Read bassa 2 SAMUƐL UYEBI 6 Bible Online

2 SAMUƐL UYEBI 6 - bassa bible

2 SAMUƐL UYEBI 6

¹Ge Devid sotulonu sasana etwenyi elele na ee zenji ni Isrɛl, a namɛ igbɛɛ-umpwa-ni-bɛ-tɛ (30,000).

²Bɛɛ ishijɛ bee zeriji atwa ata namɛ nu bwa hwɛɛ, aa sanɛ Beala-Juda, maa a shapɛ Ikpɛtɛ ɛtɛ Unu-tutwa ya Agwatana, igɛtɛ aa suyana ni izeci ya AGWANGWAMA na Hwuri Kpaaŋ na jɛjɛ na ashashɛ iyi-uumwa ɛtɛ ya apiambɛ ɛtɛ patanganɛ ni Ikpɛtɛ ɛtɛ.

³Ibɛ ɛɛ vwɛ ikpɛtɛ ɛtɛ nu umwono Abinadab na patanɛ ni ishɛmɛ, ee shiyeni iŋ nụ ụhaŋtụ uko ufwo. Ibɛ ata Uza na Ahio[10] a na shɛ miaụŋ mu Abinadab, a suka ụhaŋtụ ata

⁴ti Ikpɛtɛ ɛtɛ ya Agwatana, ga Ahio ubwa hwuleni iŋ umbe.

⁵Ge Devid na atwa Isrɛl hwɛɛ a nda tụlagwụ tu unyasa ụ'wụtụ, aa zunga azunga, aa 'nyama i'nyemi 'nyemi, oo hwulo ihwure hwure, aa pana AGWANGWAMA ụjɛrụma gana elele na tu ukpahiŋ wa aba namɛ hwɛɛ.

⁶Aka na te e ci akpakpata oko na namɛ nu Nakon, ibɛ inɛ ɛtɛ 'waŋnɛ Ikpɛtɛ ɛtɛ ya Agwatana twa udukwutwa, go Uza mbo u'ala ubwa baa ruwanɛ iŋ.

⁷Ibɛ po AGWANGWAMA njɛ isɛbwɛ no Uza, baa kwụnɛ bụ apata to dongonu Ikpɛtɛ ɛtɛ ya Agwatana, iwɛnɛ tu boo mbo u'ala ubwa bee timengeni Ikpɛtɛ ɛtɛ.

⁸Iwɛ ɛtɛ gwumanɛ Devid iwɛnɛ ta AGWANGWAMA njɛ isɛbwɛ no Uza. Ibɛ po oo po apata izeci maa, Pɛrɛz-uza[11] tutu taa hwayɛ.

⁹Ge Devid njɛ inyɛsɛ ya AGWANGWAMA jita ata, bɛɛ hiɛŋ, Gana naa Ngɛɛ zhɛ Ma nda ya maa Ikpɛtɛ gɛ ya AGWANGWAMA i ci ofwo na Ngaa namɛɛ?

¹⁰Ge Devid heŋshi maa i kwụlanɛ shɛ bụ maa shapa ya Ikpɛtɛ ya AGWANGWAMA pu bwa nu Jɛrusalɛm o. Baa vwụrɛ bee shepi iŋ bee zhe ni ihwɛ Obɛd-idụm ata jɛjɛ nụ ụshɛpwụ ata ɛɛ hiɛŋ Gat.

¹¹Ibɛ po Ikpɛtɛ ɛtɛ shi ni ihwɛ ɛtɛ Obɛd-idụm bụtụ ata bu Gat ipiɛnɛ itɛtu. AGWANGWAMA kaa peni Obɛd-idụm uwebiye ta atwa ihwɛ ibwɛ du hwɛɛ.

¹²Aka na te e mbishi agwuma ge Devid maa AGWANGWAMA peni Obɛd-idụm uwebiye, ti iyi elele nɛ baa 'yajɛ ni ihwɛ ibwɛ hwɛɛ, iwɛ Ikpɛtɛ ɛtɛ ya Agwatana. Ibɛ po ge Devid zhe bɛɛ vwɛ Ikpɛtɛ ɛtɛ ya Agwatana nu umwono Obɛd-idụm, bee shepi iŋ nu Jɛrusalɛm na shɛ ụshɛpwụ ubwa nu unyasa ụ'wụtụ tubwada.

