Read bassa 1 SHƐGWUMA SHI HIIŊ 2 Bible Online

1 SHƐGWUMA SHI HIIŊ 2 - bassa bible

1 SHƐGWUMA SHI HIIŊ 2

¹Aka na ti ge Devid gwumwonu tu'wo, baa tɛtaganɛ yɛu ibwɛ go Sụlụmụn unu, bɛɛ hiɛŋ bụ,

²N gwumwongonu ya tu'wo. Nda ohwulu bu oko maa meme mbiseni maa bɛ shɛ butubwenyi.

³No shiyono unu-tɛtɛtagana wa AGWANGWAMA na shɛ Agwatana bụ eshe, maa na nda ukwulana ubwa. Na untangana andwa ubwa, no shikpogo shɛ bwa keeni onu-tupana ubwa gana na ti yee 'nyeci nu undwa Moses, nazhɛ iyi elele nɛ aba nda zhɛ ma bu zhɛmana no ofwo elele na ebi zhe.

⁴Yaa shɛ aba hwuga-unu wa AGWANGWAMA, nazhɛ bɛɛ zhɛ bo shikicingo unu na bee n shileni la, bɛɛ hiɛŋ, Yaa shɛ atwa ukpogwu bụ a hwụjɛ-unu mu, aa n 'wa kaa na tɛcara na amɛ aba oko keeni ohwulu aba oko, asha ukpogwu bụ zha shɛ wa vwunga bụtụ na zhɛ na ya tugwama ti Isrɛl kwukwuŋ.

⁵Bi mepi du kaa iyi nɛ go Joab yɛu Zɛruwia n njɛ, ibɛ shɛ gana na baa kwụnɛ eberezhe ejeshi atwa Isrɛl eyebi, ga Abnɛ yɛu Nɛ keeni Amasa yɛu Jitɛ. Baa kwụnɛ aŋ, baa 'wɛŋ mehieŋ ma aba, na aka na tu ujasa zasaba ya, iwɛ atwa na aa kwụnɛ la nu ujasa. Baa kwụnɛ atwa na zasa tụwụma. Gamba ya n 'waŋnɛ tijama ti ibɛ, Ama nda ụbaụta iwɛ ulwapɛ ibɛ.[4]

⁶Gabụ bi mepi ya iyi nɛ shɛ maa njɛ na ti'inta tụ bụ, to lono maa 'wo tu'wo ta amɛ-olom o.

⁷Ama na nda miaụŋ mu Bazilai bụtụ ata bi Giliad uwebiye, ga a shɛ atwa oko na ashashɛ atwa na zhɛ na ya iyimɛyɛ na bụ ni ikwede ike. Iwɛnɛ po gana ata du aa n njɛ la uwebiye aka na ti Ngee gezhigeni la yɛu-bino bu ga Absalom.

⁸Ge Shimei yɛu Gira bụtụ ata bu Bɛnjamin na banɛ nu Bahurim, bu ta namba du na bụ. Ubwa la n keleni-unu ụ'wụtụ na aka na ti Ngee zhe Mahanaim, ama tuba aka na tu baa n zhaganɛ nu Urefu Jodan, Ngee teji bu Agwatana, Ngɛɛ hiɛŋ, N zha shɛ ma bụ kwụna ya nu utokwobi kwukwuŋ.

⁹Ama ta rɛta bụ gana bụtụ na zasa n-ndumwa-tụwụma o, gabụ bɛ shɛ bụtụ na incɛ. Mapa iyi nɛ i shɛ maa njɛ bụ na ahaŋsa bụ. Kwụna bụ uzawa ụjita tuto.

¹⁰Ge Devid 'wi, ee ni bu nụ ụshɛpwụ ata ubwa.

¹¹Agwuma Devid yɛ tugwama shiywa buhanda ni Isrɛl. Bɛ yɛ tugwama ni Hɛbron shiywa shi cenje, nazhɛ baa yɛ tugwama nu Jɛrusalɛm shiywa talacɛ-na-shɛba-shɛ-tatụ.

¹²Gana go Sụlụmụn yɛ tugwama te bishi bwa ge Devid ta. Cɛnjɛ-ta-tugwama tu bwa kaa ti shikeni dimi.

¹³Nazhɛ ga Adonija na ɛɛ hiɛŋ bino bwa ga Hagit zhajɛ pu Bashiba bino Sụlụmụn. Ga Bashiba hiɛŋ bụ, I te lemi hŋ? Bɛɛ jishijɛ bụ, bɛɛ hiɛŋ, Iiŋ, i te lemi suu.

¹⁴Ga Adonija hiɛŋ bụ sasana, Ma jala maa mo bi mbiso iwɛ ike. Ga Bashiba hiɛŋ bụ, Mizha duma.

¹⁵Ga Adonija hiɛŋ bụ, Bi mepi maa Gamba tugwama ti ge ci ya tiya. Atwa Isrɛl hwɛɛ kaa du ga nda ashɛlatụ maa Ma ya tugwama, ama shɛ gana ata yaa shɛ ya o, ama buhongwu mi ubwa yɛ ya tugwama, iwɛnɛ ti yaa banɛ no olugwo AGWANGWAMA maa ga i shɛ gana ata.

