Read bassa 1 SHƐGWUMA SHI HIIŊ 20 Bible Online

1 SHƐGWUMA SHI HIIŊ 20 - bassa bible

1 SHƐGWUMA SHI HIIŊ 20

¹Na aka ata ibɛ agwuma Siria, gɛ Bɛn-hadad sotulonu ejeshi ubwa hwɛɛ urubwo uko. Shɛgwuma shi nya talacɛ-na-shɛba-shi-yebi shɛ namɛ nu bwa, ti idɛkwɛ ya aba keeni ihɛŋtu ya aba ujasa. Bee munji baa sukakanɛ Samaria nu ujasa.

²Baa tumwanɛ atwa pu Ahab na shɛ agwuma Isrɛl, bɛɛ hiɛŋ bụ, Gɛ Bɛn-hadad hiɛŋ,

³Gamba n 'yajɛ azụrụfa bụ, ta azhɛnarɛya bụ, te eyekwo ata bụ ebiye keeni miaụŋ mụ bụ.

⁴Ibɛ po agwuma Isrɛl jishijɛ bụ, bɛɛ hiɛŋ, Iyɛri mi, gabụ agwuma, gana ata ɛbi hiɛŋ, gana ata ga yaa shɛ. Gabụ ga bu n 'yajɛ, ti iyi nɛ Ngaa 'yajɛ hwɛɛ.

⁵Nazhɛ atumwa anya zhagananɛ, ɛɛ hiɛŋ, Gɛ Bɛn-hadad hiɛŋ, Iwɛ-tɛkana ga maa N tumwanɛ atumwa no ofwo bu, Ngɛɛ hiɛŋ, M panɛ azhɛnarɛya keeni azụrụfa bụ, te eyikwo bu, ta miaụŋ mụ bụ.

⁶Ama beyi na aka gana ga, N zhɛ ma tumwanɛ atwa mi ugondu, maa e hikekeni shimwono shɛ bụ, to shimwono sha atwa bụ ugondu hwɛɛ, maa e suje iyi ibiye ye elele nɛ ga bu kwụlanganɛ.[34]

⁷Ibɛ po agwuma Isrɛl suyanɛ n-nyarɛ mɛ cɛnjɛ ta ata hwɛɛ, bɛɛ hiɛŋ aŋ, Kwụba ma de gana na ta bụtụ ga ba jalakaka uwuru. Bu tumwanɛ atumwa ubwa hiiŋ, bɛɛ hiɛŋ, ma panɛ bụ eyikwo mi, ta miaụŋ mi mi, ta azụrụfa keeni azhɛnarɛya mi. N lakanɛ shɛ bu o.

⁸Nazhɛ n-nyarɛ ma ata keeni atwa vwɛ hwɛɛ hiɛŋ bụ, To lono, ta pana bụ o.

⁹Ibɛ po bee mbishi atumwa Bɛn-hadad, bɛɛ hiɛŋ aŋ, Zhaga mbiso ma Iyɛri ɛtɛ mi, gɛ Bɛn-hadad na shɛ agwuma, hiɛŋ bụ ma, Gamba yɛu-ugondu bu, M bi leneni ni iyi nɛ abụ n lụpɛ la hiiŋ, ama N eri shi mo lono ya ni inɛ gɛ iyebi o. Ibɛ atumwa ata gwuri ee swegeni bu,

¹⁰Gɛ Bɛn-hadad tumwanɛ utumwa unya, bɛɛ hiɛŋ, N zhɛ me suje atwa na waŋnɛ maa e iricinji ụshɛpwụ ga bụ. Yaa shɛ upwupwutu Samaria tɛ zhɛ wo shino okwo ukwoto i'ɛlɛ ye ejeshi mi, asha ga tuwa tu m peteni ulwapɛ na hwuri gana ata!

¹¹Ibɛ po agwuma Isrɛl jishijɛ bụ, bɛɛ hiɛŋ, Mbiso ma Bɛn-hadad maa, Busaza bu tɛkana bụshɛ shɛ hwuŋ ti bɛɛ tɛ zhɛ ujasa o, semi aka na tu baa kwunanjɛ tugwo ujasa.

¹²Aka na te e mbishi Bɛn-hadad utumwa ata no ofwo na baa swa mayaga na shɛgwuma shɛ nya nu ubodongom uko. Gɛ Bɛn-hadad hiɛŋ shɛgwuma sha ata, Mama 'imɛ ma maa tu sukakanɛ ma ụshɛpwụ ata. Aa mama 'imɛ ga, aa sukakanɛ ụshɛpwụ ata.

¹³Na aka ata, bigesere bu ko zhegeni Ahab agwuma Isrɛl, bɛɛ hiɛŋ bụ, Bụ kwụbɛ ufwugwo we ejeshi ga hŋ? Ama ta nda kaa inyɛsɛ ya aba o. N zhɛ ma nda maa eri aŋ tụlasụ, ni ibɛ ɛbi zhɛ ba mapa maa Gamba n shɛ AGWANGWAMA.

