Read bassa 1 SHƐGWUMA SHI HIIŊ 10 Bible Online

1 SHƐGWUMA SHI HIIŊ 10 - bassa bible

1 SHƐGWUMA SHI HIIŊ 10

¹Aka na ta agwuma-o-o Shiba hwụjɛ urishi Sụlụmụn gana na baa untanganɛ izeci ya AGWANGWAMA, baa zhajɛ maa manga bụ ni iheŋtengene nɛ gwumanjɛ.

²Baa 'waŋnɛ du atwa ufwugwo a na a ndana bu ugondu, tu nruhondo mu na mu 'waŋnɛ manɛbɛ mụ ụhiụŋ ụlatụ, ta azhɛnarɛya na gembi tebiye keeni atayɛ ogwumishi, baa zhajɛ Jɛrusalɛm. Aka na ti bee ci Sụlụmụn bee mbishi bu iyi elele nɛ namɛ na ahaŋsa ubwa hwɛɛ.

³Go Sụlụmụn peni bu ajɛshɛgwa iyi elele nɛ bee heŋteni bu iwɛ ibɛ hwɛɛ, i zasa iyi nɛ 'yaganɛ agwuma Sụlụmụn ikɛnyi bee eshicigeni shi bu o.

⁴Aka na ta agwuma ata o o Shiba kwụbɛ ti'inta tu na go Sụlụmụn Incɛ, tu umwono na boo mo,

⁵ti iyimɛyɛ nɛ aa panɛ bụ nu uteburu ubwa, tu gana na tu miaụŋ mu bwa mu ugondu mu gɛgajɛ, tu gana na ta a'yacɛ ubwa a nda iyi keeni i'wɛŋnɛ nɛ ee uregeni hwɛɛ, ta atwa na a panɛ bu meni nu Ukwopi, ti iyi nɛ baa ta ụrụpɛ tuhwoŋzhingo nu Umwono wa AGWANGWAMA, ibɛ po ahaŋsa hwuwonowuŋ bu ya na amɛ ubwa.

⁶Bɛɛ hiɛŋ agwuma Sụlụmụn, Unabarɛ bụ na Ngaa hwụjɛ na cɛnjɛ ti mi, iwɛ iyi nɛ abu ndanjɛ keeni ti'inta tụ bụ hwɛɛ i shɛ iwɛ tɛkana ga.

⁷Ama N nga tɛtanɛ shɛ iŋ rishe maa iwɛ-tɛkana yaa shɛ o, semi ti Ngaa zhajɛ bana Ngaa kwụbɛ ya du ne eshe mi. N kwụbɛ maa e m mbishi shi du ta kpayawụ okwo na ashashɛ ti'inta tụ bụ keeni bɛzhɛgba na abɛ shɛ o.

⁸Eyikwo bu gwoje,[16] ta miaụŋ-mu-ugondu bu mu na mo shikono na agba bụ, maa a na shɛlaga ti'inta tụ bụ gwoje du.

⁹Ge Zhemonjino AGWANGWAMA na shɛ Agwatana bụ, ubwa na ubu teri maa yɛ tugwama ti Isrɛl, iwɛnɛ ta AGWANGWAMA lubi atwa Isrɛl unyizo-nom, ibɛ po baa bɛ njɛ agwuma aba maa na duma ụshɛrɛya u tishiriri gana na tu undwa ubwa jɛmɛ.

¹⁰Nazhɛ bee peni agwuma Sụlụmụn azhɛnarɛya arinya dipi-yebi-nu-woshi (120) keeni manɛbɛ mụ ụhiụŋ ubiye keeni atayɛ ogwumishi. I zasa kwukwuŋ aka na aa 'waŋnuanua agwuma Sụlụmụn manɛbɛ mụ ụhiụŋ ubiye i ci mu naa na agwuma ata o o Shiba 'waŋnanɛ bụ.

¹¹Ihɛŋtu Hiram ifwugwo nɛ 'waŋnɛ azhɛnarɛya na banɛ nu Ofi, ibɛ du 'waŋnɛ i'wɛ'wɛ ɛtɛ ya akwụrụgba keeni atayɛ ata ogwumishi.

¹²Ibɛ po agwuma Sụlụmụn suji i'wɛ'wɛ ɛtɛ ya akwụrụgba baa njɛ atukpa a na a sa Umwono ata wa AGWANGWAMA keeni umwono ubwa. Ni ibɛ du kaa baa njɛ shɛduma keeni egwoje iwɛ azunga. Iyiri i'wɛ'wɛ ɛtɛ du kaa te teni shi la na cɛnjɛ ta ata o, i zasa kaa du ofwo na aa kwụbwa iŋ ya tutu taa hwayɛ o.

¹³Ibɛ po agwuma Sụlụmụn peni agwuma Shiba iyi elele nɛ ukekeshi ibɛ to bu gana na tu baa lụpɛ bụ. Inɛ ɛtɛ kaa namɛ swooŋ nu upwaŋ na baa njɛ bụ na amɛ iyi tɛzhɛgba ta tugwama tu bwa. Nazhɛ biyikwo ata gwuri na cɛnjɛ tu bwa ta anjɛ-ugondu ubwa hwɛɛ.

¹⁴Ugombo wa azhɛnarɛya na go Sụlụmụn ba lashɛga na amɛ uywa uko a shɛ arinya akpakwụ-atatụ-nu-dupu-ne-eshe-umpwa-na-ba-ecihiŋ (666).

