Read bassa 2 SAMUƐL UYEBI 15 Bible Online

2 SAMUƐL UYEBI 15 - bassa bible

2 SAMUƐL UYEBI 15

¹Na aba inɛ gɛ, ga Absalom meme jelekeni ụhaŋtụ ujasa keeni idɛkwɛ keeni egezhiji usumwa dupu maa o no hwulono bu umbe.

²Iyi-heri ga Absalom ba gbatụ ti'ishijɛ nu uvwungwa ba zha bo shikono no odubo ata oo tono nụ ụshɛpwụ. Yaa shɛ bụtụ be elele 'waŋnɛ ụshɛrɛya, baa jala maa zha pa agwuma, ga Absalom bɛ hiɛŋ bụ, Cee abụ banɛɛ? Aka na ta bụtụ ata mbishi bu ụlamụ na baa banɛ, maa Yɛu gɛ bu ugondu banɛ nụ ụlamụ kazabana ni Isrɛl.

³Ga Absalom bɛ hiɛŋ bụtụ ata, N-ndumwa mụ bụ mu ga zhɛmɛ, mee teni kaa du cɛŋ, ama tuba i zasa ụtarụtụ wa agwuma namba maa hwuga hwayɛ n-ndumwa mụ bụ o.

⁴Ga Absalom ba kaana tihiɛŋ maa, Yaa shɛ aa ga ma njɛ kiri yebe bɛjɛmɛ-bụ-ụshɛrɛya na cɛnjɛ tu ga, maa bụtụ be elele yebe ga 'yajɛ n-ndumwa, maa ma n zhaganɛ N ngɛ zhɛ kaa maa dumangana bụ ụshɛrɛya u tishiriri.

⁵Aka na ta bụtụ be elele zhajɛ ma gwumwonu maa kwuzono bu, ga Absalom ba mba i'ɛlɛ ibwɛ bɛ ishicinjɛ bụtụ ata ba ruwanɛ bụ.

⁶Gabata ga Absalom njɛ atwa Isrɛl elele a na 'waŋnɛ n-ndumwa maa e zhe pa agwuma. Ni ibɛ kaa du bee bitereji shɛmɛ sha atwa ata ee leni iyi nɛ baa jɛmɛ.

⁷Ti yaa ulwa shiywa shi neshi, ga Absalom hiɛŋ agwuma, Iyɛri, Ma bụ tabwa, lono maa ma zha kaa Hibron maa mɛ njɛ iyi nɛ Ngee shileni la AGWANGWAMA unu.

⁸Iwɛnɛ po Gamba yɛu gɛ bu ugondu, N shileni la AGWANGWAMA unu na aka na Ngaa ta namɛ ni Gɛshu na namɛ na cɛnjɛ ta Aram, Ngɛɛ hiɛŋ, Yaa shɛ AGWANGWAMA N gwuricinji nu Jɛrusalɛm, N zhɛ mu na zhɛba bụ ni Hibron.

⁹Nazhɛ agwuma hiɛŋ bụ, Zhaga na amɛ-olom, bɛɛ ishijɛ baa sanɛ ga Hibron.

¹⁰Ama ga Absalom tumwanɛ atumwa ne tusweci no ofwo elele na ta alamụ Isrɛl teje, bɛɛ hiɛŋ aŋ, Aka elele na ahiɛ hwụjɛ rụhwụŋ ru ukakacɛ, hiɛŋ ma gunu ata maa, Ga Absalom ubwa yɛ tugwama ni Hibron.

¹¹Nazhɛ atwa kpakwụ (200) beni nu Jɛrusalɛm aa zhagajɛ na Absalom, iwɛ ụhiɛŋshɛ na aa suyanɛ aŋ maa ga a zhajɛ apata, ee zhe ga na ahaŋsa tukpataa, ama e mepi shi tuba iyi elele nɛ ga Absalom ba imanganga o.

