, bee metenji Jekob yɛu-ye-eyi iyebi.

⁸Nazhɛ ge Rechɛl hiɛŋ ifelu i'wɛtwɛ Ngaa twa na batagwụ mi, N fwụjɛ bụ kaa, boo po iŋ izeci ti ga Naftali.[37]

⁹Aka na ti ge Lia kwụbɛ maa bi genji miaụŋ tumata, bee shepi yɛu-yo-o nɛ namɛ ni i'ɛlɛ ibwɛ ge Zilpa, bee peni du Jekob maa sha biyikwo bwa.

¹⁰Ibɛ po yɛu-yo-o nɛ namɛ ni i'ɛlɛ Lia ge Zilpa metenji Jekob yɛu-ye-eyi.

¹¹Ge Lia hiɛŋ, N 'yajɛ uwaŋna-ubiye! Ibɛ po boo po iŋ izeci tu ga Gad.[38]

¹²Nazhɛ yɛu-yo-o nɛ namɛ ni i'ɛlɛ Lia ge Zilpa metenji Jekob yɛu-ye-eyi iyebi.

¹³Ge Lia hiɛŋ, N 'yajɛ unyasa! Eyikwo vwɛ zhɛ mɛ n hiɛŋ bụtụ bu unyasa, ibɛ po boo po iŋ izeci ti ga Ashɛ.[39]

¹⁴Aka na ta adwa iyimɛyɛ, gɛ Rubɛn zhe ne ehilo bɛɛ kwụbɛ tụ'walụ to okolokwu,[40] bee suje tu, bee peni bino bwa ge Lia. Nazhɛ ge Rechɛl hiɛŋ Lia, Ma bu tabwa, n tɛrɛ ka okolokwu yɛu bu cwɛŋ.

¹⁵Ama ge Lia hiɛŋ bụ, Iyi ticwɛŋ ree yaa bu shanɛ te ebi leshiji bwolo mi? Bi zhɛ ba lashɛganana ree okolokwu yɛu mi? Ge Rechɛl hiɛŋ bụ, Yaa shɛ ebi m peni okolokwu yɛu bụ, ge Jekob zhɛ bo woto na bụ nụ ụrụmɛ go.

¹⁶Aka na ti ge Jekob be ci ujiyo ehilo nụ ụrụmɛ, ge Lia beni bee teji bu uhwaŋna, bɛɛ hiɛŋ bụ, Bɛ shɛ bo woto ne mi nụ ụrụmɛ go, iwɛnɛ tu Ngoo bu sowo no okolokwu yɛu mi. Ge Jekob weci ga nu bwa nụ ụrụmɛ ata.

¹⁷Nazhɛ Agwatana hwụjɛ ilipwɛ Lia, bee le ofubo, bee metenji Jekob yɛu-ye-eyi itana.

¹⁸Ge Lia hiɛŋ, Agwatana m peni titeni ti mi, iwɛnɛ ti Ngee peni bwolo mi yɛu-yo-o nɛ namɛ ni i'ɛlɛ mi, ibɛ po boo po iŋ izeci ti ge Isaka.[41]

¹⁹Ge Lia le ofubo sasana, bee metenji Jekob yɛu-ye-eyi icihiŋ.

²⁰Nazhɛ ge Lia hiɛŋ, Agwatana n tụpajɛ itɛpwɛ ibiye. Bwolo mi zhɛ ba gɛga ya ne mi hwuwayɛ, iwɛnɛ ti Ngee metenji bu miaụŋ-me-eyi mi cihiŋ, ibɛ po boo po iŋ izeci ti gɛ Zɛbulon.[42]

²¹Na aba ibɛ nazhɛ bee meci yɛu-yo-o. Boo po iŋ izeci ti ga Daina.

²²Nazhɛ Agwatana teyinje Rechɛl, Agwatana kaa hwụjɛ ilipwɛ ibwɛ, bee kepishinji igwune ibwɛ i tumata.

²³Bee le ofubo bee meci yɛu-ye-eyi, bɛɛ hiɛŋ, Agwatana peshinji ụpụrụsa mu.

²⁴Boo po iŋ izeci tu go Josɛf.[43] Bi hiɛŋ, Ga AGWANGWAMA n keeni yɛu-ye-eyi inyɛ!

²⁵Aka na ti ge Rechɛl meci Josɛf, ge Jekob hiɛŋ Laban, N genji ya maa Mo hwulo ujiyo ni ihwɛ mi keeni na cɛnjɛ ti mi.

²⁶M panɛ eyikwo mi, na miaụŋ mi mi a na Ngaa bu ndanɛ ugondu iwɛ aba. Lono maa Mo hwulo ya, gabụ du bi mepi ugondu na Ngaa bụ ndanɛ.

²⁷Ama ga Laban hiɛŋ bụ, Yaa shɛ iwɛ mi ubu kwụlanɛ, sukwu asha gɛga. N kwụbwa ni iyi nɛ tenenji maa AGWANGWAMA m peni-uwebiye tedure iwɛ bụ.

²⁸Duma iyi nɛ shɛ utashɛ bụ, maa Ma bụ tụpa uŋ.