¹³Aka na ta atwa na 'waŋnɛ Ikpɛtɛ ɛtɛ ya AGWANGWAMA zhe tahaŋnụ ahaŋpalụ ecihiŋ, bee shikicinji aŋ, boo to tugwo ụrụpɛ nu usemberi buna keeni yɛu buna nɛ nyemi.

¹⁴Ge Devid rɛ idikɛ ɛtɛ i tikpɛngbɛ[12] ilinɛn ne embi ubwa, baa hiɛbagana AGWANGWAMA tɛhiɛba gana na tu ukpahiŋ ubwa namɛ hwɛɛ.

¹⁵Gana ge Devid keeni atwa Isrɛl hwɛɛ njɛ nazhɛ aa shapɛ Ikpɛtɛ ɛtɛ ya AGWANGWAMA maa e zhe Jɛrusalɛm ne ewili keeni akakacɛ tuhwulo ta.

¹⁶Gana na ti Ikpɛtɛ ɛtɛ ya AGWANGWAMA teni ụshɛpwụ ata Devid ụ'wụtụ. Ga Maikal yɛu-yo-o Soul hikeni ụgbahwụ, baa kwụbɛ ta agwuma ge Devid ba dwa angapa na tɛhiɛba nu umbe AGWANGWAMA, baa ngbaracɛ bụ cwɛŋ bana na amɛ ubwa.

¹⁷Ee tecinji Ikpɛtɛ ɛtɛ ya AGWANGWAMA nu udulo ata, ee shi iŋ nu urubwo na ge Devid ga ndanɛ iŋ. Nazhɛ ge Devid peni AGWANGWAMA arụpɛ tuhwoŋzhingo keeni arụpɛ amɛ-olom.

¹⁸Aka na ti ge Devid hwuwi arụpɛ tuhwoŋzhingo keeni arụpɛ amɛ-olom tuta, nazhɛ bee peni atwa ata uwebiye ni izeci ya AGWANGWAMA na Hwuri Kpaaŋ.

¹⁹Bee hweŋshi aŋ iyimɛyɛ hwɛɛ aba na shɛ atwa Isrɛl, te eyikwo te etwenyi. Bee peni du bụtụ bụtụ ukara uko keeni usunda tinyoso uko uko keeni tu'unto ta tụ'walụ ta afwafwa tu hwoo, nazhɛ bụtụ bụtụ sanɛ ujiyo ni ihwɛ ibwɛ.

²⁰Aka na ti ge Devid ji ni ihwɛ ibwɛ maa 'walụ atwa umwamwa ubwa. Ga Maikal yɛu-yo-o Soul banɛ bɛɛ tɛjɛ bụ uhwaŋna, bɛɛ hiɛŋ bụ, agwuma Isrɛl meme peni ụjɛrụma hwayɛ ga duwa, harɛ bee meme shiri mohondo ne eshe miaụŋ-mu-ugondu mo o ma atwa ubwa shihwolu gana alagwụ. Ezuye shɛ shɛ bu du o.

²¹Ge Devid jishijɛ Maikal, bɛɛ hiɛŋ bụ, AGWANGWAMA na n teri maa Ma sha bi'yagajɛ ba atwa ubwa Isrɛl uhwuri bishi bu keeni atwa ihwɛ bishi bu, ubwa Ama hiɛbagana tɛhiɛba. N tɛ zhɛ kaa ma uranga AGWANGWAMA tɛhiɛba tɛhiɛbagana tutu.

²²Ngɛɛ tɛ zhɛ kaa m mama kaana ụpụrụsa tụpana uhwuri gana ga maa n ngbaraka cwɛŋ ne eshe bu.[13] Inɛ miaụŋ mi mi mu ugondu mo o mu na aba njɛ iwɛ aba, aba ma m pana ụjɛrụma te gembi duwa.

²³Ga Maikal yɛu ɛtɛ Soul yo o kaa zasa yɛu kwukwuŋ uuwa boo to 'wo.