Read bassa 1 SHƐGWUMA SHI HIIŊ 11 Bible Online

1 SHƐGWUMA SHI HIIŊ 11 - bassa bible

1 SHƐGWUMA SHI HIIŊ 11

¹Iwɛ eyikwo anya edenji kwụlanɛ agwuma Sụlụmụn, aba shɛ miaụŋ-mo-o ma Amoab, na mu na ma A'amon, na mu na ma Asaidụn keeni mu na mɛ Ɛhit. A na ata kaa namɛ swooŋ ni yɛu Faro nɛ bee zeni.

²Edenji ata aba kaa AGWANGWAMA hiɛŋ miaụŋ mi Isrɛl, Ta nda ma tụmbụla na aba o, iwɛ aka na ɛɛ zhɛ a jɛshɛrɛga-shihaŋsa shi hiŋ maa hi na nda tuwa ta aba. Ama aba kaa agwuma Sụlụmụn lubi waa.

³Eyikwo ubwa a na shɛ miaụŋ mi shɛgwuma namɛ akpakwụ-atatụ-ni-dipi-yebi (700), a na ata namɛ swooŋ ne eyikwo magɛgashɛ kpakwụ-ni-dipi-yebi (300) a na baa 'yajɛ. Eyikwo ata ubwa aba kaa jɛshɛrɛjɛ bụ ahaŋsa.

⁴Aka na tu go Sụlụmụn injɛ, eyikwo ata ubwa aba vwụrɛcɛnjɛ bụ maa bu na zhɛba tuwa. Ibɛ po baa patanɛ shɛ ya AGWANGWAMA na shɛ Agwatana ubwa rishe gana bishi bwa ge Devid.

⁵Go Sụlụmụn ba zhɛba ya Ashtorɛt ata shɛ tuwa to o ta Asaidụn, baa zhɛba du tuwa ta A'amon tu na ɛɛ hiɛŋ Milkom,[18] tu na tɛ shɛ iyi-tupwaŋ ya A'amon.

⁶Go Sụlụmụn njɛ AGWANGWAMA iwɛwɛ, bu 'wa sụ ya AGWANGWAMA na amɛ oko gana na bishi bwa ge Devid 'wa bu la o.

⁷Nazhɛ go Sụlụmụn meni Kemosh na shɛ tuwa tu tupwaŋ ta Amoab utukwu-ụrụpɛ ni ishɛmɛ ɛtɛ namɛ nu uwaŋna-banụ Jɛrusalɛm, bee meni du Molɛk na shɛ tuwa tu tupwaŋ ta A'amon utukwu-ụrụpɛ.

⁸Gobwonu du bee meni eyikwo ata anya edenji a na baa zanɛ hwɛɛ otukwu-arụpɛ maa o no hwoŋzhingo iturɛre na tuwa ta aba tu na aa ta arụpɛ.

⁹Nazhɛ amɛ AGWANGWAMA hashɛganụ no Sụlụmụn iwɛnɛ ta ahaŋsa ubwa jɛshɛrɛgwa bee genji bu tu'wa, ubwa na shɛ AGWANGWAMA atwa Isrɛl na kaa bananɛ bụ la caakwụ kpalụ yebi.

¹⁰Iwɛ ijɛ kaa gom baa tɛtaganɛ bu la unu maa bɛ shɛ shɛ ba 'wa tuwa o, ama bu untanganɛ shɛ unu ata AGWANGWAMA peni bu o.

¹¹Iwɛbɛ po AGWANGWAMA hiɛŋ Sụlụmụn, Gana na ta ahaŋsa bụ lacɛ maa untangana unu mu tutwa keeni undwa na Ngee bi peni, N zhɛ mo dwonu cɛnjɛ-ta-tugwama tụ bụ ma pana tụ yɛu bu ugondu ike.

¹²Ama N zha shɛ ma nda iŋ na aka bu o, iwɛ ụjɛrụma bishi bu ge Devid, ama N zhɛ mo dwonu tu na aka na yɛu bu yɛ hwuŋ tugwama.

¹³Ama okwo ti yaa shɛ gana ata, N zha shɛ ma lashɛga cɛnjɛ ta ata hwɛ hwɛɛ o, ama N zhɛ ma pana yɛu bu ụlamụ uko du iwɛ ụjɛrụma yɛu mi ugondu ge Devid keeni iwɛ Jɛrusalɛm na Ngee teri.

¹⁴Ibɛ po AGWANGWAMA ishɛcɛnganɛ Sụlụmụn atwa i'ime maa a sukakanɛ bụ. Aba shɛ ga Hadad bụtụ bi Idụm na shɛ du ụlamụ tugwama ni Idụm.