¹⁶Ama N 'yajɛ tuba iyi ike Ama jala maa ma bụ lụpa, ta ma nyasa iŋ hwayɛ tuba o. Ga Bashiba hiɛŋ bụ, Duma.

¹⁷Ga Adonija hiɛŋ bụ, Ma bụ lụpa maa hiɛŋ agwuma Sụlụmụn maa ma m pana Abishag yɛu ɛtɛ yo o yaa atwa Shunem maa ma zana. Yaa shɛ gabụ bi hiɛŋ Sụlụmụn, bi zha shɛ ba laka o.

¹⁸Ga Bashiba hiɛŋ bụ, I zhɛmɛ tebiye, N zhɛ mo mbiso agwuma utumwa bụ.

¹⁹Ga Bashiba teni ga nu umwono wa agwuma Sụlụmụn maa mbiso bu utumwa Adonija. Agwuma ishijɛ, bɛɛ tɛjɛ bino bwa uhwaŋna, bee kwuzeni bu, nazhɛ bee gwuri baa jɛjɛ ni idwɛtwɛ ibwɛ. Aa shapɛrɛganɛ bino ba agwuma iyi baa jɛjɛ nu u'ala ubiye wa agwuma.

²⁰Nazhɛ bino ba agwuma hiɛŋ agwuma, Ma jala maa ma bụ lụpa iyi ike i ticwɛŋ bana. Ta ma nyasa iŋ hwayɛ o. Agwuma hiɛŋ bụ, Omu, lụpa iŋ, N zha shɛ ma bụ nyasa iŋ o.

²¹Ga Bashiba hiɛŋ bụ, Lono kaa maa batagwụ bụ ga Adonija zeni Abishag yɛu ɛtɛ yo o ya atwa Shunem?

²²Ibɛ agwuma jishijɛ bino bwa, bɛɛ hiɛŋ, Iwembe bwa i shɛ maa ga Abishag kiri aba lụpaga Adonija maa zanaa? Lụpaga bụ du tugwama maa ya tụ. Ubwa du kaa shɛ batagwụ mi. Nu bwa du kaa ata Abiata bunongbo keeni Joab yɛu Zɛruwia namɛ!

²³Nazhɛ agwuma go Sụlụmụn to AGWANGWAMA, bɛɛ hiɛŋ, Yaa shɛ uraiŋ Adonija cɛpɛ shɛ ilupwɛ gɛ ibwɛ, asha ga Agwatana n kwụnɛ.

²⁴Hwuwayɛ go N to AGWANGWAMA na shɛ buumwa, ubwa na n shikicinji, bee leni kaa du maa ma gɛga ni idwɛtwɛ bishi mi ge Devid na m peni ihwɛ gɛ, nu gana na ti bee shileni bu la unu. Ga Adonija zhɛ bo 'wo hwayɛ ga tilɛɛ!

²⁵Nazhɛ agwuma Sụlụmụn tumwanɛ Bɛnaya, yɛu Jɛhoyada maa ga kwụna Adonija, boo po bu ga iyi bee 'wi.

²⁶Nazhɛ agwuma hiɛŋ bunongbo ga Abiata, Gwulo ne ehilo bu na Anatot, bi ge ci tu'wo, ama N ta zha shɛ ma bụ kwụna o. Iwɛnɛ po gabụ bu 'waŋnɛ la Ikpɛtɛ ya AGWANGWAMA na shɛ Agwatana na aka bishi mi ge Devid, abɛ njɛ ụbaụta we elele nu bwa.

²⁷Ibɛ po go Sụlụmụn becinji Abiata no tunongbo ta AGWANGWAMA tisha, nazhɛ n-ndumwa ma ata Agwatana jɛmɛ la nu Shailo iwɛ ihwɛ Ilai na shɛ la bunongbo mi sɛ.

²⁸Aka na tu go Joab hwụjɛ iwɛ ɛtɛ, bee gezhiji bee zhe nu Umwono wa AGWANGWAMA, baa 'imɛ mahiuaŋ mu utukwu-ụrụpɛ, iwɛnɛ tu baa namɛ la na Adonija, baa zasa na Absalom.

²⁹Ee zhe ee mbishi agwuma Sụlụmụn, ɛɛ hiɛŋ, Go Joab gezhiji bee zhe nu Umwono wa AGWANGWAMA, baa 'imɛ ba mahiuaŋ mu utukwu-ụrụpɛ. Go Sụlụmụn tumwanɛ Bɛnaya yɛu Jɛhoyada, bɛɛ hiɛŋ bụ, Zhaga kwụna bụ.

³⁰Gɛ Bɛnaya teni ga nu Umwono wa AGWANGWAMA, bɛɛ hiɛŋ Joab, agwuma hiɛŋ banɛ. Go Joab hiɛŋ bụ, Awo, epe Ngɛɛ zhɛ mo 'wo. Gɛ Bɛnaya banɛ bee mbishi agwuma maa gana go Joab hiɛŋ nu.

