Read bassa 1 SHƐGWUMA SHI HIIŊ 19 Bible Online

1 SHƐGWUMA SHI HIIŊ 19 - bassa bible

1 SHƐGWUMA SHI HIIŊ 19

¹Tu ga Ahab mbishi Jɛzɛbɛl iyi elele nɛ ge Elaija njɛ, tu gana na ti ge Elaija kwụnɛ egesere Beal hwɛɛ nu utokwobi.

²Ibɛ po gɛ Jɛzɛbɛl tumwanɛ atwa no ofwo Elaija, bɛɛ hiɛŋ bụ, Yaa shɛ Ngaa bụ kwụnɛ shɛ beyi na aka gana ga, maa shɛ gana bụtụ bu ko na amɛ egesere ata abụ kụnɛ, asha ga tuwa tu ga tu n kwụnɛ.

³Ti ge Elaija hwụjɛ iwɛ ɛtɛ,[33] baa njɛ inyɛsɛ uhiuhiu ubwa, bee gezhiji bee zhe Biashiba na cɛnjɛ tu Juda. Apata bee shiri yɛu ibwɛ ugondu.

⁴Ge Elaija zhe tahaŋnụ uwaŋna uko mudu nụ ụshɛka, baa jɛjɛ nu ucilo ụ'wụ'wụ uko isheshe, baa kalanga-unu, baa lụpɛ AGWANGWAMA, bɛɛ hiɛŋ, Shapa ya uraiŋ mu, N zhɛshɛ Ngee hwuri eshi mi o!

⁵Nazhɛ bee weci apata bee leyi malabụ nu ucilo ụ'wụ'wụ ata. Nazhɛ butumwa-ba-azuba zhingicinjɛ bụ, bɛɛ hiɛŋ bụ, Zhinjɛ maa yɛ iyimɛyɛ.

⁶Baa mbiyanɛ, baa kwụbɛ ta akara oko na oo to, patanɛ nu utayɛ uko na vwengenji keeni okoko meni tee shi no ofwo uhiuhiu ubwa. Baa yɛ iyimɛyɛ ɛtɛ, bee swe du meni ma ata, bee leyeneni malabụ.

⁷Ibɛ po butumwa ba AGWANGWAMA ba azuba gwuleneni, bee timengeni bu na aka yebi, bɛɛ hiɛŋ bụ, Ishijɛ maa yɛ iyimɛyɛ, iwɛnɛ po ofwo na ɛbi zhɛ ta dụlụmɛ.

⁸Bɛɛ ishijɛ ga, baa yɛ iyimɛyɛ ɛtɛ, bee swe du meni. Nazhɛ iyimɛyɛ ɛtɛ peni bu ukpahiŋ, bee zhe tahaŋnụ Jitɛ buhanda tutu bee ci Ishɛmɛ ɛtɛ ya Agwatana, ɛɛ hiɛŋ Sainai.

⁹Bee zhe bee ci ụpangwụ uko na namɛ apata, maa woto apata nụ ụrụmɛ ata. Nazhɛ AGWANGWAMA heŋteni bu, bɛɛ hiɛŋ, Elaija, imbe aba nda epee?

¹⁰Bɛɛ jishijɛ, bɛɛ hiɛŋ, Ma tala isɛbwɛ ya AGWANGWAMA na shɛ Agwatana na Hwuri Kpaaŋ tebiye, ama atwa Isrɛl lacɛ unu na abu twa la na aba, ee hwuŋzetenji utukwu-ụrụpɛ bụ, aa kwụnananɛ egesere bu nu utokwobi. Ngooko kiri N vwɛ ya, ibɛ gɛnɛnɛ aa ma jalanana tụkwụna!

¹¹Nazhɛ AGWANGWAMA hiɛŋ bụ, Zhaga shikono nu umbe mu ni ihiŋhiŋ ishɛmɛ ɛtɛ mi, N zhɛ ma kashɛka hwayɛ apata! Nazhɛ uvwugo ụ'wụtụ kwuni tɛnda, ishɛmɛ ɛtɛ kwuni tubagatagwụ, atayɛ bwaratagwụ nu umbe AGWANGWAMA, ama AGWANGWAMA kaa zasaba nu uvwugo ata o. Na aba uvwugo ata, cɛnjɛ ti zhingotu, AGWANGWAMA kaa zasaba waa no tizhingotu ta ata ta cɛnjɛ o.