¹⁵Aka na ti ge Devid ta namɛ la ni Idụm, go Joab na shɛ uberezhe we ejeshi ubwa zhe maa no n'wo, na aba na ta a lasụ atwa Idụm nu ujasa, aa kwụnɛ etwenyi Idụm hwɛɛ.

¹⁶Go Joab na atwa Isrɛl hwɛɛ namɛ apata ipiɛnɛ icihiŋ, uuwa i ci aka na te e hwuwi etwenyi Idụm tụkwụna hwɛɛ.

¹⁷Ibɛ po ga Hadad keeni atwa Idụm oko a na shɛ miaụŋ-mu-ugondu bishi bwa gezhiji ee zhe Ijipti, ga Hadad kaa ta shɛ la yɛu aka ata.

¹⁸Aa banɛ ni Midian aa zhajɛ Paran, ee suji atwa Paran ee zhe ni Ijipti pa agwuma Faro, ibɛ po agwuma Faro peni Hadad umwono, ti iyimɛyɛ keeni cɛnjɛ.

¹⁹Ga Faro lemeni Hadad amɛ tebiye, ibɛ po ga Faro peni bu ukwede ubwa bee zeni (ibɛ shɛ buhongwu biyikwo bwa) na ɛɛ hiɛŋ izeci ibwɛ ga Tapɛnɛs.

²⁰Ibɛ biyikwo Hadad na shɛ buhongwu Tapɛnɛs meci yɛu-ye-eyi na Hadad, oo po iŋ izeci tu ga Gɛnubat. Ibɛ batagwụ bwa ga Tapɛnɛs na ga Faro zeni wɛŋnicinjɛ yɛu ɛtɛ buhongwu bwa ni ihwɛ Faro na ashashɛ miaụŋ mu Faro.

²¹Aka na ti ga Hadad namɛ ni Ijipti baa hwụjɛ maa bwonu ge Devid 'wi, tu go Joab na shɛ uberezhe we ejeshi ubwa du uwo, nazhɛ baa lụpɛ Faro, bɛɛ hiɛŋ bụ, N leneni kaa maa Mo jiyo na cɛnjɛ ti mi.

²²Ga Faro hiɛŋ bụ, Imbe bwaa ibu 'nyananɛ upo aba jala maa gwuri na cɛnjɛ tụ bụụ? Ga Hadad jishijɛ bụ, bɛɛ hiɛŋ, I zasa iyi elele n 'nyananɛ o, ama n leneni kwakwa maa Mo jiyo![19]

²³Ibɛ po Agwatana ishɛcɛnganɛ Sụlụmụn bụtụ bi i'ime bi nya, ubwa shɛ ge Rezon yɛu Ɛliada, bu gata gezhigeni la agwuma-ihwɛ ibwɛ ga Hadadɛzɛ na shɛ agwuma Zoba.

²⁴Ge Rezon sotulonu atwa ubwa, baa shɛ ya tuba uhiu wa aba maa a na nda tigezhe. Ge Devid kaa laswawa la Hadadizɛ[20] harɛ baa kwụnɛ atwa ata namɛ na aba. Ge Rezon na atwa ebe ubwa zhe Damaskos, ibɛ atwa ata ubwa njɛ bụ agwuma Damaskos.

²⁵Ge Rezon to atwa Isrɛl ni i'ime na aka na tu go Sụlụmụn ta yɛ tugwama, baa nda atwa Isrɛl umungwuta, ubwa du yɛ tugwama ta atwa Siria.

²⁶Gɛ Jɛroboam yɛu Nebat na shɛ ụlamụ Ifrem na banɛ ni Zɛrɛda, na shɛ yɛu-ugondu Sụlụmụn, na ɛɛ hiɛŋ izeci bino bwa ga Zɛruwia, ishijɛ baa sukakanɛ agwuma Sụlụmụn.

²⁷Ecilo uwuru ubwa na agwuma Sụlụmụn i shɛ iwɛnɛ go Sụlụmụn mo tuma tu ko, bee sukeni onungwu ụshɛpwụ wa agwuma Devid bishi bwa.

²⁸Gɛ Jɛroboam kaa shɛ bijeshi bu ukpahiŋ. Tu go Sụlụmụn kwụbɛ maa gɛ Jɛruboam shɛ usemberi na eri ugondu tɛnda, ibɛ po bee teri bu maa sha uhiu wa atwa na a nda ugondu ukpahiŋ ni ihwɛ Josɛf.

²⁹Aka na ti gɛ Jɛroboam beni nu Jɛrusalɛm, ibɛ bigesere na ɛɛ hiɛŋ, ga Ahija na shɛ bụtụ bu Shailo kwụbɛ bụ nu uhwaŋna. Ga Ahija kaa ge hwuŋteni utogwo uko ta shɛ ufwo, ebeyebi kaa kiri namba apata na aka ata.

