Read bassa 1 SHƐGWUMA SHI HIIŊ 17 Bible Online

1 SHƐGWUMA SHI HIIŊ 17 - bassa bible

1 SHƐGWUMA SHI HIIŊ 17

¹Ge Elaija bigesere ata banɛ ni Tishbi[31] ata namɛ na cɛnjɛ ti Giliad, bɛɛ hiɛŋ Ahab, N to AGWANGWAMA na shɛ Agwatana Isrɛl na Ama ndana iyi, maa eshilo zha shɛ o ngbo, okwo cime ti zha shɛ ta 'wala kwukwuŋ uuwa i ci shiywa shɛ mbana, semi aka na ti Ngɛɛ hiɛŋ hwuŋ go ngbo.

²Nazhɛ AGWANGWAMA mbishi Elaija n-ndumwa, bɛɛ hiɛŋ,

³Bana epe, maa zhe geri bu uwaŋna-banụ, maa swaka ni isese Kɛrit, nɛ namɛ geri bu uwaŋna-banụ Jodan.

⁴Meni mi isese ɛtɛ ɛbi zhɛ bu na swa. M mbiswo du kaa Agwaagwaa maa ga a na bu 'waŋnanɛ iyimɛyɛ apata.

⁵Ge Elaija beni ga apata bee hwuri, gana na ta AGWANGWAMA mbishi bu. Baa namɛ ni isese ɛtɛ Kɛrit, nɛ namɛ geri bu uwaŋna-banụ Jodan.

⁶Ibɛ agwaagwaa a 'waŋnanɛ bụ ga Iyimɛyɛ, tu usunda, nu uvwungwa keeni ụrụmɛ, baa swa kaa meni mi isese ɛtɛ.

⁷Ti yaa namɛ fwalaa, ibɛ meni mi isese ɛtɛ mu hwɛŋ, iwɛnɛ te eshilo ngbi shi na cɛnjɛ tu unyizo.

⁸Nazhɛ AGWANGWAMA mbishi Elaija n-ndumwa, bɛɛ hiɛŋ,

⁹Ishijɛ maa zhe Zarefat na namɛ nu Saidụn maa nama apata. M mbiswo bululo bu ko na namɛ apata maa bu na bu biga.

¹⁰Bɛɛ ishijɛ ga, baa sanɛ Zarefat. Aka na ti bee ci odubo ụshɛpwụ ata, baa kwụbɛ to bululo bu ko ba dwaga i'wɛ'wɛ, bɛɛ hiɛŋ bụ, Sukwu, m piɛ kaa meni cwɛŋ maa ma swa.

¹¹Aka na to bululo ata zhɛ ga maa panɛ bu meni, bɛɛ hiɛŋ bụ sasana, Sukwu, n 'waŋnanɛ hwayɛ du iyimɛyɛ cwɛŋ bana.

¹²Ama bululo ata hiɛŋ bụ, N to AGWANGWAMA na shɛ Agwatana bụ, maa N zasa iyimɛyɛ nɛ nduwa o, inɛmɛ nɛ kaa namba, namɛ nu ukwoto i'ɛlɛ kiri, i zweni ba ni ikele keeni muzhimi mi ticwɛŋ bana nu ubene. Ibɛ Ama dwagana i'wɛ'wɛ gɛ, iwɛ maa Mo jiyo ma nda iyi ni bɛ, maa ta ya ni yɛu mi ye eyi nazhɛ to 'wo ya.

¹³Ge Elaija jishijɛ bụ, bɛɛ hiɛŋ, Ta nda inyɛsɛ o, zhaga n ndanɛ tugwo akara oko cwɛŋ ni bɛ, maa n 'waŋnanɛ, nazhɛ njɛ ya inɛɛ bu ni yɛu bu.

¹⁴Iwɛnɛ po AGWANGWAMA na shɛ Agwatana Isrɛl hiɛŋ, Inɛmɛ ɛtɛ namɛ ni ikele ɛtɛ zha shɛ yo hwuwowu kwukwuŋ, muzhimi ma ata mu zweni nu ubene ata kaa mu zha shɛ mo hwuwowu du kwukwuŋ uuwa i ci aka na Agwatana zhɛ o lono maa eshilo ngbi na cɛnjɛ tu ga.

¹⁵Nazhɛ biyikwo ata zhe baa njɛ ga gana na ti ge Elaija hiɛŋ bụ. Nazhɛ biyikwo ata, ti ge Elaija keeni atwa biyikwo ata yɛ iyimɛyɛ ɛtɛ Jitɛ ifwugwo.

¹⁶Inɛmɛ ɛtɛ ge zweni ni ikele ɛtɛ hwuwowu su o, muzhimi ma ata mu zweni nu ubene ata kaa du mu hwuwowu su o, nu gana na ta AGWANGWAMA ga dumwa tedure nu unu Elaija.

¹⁷Na aba inɛ ɛtɛ, ibɛ yɛu-ye-eyi bululo ata leyi nụ ụngwụ, ụngwụ ata kaa 'yajɛ ikɛnyi duwa. Ibɛ po yɛu ɛtɛ 'wi.

¹⁸Nazhɛ biyikwo ata hiɛŋ Elaija, Imbe bwa kwuuŋ Ngaa bɛ njɛ gabụ bụtụ ga ba Agwatana, upo abu n zhaganɛ iwɛ maa n teyingeni iwɛwɛ mi no tu'wo tu na abɛ njɛ maa gɛ yɛu mi 'wii?

¹⁹Ge Elaija hiɛŋ bụ, M panɛ yɛu ɛtɛ bụ. Bee leshiji iŋ ni i'ɛlɛ biyikwo ata, be munji nu umwono ata wa azuba baa ga namɛ, bee shiri iŋ no ogodo ubwa.

²⁰Bee keri AGWANGWAMA ụhiɛŋshɛ, bɛɛ hiɛŋ, Oo AGWANGWAMA na shɛ Agwatana mi, gabụ suu bu shapɛrɛganɛ ya bululo ga Ngaa namɛ pu bwa abara ga ne ebe maa gɛ yɛu ibwɛ 'wi?

²¹Bee meme nderishinji, bee ubeni yɛu ɛtɛ kpalụ tatụ, baa suyanɛ AGWANGWAMA, bɛɛ hiɛŋ, Oo AGWANGWAMA na shɛ Agwatana mi, lono kaa maa ohwulu yɛu gɛ gwure na amɛ ubwa.

²²Nazhɛ AGWANGWAMA hwụjɛ ga ilupwɛ Elaija, nazhɛ ohwulu yɛu ɛtɛ gwure sasana na amɛ ubwa.

²³Ge Elaija shapɛ yɛu ɛtɛ bee zwe ni bɛ, bee peni bino bi bɛ. Ge Elaija hiɛŋ bụ, kwụba, yɛu bu nɛ i hiɛ.

²⁴Nazhɛ biyikwo ata hiɛŋ Elaija, Hwuwayɛ go Ngee mepi ya maa gabụ ga bɛ shɛ bụtụ ba Agwatana, maa n-ndumwa ma Agwatana mu na aba duma kaa mɛ shɛ iwɛ-tɛkana.