Read bassa UMOZHIGO 37 Bible Online

UMOZHIGO 37 - bassa bible

UMOZHIGO 37

¹Ge Jekob jɛjɛ na cɛnjɛ ti Kenan tu na bishi bwa jɛjɛ la.

²Rụrụkwụkwụ ru umwamwa Jekob na. Go Josɛf namɛ shiywa umpwa-na-shɛba-shi-cenje te e meci bu, nazhɛ baa ngabaraka agwụdụ keeni iyweywe na atagwụ ubwa, ubwa kaa ta shɛ yɛu na ashashɛ miaụŋ-me-eyi mi Bilha na mu na Zilpa, a na shɛ eyikwo bishi bwa. Go Josɛf shapɛrɛganɛ bishi ba aba unabarɛ wa aba ụwɛ.

³Ge Isrɛl kaa bo lubo Josɛf uhwuri yɛu ibwɛ ye elele, iwɛnɛ tu baa shɛ yɛu ibwɛ nɛ bee meci na ti'inga tu bwa. Bee tegeneni bu idikɛ i'ɛlɛ nɛ 'yajɛ ti'nyeci tu tuswoswoswo.

⁴Ama aka na atagwụ ubwa kwụbɛ maa bishi ba aba bo lubo bu uhwuri aŋ kpaaŋ aba, ibɛ po oo to bu ni i'ime. E eri shi a dumanga n-ndumwa nu bwa na amɛ-olom tebiye o.

⁵Go Josɛf wetegeni ụwalabụ uko, aka na ti bee mbishi atagwụ ubwa ụwalabụ ata, ee keeni bu i'ime tuta.

⁶Bɛɛ hiɛŋ aŋ, Hwuga ma ụwalabụ na Ngee wetegeni.

⁷Tu zweni ne ehilo oto umpo eshi ohiu, ibɛ ushi rihiu ri mi ishijɛ wee shikeni to, nazhɛ eshi ohiu hiŋ rungwutwonu uŋ, ee kwuzeni ushi rihiu ri mi.

⁸Ibɛ po atagwụ ubwa hiɛŋ bụ, Asha gabụ suu bi zhɛ ba sha agwuma tu kwo kaa gabụ suu bi zhɛ ba 'yaga ụhwada tu? Ibɛ po ee keeni bu ya ti'imo iwɛ ụwalabụ ata ubwa keeni iwɛ n-ndumwa ma ata baa dumanjɛ.

⁹Go Josɛf wetegeni ụwalabụ unya, bee mbishi atagwụ ubwa, bɛɛ hiɛŋ, N wetegeni ụwalabụ unya, ibɛ uwaŋna nu upiana keeni mkpasu umpwa-nu-boo-ko e n kwuzeni.

¹⁰Ama aka na ti bee mbishi bishi bwa keeni atagwụ ubwa. Bishi bwa tezhigeni bu, bɛɛ hiɛŋ bụ, Ụwalabụ imbe nɛ ebu wetegenii? Asha Gamba no nobu keeni atagwụ bụ suu ti zhɛ to bu kwuzono?

¹¹Nazhɛ atagwụ ubwa kwuni isɛbwɛngwɛ tɛnda nu bwa, ama bishi bwa kaa untanganɛ iwɛ ɛtɛ na ahaŋsa ubwa.

¹²Jitoo ko atagwụ Josɛf suji agwụdụ bishi ba aba ee zhe ne ehilo no ofwo tiyaga to gwumwonu ni Shɛkɛm.

¹³Ge Isrɛl hiɛŋ Josɛf, Atagwụ bụ suji agwụdụ no ofwo tiyaga ni Shɛkɛm, N zhɛ ma bụ tumwana no ofwo aba. Go Josɛf leni, bɛɛ hiɛŋ bụ Gamba na.

¹⁴Bishi bwa hiɛŋ bụ, Zhaga hwuwayɛ go kwubɛ atagwụ bụ okwo a ta namba lapiya keeni agwụdụ, maa n gwuricingeni ajɛshɛgwa. Baa tumwanɛ bụ ga, bee beni nu ulomu Hibron, bee zhe ni Shɛkɛm.

¹⁵Ibɛ bụtụ bu ko kwụbɛ bụ tu bo rungo na ambɛ, nazhɛ bụtụ ata heŋteni bu, bɛɛ hiɛŋ, Imbe aba dwalakakaa?

¹⁶Go Josɛf hiɛŋ bụ, Ma dwalakaka atagwụ mi, ma bu tabwa, m mbishi ka geri na ee suji agwụdụ ee zhe tiyaga.

¹⁷Nazhɛ bụtụ ata hiɛŋ bụ, O hwulwo, N hwụjɛ tɛ ɛ hiɛŋ, Ti zhe ma Dotan. Ibɛ po go Josɛf 'wa atagwụ ubwa, boo to aŋ ugbe nu Dotan.