¹²Aka na tu ga Absalom ba ta arụpɛ, baa tumwanɛ butumwa maa a suyanɛ Ahitofɛl na namɛ ni Gilo na kaa du ga shɛ bipeni ba agwuma Devid ahaŋsa, baa zhajɛ ga. Ibɛ tuhaŋsa ta ata ti ci'nyɛ ti keeni ukpahiŋ ti'yaga, atwa na namɛ na Absalom du a kaana ufwugwo tugombo.

¹³Aka na ta butumwa zhe pi Devid bee mbishi bu, bɛɛ hiɛŋ, Shihaŋsa sha atwa Isrɛl hwɛɛ shɛ namɛ na Absalom.

¹⁴Ge Devid hiɛŋ ehiu anjɛ-ugondu ubwa a na namɛ nu bwa nu Jɛrusalɛm hwɛɛ, Ishijɛ ma kakayɛ maa ti beni ma epe, shibwonu ga Absalom be ci ba kakayɛ maa ma tu kwụna hwɛɛ ta atwa ụshɛpwụ ga nu utokwobi!

¹⁵Ibɛ po ehiu anjɛ-ugondu agwuma jishijɛ bụ, ɛɛ hiɛŋ, Atuba na tɛ shɛ miaụŋ-mu-ugondu bu, tu mama 'imɛ maa ta nda iyi elele nɛ abɛ jɛmɛ gabụ Iyɛri tu.

¹⁶Agwuma ishijɛ, ta atwa ihwɛ ibwɛ keeni ehiu anjɛ-ugondu ubwa hwɛɛ ee beni, semi eyikwo ubwa magɛgashɛ umpwa kiri bee genji maa a ngbaraka ihwɛ ibwɛ.

¹⁷Aka na ta agwuma beni nụ ụshɛpwụ ata medenji atwa elele na 'wa bụ, ee zhe ee ci ihwɛ ike nɛ namɛ imɛwɛɛ nụ ụshɛpwụ ata.

¹⁸Nazhɛ ehiu anjɛ-ugondu ubwa a na banɛ ni Kɛrɛt, keeni atwa Pɛlɛt, keeni Git, ufwugwo wa asaza ata hwɛɛ shɛ atwa akpakwụ-atatụ (600), a na she bu te kwune nu Gat, hwɛɛ aba keshici[31] bu ee hwuleni bu umbe.

¹⁹Agwuma hiɛŋ Itai, ata banɛ Git, Iwembe po abụ tu 'waa? Gwulo maa gɛga na agwuma ata ofwo ga Absalom. Iwɛnɛ po bugaiŋ abɛ shɛ keeni bụtụ ti'ima, bu banɛ na cɛnjɛ tụ bụ ebi gezhije.

²⁰Wenebe ebi te ci, Iwembe po Ngɛɛ zhɛ ma bu shapa gunu hwayɛ ga maa Mo kwuno urungo na bụụ? Gamba kaa N te mepi shi okwo geri na Ngɛɛ zhɛ ma ta o. Sugo atwa cɛnjɛ tụ bụ maa hi gwuri. Ga AGWANGWAMA hieci inyɛmɛnyɛmɛ bu na tɛcara tu bwa.

²¹Ama ge Itai jishijɛ agwuma, bɛɛ hiɛŋ, N to AGWANGWAMA keeni agwuma mi maa, Ofwo elele na ɛbi zhɛ, N zhɛ ma zhagaga na bụ, okwo nu uraiŋ tiya, kwo kaa tutu tu'wo.

²²Ge Devid jishijɛ Itai, bɛɛ hiɛŋ bụ, I zhɛmɛ tebiye! Mizha kashɛka! Ge Itai ata keshici ga medenji atwa Devid hwɛɛ, keeni atwa aba na ta gwụmwatangwụ hwɛɛ.

²³Nazhɛ atwa cɛnjɛ ta ata hwɛɛ tileni nu u'wo gboo iwɛnɛ ti ge Devid beni nụ ụshɛpwụ ata medenji atwa elele na 'wa bụ. Nazhɛ agwuma keshi isese Kɛdron, ee hwuri geri bu ụshɛka.

