Read bassa UMOZHIGO 9 Bible Online

UMOZHIGO 9 - bassa bible

UMOZHIGO 9

¹Nazhɛ Agwatana peni Noa uwebiye keeni miaụŋ mu bwa, bɛɛ hiɛŋ aŋ, Na mata ma maa hi gembi ufwugwo, maa ajalalo hiŋ shini cɛnjɛ tu unyizo.

²Usunda ehilo we elele, nụ ụnụnụ we elele, ahiɛba kaa ee utegeni iŋ kpaaŋ, keeni iyi elele nɛ yo hombilo na cɛnjɛ keeni ijɛnɛ ye elele nɛ zweni ni itekwu, i zhɛ na nda inyɛsɛ hiŋ.

³Na ya ma iyi-uumwa ye elele nɛ yo rungo, gana na Ngee hi peni iyi tibila inyɛshɛ, gabata du Ngee hi peni iŋ maa i shɛ iyimɛyɛ hiŋ.

⁴Hiɛ shɛ shɛ hi na ya usunda te mehieŋ mu bwa o, ne mehieŋ ata uraiŋ namɛ.

⁵No olugwo bụtụ Ngɛɛ zhɛ ma dwalakaka mehieŋ mu uraiŋ usunda we elele tilɛɛ, no olugwo bụtụ kaa Ngɛɛ zhɛ ma dwalakaka uraiŋ yɛu-bino bwa.

⁶Bụtụ be elele na duduji mehieŋ ma bụtụ, bụtụ du zhɛ bo dudugo mehieŋ mu bwa, iwɛnɛ ta Agwatana njɛ bụtụ nụ ụsụbwa ubwa.

⁷Na mata ma maa hi na kaana ufwugwo tugombo maa ajalalo hiŋ shini cɛnjɛ tu unyizo.

⁸Nazhɛ Agwatana hiɛŋ Noa na miaụŋ mu bwa,

⁹Hioko ma, N shikicinji unu mu tutwa ne hiŋ keeni miaụŋ mi hiŋ me ekwunyi

¹⁰keeni iyi-uumwa ye elele nɛ aa karɛ nɛ namɛ ne hiŋ, ta shanụnụ she elele, ti iyimabiga ye elele keeni isundɛ ehilo ye elele nɛ namɛ na cɛnjɛ tu unyizo, ibɛ shɛ ufwugwo iyi elele nɛ banɛ nụ ụhaŋtụ.

¹¹N shikicinji unu mu tutwa ne hiŋ, maa meni mi zha shɛ ma zhagajɛ ya sasana maa mi iricinji iyi-uumwa kwukwuŋ, meni kaa mi zha shɛ ma zhagajɛ sasana maa mi iricinji cɛnjɛ tu unyizo kwukwuŋ.

¹²Agwatana hiɛŋ, Useyida unu unyizo-nom na Ngaa twa ne hiŋ keeni iyi-uumwa ye elele nɛ namɛ ne hiŋ keeni iwɛ uwaŋnɛ we elele na te e ci geri-be-eshe na,

¹³M beci buhwa mi na tụla, ubwa zhɛ ba sha useyida unu mu tutwa na namɛ na ashashɛ mi na atwa cɛnjɛ tu unyizo.

¹⁴Aka na Ngee suje odomu Ngee ubi na tụla nazhɛ ɛɛ zhɛ a kwụba buhwa ata na tụla.

¹⁵N zhɛ me teyinje unu mu tutwa na namɛ na ashashɛ mi ne hiŋ keeni iyi-uumwa ye elele, maa meni mi zha shɛ ma zhagajɛ ya sasana maa mi iricinji iyi-uumwa kpaaŋ kwukwun.

¹⁶Aka na ta buhwa bacɛ no odomu, N zhɛ ma ngbaraka bụ maa me teyinje unu-tutwa unyizo-nom na namɛ na ashashɛ mi keeni iyi-uumwa ye elele nɛ namɛ na cɛnjɛ tu unyizo.

¹⁷Agwatana hiɛŋ Noa, Inɛ gɛ ibɛ shɛ useyida unu mu tutwa na Ngee shikicinji na ashashɛ mi ni iyi-uumwa ye elele nɛ namɛ na cɛnjɛ tu unyizo.

¹⁸Gɛ Shɛm, na Ham, keeni Jɛfɛt, aba shɛ miaụŋ mu Noa mu na mu banɛ nụ ụhaŋtụ. Ga Ham meci Kenan.

¹⁹Aba tatụ ga, aba shɛ miaụŋ mu Noa, no olugwo aba atwa elele na namɛ hwayɛ na cɛnjɛ tu unyizo ga banɛ.

²⁰Ga Noa shɛ bufwashɛ, ubwa kwuni itimɛ ya afwafwa tuhwaŋ hiiŋ.

²¹Bee swe meni mụ tụ'walụ ta afwafwa, maa 'imɛ bụ, bee weci mohondo nu udulo ubwa tugwuno.

²²Ga Ham na shɛ bishi Kenan kwụbɛ mohondo me bishi bwa, bee beni bee mbishe atagwụ ubwa eyebi a na namɛ no tupohondo.

²³Nazhɛ gɛ Shɛm keeni Jɛfɛt suji tugwuno tu tu'urugono tu ko ee berishiji tu, ee peteni no shitutu sha aba ebeyebi, ee zhe tahaŋnụ mabaaba, aa ngbaracɛ nyapadụ maa kede a kwụbɛ mohondo mu bwa o, ee urigeni mohondo me bishi ba aba.

²⁴Aka na te meni ma ata mụ tụ'walụ ta afwafwa mi hiŋ Noa, nazhɛ bee mepi iyi nɛ yɛu ibwɛ imɛwɛɛ njɛ bụ.

²⁵Bɛɛ hiɛŋ, Go unu-tukalana 'imɛ Kenan, bi zhɛ ba sha bujama ba ajama atagwụ ubwa.

²⁶Bɛɛ hiɛŋ sasana, Go o zhemonjino AGWANGWAMA na shɛ Agwatana Shɛm, ga ge Kenan shɛ bujama bu bwa.

²⁷Ga Agwatana keeni atwa Jɛfɛt[10] ofwugwo! Ga ajalalo ubwa nama hwuŋ na ajalalo Shɛm, ga ge Kenan shɛ bujama bu bwa.

²⁸Ga Noa zhɛrɛ shiywa kpakwụ-ni-dipi-tɛtu na aba na te meni mi zhagajɛ.

²⁹Shiywa shɛ Noa hwɛɛ shɛ namɛ akpakwụ-eneshi-ni-dipi-tɛtu, (950) nazhɛ bee 'wi.