Read bassa 2 SAMUƐL UYEBI 20 Bible Online

2 SAMUƐL UYEBI 20 - bassa bible

2 SAMUƐL UYEBI 20

¹Bụtụ bu ko bu tusashɛ namba la, ɛɛ hiɛŋ izeci ibwɛ ge Shiba, yɛu Bikri na shɛ ụlamụ Bɛnjamin. Bee 'nyemeni utiitidi, bɛɛ hiɛŋ, Oo ahiɛba atwa Isrɛl, tu zasa urobwo we elele ne Devid o, tu zasa kaa ogwu elele ni yɛu Jɛsi o. Bụtụ bụtụ go jiyo ni ihwɛ ibwɛ.

²Iwɛbɛ po atwa Isrɛl hwɛɛ genji Devid aa 'wa Shiba. Ama atwa Juda tuba 'wa Devid agwuma aba na tɛcara, te kwune nu Jodan tutu Jɛrusalɛm.

³Aka na ti ge Devid ci ihwɛ ibwɛ nu Jɛrusalɛm, bee suji eyikwo ubwa magɛgashɛ umpwa, a gata bee ge tileni la maa a na ngbaraka ihwɛ ibwɛ, bee utegeni aŋ bungbaracɛ na zhɛ na ngbaraka aŋ nu umwono na ee kepi aŋ gana olulo. Bu weci shi kaa na aba o, ama ba pana aŋ iyimɛyɛ. Apata kaa ɛɛ zhɛ a nama tutu ụjita tu'wo ta aba.

⁴Agwuma hiɛŋ Amasa, Suyanɛ atwa Juda maa o sotulonu no ofwo mi waŋnabeyiko, tu gabụ du maa gwure na aba.

⁵Ga Amasa zhe ga baa suyanɛ atwa Juda, ama bu gwuri shi ya tuba na aba na aka na agwuma ge shileni bu o.

⁶Ibɛ po agwuma hiɛŋ Abishai, Ge Shiba ba jala maa ma tu nda iwɛwɛ uhwuri gana na ga Absalom ɛtɛ njɛ la. Zhaga sugo miaụŋ mi mi mu ugondu maa hi 'wa bụ, shibwonu bi zhɛ ba lashaga ashɛpwụ na 'yajɛ ikepi maa ma tu banangana.

⁷Ibɛ po atwa Joab, na atwa na shɛ ụlamụ Kɛrɛt, nụ ụlamụ pɛlɛt keeni asaza elele na 'yajɛ ukpahiŋ nu ujasa beni nu Jɛrusalɛm aa 'wa Shiba yɛu Bikri. Ga Abishai, ubwa shɛ uberezhe wa aba.

⁸Aka na te e ci utayɛ uko ụ'wụtụ na namɛ ni Gibion, apata ga Amasa twa na aba. Go Joab kaa urigeni i'wɛŋnɛ ibwɛ ujasa, bee hwuŋteni utokwobi ubwa nu ufwutwa, bee hwuŋteni uŋ nu umazhɛya ata bee umpi ne embi ubwa. Gana na tu baa kaana izhɛ, ibɛ utokwobi ata hwucikwo nu ufwutwa.

⁹Go Joab hiɛŋ Amasa, Ɛ-yɛu-bino mi, bu namba lapiya kaa? Go Joab 'imɛ bizholu Amasa nu u'ala ubwa ubiye maa ruwanɛ bụ.

¹⁰Ama ga Amasa tuba peni shi abashɛ maa go Joab untanganɛ ba utokwobi nu u'ala ubwa ugwulwo, go Joab sepi bu uŋ na amɛ, evwi ubwa banɛ aa 'waŋ na cɛnjɛ. Bee 'wi apata gu nu urubwo, go Joab du keeni shi bu uŋ ya tusapa o. Nazhɛ go Joab ni yɛu-bino bwa ga Abishai 'wa Shiba yɛu Bikri.

¹¹Bụtụ Joab bu ko tuba shikeni no ofwo ru'wo ru Amasa, baa uganɛ, bɛɛ hiɛŋ, Bụtụ be elele na mepeni Devid iwɛ, bụtụ be elele na kaa namɛ no Joab, asha ga 'wa Joab!

¹²Ru'wo ru Amasa kaa ru hwuŋpilongwu ne mehieŋ mu bwa, ree shiri ne rishe ru uhwaŋna ata ụ'wụtụ. Aka na ta bụtụ ata Joab kwụbɛ maa bụtụ be elele na ci apata bo shikono, ibɛ po bee kekwuri ru apata bee keri ru ni itimɛ ike, bee urigeni ru ukpasa uko.

