Read bassa 2 SAMUƐL UYEBI 4 Bible Online

2 SAMUƐL UYEBI 4 - bassa bible

2 SAMUƐL UYEBI 4

¹Aka na ti ge Ish-boshɛt yɛu Soul hwụjɛ maa a kwụnɛ Abnɛ ni Hibron, bu zasa ya u'waba-tihia o, ohwulu kaa horukono atwa Isrɛl hwɛɛ.

²Ge Ish-boshɛt yɛu ɛtɛ Soul 'yajɛ atwa eyebi a na shɛ eberezhe ejeshi ubwa. Ɛ hiɛŋ izeci bụtụ bu ko ge Beana, ɛɛ hiɛŋ izeci bụtụ bi yebi ge Rekab miaụŋ mu Rimon ata banɛ ni Biɛrot, bụtụ bụ ụlamụ Bɛnjamin. (Iwɛnɛ po a rɛcɛ du Biɛrot ata nụ ụlamụ Bɛnjamin.

³Atwa ata Biɛrot gezhiji, ee zhe Gitaim, aa shɛ apata alashɛ taa hwayɛ).

⁴Go Jonatan yɛu Soul meci yɛu-ye-eyi ike nɛ ɛɛ hiɛŋ izeci ibwɛ gɛ Mɛfiboshɛt, na namɛ shiywa shɛ ta te e meci bu, na aka na ta a kwụnɛ Soul no Jonatan. Aka na tu unabarɛ tu'wo ta aba banɛ ni Jɛzrɛl wee ci aŋ, ibɛ bụtụ na ba biga bụ shepi bu bee gezhiji, ama gana na tu baa nda izɛlɛgwu, ibɛ po gɛ Mɛfiboshɛt benengeni bu bee leyi na cɛnjɛ, ibɛ po ivwunɛ ibwɛ dwotwogonu, baa shɛ ya ugwurukwu.

⁵Ge Rekab ne Beana miaụŋ mu Rimon ata shɛ Bubiɛrot ata ishijɛ aa sanɛ ni ihwɛ Ish-boshɛt. Ee ci apata geri bu uwaŋna tishikoko, na aka na tu baa 'waŋ ihwungwɛ nu uwaŋna ata.

⁶Ee teni taa na amɛ umwono ata gana maa iyimɛyɛ wit ɛɛ zhɛ a sarɛ apata. Ee sepi bu iyi ike na amɛ. Ge Rekab ni yɛu-bino bwa ge Beana gezhiji ee benengeni.

⁷Aka na ee teni nu umwono ata ge Ish-boshɛt bo woto, tu bwa weci no ogodo nu umwono ubwa u buweci bo woto malabụ, aa kwụnɛ bụ. Nazhɛ ee mwi uhiuhiu ubwa ee shepi uŋ ee hwuri, ee duri uhwaŋna Araba, ee zhe tahaŋnụ uuwa gi iyi yo holo.

⁸Aa shapɛ uhiuhiu ata Ish-boshɛt pa agwuma Devid ni Hibron, ɛɛ hiɛŋ bụ, Uhiuhiu Ish-boshɛt yɛu Soul, na shɛ la bụtụ ata bụ bi i'ime na ma bụ jala la tụkwụna na. AGWANGWAMA ubu tụpananɛ hwayɛ ga itɛpwɛ, gabụ agwuma-ihwɛ tu no ofwo Soul keeni atwa ihwɛ ibwɛ du.

⁹Ge Devid jishijɛ Rekab ni yɛu-bino bwa ge Beana, a na shɛ miaụŋ mi Rimon ata shɛ Bubiɛrot, bɛɛ hiɛŋ, N to AGWANGWAMA na shɛ buumwa na kaa ma n lashaga ni iyi iwɛ ye elele hwɛɛ,

¹⁰aka na ta butumwa bu ko zhajɛ la ni Ziklag, bee m mbishi iwɛ tu'wo tu Soul. Bee heŋshi maa unabarɛ ubiye baa n 'waŋnanɛ. Ngaa 'imɛ bụ, Ngaa kwụnɛ. Itɛpwɛ nɛ Ngaa tụpanɛ bụ ta, iwɛ unabarɛ ubiye na baa 'waŋnɛ!

¹¹Asha kpalụ mba tuba yɛɛ zhɛ ya wumana ogworozwo a na kwụnɛ bụtụ bi tiririri taa nu umwono ubwa no ogodo ubwaa? N zhɛ ma tụpa itɛpwɛ tu'wo tu bwa nu uhiuhiu hiŋ maa Ma hiɛ bacɛnga na cɛnjɛ tu unyizo!

¹²Ge Devid peni esemberi ubwa oko unu maa ga kwụnɛ aŋ, ibɛ po ee jejeji i'ɛlɛ ya aba keeni ɛvwɛvwɛjɛ aba, nazhɛ ee sweteji aŋ ni ipɛlu ukwokwo uko na namɛ ni Hibron. Ama e shepi tuba uhiuhiu ebe Ish-boshɛt ee ni uŋ nu u'uye Abnɛ ni Hibron ata.