¹⁴Ga Ahab heŋteni bigesere ata, bɛɛ hiɛŋ bụ, Gaaba tuba zhɛ mo tu hwulono umbe nu ujasa gaa? Bigesere ata jishijɛ bụ, bɛɛ hiɛŋ, AGWANGWAMA hiɛŋ, Tedure ne esemberi na a ndana ugwomina na untanganɛ ekpeleshi cɛnjɛ tu ga ugondu. Ga Ahab heŋteni bu, bɛɛ hiɛŋ, Gaaba kwuuŋ zhɛ bo kwuno ujasa ata hiiŋ? Bigesere ata jishijɛ bụ, bɛɛ hiɛŋ, Gabụ!

¹⁵Nazhɛ ga Ahab sotulonu esemberi ata a ndana egwomina ata untanganɛ ekpeleshi cɛnjɛ ta ata ugondu urubwo uko hwɛɛ aba. Ufwugwo wa aba ụ shɛ atwa (kpakwụ-nu-talacɛ-na-ba-eyebi) (232). Nazhɛ boo sotulonu ejeshi atwa Isrɛl urubwo uko hwɛɛ aba, ufwugwo wa aba namɛ atwa igbɛɛ-itɛtu-na-akpakwụ-a-ta (7,000).

¹⁶Ee beni nu uwaŋna tishikoko, na aka na tu ga Bɛn-hadad te shiyeni nu ubodongom ata baa ta swa mayaga na shɛgwuma sha ata talacɛ-na-shɛba-shi-yebi shɛ na sho mbiyono bu.

¹⁷Ibɛ esemberi ebe a ndana egwomina ekpeleshi cɛnjɛ ugondu hwuri umbe hiiŋ. Ibɛ atumwa na gɛ Bɛn-hadad ga tumwanɛ gwuri, ee mbishi bu, ɛɛ hiɛŋ, Atwa oko banɛ ba nu Samaria aa zhajɛ.

¹⁸Bɛɛ hiɛŋ, Okwo yaa shɛ ulapiya aa 'waŋnɛ, ima aŋ ma buumwa buumwa, kwo kaa ujasa aa zhajɛ, ima aŋ ma buumwa buumwa.

¹⁹Nazhɛ esemberi ata a ndana egwomina ekpeleshi cɛnjɛ ugondu hwuri ga umbe, nazhɛ ejeshi atwa Isrɛl hwɛɛ 'wa aŋ ne ekwunyi.

²⁰Bụtụ bụtụ na amɛ esemberi ata kwụnɛ bụtụ bwa bi ifelu. Ibɛ po atwa Siria gezhiji, nazhɛ atwa Isrɛl urigeni aŋ nụ usumwa. Ama gɛ Bɛn-hadad munji budakwa bee benengeni, medenji asụcɛ idɛkwɛ ibwɛ.

²¹Ibɛ po agwuma Isrɛl zhe bee suji[35] idɛkwɛ keeni ihɛŋtu ujasa ya aba hwɛɛ. Baa kwụnɛ ejeshi atwa Siria tebiye.

²²Nazhɛ bigesere ata zhe pa agwuma Isrɛl, bɛɛ hiɛŋ bụ, Zhaga mama 'imɛ tebiye maa shikicinji ejeshi bu ta 'yajɛ ikɛnyi tebiye. Iwɛnɛ po agwuma Siria zhɛ ma bụ sukakana sasana unywanywa na aka gana ga.

²³Nazhɛ anjɛ-ugondu agwuma Siria, hiɛŋ bụ, Iwɛnɛ ta-tuwa ta aba tɛ shɛ tuwa tu nshama, ibɛ po ee tu hwuri ikɛnyi, ama ga shɛ nu udadarɛ ya eti jeshi aŋ, nazhɛ ɛti zhɛ ta ala aŋ.

²⁴Gana ɛbi zhɛ ba nda na: Bwaga shɛgwuma sha ata no ohwolu aba hwɛɛ, maa zweni eberezhe ejeshi no ohwolu aba!

²⁵Sotulonu ejeshi te gembi ufwugwo gana a na ala aa kwụnɛ, bụtụ bụtụ na budakwa bwa keeni ihɛŋtu ya aba ujasa, bụtụ bụtụ nu una ubwa ụhaŋtụ. Ti zhɛ ta nda ya ujasa na aba nu udadarɛ, ti zhɛ kaa ta lasụ aŋ ya gom. Bee leni ga n-ndumwa ma aba, baa njɛ ga gana ata ɛɛ hiɛŋ bụ.

²⁶Tu unywanywa rinje, gɛ Bɛn-hadad sotulonu ga ejeshi ubwa urubwo uko, bee zhe Afɛk maa sukakana atwa Isrɛl.

²⁷Ibɛ po atwa Isrɛl mama 'imɛ iwɛ ujasa, aa ụlwatagwụ, ee zhegeni atwa Siria. Nazhɛ atwa Isrɛl tileni nu ugba wa aba nu umbe atwa Siria gana orubwo iyweywe na gwụmwatangwụ ufwugwo ofwo eyebi kwurɛ kwurɛ. Ama atwa Siria tuba shidinji u'una ata nu ufwugwo wa aba.

