Read bassa 1 SHƐGWUMA SHI HIIŊ 12 Bible Online

1 SHƐGWUMA SHI HIIŊ 12 - bassa bible

1 SHƐGWUMA SHI HIIŊ 12

¹Ge Rehoboam zhe Shɛkɛm no ofwo na atwa Isrɛl ụlwatagwụ hwɛɛ maa e peni bu tugwama.

²Gɛ Jɛroboam yɛu Nebat hwụjɛ iŋ, tu baa ta namɛ ni Ijipti aka ata, iwɛnɛ ti bee gezhigeni la Sụlụmụn, ibɛ po baa banɛ ni Ijipti,[22] bee jiye.

³Aa tumwanɛ atwa aa suyanɛ Jɛroboam, gɛ Jɛroboam na atwa Isrɛl hwɛɛ hiɛŋ Rehoboam,

⁴Bishi bu go Sụlụmụn ɛtɛ njɛ la umungwuta duwa, ama ta jala maa kede tuba ɛtɛ njɛ ya umungwuta i ci gana ata bishi bu ɛtɛ njɛ la o, nazhɛ ɛti zhɛ ta bụ ndana ugondu tutu.

⁵Bɛɛ hiɛŋ atwa ata, Zhaga ma, gwure ma waŋnabeyiko. Ibɛ po atwa ata gwuleji ga.

⁶Nazhɛ agwuma ge Rehoboam zhe baa lụpɛ ahaŋsa-tupana nu n-nyarɛ mu na ma ndana la bishi bwa go Sụlụmụn ugondu na aka na tu baa ta ya la uraiŋ, bɛɛ hiɛŋ aŋ, Gana naa ahia jala maa mɛ jishijɛ atwa ataa?

⁷Ibɛ n-nyarɛ ma ata mi jishijɛ bụ, mɛɛ hiɛŋ, Yaa shɛ ebi peni aŋ ajɛshɛgwa na zhɛmɛ, ebi leni maa njɛ aŋ tebiye, bi zhɛ ba sha agwuma aba tutu.

⁸Ama bu lacɛ ahaŋsa ata n-nyarɛ mi peni bu, bee zhe no ofwo esemberi na shɛ asara ubwa a na a ndana bu ugondu maa e peni bu ahaŋsa.

⁹Bɛɛ hiɛŋ aŋ, Gana naa Ngɛɛ zhɛ ma ndaa? Ajɛshɛgwa naa Ngɛɛ zhɛ ma pana atwa ata a jala maa ma salanana umungwuta wa abaa?

¹⁰Nazhɛ asara ubwa a na baa waŋnɛ na aba jishijɛ bụ, ɛɛ hiɛŋ, Mbiso aŋ maa, Buvwa mi bikɛriwɛŋzhɛ nyemi bee hwuri embi bishi mi.

¹¹Bishi mi ihiɛ njɛ la umungwuta na gembi tebiye, ama N zhɛ tuba ma kaana uŋ ugombo. Bishi mi ihi vwuri la nu udugwu, ama N zhɛ tuba mo hi vwulo nu unaba unyeji.

¹²Tɛ ɛ hiɛŋ jitaala, ibɛ ge Jeroboam na atwa ata zhajɛ no ofwo Rehoboam hwɛɛ aba gana na ti bee peni aŋ la unu maa ge gwure waŋna beyiko.

¹³Ibɛ agwuma peni aŋ ajɛshɛgwa na wumanjɛ, iwɛnɛ tu baa lacɛ ahaŋsa na n-nyarɛ mi peni bu.

¹⁴Bee peni aŋ ajɛshɛgwa gana na te esemberi peni bu la ahaŋsa, bɛɛ hiɛŋ aŋ, Bishi mi ihiɛ njɛ la umungwuta na gembi tebiye, ama N zhɛ tuba ma kaana uŋ ugombo. Bishi mi ihi vwuri la nu udugwu, ama N zhɛ tuba mo hi vwulo nu unaba unyeji.

¹⁵Agwuma leni shi ilupwɛ nɛ atwa ata lụpɛ bu o, iwɛnɛ ti yaa shɛ tuhaŋsa ta AGWANGWAMA, iwɛ maa ga n-ndumwa ma ata AGWANGWAMA dumwa la nu unu bigesere ga Ahija bụtụ ata bu Shailo iwɛ Jɛreboam yɛu Nebat mi sɛ.

¹⁶Gana na ta atwa Isrɛl hwɛɛ kwụbɛ maa agwuma lacɛ ilupwɛ ya aba. Ɛɛ jishijɛ bụ, ɛɛ hiɛŋ, Imbe bwaa i shɛ inee tu ne Devidii? Iyi-yo-ogwu yɛu Jɛsi zha shɛ me ti ce o! Ahiɛba atwa Isrɛl, gwulogo ma nu nhwaŋ mi hiŋ. Ga ge Rehoboam mama untangana! Ibɛ po atwa Isrɛl jiyeji nu nhwaŋ ma aba.

¹⁷Ama ge Rehoboam yɛ tugwama ta atwa Isrɛl a na namɛ nu Juda kiri.

