Read bassa 2 SAMUƐL UYEBI 12 Bible Online

2 SAMUƐL UYEBI 12 - bassa bible

2 SAMUƐL UYEBI 12

¹AGWANGWAMA tumwanɛ Natan utumwa no ofwo Devid. Aka na ti ga Natan ci pu bwa, bɛɛ hiɛŋ bụ, Atwa oko eyebi namba la nụ ụshɛpwụ uko, bụtụ bu ko shɛ bɛzhɛgba, bụtụ bi yebi tuba shɛ bukofwo.

²Bɛzhɛgba ata kaa 'yajɛ agwụdụ gembi ufwugwo tebiye.

³Ama bukofwo ata tuba zasa iyi elele kwukwuŋ, semi yɛu-ụgwụdụ ike gba nɛ boo so kiri. Ba ima bụ u'ala tebiye, bɛɛ wɛnicinjɛ bụ, ni iyimɛyɛ ibwɛ, baa swa meni nu ukwopi ubwa ukɛnyi ibwɛ, boo woto na agba ubwa. Baa njɛ bu gana yɛu ibwɛ yo o.

⁴Jitoo ko bugaiŋ zhaganɛ bɛzhɛgba ata, bi shepi shi ụgwụdụ ubwa uko kwo kaa buna bu bwa bu ko maa kwụnanga bugaiŋ ata bwa maa ima bụ ugaiŋ o. Ama yɛu-ụgwụdụ ye ebe bukofwo 'yajɛ, ubwa bee shepi baa kwụnɛ, baa 'imɛ bugaiŋ bwa ugaiŋ.

⁵Ibɛ po amɛ Devid hashɛganụ tebiye, bee kwuni isɛbwɛ tɛnda iwɛ n-ndumwa ma ata ga Natan mbishi bu, iwɛ bụtụ ata njɛ iyi gɛnɛ ɛtɛ. Bɛɛ hiɛŋ Natan, N to Agwatana na shɛ buumwa maa bụtụ ata ci tu'wo.

⁶Bụtụ ata shɛ bo gwuricingo ụgwụdụ ata maa du patana agwụdu eneshi no tugwuricingo ta aba, iwɛnɛ tu baa njɛ iyi i ci'nyɛ i ci gana ata, baa zasa inyɛmɛnyɛmɛ bụtụ ata shɛ bukofwo kwukwuŋ.

⁷Ga Natan hiɛŋ Devid, Gabụ kaa bɛ njɛ ijɛ ɛtɛ. AGWANGWAMA na shɛ Agwatana Isrɛl hiɛŋ, M bu dudugeni manɛbɛ maa yɛ tugwama ti Isrɛl, Ngee bi lesheji no Soul.

⁸Ngee bi peni ihwɛ ya agwuma-ihwɛ ɛtɛ bu, Ngee bu utegeni te eyikwo ubwa; Ngaa bɛ njɛ agwuma cɛnjɛ ti Isrɛl keeni cɛnjɛ tu Juda. Yaa shɛ inɛ ɛtɛ ga bụ twa sụ, N ngɛ zhɛ ma bu kaana inɛɛ nɛ hwuri inɛ ɛtɛ.

⁹Iwembe po abụ ngbaracɛ n-ndumwa ma AGWANGWAMA cwɛŋ, abɛ njɛ iyi iwɛ gana ga ne eshe ubwaa? Gabụ bɛ njɛ maa ga A'amon kwụnɛ Uria Bihit ata nu ujasa nu utokwobi, nazhɛ ebi zeneneni biyikwo bwa!

¹⁰Te kwuni na aka ga, tu'wo tu utokwobi ti zha shɛ ta bana ni ihwɛ bu kwukwuŋ, iwɛnɛ ta abụ n ngbaracɛ cwɛŋ, ebi zeneneni kaa biyikwo ata Uria Bihit ata.

¹¹Gamba AGWANGWAMA m bi keleni-unu maa, N zhɛ mɛ ishicinjɛ iyi iwɛ ni ihwɛ bu ikɛnyi bu maa ibu sukakanɛ. N zhɛ mo sugo eyikwo bu ne eshe bu, ma pana aŋ uyebi bu uko, bɛɛ zhɛ bo woto na aba ne eshe uwaŋna caakwụụ.

¹²Bɛ njɛ inɛɛ bu ne tusweci, ama N zhɛ tuba ma nda inɛ gɛ ne eshe uwaŋna maa atwa Isrɛl kpaaŋ kwụbɛ iŋ.

¹³Ge Devid hiɛŋ Natan, N njɛ AGWANGWAMA iwɛwɛ. Ga Natan jishijɛ bụ, bɛɛ hiɛŋ, AGWANGWAMA du ubu gongwonuo iwɛwɛ bụ, bu zha shɛ bo 'wo ya o.

¹⁴Ama okwo ti yaa shɛ gana ata, yɛu ɛtɛ ebi meci ne biyikwo ata zhɛ yo 'wo tilɛɛ, iwɛnɛ ta abụ mụnɛ atwa i'ime AGWANGWAMA ohwolu maa a njɛ iyi nɛ gwumanɛ bụ.[25]

¹⁵Nazhɛ ga Natan sanɛ ujiyo ni ihwɛ ibwɛ. Ibɛ po AGWANGWAMA po yɛu ɛtɛ biyikwo Uria meci ne Devid iyi, yee leyi nụ ụngwụ.

¹⁶Ge Devid tabwa Agwatana maa nɛnga yɛu ɛtɛ. Baa njɛ ezumi, bee teni nu umwono ubwa boo woto na cɛnjɛ uuwa gu uvwungwa.

