Read bassa 2 SAMUƐL UYEBI 24 Bible Online

2 SAMUƐL UYEBI 24 - bassa bible

2 SAMUƐL UYEBI 24

¹AGWANGWAMA 'yagananɛ isɛbwɛ na atwa Isrɛl, bee shishingeni Devid maa sukakana aŋ, bɛɛ hiɛŋ bụ, Zhaga rɛta atwa Isrɛl keeni atwa Juda.

²Ibɛ po agwuma eni Joab na shɛ uberezhe we jeshi ubwa ugondu ata, bɛɛ hiɛŋ bụ, Zhaga sugo ejeshi bu maa duleji alamụ Isrɛl hwɛɛ, te kwune nu Dan tutu i ci Bɛshiba maa rɛcɛ atwa maa Ma mapa gana na tu ufwugwo wa aba namɛ.

³Ama go Joab jishijɛ agwuma, bɛɛ hiɛŋ, Agwuma Tumaka! Ga AGWANGWAMA na shɛ Agwatana bụ, njɛ maa atwa Isrɛl keeni ufwugwo i ci akpakwụ akpakwụ uhwuri gana na aa namɛ hwuwayɛ, maa du yɛ uraiŋ maa kwụbɛ iŋ ne eshe bu. Ama imbe tuba po iyɛri mi nɛ shɛ agwuma ya jala maa Ma nda ijɛɛ?

⁴Ama n-ndumwa ma agwuma mu lasụ mu na Joab keeni mu na me eberezhe ubwa. Nazhɛ ee beni na agba agwuma ee hwuri maa a rɛcɛ atwa Isrɛl.

⁵Ee hwuri ee keshi Urefu Jodan, ee jwe ugba wa aba geri bu Aroe, ibɛ shɛ ụshɛpwụ na namɛ na ashashɛ Ulomu no tugwungwu tɛ cɛnjɛ tu Gad. Ee beni apata ee hwuri Jazɛ na namɛ tuzuba.

⁶Oo to tuhwulo ee zhe Giliad keeni Kadɛsh na cɛnjɛ tɛ Ɛhit.[53] Nazhɛ ee zhe Dan, ee beni nu Dan ee zhe geri bu Saidụn.

⁷Nazhɛ ee zhe tuta na ashɛpwụ na 'yagajɛ ikepi nu Taya, oo to tuhwulo ee zhegeji ashɛpwụ Ehiv elele hwɛɛ keeni Ekenan, ibɛ aa kwunanjɛ ni Biɛshiba na namɛ tuta tɛ cɛnjɛ ta atwa Juda.

⁸A namɛ ipiɛnɛ icinjishi ni ijitɛ woshi na tahaŋnụ ta aba, nazhɛ ee gwure nu Jɛrusalɛm na aba na te e hwuwe cɛnjɛ ta ata tudulogo hwɛɛ.

⁹Go Joab mbishi agwuma ufwugwo wa atwa Isrɛl a na eri a nda ujasa, a namɛ atwa igbɛɛ-akpakwụ-eneshi (800,000), atwa Juda namɛ atwa igbɛɛ-akpakwụ-eyebi-ni-dipi-yebi (500,000).

¹⁰Na aba na ti ge Devid hwuwi tɛrɛcɛ tu ga, nazhɛ bimbisegeni-ba-amɛ ubwa peni bu n-ndumwa-tụwụma, bɛɛ hiɛŋ AGWANGWAMA, N njɛ iwɛwɛ i'wɛtwɛ ni ijɛ Ngaa njɛ! Sukwu Ma bụ tabwa maa n gengeni iwɛwɛ mi. N njɛ ụlagwụ ụ'wụtụ 'wụtụ.

¹¹Aka na ti ge Devid zhinjɛ nu uvwungwa, ibɛ AGWANGWAMA mbishi Gad na shɛ bigesere na ba dumangana Devid tigesere, bɛɛ hiɛŋ bụ,

¹²Zhaga hiɛŋ Devid, AGWANGWAMA hiɛŋ, bi zhɛ mo bu tulonono iyi itɛtu maa teri ike inɛɛ nɛ aba jala na amɛ ibɛ maa ma bu ndana iŋ.

¹³Ga Gad zhajɛ ga no ofwo Devid bee mbishi bu iyi nɛ AGWANGWAMA jɛmɛ, bɛɛ hiɛŋ, Bi teri suu maa imunɛ layɛ na cɛnjɛ tu ga tụ bụ shiywa shɛ tatụ? Kwo kaa maa gezhigeni atwa i'ime bu ipiɛnɛ itɛtu te e bu urigeni? Kwo kaa maa ụngwụ tishikpe layɛ na cɛnjɛ tu ga tụ bụ ijitɛ itɛtu. Haŋsa tebiye maa m mbishi inɛɛ nɛ ebi teri maa Mo gwulo ma pana bụtụ na n tumwanɛ ajɛshɛgwa.