¹⁸Agwuma ge Rehoboam tumwanɛ Adoram[23] na shɛ uhiu wa anjɛ-ugondu iji, ibɛ atwa Isrɛl hwɛɛ tegeni bu atayɛ aa kwụnɛ bụ. Ibɛ po agwuma ge Rehoboam munji ụhaŋtụ ubwa ujasa kakayɛ bee gwuri nu Jɛrusalɛm.

¹⁹Te kwuni taa na aka ata atwa Isrɛl ta sukakana ihwɛ Devid tutu taa hwayɛ.

²⁰Aka na ta atwa Isrɛl hwɛɛ hwụjɛ maa gɛ Jɛroboam banɛ ni Ijipti bee gwure, aa suyanɛ bụ, ee peni bu tugwama ti Isrɛl hwɛɛ. I zasa atwa na 'wa umwamwa Devid o, semi ụlamụ Juda kiri.

²¹Aka na ge Rehoboam ci Jɛrusalɛm, boo sotulonu ụlamụ Juda hwɛɛ keeni ụlamụ Bɛnjamin, bee zenji atwa igbɛɛ-dipi-tɛtu-nu-talacɛ (180,000) a na beni urishi nu ujasa maa a njɛ ujasa na atwa Isrɛl, maa tuba e gwuricingeni Rehoboam yɛu Sụlụmụn cɛnjɛ-ta-tugwama.

²²Ama Agwatana tumwanɛ bigesere bwa gɛ Shɛmaya, bɛɛ hiɛŋ,

²³Mbiso Rehoboam yɛu Sụlụmụn agwuma Juda, tu ụlamụ Juda keeni ụlamụ Bɛnjamin keeni atwa elele na vwɛ maa,

²⁴AGWANGWAMA hiɛŋ, Ta sukakana ma miaụŋ-mo-bino hiŋ nu ujasa o. Bụtụ bụtụ go gwulo ni ihwɛ ibwɛ, ijɛ banɛ no olugwo mi. Ibɛ po atwa ata hwụjɛ-unu wa AGWANGWAMA, ee ji ga gana na ta AGWANGWAMA peni aŋ unu.

²⁵Nazhɛ gɛ Jɛroboam jwe ụshɛpwụ Shɛkɛm ata namɛ ni ishɛmɛ cɛnjɛ ti Ifrem, baa namɛ apata. Apata bee beni bee jweeneni ụshɛpwụ ata ɛɛ hiɛŋ, Pɛnuɛl.

²⁶Gɛ Jɛroboam heŋshi na amɛ ubwa, bɛɛ hiɛŋ, Cɛnjɛ-ta-tugwama ti zhɛ to gwulo ni ihwɛ Devid.

²⁷Yaa shɛ atwa ga zhe Jɛrusalɛm maa a na ta ụrụpɛ nu Umwono wa AGWANGWAMA, asha ɛ zhɛ a lashɛga tugwama ti mi o gwulo no ofwo agwuma-ihwɛ aba ge Rehoboam agwuma Juda maa tuba a n kwụnɛ.

²⁸Na aba na ta agwuma heŋshi ahaŋsa ata, boo mo ntatanuwaŋ mu miaụŋ mi inɛ mi yebi na azhɛnarɛya. Bɛɛ hiɛŋ atwa ata, Ahiɛba atwa Isrɛl, hi lukwumi ya Jɛrusalɛm tizha, kwụba ma agwatana hiŋ na ihi bɛcinjɛ la na cɛnjɛ ti Ijipti na.

²⁹Bee zhe bee shikicinji itɛtɛnuwɛŋ ɛtɛ ike ni Bɛtɛl, bee shikicinji inɛ iyebi nu Dan.

³⁰Atwa a nda iwɛwɛ na tɛzha tu na aa zha maa a na zhɛba inɛ ɛtɛ namɛ ni Bɛtɛl, aa zha du tutu inɛ ɛtɛ namɛ nu Dan.[24]

³¹Gɛ Jɛroboam du mengeni otukwu-ụrụpɛ ne tikpekwu, bee suji atwa elele na kwụlanɛ bụ, baa njɛ aŋ onongbo, okwo ta atwa ata shɛ shɛ ụlamụ wa Alivai.

³²Gɛ Jɛroboam shiri isene ike, tu upiana bụtụndatụ namɛ Jitɛ umpwa-ni-bɛ-tɛ, gana isene unyasa na aa nda nu Juda. Boo to arụpɛ nu utukwu-ụrụpɛ gana na du baa nda ni Bɛtɛl, baa taga ntatanuwaŋ mu miaụŋ mi inɛ mu na boo mo arụpɛ. Bee tileni onongbo ni Bɛtɛl maa a nama ne tikpekwu ta ata boo mo otukwu-ụrụpɛ.

³³Bee zhe nu utukwu-ụrụpɛ ata boo mo ni Bɛtɛl tu upiana bụtụndatụ namɛ Jitɛ umpwa-ni-bɛ-tɛ, ibɛ shɛ aka na bee meme dweji ni ikɛnyi ibwɛ maa bu na ta ụrụpɛ iturɛre tuhwoŋzhingo. Bee shileni du miaụŋ mi Isrɛl aka na maa a na ya iyimɛyɛ isene.