¹⁸Aka na aa kwụbɛ bụ taa dụlụ tobwolo bu to gwumwonu su na aba o, aa twagwụ bụ unu maa ga kwụnɛ bụ.

¹⁹Aa mama hiaŋnụ, Buwetegeni ga ba awalabụ ye be ci.

²⁰Hwure tụ kwụnɛ bụ ma maa ti keri bu ma nu ushapa uko, maa ti hiɛŋ ma usunda ehilo uko ụ yɛ bụ, maa ta kwụba ya iyi nɛ awalabụ ata ubwa zhɛ a sha.

²¹Ama aka na ti gɛ Rubɛn hwụjɛ iŋ, baa lacɛ, bɛɛ hiɛŋ, Kede tu kwụnɛ bụ ma o.

²²Gɛ Rubɛn hiɛŋ aŋ, Ta kwụna bụ ma o, kala bụ ma okwo nu ushapa ga namɛ epe nụ ụshɛka ga, kede i'ɛlɛ hiŋ timengeni bu o. Bɛ jɛmɛ iwɛ ɛtɛ maa lashɛga bụ ni i'ɛlɛ ya aba, maa gwuricingono bu bishi bwa.

²³Aka na tu go Josɛf ci atagwụ ubwa, ee ushiji bu idikɛ ɛtɛ ibwɛ 'yajɛ ti'nyeci tu tuswoswoswo nɛ bee ge urigeni.

²⁴Ee shepi bu ee keri nu ushapa uko uhwoo na zasa meni.

²⁵Nazhɛ aa jɛjɛ maa a yɛ iyimɛyɛ, eshigiri, ee shepi eshe aa kwụbɛ ta atwa Ishmɛl a na banɛ ni Giliad zhɛ tɛkashɛka. Nruhondo ma aba mu 'waŋnɛ tuko keeni iyi nɛ aa nda manɛbɛ mu unibi keeni iturɛre muru, ɛɛ zhɛ Ijipti.

²⁶Nazhɛ go Juda hiɛŋ miaụŋ-mo-bino bwa, Imbe kwuuŋ shɛ ule na ɛti zhɛ tu ma ya ti yaa shɛ atụ kwụnɛ buhongwu tu maa tu sweci ma mehieŋ mu bwaa?

²⁷Hwure ma ti sengeni bu ma atwa Ishmɛl, maa kede i'ɛlɛ tu timengeni bu o, iwɛnɛ tu baa shɛ buhongwu tu, baa shɛ kaa tu'waba tu tu. Ibɛ po miaụŋ-mo-bino bwa mu hwụjɛ-unu ubwa.

²⁸Aka na ahinya Midia zhɛ tɛkashɛka, ɛɛ vwɛ Josɛf nu ushapa ata, ee sengeni bu atwa Ishmɛl azụrụfa arinya woshi, ee shepi Josɛf ni Ijipti.

²⁹Aka na gɛ Rubɛn gwuri no ofwo ushapa ata, baa kwụbɛ maa go Josɛf zasaba nu ushapa o, bee dwetweji tugwuno tu bwa.

³⁰Bee gwure no ofwo ohongwu ubwa, bɛɛ hiɛŋ aŋ, Buhongwu tu zaba ya o. Cee Ngɛɛ zhɛ mo tonoo?

³¹Aa kwụnɛ biywoywo, ee shepi idikɛ Josɛf ee shiyeni iŋ ne mehieŋ ma ata.

³²Nazhɛ aa tumwanɛ idikɛ ɛtɛ i ti'nyeci tu tuswoswoswo, no ofwo bishi ba aba, ɛɛ hiɛŋ, Iyi etu gwushije na, kwụba de okwo idikɛ yɛu bụ nɛ.

³³Ge Jekob kaa mepi iŋ, bɛɛ hiɛŋ, Idikɛ yɛu mi nɛ, usunda ehilo uko ụwɛ ubwa kwụnɛ bụ ụ yɛ, i zasa beye bana o onsotongwo Josɛf wuŋzu, wuŋzu.

³⁴Nazhɛ ge Jekob dwetweji otogwo ubwa,[54] boo urugono tugwuno tụ ụcɛnjɛ tɛnda,[55] boo to-ụkwụla yɛu ibwɛ te ilegeji.

³⁵Miaụŋ mu bwa me eyi keeni miaụŋ mu bwa mo o kpaaŋ mi ishijɛ maa mi ingatanjɛ bụ, ama bu lacɛ ti'ingatanga, bɛɛ hiɛŋ, N zhɛ ma ta-ụkwụla yɛu mi tutu tu'wo. Gana bishi bwa cwɛ-u'wo ubwa ta.

³⁶Amidian ata sengeni bu Potifa na shɛ bɛnjɛ-bu-ugondu Faro, na kaa shɛ uhiu wa a'iywa ihwɛ ibwɛ ni Ijipti.