³¹Agwuma hiɛŋ Bɛnaya, Nda bụ gana ata baa jɛmɛ, kwụna bụ maa ni bu, iwɛ maa tụwụma ta atwa ata go Joab kwụnɛ la tɛ bɛzhɛngwa nu uhiuhiu mu keeni ihwɛ bishi mi.

³²AGWANGWAMA zhɛ a tụpana bụ tụlụkpashɛ ta atwa ata eyebi baa kwụnɛ la nu utokwobi uzawa tumapa te bishi mi. Atwa ata eyebi aba shɛ ga Abnɛ yɛu Nɛ na shɛ la uberezhe we ejeshi atwa Isrɛl keeni Amasa yɛu Jitɛ, na shɛ la uberezhe we ejeshi atwa Juda. Atwa ata kaa shɛ la atwa tiririri ee hwuri bu.

³³Ga tụwụma ta atwa ata baa kwụnɛ la tu nama nu uhiuhiu Joab keeni ukpogwu ubwa unyizo-nom. Ama AGWANGWAMA tuba zhɛ a pana Devid amɛ-olom, ta ajalalo ubwa, ti ihwɛ ibwɛ, ti idwɛtwɛ tugwama tu bwa unyizo-nom.

³⁴Gɛ Bɛnaya yɛu Jɛhoyada munji ga baa kwụnɛ Joab, ee ni bu ni ihwɛ ibwɛ[5] nɛ namɛ nụ ụshɛka.

³⁵Nazhɛ agwuma njɛ Bɛnaya uberezhe we ejeshi ubwa tụlụkpashɛ tu Joab. Bee shepi Zadok na shɛ bunongbo bee shiyeni bu no ohwolu Abiata.

³⁶Nazhɛ agwuma tumwanɛ Shimei, bɛɛ hiɛŋ bụ, Zhaga ma umwono bu nu Jɛrusalɛm maa shiyono nu bwa apata, ta bana nụ ụshɛpwụ ata maa zhe ofwo elele o.

³⁷Jita elele ebi beni ebi keshi isese Kidron, ɛ zhɛ ma bụ kwụna jita ata, tijama te mehieŋ mụ bụ kaa ti zhɛ ta patana nu uhiuhiu bu.

³⁸Ge Shimei hiɛŋ agwuma, Iyi nɛ abɛ jɛmɛ zhɛmɛ. Gamba yɛu bu ugondu N zhɛ ma nda gana na abɛ jɛmɛ gabụ Iyɛri mi nɛ shɛ agwuma. Ge Shimei namɛ ga nu Jɛrusalɛm te ilegeji, bi beni shi o.

³⁹Na aba na ta shiywa shɛ tatụ shi keshici, ibɛ ajama Shimei eyebi gezhiji ee zhe pu Akish yɛu Maka, agwuma Gat. Ee mbishi Shimei maa ajama bu namba nu Gat.

⁴⁰Ge Shimei ishijɛ bee peteni izhinyɛci ibwɛ ufuridi, bee zhegeni Akish nu Gat iwɛ ajama ubwa, bee jicinje aŋ.

⁴¹Aka na te e mbishi Sụlụmụn maa bwonu ge Shimei beni nu Jɛrusalɛm bee zhe Gat, boo gwulwo.

⁴²Agwuma suyanɛ Shimei, bɛɛ hiɛŋ bụ, M bi mbishi shi la suu maa jita elele ebi beni nu Jɛrusalɛm ɛ zhɛ ma bụ kwụna tilɛɛ? Obu to la AGWANGWAMA, ɛbi hiɛŋ, Iyi nɛ Ngaa jɛmɛ zhɛmɛ, bi zhɛ ba hwuga-unu mu.

⁴³Imbe po abu untanganɛ shɛ ya unu ata ebi shileni la AGWANGWAMA maa hwụjɛ-unu ata Ngee bi peni laa?

⁴⁴Ibɛ po agwuma hiɛŋ Shimei, Bi mepi iyi iwɛ nɛ abɛ njɛ la bishi mi ge Devid na ahaŋsa bụ hwɛɛ. Iwɛ ecilo ata ibɛ AGWANGWAMA zhɛ ma bụ tụpana tụlụkpashɛ ti iyi iwɛ nɛ abɛ njɛ la du.

⁴⁵Ama ɛ zhɛ ma m pana tuba uwebiye. Cɛnjɛ-ta-tugwama ti Devid kaa ti zhɛ to shikono dimi ne eshe AGWANGWAMA unyizo-nom.

⁴⁶Ibɛ po agwuma hiɛŋ Bɛnaya yɛu Jɛhoyada, Zhaga kwụna Shimei. Bee zhe baa kwụnɛ bụ ga. Gabata Cɛnjɛ-ta-tugwama ta ata ti shikeni dimi ni i'ɛlɛ Sụlụmụn.