Read bassa UMOZHIGO 6 Bible Online

UMOZHIGO 6 - bassa bible

UMOZHIGO 6

¹Aka na ta atwa kwuni ufwugwo tugombo na cɛnjɛ tu unyizo, iwɛnɛ ta a matanga aŋ miaụŋ-mo-o,

²nazhɛ miaụŋ-me-eyi ma Agwatana[8] mụ kwụbɛ miaụŋ-mo-o ma atwa maa mu pilanụ, ee teri a na elele na kwụlanɛ aŋ maa a njɛ eyikwo aba.

³Nazhɛ AGWANGWAMA hiɛŋ, Mpiala mi ihwungwɛ mi mi zha shɛ ma nama na bụtụ tutu unyizo-nom iwɛnɛ po butugwumwa na zhɛ bo 'wo baa shɛ. Te kwuni na aka ga shiywa shɛ bwa shi zhɛ sha nama ya dipi-yebi-nu-woshi (120).

⁴Agbandụ kaa namɛ la nu unyizo heni ata, keeni na aba ibɛ du, aka na ta miaụŋ-me-eyi ma Agwatana[9] mi teneni miaụŋ-mo-o ma atwa, ee metenji aŋ miaụŋ, atwa ata aba shɛ la atwa ikɛnyi a na beni urishi na aka cala.

⁵AGWANGWAMA kwụbɛ maa abwagara na bụtụ ba nda na cɛnjɛ tu unyizo ga hwuleji, tuhaŋsa tu na aa haŋsa na shɛmɛ sha aba kaa tɛ shɛ iyi iwɛ kiri aka elele.

⁶Ibɛ po amɛ AGWANGWAMA hashɛganụ iwɛnɛ tu baa njɛ butugwumwa na cɛnjɛ tu unyizo, yaa gwumanɛ bụ duwa.

⁷Ibɛ po AGWANGWAMA hiɛŋ, N zhɛ mo iricingo atwa na Ngaa karɛ maa e beni na cɛnjɛ tu unyizo, ta atwa, ti isundɛ ehilo, ti iyi nɛ yo hombilo, ta shanụnụ, iwɛnɛ ta amɛ mi hashɛganụ iwɛnɛ tu Ngaa njɛ aŋ.

⁸Ama amɛ AGWANGWAMA lemi na Noa.

⁹Uwaŋnɛ Noa na. Ga Noa shɛ bụtụ bi tiririri, bu zasa kaa unu-tusapa kwukwuŋ na ashashɛ uwaŋnɛ ubwa o. Ga Noa kaa twa-ikpɛngwu na Agwatana.

¹⁰Ga Noa kaa 'yajɛ miaụŋ-me-eyi mu tatụ, gɛ Shɛm, na Ham, keeni Jafɛt.

¹¹Agwatana kwụbɛ maa cɛnjɛ tu unyizo ti teni ụdamụ, abwagara kaa barɛ na cɛnjɛ tu unyizo.

¹²Agwatana kwụbɛ maa cɛnjɛ tu unyizo ti teni ụdamụ, iwɛnɛ ta atwa elele teni ụdamụ na cɛnjɛ tu unyizo kpaaŋ.

¹³Nazhɛ Agwatana hiɛŋ Noa, N nduwa ahaŋsa mi oko maa mo iricingo usunda-tu'waba we elele nu unyizo, iwɛnɛ te e shidinji abwagara nu unyizo. N zhɛ mo iricingo aŋ hwɛɛ, ta cɛnjɛ tu unyizo.

¹⁴Meme shebeni ụhaŋtụ nu uzhibi ụ'wụ'wụ na ɛɛ hiɛŋ gofɛ, nda shɛmɛ na amɛ ubwa, swana amɛ ubwa tuko ta aba ubwa hwɛɛ.

¹⁵Gana na ɛbi zhɛ ba shaba ụhaŋtụ ata na: ga ụnjɛswa ubwa ụ shɛ bimenji be esugwulumi kpakwụ-ni-dipi-yebi (300). Go uholo ubwa ụ shɛ bimenji be esugwulumi dupu (50). Go uzoto ubwa ụ shɛ bimenji be esugwulumi talacɛ (30).

¹⁶Ta ụhaŋtụ ata ukogo, go tuhwolu tu na ti zhɛ ta nama nu ukogo ata keeni i'ɛŋbi ibwɛ, tɛ shɛ ababasụ i'ɛlɛ eyebi, nda odubo na bụ'aŋbụ bu bwa nụ ụzalụ uko, ndana uŋ shɛmɛ shɛ tatụ nu ukwunanga wa azuba ubwa.

¹⁷N zhɛ ma nda maa meni mi zhagajɛ, maa mi iricinji iyi elele nɛ ya hwungwa na cɛnjɛ tu unyizo. Iyi elele nɛ kaa namɛ na cɛnjɛ tu unyizo zhɛ yo 'wo.

¹⁸Ama N zhɛ ma twa-unu na bụ, bɛ shɛ kaa bo tono nụ ụhaŋtụ ata, tu gabụ, ta miaụŋ mụ bụ me eyi, te biyikwo bu keeni atashɛ bụ.

¹⁹Sugo edenji iyi-uumwa ye elele iyebi yebi butubwenyi ne biyikwo maa tecinji iŋ nụ ụhaŋtụ ata maa i nama uraiŋ.

²⁰Tu udenji shanụnụ she elele, tu udenji isundɛ ehilo ye elele, ti iyi elele nɛ yo hombilo na cɛnjɛ, iyebi yebi hwɛɛ maa i nama uraiŋ.

²¹Sugo sasana iyimɛyɛ ye elele nɛ ɛɛ zhɛ na ya maa suteni iŋ pụ bụ, inɛ ɛtɛ ibɛ zhɛ ya sha iyimɛyɛ bụ na aba.

²²Ga Noa njɛ gana na ta Agwatana eni bu kpaaŋ.