¹⁴Ge Devid jishijɛ Gad, bɛɛ hiɛŋ, N namɛ ne tiriri tụ 'wụtụ! Ga shɛ AGWANGWAMA iti peni ulwapɛ, iwɛnɛ tu boo hioko inyɛmɛnyɛmɛ duwa, maa kede i shɛ atwa iti peni ulwapɛ o.

¹⁵Gabata AGWANGWAMA kalanɛ ga atwa Isrɛl ụngwụ ata tishikpe, te kwuni nu uvwungwa tutu i ci aka na bee ge jwe. Atwa na ụngwụ ata kwụnɛ te kwuni nu Dan tutu i ci Biɛshiba namɛ igbɛɛ-talacɛ-ni-bɛ-tɛ (70,000).

¹⁶Aka na ta butumwa ba AGWANGWAMA ba azuba na ba kwụna atwa ata shikeni ni ipɛlu ya akpakpata Arauna ata shɛ Bujɛbus, bee sekeni u'ala ubwa maa iricingo atwa Jɛrusalɛm. Nazhɛ AGWANGWAMA sheyinji tuhaŋsa tu bwa nu ulwapɛ ata baa ga pana atwa ata, bɛɛ hiɛŋ butumwa ata, Ganga ya, inɛ ɛtɛ gwumwa, gwuricingo ya u'ala bụ!

¹⁷Aka na ti ge Devid kwụbɛ butumwa ata ba Agwatana na ba kwụna atwa ata, bɛɛ hiɛŋ AGWANGWAMA, Hioko, Gamba n njɛ iwɛwɛ, N njɛ iyi tugworozwo duwa. Ama imbe tuba atwa ga a na shɛ gana agwụdụ na mama zasa njɛɛ? Ma bụ tabwa maa ga shɛ Gamba kiri abụ sukakanɛ keeni atwa ihwɛ bishi mi.

¹⁸Ga Gad zhe pi Devid nụ ụjita ata gbaa, bɛɛ hiɛŋ bụ, Zhaga mungo na akpakpata Arauna Bujɛbus ata maa meni AGWANGWAMA utukwu-ụrụpɛ apata.

¹⁹Ge Devid munji bee zhe ga nu gana na ta AGWANGWAMA peni bu unu tedure na Gad.

²⁰Aka na tu ga Arauna mbiyanɛ tuta, baa kwụbɛ agwuma keeni atwa ugondu ubwa te e munje ee ci no ofwo ubwa. Bee beni bee kwuzeni agwuma, bee ubi ụpɛshɛka ubwa na cɛnjɛ.

²¹Bee heŋteni agwuma, bɛɛ hiɛŋ, Agwuma Tumaka! Imbe ibu shapɛ no ofwo yɛu gɛ bu ugonduu? Ge Devid jishijɛ bụ, bɛɛ hiɛŋ, N zhajɛ maa Ma sa akpakpata ga bụ maa ma mana AGWANGWAMA utukwu-ụrụpɛ epe, iwɛ maa ụngwụ ga tishikpe genji ya atwamwa.

²²Ga Arauna hiɛŋ Devid, Agwuma Tumaka! Shapa aŋ maa njɛ uhwara na aba gana na ubu kwụlanɛ. Inɛ ye eyi nɛ maa peni AGWANGWAMA ụrụpɛ tuhwoŋzhingo, sugo du imbele ya akpakpata ga keeni i'wɛ'wɛ n'ilu mi inɛ gɛ maa shanɛ ulwa.

²³Ga Arauna suji iŋ hwɛɛ bee peni agwuma, bɛɛ hiɛŋ bụ, Ga AGWANGWAMA na shɛ Agwatana bụ leshiji ụrụpɛ ga bụ.[54]

²⁴Ama agwuma jishijɛ Arauna, bɛɛ hiɛŋ, Awo, N zhɛ ma bụ tụpa ukwuribi wa aba. N zha shɛ ma pana AGWANGWAMA na shɛ Agwatana mi ụrụpɛ ni iyi ya arahaŋ o. Ge Devid so akpakpata ata, ti inɛ ɛtɛ ye eyi baa cɛpɛ bụ azụrụfa arinya dupu.

²⁵Nazhɛ bee meni AGWANGWAMA utukwu ata apata, nazhɛ boo to ụrụpɛ tuhwoŋzhingo keeni ụrụpɛ wa amɛ-olom. Ibɛ AGWANGWAMA hwụjɛ tutabwa tu na aa tabwa bụ iwɛ cɛnjɛ ta ata, nazhɛ ụngwụ ata ga namɛ ni Isrɛl hwuwowu ya.