Read bassa 2 SAMUƐL UYEBI 16 Bible Online

2 SAMUƐL UYEBI 16 - bassa bible

2 SAMUƐL UYEBI 16

¹Aka na ti ge Devid keshici ihiŋhiŋ ishɛmɛ ɛtɛ fwalaa, baa twa ne Ziba ata shɛ yɛu-ugondu Mɛfiboshɛt, tu baa 'waŋnɛ nzhinyacɛ mu na mu 'waŋnɛ tumbara tu mbrad kpakwụ (200), keeni tu'unto ta afwafwa hwoo dipi-yebi (100) keeni otutu meni mu tụ'walụ ta afwafwa dipi-yebi (100).

²Agwuma heŋteni Ziba, bɛɛ hiɛŋ, Cee ɛbi zhɛ ni i'wɛŋnɛ gɛ abụ 'waŋnɛɛ? Ge Ziba jishijɛ bụ, bɛɛ hiɛŋ, nzhinyacɛ mu ga mɛ shɛ iwɛ atwa ihwɛ bu gabụ agwuma, maa a na suka, mbrad mu ga keeni tụ'walụ tu ga, tɛ shɛ iwɛ maa atwa ata na ya, meni mu ga mɛ shɛ iwɛ aba maa a na swa na aka na te e lukwumi nụ ụshɛka.

³Agwuma heŋteni bu, bɛɛ hiɛŋ, Cee bụjalụ ba agwuma-ihwɛ bu namɛɛ? Ge Ziba jishijɛ bụ, bɛɛ hiɛŋ, Bu namba nu Jɛrusalɛm, iwɛnɛ ti bɛɛ hiɛŋ, Hwayɛ ga ibɛ atwa Isrɛl zhɛ me n gwuricingeni Cɛnjɛ-ta-tugwama tu ugwunukwoshi mu go Soul.

⁴Agwuma hiɛŋ Ziba, Iyi elele nɛ gɛ Mɛfiboshɛt 'yajɛ, inɛɛ bi yaa shɛ. Ge Ziba jishijɛ agwuma, bɛɛ hiɛŋ, Tumaka! Yɛu-ugondu bu Ngaa shɛ. Agwuma lono maa hieci inyɛmɛnyɛmɛ mi gabụ iyɛri mi!

⁵Aka na ta agwuma ge Devid ci ụshɛpwụ ata ɛɛ hiɛŋ Bahurim, ibɛ bụtụ bu ko banɛ nu umwamwa udenji Soul, ɛ hiɛŋ izeci ibwɛ ge Shimei yɛu-ye-eyi Gira, ba twagaga tutwa ti bee ci tubanɛ nụ ụshɛpwụ ata.

⁶Ge Shimei kwuni Devid atayɛ tukalanga keeni anjɛ-ugondu Devid kpaaŋ, okwo ta atwa Devid kpaaŋ keeni atwa ikɛnyi elele a na a 'yaka bụ, rungwutwonu bu tu u'ala ubiye tu u'ala ugwulwo.

⁷Ge Shimei ba twagaga bụ, bɛɛ hiɛŋ, Bana epe! Bana epe! Gabụ bụkwụnɛ ga ba atwa! Gabụ bụtụ ga bu tusashɛ!

⁸Gabụ ga bi leshiji Cɛnjɛ-ta-tugwama tu Soul, ibɛ po AGWANGWAMA ma bụ tụpana itɛpwɛ iwɛ atwa ofwugwo na abu kwụnɛ nu umwamwa Soul. Ibɛ po AGWANGWAMA peni yɛu bu ga Absalom Cɛnjɛ-ta-tugwama ta ata iwɛnɛ aba kwụna atwa, iwɛbɛ po abɛ njɛ ufwu!

⁹Ga Abishai yɛu Zɛruwia hiɛŋ agwuma, Iyɛri mi gabụ agwuma, iwembe po ru'wo ru ga ru uwɛwɛ ru ma bụ twagagaa? Lono maa ma zha mo mwo bu uhiuhiu!

¹⁰Agwuma hiɛŋ Abishai, Imbe i shɛ inee mi ne hiŋ ahiɛba miaụŋ mu Zɛruwiaa? Yaa shɛ AGWANGWAMA hiɛn bụ ga ma n twagaga, asha gaaba tuba eri bɛ hiɛŋ bụ, Iwembe po aba nda ijɛɛ?