¹³Aka na te e kekwuri ru'wo ru Amasa ee keri ru ni itimɛ ɛtɛ, nazhɛ atwa elele 'wa ya Joab maa e urigeni Shiba yɛu ɛtɛ Bikri.

¹⁴Ge Shiba kesheci tugwungwu ta alamụ Isrɛl hwɛɛ, bee zhe nụ ụshɛpwụ na ɛɛ hiɛŋ, Abɛl una Bɛt-meaka, ibɛ atwa na shɛ udenji Bikri[39] hwɛɛ sotulonu aa 'wa bụ ee teni nu ụshɛpwụ ata.

¹⁵Ta atwa elele na 'wa Joab hwụjɛ maa ge Shiba namba nu ụshɛpwụ ata, ee zhe ee hweri uŋ oo rungwutwonu. Oo hino uvwi uba ụshɛpwụ ata maa u hwuŋzwo.

¹⁶Biyikwo bu ko na incɛ namba nụ ụshɛpwụ ata, bee keri ụhiɛŋshɛ, bɛɛ hiɛŋ, Shɛlaga ma! Shɛlaga ma! Mbiso ma Joab maa ga zhajɛ epe, Ma jala maa Mo mbiso bu iwɛ ike.

¹⁷Go Joab zhe ga pe biyikwo ata. Biyikwo ata heŋteni bu, bɛɛ hiɛŋ, Gabụ suu bɛ shɛ go Joab? Go Joab jishijɛ bụ, bɛɛ hiɛŋ, Iiŋ, Gamba ganana. Biyikwo ata hiɛŋ bụ, Iyɛri mi Shɛlaga iwɛnɛ yɛu gɛ bu ugondu zhɛ mo bu mbiso. Go Joab hiɛŋ bụ, N shɛlajɛ.

¹⁸Biyikwo ata hiɛŋ bụ, A shana aa duma cala cala maa, Zhaga lɛshijɛ ajɛshɛgwa ahaŋsa na ubu inanjɛ no olugwo atwa na a pana bụtụ ahaŋsa, a na namɛ nụ ụshɛpwụ ata ɛɛ hiɛŋ Abɛl. Gana aa nda ta aa kwụnanga iwɛ.

¹⁹N shɛ bụtụ bu ko na ashashɛ atwa amɛ-olom a na shɛ atwa tɛcara nụ ụshɛpwụ ga, ụ shɛ bino bi Isrɛl. Iwembe po tuba aba jala maa iricinji uŋ maa njɛ ụshɛpwụ na shɛ una wa AGWANGWAMA osomboo?

²⁰Go Joab jishijɛ biyikwo ata, bɛɛ hiɛŋ, N zha shɛ mo iricingo ụshɛpwụ ga maa Ma nda uŋ osombo kwukwuŋ!

²¹Shɛ tuhaŋsa tu tu tu ta o. Yaa shɛ ahiɛ tɛ panɛ bụtụ ata ɛɛ hiɛŋ ge Shiba yɛu Bikri na banɛ ni ishɛmɛ Ifrem, na kwuni tigezhe tutana agwuma Devid, asha ti zhɛ ta ganga ụshɛpwụ ga. Biyikwo ata jishijɛ Joab, bɛɛ hiɛŋ, Ti zhɛ ta hiɛ kalanɛ uhiuhiu ubwa na azuba uba ga.

²²Nazhɛ biyikwo ata zhegeni atwa elele na namɛ nu ụshɛpwụ ata na ti'inta tu bwa. Ee mushinje uhiuhiu Shiba aa kalanɛ uŋ ata Joab ni ihiŋhiŋ uba ata. Nazhɛ go Joab njɛ okowuya unaa na wo mbiso atwa ubwa maa ge genji ya ụshɛpwụ ata, nazhɛ bụtụ bụtụ gwuri ni ihwɛ ibwɛ. Ama go Joab tuba gwuri no ofwo agwuma nu Jɛrusalɛm.

²³Go Joab, ubwa shɛ uberezhe we jeshi atwa Isrɛl hwɛɛ, ga Bɛneiya yɛu Jahoiyada ubwa tuba shɛ uberezhe wa atwa na shɛ Ɛkɛrɛt keeni Ɛpɛlɛt.

²⁴Ga Adoram ubwa tuba shɛ uhiu wa anjɛ-ugondu ukpahiŋ; ge Jehoshafat yɛu Ahilud ubwa tuba shɛ bi'intanɛ bi iyi elele nɛ ya nda;

²⁵ge Shiva ubwa shɛ bi'nyeci bu umwono-ụshɛrɛya, ga Zadok na Abiata aba shɛ onongbo,

²⁶ge Ira na banɛ ni Jai ubwa shɛ du bụtụ bu ko na ashashɛ onongbo Devid.