³⁰Ga Ahija dwetweji utogwo ebe ubwa ufwo bee ge hwuŋteni orubwo umpwa-na-ba-eyebi.

³¹Nazhɛ bɛɛ hiɛŋ Jɛroboam, Sugo orubwo umpwa maa 'yaga, iwɛnɛ po AGWANGWAMA na shɛ Agwatana Isrɛl dumwa, bɛɛ hiɛŋ, Kwụba, N zhɛ mo bogwu cɛnjɛ-ta-tugwama tu Sụlụmụn, gabụ kaa Ngɛɛ zhɛ ma pana alamụ umpwa.

³²Ama go Sụlụmụn tuba zhɛ ba untangana ụlamụ uko gba iwɛ ụjɛrụma yɛu mi ugondu ge Devid keeni iwɛ Jɛrusalɛm na shɛ ụshɛpwụ ata Ngee teri na amɛ alamụ Isrɛl hwɛɛ.

³³Ecilo no po Ngaa njɛ iŋ gana ata i shɛ iwɛnɛ tu baa lacɛ[21] maa ma n 'wa, bee zhe baa zhɛba Ashtorɛt na shɛ tuwa to o ta Asaidụn keeni Kemosh na shɛ tuwa ta Amoab keeni Milkom na shɛ tuwa ta A'amon. Iwɛnɛ po bu hwụjɛ shɛ unu mu maa bu na nda iyi nɛ teni cɛŋ ne eshe mi maa bu na untangana undwa mu keeni unu mu tụpana gana na bishi bwa ge Devid njɛ la o.

³⁴Okwo ti yaa shɛ gana ata, N zha shɛ ma lashɛga bu tugwama hwɛ hwɛɛ o, bi zhɛ ba sha agwuma tutu tu'wo tu bwa, iwɛ ụjɛrụma Devid na shɛ yɛu mi ugondu nɛ Ngee teri la, na kaa untanganɛ la unu mu tụpana keeni unu mu tɛtɛtagana.

³⁵Ama N zhɛ ma lashɛga tugwama ni i'ɛlɛ yɛu Sụlụmụn ma bụ pana maa shɛ agwuma alamụ umpwa.

³⁶Ama N zhɛ ma pana yɛu Sụlụmụn ụlamụ uko maa ya tugwama tu bwa iwɛ maa kede ge Devid na shɛ yɛu mi ugondu vwụnjɛ bụtụ na zhɛ na ya tugwama tu Jɛrusalɛm na shɛ ụshɛpwụ ata Ngee teri maa a na ma zhɛba aka elele o.

³⁷Gabụ kaa Ngɛɛ zhɛ ma nda maa yɛ tugwama ta atwa Isrɛl tutu i ci uce tugwungwu ta tuba gana elele na aba jala.

³⁸Yaa shɛ aba hwuga-unu mu, aba nda kaa iyi elele te teni cɛŋ, aba untangana unu na Ama bu pana keeni unu na Ama bu tɛtagana, gana na ge Devid njɛ la. Nazhɛ Ngɛɛ zhɛ ma nama na bụ, maa ajalalo bu na ya tugwama ta atwa Isrɛl unyizo-nom, gana na tu Ngaa ndanɛ la Devid, gabụ Ngɛɛ zhɛ mo utogono atwa Isrɛl hwɛɛ.

³⁹Ama N zhɛ kaa ma sukakana ajalalo Devid iwɛ iwɛwɛ nɛ go Sụlụmụn njɛ, i zha shɛ tuba ya sha unyizo-nom o.

⁴⁰Iwɛ ecilo ata upo go Sụlụmụn mekeni gana na maa kwụna Jɛroboam. Ibɛ po gɛ Jɛroboam gezhiji bee zhe pi Shishak agwuma Ijipti, baa namɛ pu bwa ni Ijipti uuwa i ci aka na go Sụlụmụn 'wi.

⁴¹Iyi elele nɛ go Sụlụmụn ndanjɛ hwɛɛ, ta ti'inta tu bwa, i 'nyeci shi suu nu utakada Shɛrụkwụkwụ shɛ Sụlụmụn hwɛɛ?

⁴²Shiywa shɛ na go Sụlụmụn yɛ tugwama ti Isrɛl hwɛɛ shɛ namɛ buhanda.

⁴³Ga Sụlụmụn 'wi ee ni bu nụ ụshɛpwụ bishi bwa ge Devid. Nazhɛ ge Rehoboam yɛu ibwɛ yɛ tugwama no ohwolu ubwa.