Read bassa 2 SAMUƐL UYEBI 10 Bible Online

2 SAMUƐL UYEBI 10 - bassa bible

2 SAMUƐL UYEBI 10

¹Na aba inɛ gɛ, agwuma A'amon ga Nahash 'wi, nazhɛ yɛu ibwɛ ye eyi ga Hanun yɛ ya tugwama tu bwa.

²Ge Devid hiɛŋ, N zhɛ ma nda Hanun yɛu Nahash uwebiye, gana na du te bishi bwa ma n nda la uwebiye. Ibɛ po ge Devid tumwanɛ ga miaụŋ mu bwa mu ugondu maa a ingatanjɛ bụ iwɛ bishi bwa na 'wi. Ibɛ miaụŋ ma ata mu ugondu Devid mi zhe ga na cɛnjɛ ta A'amon.

³Ibɛ atwa ụjɛrụma A'amon hiɛŋ agwuma aba ga Hanun, Bi heŋshi ree maa ụjɛrụma ge Devid mụnɛ bishi bu upo baa tumwanɛ miaụŋ mu bwa mu ugondu maa a bụ ingatanjɛ? Bi heŋshi shi ree maa ge Devid tumwanɛ miaụŋ mu bwa mu ugondu maa e yelegeji ụshɛpwụ ga maa e mepi gana na waa shɛ, iwɛ maa zhajɛ maa ba lashɛga uŋ?

⁴Ga Hanun 'imɛ miaụŋ-mu-ugondu Devid baa 'nyanjɛ apadụ tizholu ta aba tutu ashashɛ hwɛɛ aba, nazhɛ bee begeteji tugwuno ta aba na ashashɛ tutu shi'unswa, nazhɛ bee genji aŋ ee hwuri.

⁵Aka na te e mbishi Devid iwɛ ɛtɛ, baa tumwanɛ atwa maa e teji atwa ata uhwaŋna. Agwuma hiɛŋ aŋ, ga a gɛga tugwo nu Jɛriko uuwa i ci aka na tizholu ta aba tu sabajɛ nazhɛ e jiye. Iwɛnɛ po a njɛ aŋ ezuye duwa.

⁶Aka na ta A'amon kwụbɛ maa a shɛ ya atwa i'ime Devid, ibɛ po aa njɛ ejeshi Asiria a na jɛjɛ ni Bɛt-rihob keeni Asiria a na jɛjɛ nu Zoba igbɛɛ-umpwa (20,000) ụgwụ, keeni a na Tob igbɛɛ-icihiŋ (12,000) keeni a na agwuma Meaka akpakwụ-a-ta (1,000) anaa na a zha tahaŋnụ ni ivwunɛ.

⁷Aka na ti ge Devid hwụjɛ iŋ, baa tumwanɛ Joab ne ejeshi na 'yajɛ ikɛnyi hwɛɛ.

⁸Ibɛ po A'amon banɛ ee keri bụkpagwụ ba aba bu ujasa nu unu wo odubo ụshɛpwụ ata ụ'wụtụ. Nazhɛ atwa vwɛ a na shɛ Asiria, na atwa Tob keeni atwa agwuma Meaka keri bụkpagwụ ba aba bu ujasa nu udadarɛ ụshɛpwụ ata gwumwonu ne shihilo.

⁹Tu go Joab kwụbɛ maa ujasa hweri bu, ti geri bu umbe ti geri ba aba, bee zenji ejeshi anaa na 'yajɛ ukpahiŋ duwa ni Isrɛl ma e keleni Asiria bụkpagwụ bu ujasa.

¹⁰Bee suji tuba atwa vwɛ bee utegeni yɛu-bino bwa ga Abishai maa sha uhiu wa aba maa a sukakanɛ A'amon.

¹¹Go Joab hiɛŋ bụ, Yaa shɛ Asiria zhɛ ma n lasụ hwayɛ, asha zhajɛ ma m mbiyeni. Yaa shɛ kaa A'amon zhɛ ma bụ lasụ hwayɛ, N zhɛ du ma zhajɛ maa Mo bu mbiyono.

¹²Nda ma ohwulu hiŋ oko maa hi shikono dimi! Mizha ti shanɛ ma ikɛnyi maa ti jeseni ma atwa tu keeni ashɛpwụ Agwatana tu ujasa. Ga AGWANGWAMA njɛ iyi nɛ shɛ ukwulana ubwa!

¹³Go Joab na atwa na namɛ nu bwa a kaana izhɛ maa a sukakanɛ Asiria nu ujasa, ibɛ Asiria gezhigeni bu.

¹⁴Aka na ta A'amon kwụbɛ maa Asiria gezhigeni Joab, ee gezhigeni du Abishai ee teni na amɛ ụshɛpwụ ata. Nazhɛ go Joab gwuri nu Jɛrusalɛm, bee genji ya A'amon tijasa.

¹⁵Ama aka na ta Asiria kwụbɛ maa atwa Isrɛl lasụ aŋ, iwɛbɛ po aa mama suyaganụ hwɛɛ aba aa ulwa urubwo uko.

¹⁶Ga Hadadizɛ ata shɛ agwuma tumwanɛ atwa no ofwo Asiria a na namɛ geri bu uwaŋna-banụ bu Urefu Yufretis,[18] aa zhajɛ ni Hilam. Bụtụ na shɛ uhiu wa aba i shɛ go Shobak na shɛ uberezhe we jeshi Hadadizɛ na namɛ nu Zoba.

¹⁷Ti ge Devid hwụjɛ iŋ, boo sotulonu atwa Isrɛl hwɛɛ urubwo uko, ee keshi Urefu Jodan, bee zhe Hilam. Asiria keri bụkpagwụ ba aba bu ujasa maa a sukakanɛ Devid. Ee kwuni ya ujasa tɛnda.

¹⁸Asiria gezhigeni atwa Isrɛl. Ge Devid kwụnɛ Asiria a na shɛ asụcɛ ihɛŋtu ujasa akpakwụ-atatụ-ni-dipi-yebi (700) keeni asụcɛ idɛkwɛ[19] igbɛɛ-woshi (40,000), nazhɛ aa gwụcɛnjɛ Shobak ata shɛ uberezhe wa atwa aba i'ime, bee 'wi apata.

¹⁹Aka na ta shɛgwuma shɛ na shɛ namɛ ni i'ɛlɛ Hadadizɛ hwɛɛ shɛ kwụbɛ ya maa atwa Isrɛl lasụ aŋ. Nazhɛ aa njɛ ya gana na maa ga amɛ-olom nama na ashashɛ aba na atwa Isrɛl, ibɛ po aa namɛ ya ni i'ɛlɛ ya atwa Isrɛl. Ibɛ po inyɛsɛ shɛ ya Asiria maa e mbiyeni A'amon aka elele.