²⁴Ga Abiata zhajɛ,[32] ga Zadok zhajɛ du, medenji Alivai elele na 'waŋnɛ Ikpɛtɛ Unu-tutwa ya Agwatana. Ee shi iŋ, uuwa i ci aka na atwa ata beni nụ ụshɛpwụ ata hwɛɛ.

²⁵Nazhɛ agwuma hiɛŋ Zadok, Shapa Ikpɛtɛ gɛ ya Agwatana maa gwuricinji iŋ na amɛ ụshɛpwụ. Yaa shɛ AGWANGWAMA zhɛ ma m mapana iwɛ, asha jitoo ko bi tɛ zhɛ me n gwuricinje maa Ma kwụba iŋ sasana, to ofwo ata yee shi.

²⁶Ama yaa shɛ kaa baa zasa amɛ-olom ne mi, asha M mama 'imɛ maa ma n nda gana na kwụlanɛ bụ.

²⁷Agwuma hiaaŋnanɛ Zadok ata shɛ bunongbo, Hioko,[33] shapa yɛu bu ga Ahimaz keeni Jonatan yɛu Abiata maa hi gwuri na amɛ ụshɛpwụ na amɛ-olom.

²⁸N zhɛ tuba ma nama tugwo nụ ụpalanụ Urefu Jodan nụ ụshɛka uuwa i ci aka na Ngaa hwụjɛ iyi nɛ ɛhi zhɛ hi mo mbiso.

²⁹Ga Zadok na Abiata shepi ga Ikpɛtɛ ɛtɛ ya Agwatana ee gwuri nu Jɛrusalɛm, aa jɛjɛ ya apata.

³⁰Ama ge Devid munji Ishɛmɛ Buta, baa twa-u'wo ti bɛɛ zhɛ, bee peteni i'ɛlɛ nu uhiuhiu ubwa, bɛɛ zhɛ ni ivwunɛ. Atwa na zhagajɛ nu bwa hwɛɛ, petengeni du i'ɛlɛ no ohiuhiu aba, aa twagana u'wo tɛ ɛ zhɛ.

³¹Aka na te e mbishi Devid, ɛɛ hiɛŋ, Ga Ahitofɛl momo togwu na atwa tigezhe Absalom. Ge Devid tabwa AGWANGWAMA, bɛɛ hiɛŋ, Ma bụ tabwa maa sheyinji ahaŋsa tụpana Ahitofɛl maa ga a shɛ iyi ụlagwụ.

³²Aka na ti ge Devid ci ihiŋhiŋ ishɛmɛ ɛtɛ, na shɛ ofwo na aa zhɛba Agwatana, go Hushai na shɛ Bu'aki, banɛ bɛɛ tɛjɛ Devid uhwaŋna aa twa apata, tugwuno tu bwa tu dwatwagwụ, uhiuhiu ubwa shɛ ga ahwayɛ.

³³Ge Devid hiɛŋ bụ, Yaa shɛ abụ zhagajɛ hwayɛ ne mi, asha bi zhɛ bu ma n shana i'wɛŋnɛ.

³⁴Ama yaa shɛ ebu gwuri nụ ụshɛpwụ, maa mbishi Absalom maa, Oo agwuma, N zhɛ ma sha ya yɛu bu ugondu gana na tu Ngaa shɛ la yɛu-ugondu shibi cala. Iwɛ maa njɛ gana elele na ebi eri maa jɛshɛrɛjɛ ahaŋsa elele na ga Ahitofɛl ba pana atwa.

³⁵Shɛ ga Zadok keeni Abiata a na shɛ onongbo suu zhɛ a nama apata na bụ? No mbiso aŋ iyi elele nɛ abụ hwụjɛ ni ihwɛ ya agwuma.

³⁶Miaụŋ ma aba mi yebi mu namba apata na aba, ga Ahimaz yɛu Zadok, no Jonatan yɛu Abiata, tumwanɛ aŋ pi mi maa e m mbishi iyi elele nɛ abụ hwụjɛ.

³⁷Go Hushai na shɛ biyejilo Devid gwuri ga nụ ụshɛpwụ, gunu na tu ga Absalom be teni nụ ụshɛpwụ ata du.