¹¹Ge Devid hiɛŋ Abishai keeni anjɛ-ugondu ubwa hwɛɛ, Yɛu mi nɛ shɛ tu'waba ti mi ti ikɛnyi mi ya dwalakaka uhiuhiu mu, asha shɛ inɛ bụtụ ga bu Bɛnjamin suu zhɛ ya wụmangwụ ya? AGWANGWAMA ubwa hiɛŋ bụ ga ma twagaga, ganga bụ ma maa ma n twagaga.

¹²Nekeshi AGWANGWAMA eri a kwụba hwuŋ tiriri ti mi[34] maa ma n tụpana uwebiye tụlụkpahɛ ta tutwa tu ga baa ma n twagaga hwayɛ ga.

¹³Gabata ge Devid na atwa ubwa to tuhwulo ta tahaŋnụ ta aba nu uhwaŋna ata. Ama ge Shimei uranjɛ bụ tutwa, baa 'waŋ aŋ atayɛ, boo zwogono aŋ upwupwutu tu baa namɛ hileniye bụ'aŋbụ bi ishɛmɛ ɛtɛ.

¹⁴Agwuma na atwa ubwa hwɛɛ lukwumenji te e ci Urefu Jodan, oo to ụhinjanụ apata.

¹⁵Ga Absalom na atwa Isrɛl hwɛɛ zhagajɛ nu bwa ee teni Jɛrusalɛm, ga Ahitofɛl du zhagajɛ na aba.

¹⁶Aka na go Hushai Bu'aki ata na shɛ biyejilo Devid, zhe no ofwo Absalom, bɛɛ hiɛŋ Absalom, Agwuma, ya urugbo! Agwuma, ya urugbo!

¹⁷Ga Absalom heŋteni Hushai, bɛɛ hiɛŋ, Bụtụ tɛcara tisha no ofwo biyejilo bu na hŋ? Iwembe po abụ zhagajɛ shɛ nu bwaa?

¹⁸Go Hushai jishijɛ Absalom, bɛɛ hiɛŋ, Bụtụ be elele na AGWANGWAMA teri, bụtụ be elele na kaa atwa ga keeni atwa Isrɛl hwɛɛ teri, bụtụ ata Ngɛɛ zhɛ ma sha bụtụ bwa, pu bwa du kaa Ngɛɛ zhɛ ma nama.

¹⁹Bɛɛ hiɛŋ bu sasana, Gaaba kwuuŋ Ngɛɛ zhɛ ma ndana ugonduu? Shɛ yɛu ya agwuma-ihwɛ mi suu? Gana na tu Ngaa ndanɛ la bishi bu ugondu, gabata du Ngɛɛ zhɛ ma bu ndana ugondu.

²⁰Ga Absalom hiɛŋ Ahitofɛl, Iti peni-ahaŋsa, imbe i shɛ maa ta ndaa?

²¹Ga Ahitofɛl jishijɛ Absalom, bɛɛ hiɛŋ, Zhaga woto ne eyikwo ata shibi magɛgashɛ, a gata bɛɛ gɛnjɛ maa a na ngbaraka ihwɛ ibwɛ. Nazhɛ atwa Isrɛl hwɛɛ zhɛ a mapa maa bu to ga shibi ni i'ime gom ta a hwụjɛ iŋ, ama u'waba tuba zhɛ wa hia atwa elele na ubu 'wa, nazhɛ tunama ta aba na bụ ti zhɛ ta kaana ikɛnyi.

²²Ee zhe ee beteni Absalom umwono ata tugwuno ni ikete ɛtɛ ukogo umwono wa agwuma. Ga Absalom teni bee weci ne eyikwo bishi bwa magɛgashɛ ne eshe atwa ata hwɛɛ.

²³Ahaŋsa tụpana elele na banɛ nu unu Ahitofɛl na aka ata, a shɛ gana n-ndumwa mu na Agwatana jɛmɛ. Iwɛbɛ po ge Devid na Absalom a nda ugondu na ahaŋsa elele na ga Ahitofɛl ba pana aŋ.