¹²Na aba na ta cɛnjɛ ti zhingotu, ulwa zhajɛ, AGWANGWAMA kaa zasaba sasana nu ulwa ata o. Na aba na tu ulwa ata hwoŋni, nazhɛ rụhwụŋ ru ko ru dumanɛ iwɛ saiiŋ.

¹³Aka na ti ge Elaija hwụjɛ rụhwụŋ ra ata, bee fwuleji ụpɛshɛka ubwa nu utogwo ubwa, bee beni nụ ụpangwụ ata, bee shikeni ya no tupohondo tu ụpangwụ ata. Ibɛ rụhwụn ra ata ri hiɛŋ bụ, Elaija, imbe aba nda epee?

¹⁴Bɛɛ jishijɛ, bɛɛ hiɛŋ, Ma tala isɛbwɛ ya AGWANGWAMA na shɛ Agwatana na Hwuri Kpaaŋ tebiye, ama atwa Isrɛl kaa lacɛ unu na abu twa la na aba, ee hwuŋzetenji utukwu-ụrụpɛ bụ, aa kwụnananɛ egesere bu nu utokwobi. Ngooko kiri n vwɛ ya, ibɛ gɛnɛnɛ aa ma jalanana tụkwụna.

¹⁵Nazhɛ AGWANGWAMA hiɛŋ bụ, Dulo uhwaŋna ata ụshɛka maa gwuri nu Damaskos. Yaa shɛ ebi ci apata, dudugono Hazaɛl manɛbɛ maa sha agwuma Siria.

¹⁶Dudugono du Jehu yɛu Nimshi manɛbɛ maa sha agwuma Isrɛl, nazhɛ dudugeni Elaisha yɛu Shafat bụtụ ata bụ Ebɛlmehola manɛbɛ maa sha bigesere ụlụkpashɛ bụ.

¹⁷Yaa shɛ bụtụ be elele benengeni utokwobi Hazaɛl, ge Jehu tuba zhɛ ba kwụna bụ, yaa shɛ kaa bụtụ ata benengeni utokwobi Jehu, ge Elaisha zhɛ ba kwụna bụ.

¹⁸Ama N zhɛ ma ganga atwa igbɛɛ-itɛtu-na-akpakwụ-a-ta (7,000) ni Isrɛl anaa na kwuzeni shi tuwa ti Beal, a ta ruwanɛ shɛ tụ du kwukwuŋ.

¹⁹Ti ge Elaija beni ga apata, baa kwụbɛ Elaisha yɛu Shafat, tu baa 'waŋnɛ inɛ iyebi yebi orubwo umpwa-ni-bɛyebi baa hwaŋ itimɛ ni ibɛ, baa 'wa iŋ ne ekwunyi. Baa namɛ tuba ni inɛ ɛtɛ imɛwɛɛ. Ge Elaija zhe bee ubi bu idikɛ ɛtɛ ibwɛ i tuwururu baa patanga na azuba.

²⁰Ge Elaisha genji inɛ ɛtɛ, baa 'wa Elaija, bɛɛ hiɛŋ bụ, Sukwu, n leneni maa Ma zha mɛ njɛ bishi mi no bino mi ongbo tugwo nazhɛ me gwure maa Ma bu 'wa. Ge Elaija hiɛŋ bụ, I zhɛmɛ, zhaga, imbe kwuŋ Ngaa bɛ njɛɛ?

²¹Ge Elaisha gwuri ga, bee peshenji i'wɛ'wɛ ɛtɛ nu n'ilu mi inɛ ɛtɛ, baa kwụnɛ iŋ. Bee suji i'wɛ'wɛ ebe bee ge petengeni inɛ nu n'ilu, baa shanɛ ulwa ni bɛ, bee shiteji usunda inɛ ɛtɛ, bee penenji atwamwa aa yɛ. Nazhɛ baa 'wa ya Elaija baa ndana bu ugondu.