²⁹Ge Jekob jishijɛ bụ, bɛɛ hiɛŋ, Gabụ du bi mepi gana na tu Ngaa bụ ndanɛ ugondu, keeni gana na tu Ngaa 'imɛ iyimabiga bu u'ala.

³⁰Iyi nɛ abɛ 'yajɛ la namɛ cwɛŋ ti Ngee ci epe, ama i keeni ya ugombo duwa, AGWANGWAMA kaa m peni-uwebiye no ofwo elele na Ngee duleji. Ama aka naa tuba Ngɛɛ zhɛ ma nda iyi nɛ maa ma biga atwa ihwɛ mii?

³¹Ga Laban heŋteni Jekob, bɛɛ hiɛŋ, Imbe Ngɛɛ zhɛ ma bụ tụpaa? Ge Jekob jishijɛ bụ, bɛɛ hiɛŋ, Yaa shɛ ɛbi zhɛ bo lono iwɛ gɛ Ngɛɛ zhɛ ma duma, asha bu zha shɛ bu ma n tụpa ya iyi elele ti Ngɛɛ zhɛ ma ta tuhwulo ta agwụdụ bụ tungbaraka o.

³²N zhɛ mo tonongo hwayɛ ga unyama wa agwụdụ bụ kpaaŋ, maa Mo sugo miaụŋ-ma-agwụdụ mi shi hwɛɛ, keeni miaụŋ mi iyweywe nɛ 'yajɛ tubana, a na ata aba zhɛ a sha tụtụpa ti mi.

³³Tiririri ti mi ti zhɛ ta pana ajɛshɛgwa mi nụ ụjita ti beyi, na aka na ta abu zhajɛ maa kwụbɛ titeni ti mi. Iyweywe ye elele nɛ zasa tubana ti tiwere were keeni ti'nyeci ti ti'nyɛ 'nyɛ 'nyɛ keeni miaụŋ-ma-agwụdụ na mɛ shɛ mi shi no olugwo mi asha tuzundo Ngee zunji a na ata.

³⁴Ga Laban hiɛŋ bụ, I zhɛmɛ! Ga i shɛ gana na abɛ jɛmɛ.

³⁵Ama nụ ụjita ata ga Laban suji epi na 'yajɛ ti'nyeci tụ tụmbwụụ mbwụụ keeni anaa na 'yajɛ tubana keeni iyweywe yo o nɛ 'yajɛ tubana keeni inɛ ye elele nɛ tubana tɛ cɛnjɛ tu namɛ na tu'waba ti ibɛ, ti yɛu-ụgwụdụ ye elele nɛ shɛ ishi, bee utegeni miaụŋ mu bwa me eyi maa mu na ngbaraka a na ata.

³⁶Be genji Jekob taa dụlụ i ci tahaŋnụ ti ijitɛ itɛtu, ge Jekob tuba ba biga iyimabiga Laban nɛ vwɛ.

³⁷Nazhɛ ge Jekob suji imbele i'wɛ'wɛ nɛ ɛɛ hiɛŋ popla keeni almond keeni plene nɛ te lemi, be bwedeji, baa bwụranjɛ iŋ dere dere, baa njɛ maa ga tu'waba tɛ cɛnjɛ ti imbele ɛtɛ ti hikekeni.

³⁸Bee tileni imbele ebe bee bwedeji nu umbe unyama iyimabiga, nu ukporo na meni ma fwunga moo zwo no ofwo na unyama wa agwụdụ keeni iyweywe ya swa meni. Iwɛnɛ po iyimabiga yo mungo inyɛ aka na aa zhajɛ maa e swe meni.

³⁹Aka elele na ti iyweywe meci nu umbe imbele ɛtɛ, oywoywo aba a sha a na ti'nyeci ti tiwere were keeni a na tubana keeni a na ti'nyeci ti ti'nyɛ 'nyɛ 'nyɛ.

⁴⁰Ge Jekob bogwu miaụŋ-ma-agwụdụ ni iyweywe, bee peni eshe aba geri ba a na ti'nyeci ti tiwere were keeni a na eshi kpaaŋ a na zweni ni iyimabiga Laban. Gana baa njɛ ta, upo iyi ibwɛ keeni ugombo, bee tileni a na ubwa swooŋ, bi tileni shi a na ubwa urubwo uko nu unyama wa agwụdụ Laban o.

⁴¹Na aba ibɛ, aka elele na tu unyama wa agwụdụ na 'yajɛ ulapiya 'yajɛ meni na amɛ, ge Jekob bo tulono imbele nu ukporo ata namɛ nu umbe unyama wa agwụdụ maa o zwono na ashashɛ imbele ɛtɛ maa e meci miaụŋ.

⁴²Ama aka na tu unyama wa agwụdụ na shɛ asụnyasụ zhajɛ hwayɛ, bi zha shɛ bo tulono imbele ɛtɛ nu umbe wa aba o, gabata a na ata shɛ asụnyasụ aba shɛ a na Laban, a na ata tuba 'yajɛ ulapiya aba shɛ a na Jekob.

⁴³Gana ge Jekob njɛ upo bee keeni ugombo na bɛzhɛgba tisha duwa duwa keeni unyama wa agwụdụ, na ajama o o keeni ajama eyi keeni nruhondo keeni nzhinyacɛ ta.