¹⁷Ehiu atwa na baa 'yajɛ ni ihwɛ ibwɛ zhegeni bu nu umwono ata, ee mekeni maa ɛ ishicinjɛ bụ na cɛnjɛ ta ata, baa lacɛ. Bɛ yɛ shɛ kaa du iyimɛyɛ na aba o.

¹⁸Ti yaa namɛ ijitɛ icenje, yɛu ɛtɛ 'wi. Ibɛ po miaụŋ mu bwa mu ugondu ma nda inyɛsɛ gana na maa e mbishi bu maa yɛu ɛtɛ 'wi. Ɛɛ hiɛŋ, Aka na ti yɛu gɛ te 'wi shi la, okwo ata njɛ n-ndumwa nu bwa, bụ hwụjɛ shɛ iwe tu o, gana naa eti eri to mbiso bu ya hwayɛ maa yɛu gɛ 'wii? Nekeshi bi eri mama kwụna hwayɛ o!

¹⁹Aka na ti ge Devid kwụbɛ ta miaụŋ mu bwa mu ugondu momo mbisonu n-ndumwa swɛɛ swɛɛ na acɛbɛ, bee mepi ya maa yɛu ɛtɛ 'wi. Ge Devid heŋteni aŋ, bɛɛ hiɛŋ, Yɛu ɛtɛ 'wi suu? Ɛɛ jishijɛ bụ, ɛɛ hiɛŋ, Iiŋ, i 'wi.

²⁰Na aka ata nazhɛ ge Devid ishijɛ na cɛnjɛ, baa dụrɛ meni, baa sukwutwa manɛbɛ, bee urigeni tugwuno ti biye. Nazhɛ bee zhe nu umwono wa AGWANGWAMA baa zhɛbɛ bụ. Ti bee gwure ni ihwɛ ibwɛ, bɛɛ hiɛŋ ga panɛ bụ iyimɛyɛ, ta a panɛ bụ iyimɛyɛ ɛtɛ, baa yɛ iŋ.

²¹Miaụŋ mu bwa mu ugondu mi hiɛŋ bụ, Imbe nɛ abɛ njɛɛ? Aka na ti yɛu gɛ te 'wi shi la, abụ lacɛ iyi tiya, abụ cwɛ-u'wo. Ama gunu na ti yɛu gɛ 'wi, ɛbi ishijɛ ya abɛ yɛ iyimɛyɛ!

²²Ge Devid jishijɛ aŋ, bɛɛ hiɛŋ, Iwɛ-tɛkana ga, N njɛ la ga ezumi, Ngaa cwɛ tu u'wo na aka na ti yɛu gɛ te 'wi shi la. N nge heŋshi la okwo nekeshi AGWANGWAMA zhɛ o hioko inyɛmɛnyɛmɛ mi maa kede yɛu gɛ 'wi o.

²³Ama i uwo ya kaa, iwembe po Ngɛɛ tɛ zhɛ ma nda ezumi waaa? N te eri me gwuricinje iŋ hŋ? Jitoo ko Gamba n zhɛ ma zha no ofwo na yaa namɛ, ama i zha shɛ ye gwure ya no ofwo mi kwukwuŋ.

²⁴Ge Devid ingatanjɛ biyikwo bwa ga Bashiba. Bee zhe bee weci nu bwa, ee meci yɛu-ye-eyi, ge Devid po iŋ izeci tu go Sụlụmụn. AGWANGWAMA kaa lubi yɛu ɛtɛ.

²⁵Iwɛnɛ ta AGWANGWAMA lubi yɛu ɛtɛ, ibɛ po ge Devid tumwanɛ bigesere ata ga Natan maa ga pa yɛu ɛtɛ izeci ti gɛ Jɛdidia,[26] iwɛnɛ ta AGWANGWAMA lubi iŋ.

²⁶Ti yaa namɛ aka fwalaa, go Joab sukakanɛ Raba ata shɛ ụshɛpwụ ụ'wụtụ na shɛ rishe ra ashɛpwụ vwɛ na cɛnjɛ ta A'amon, bee leshiji uŋ.

²⁷Go Joab tumwanɛ atumwa no ofwo Devid, bɛɛ hiɛŋ, N tofulogwo Raba, Ngoo loshigwo ashɛpwụ ubwa anya a na 'yajɛ meni.

²⁸Hwuwayɛ go sotulonu ya atwa vwɛ hwɛɛ maa hi tefuleji ụshɛpwụ ata maa hi leshiji uŋ, shibwonu yaa shɛ Gamba n leshiji uŋ ɛ zhɛ na suyana uŋ hwuŋ ni izeci mi.

²⁹Ge Devid sotulonu ga atwa ata vwɛ hwɛɛ, ee zhe ee tefuleji ga ụshɛpwụ ata Raba, ee leshiji uŋ.

³⁰Bɛɛ pɛshinjɛ udara nu uhiuhiu wa agwuma aba, bee peteni uŋ nu uhiuhiu ubwa. Uzhinono udara ata ụ shɛ bimenji bi tɛlɛnt bu uzhɛnarɛya uko. A njɛ uŋ tisemberi na atayɛ ebiye. Ge Devid suje ufwa ujasa nụ ụshɛpwụ ata te gembi tebiye.

³¹Bee suje atwa ụshɛpwụ ata maa a na bagaga i'wɛ'wɛ, keeni i'wɛ'wɛ tulogo, baa njɛ aŋ ni iji maa a na nda etemberi. Gabata du baa njɛ ashɛpwụ A'amon a na vwɛ hwɛɛ, nazhɛ ge Devid na atwa vwɛ ubwa gwuri nu Jɛrusalɛm hwɛɛ aba.