Read bassa 2 SAMUƐL UYEBI 9 Bible Online

2 SAMUƐL UYEBI 9 - bassa bible

2 SAMUƐL UYEBI 9

¹Ge Devid heŋteni iheŋtene jitoo ko bɛɛ hiɛŋ, I ta 'yajɛ bụtụ be elele ta vwɛ ni ihwɛ Soul maa Ma nda bụ uwebiye iwɛ ụjɛrụma Jonatan hŋ?

²I ta 'yajɛ la yɛu-ugondu ike nɛ ta namba ni ihwɛ Soul ɛɛ hiɛŋ izeci ibwɛ ge Ziba. Ibɛ aa suyanɛ bụ pa agwuma Devid, ibɛ agwuma heŋteni bu, bɛɛ hiɛŋ, Gabụ suu bɛ shɛ ge Ziba? Bɛɛ jishijɛ bụ, bɛɛ hiɛŋ, Gamba ga yɛu bu ugondu na.

³Agwuma heŋteni bu, bɛɛ hiɛŋ, I 'yajɛ bụtụ be elele ta vwɛ ni ihwɛ Soul maa Ma nda bụ uwebiye ya Agwatana hŋ? Ge Ziba jishijɛ bụ, bɛɛ hiɛŋ, Iiŋ, yɛu Jonatan ye eyi ike ta namba. Ama ivwunɛ ibwɛ kwuswatagwụ.

⁴Agwuma heŋteni bu, bɛɛ hiɛŋ, Cee baa namɛɛ? Ge Ziba jishijɛ agwuma, bɛɛ hiɛŋ, Bu namɛ ni ihwɛ Maki yɛu-ye-eyi Amiɛl ata namɛ nu Lodɛba.

⁵Agwuma Devid tumwanɛ bụtụ ni ihwɛ ebe Maki yɛu-ye-eyi Amiɛl nu Lodɛba, aa shapɛ bụ.

⁶Aka na ti gɛ Mɛfiboshɛt, yɛu Jonatan na shɛ bụjalụ Soul pushe, bee kwuzeni Devid, baa 'walụ bụ a'walụ tugwama. Ge Devid hiɛŋ bụ, Ɛ-Mɛfiboshɛt. Bɛɛ jishijɛ bụ, bɛɛ hiɛŋ, Gamba yɛu bu ugondu na.

⁷Ge Devid hiɛŋ bụ, Ta nda inyɛsɛ o, N zhɛ ma bu nda uwebiye iwɛ ụjɛrụma bishi bu go Jonatan. N zhɛ du kaa me bu gwuricingeni cɛnjɛ te elele tu na tɛ shɛ la ma tu ugwunukwoshi bu go Soul hwɛɛ. Atubana bụ kaa ti zhɛ tu na ya iyimɛyɛ ikwede ike aka elele.

⁸Gɛ Mɛfiboshɛt kwuzeneni, baa 'walananụ bụ a'walụ tugwama, bɛɛ hiɛŋ bụ, Iwembe po abụ ta ma nda uwebiye Gamba na n hwuri shi okwo ru'wo ru uwɛwɛɛ?

⁹Nazhɛ agwuma suyanɛ Ziba yɛu ɛtɛ ugondu Soul, bɛɛ hiɛŋ bụ, M pwonuo Mɛfiboshɛt bụjalụ ba agwuma ihwɛ bụ, ti iyi elele nɛ go Soul ga 'yajɛ la keeni umwamwa ubwa hwɛɛ.

¹⁰Ama gabụ, na miaụŋ mụ bụ me eyi keeni miaụŋ mụ bụ mu ugondu, hi zhɛ hi na hwanga bụ itimɛ, maa hi ne sugeni bu iyimɛyɛ iwɛ maa tuba iyimɛyɛ namana bụjalụ ga ba agwuma-ihwɛ bu. Ama gɛ Mɛfiboshɛt ni ikɛnyi ibwɛ tuba zhɛ na ya iyimɛyɛ ikwede ike ne mi aka elele. Ge Ziba kaa 'yajɛ miaụŋ-me-eyi umpwa-na-muba-mu-ta keeni miaụŋ-mu-ugondu woshi.

¹¹Ge Ziba jishijɛ agwuma, bɛɛ hiɛŋ, Iyi elele nɛ ebu m peni-unu Gamba yɛu bu ugondu, N zhɛ ma nda gana ata. Gabata gɛ Mɛfiboshɛt ba ya ga iyimɛyɛ ikwede ike ne Devid,[17] gana yɛu nɛ agwuma Devid meci gom.

¹²Gɛ Mɛfiboshɛt kaa 'yajɛ yɛu-ye-eyi ike nɛ ɛɛ hiɛŋ izeci ibɛ ge Mika. Atwa elele na namɛ ni ihwɛ Ziba a shɛ ya miaụŋ-mu-ugondu Mɛfiboshɛt.

¹³Gabata gɛ Mɛfiboshɛt na ivwunɛ ibwɛ hwɛɛ bɛ iyebi kwuswatagwụ namɛ ya nu Jɛrusalɛm, baa ya iyimɛyɛ ikwede ike na agwuma aka elele.