¹⁵Ana ata kaa namɛ swooŋ na anaa na a banɛ no olugwo ahinya keeni ahinya na a suka iyi, keeni shɛgwuma sha Arabia hwɛɛ, te egwomina cɛnjɛ ta ata kpaaŋ.

¹⁶Agwuma Sụlụmụn njɛ shabula shɛ ujasa shɛ na shi gembenji kpakwụ, abula ata oko gba a ya azhɛnarɛya na ulumo wa aba shɛ arinya akpakwụ-atatụ (600).

¹⁷Baa ndaananɛ shabula shɛ ujasa kpakwụ-ni-dipi-yebi (300) na azhɛnarɛya na ee jibi. Abula oko gba a ya ulumo wa azhɛnarɛya arinya dipi-tɛtu (150). Nazhɛ agwuma suji shabula sha ata hwɛɛ bee tileni shu nu umwono ata ɛɛ hiɛŋ izeci ubwa, Uwapa Lebanon.

¹⁸Agwuma du meeneni idwɛtwɛ ike i'wɛtwɛ ne ene adagba, bee sweni iŋ azhɛnarɛya na namɛ rụmbɛɛ.

¹⁹Idwɛtwɛ ɛtɛ 'yajɛ shigbudu shi cihiŋ shɛ na oo mungo iŋ, aa njɛ ụsụbwa uhiuhiu yɛu buna ni idwɛtwɛ ɛtɛ. Aa njɛ du iyi i'ɛlɛ tupatangana ni idwɛtwɛ ɛtɛ zalụ hweehwe. Izeci iyebi shikekeni ni ijɛ ɛtɛ i'ɛlɛ tupatangana.

²⁰E shikecenji izeci umpwa-ni-bɛyebi, bu ko bo shikono nu ukwunanga shigbudu sha ata hwɛɛ ba shi cihiŋ. I ta zasa cɛnjɛ-ta-tugwama te elele kwukwuŋ ti 'yagawa la idwɛtwɛ gɛnɛ ɛtɛ.

²¹Iyi elele nɛ agwuma Sụlụmụn ba swa meni ni ibɛ i shɛ azhɛnarɛya. Agbamgbam na zweni nu umwono ata ɛɛ hiɛŋ, Uwapa Lebanon hwɛɛ a shɛ na azhɛnarɛya tụrụmbɛɛ aa njɛ aŋ. I zasa iyi elele nɛ aa njɛ na azụrụfa o, iwɛnɛ ta azụrụfa zasa la ụjɛrụma na aka agwuma Sụlụmụn okwo cwɛŋ.

²²Iwɛnɛ po agwuma 'yajɛ du ihɛŋtu tinyakpa nyakpa nɛ aa haŋtana ni itekwu. Eheŋteni ubwa a zhagaga ne eheŋteni ihɛŋtu ya agwuma Hiram. Shiywa shɛ tatatụ eheŋteni ubwa e jiye, aa 'waŋnanɛ bụ azhɛnarɛya, na azụrụfa, te ene adagba, ta shamwa, te egbereji, to obonu to otwootwolwo hwɛɛ.

²³Gana agwuma Sụlụmụn ngezengeni shɛgwuma shi unyizo ga hwɛɛ na bɛzhɛgba tisha keeni ti'inta ta.

²⁴Ibɛ po atwa unyizo ga hwɛɛ a jalakaka Sụlụmụn maa a na hwuga n-ndumwa mi ti'inta tu na Agwatana peni bu.

²⁵Ibɛ po du kaa bụtụ be elele be ci pu bwa, ba 'waŋnanɛ bụ upwaŋ wa azụrụfa, na azhɛnarɛya, no otogwo, ni i'wɛŋnɛ ujasa, ta manɛbɛ mu na mi 'yajɛ ụhiụŋ ubiye, ti idɛkwɛ swoswoswo, gana ata aa 'waŋnanɛ bụ kamụụ uywa uywa.

²⁶Go Sụlụmụn sotulonu ihɛŋtu ibwɛ ujasa keeni asụcɛ idɛkwɛ ibwɛ. Ihɛŋtu ujasa nɛ baa 'yajɛ namɛ akpakwụ-e-cenje (1,400) keeni asụcɛ idɛkwɛ igbɛɛ-icihiŋ (12,000), bee tilegeni iŋ na ashɛpwụ a'wụtụ a'wụtụ a na boo mo iwɛ ihɛŋtu ibwɛ ujasa keeni Jɛrusalɛm na baa namɛ.

²⁷Agwuma njɛ maa ga azụrụfa bala nu Jɛrusalɛm gana atayɛ na aka ubwa. I'wɛ'wɛ yo osobu barɛ gana odurungwu na shikekeni na ahangwụ.

²⁸Ni Ijipti[17] keeni Silisia apata ahinya agwuma Sụlụmụn ɛ sɛnjɛ bụ idɛkwɛ ibwɛ te gembi ufwugwo duwa.

²⁹Ahinya agwuma ɛ sɛ ụhaŋtụ ujasa uko ni Ijipti gana azụrụfa arinya akpakwụ-atatụ (600), ɛ sɛ budakwa bu ko azụrụfa arinya dipi-tɛtu (150), a na sangana ya shɛgwuma shɛ Ɛhit keeni a na Siria.