²⁸Nazhɛ bụtụ ba Agwatana bu ko zhe pa agwuma Isrɛl, bɛɛ hiɛŋ bụ, AGWANGWAMA hiɛŋ, Iwɛnɛ ta atwa Siria hiɛŋ, AGWANGWAMA shɛ tuwa tu nshama, bɛ shɛ shɛ tuwa tu ulomu o, iwɛbɛ po Ngɛɛ zhɛ mo bu utogono ejeshi atwa ga Siria a'wụtụ 'wụtụ maa eri aŋ hwɛɛ. Nazhɛ ɛbi zhɛ ba mapa maa Gamba n shɛ AGWANGWAMA gom.

²⁹A namɛ ne ehilo ujasa ata Jitɛ icenje, atwa oko namɛ beye, anya atwa namɛ fwonu, aa mama ngbarakanụ. Ee kwuni ujasa nụ ụjita ata ucenje, nazhɛ atwa Isrɛl kwụnɛ atwa Siria igbɛɛ-dupu (100,000) jita ata uko gba, aba shɛ ejeshi na a zha tahaŋnụ ni ivwunɛ.

³⁰Atwa vwɛ aba gezheji ee duri Afɛk, ibɛ uba ụshɛpwụ ata hwuŋzwo waa 'imɛ atwa igbɛɛ-umpwa-ni-bɛ-i-tɛtu-na-akpakwụ-a-ta (27,000) anaa na ga ta vwɛ. Gɛ Bɛn-hadad gezhiji du, bee teni nu umwono uko na ta namɛ nụ ụshɛpwụ ata.

³¹Nazhɛ anjɛ-ugondu Bɛn-hadad hiɛŋ bụ, Tụ hwụjɛ maa shɛgwuma shi Isrɛl shi 'yajɛ inyɛmɛnyɛmɛ, iwɛ ecilo ata sukwu, lono maa to urogono tugwuno tụ ụcɛnjɛ tɛnda, maa to umpo ihwehwe no ohiuhiu tu maa ta zhagana agwuma Isrɛl. Nekeshi bu ma tu ganga tụkwụna.

³²Ee uregeni ga tugwuno tụ ụcɛnjɛ tɛnda, ee umpi ihwehwe no ohiuhiu aba, ee zhegeni agwuma Isrɛl, ɛɛ hiɛŋ bụ, Yɛu ɛtɛ bu ugondu, gɛ Bɛn-hadad hiɛŋ, Ma bụ tabwa maa genji bu tụkwụna. Agwuma jishijɛ aŋ, bɛɛ hiɛŋ, Bu ta namba waa hŋ? Yɛu-bino mi baa shɛ!

³³Atwa ata Bɛn-hadad a ga ngbarakacɛ kaa uhwaŋna maa ga Ahab zhɛ bɛ jishijɛ aŋ n-ndumwa ma amɛ-olom. Ama ti ga Ahab hiɛŋ aŋ gana ata, ibɛ atwa ata lɛshijɛ kakayɛ, ɛɛ hiɛŋ bụ, Iiŋ, gɛ Bɛn-hadad yɛu ɛtɛ bino bu! Ga Ahab jishijɛ aŋ, bɛɛ hiɛŋ, Zhaga zɛrijɛ bu ma epe. Aka na ti gɛ Bɛn-hadad ci apata. Ga Ahab hiɛŋ bụ ge munje nụ ụhaŋtụ ubwa ujasa.

³⁴Gɛ Bɛn-hadad hiɛŋ Ahab, N zhɛ me bu gwuricingeni ashɛpwụ ata bishi mi leshiji la ni i'ɛlɛ bishi bu. Bi eri du kaa ba ma umwono tihinya nu Damaskos gana na te bishi mi mo nu Samaria. Ga Ahab hiɛŋ bụ, N zha shɛ du ma bu kwụna ya iwɛ unu ga ebi shiri o. Ibɛ po aa twa-unu jita ata, bee genji bu bee hwuri ujiyo.

³⁵Ibɛ po bụtụ bu ko na amɛ egesere, na to soso tigesere hiɛŋ binya bwa, AGWANGWAMA m peni-unu, bɛɛ hiɛŋ, M po iyi. Ama bụtụ ata tuba lacɛ maa pa bụ iyi.

³⁶Bɛɛ hiɛŋ bụ, Gunu na te ebi beni hwayɛ epe, bizeci zhɛ ma bụ kwụna, iwɛnɛ ta abụ lacɛ unu wa AGWANGWAMA tuhwuga. Ti bee genji bu ga, gunu ata bizeci twa nu bwa, baa kwụnɛ bụ ga.

³⁷Bigesere ata zhegeni binya bụtụ sashana, bɛɛ hiɛŋ bụ, Ma bụ tabwa, M po iyi! Nazhɛ bụtụ ata po bu ga iyi, baa gwụcɛnjɛ bụ.

³⁸Nazhɛ bigesere ebe oo po iyi, umpi buzuzu ne eshe ubwa, maa kede e mepi bu o, bee zhe nu uhwaŋna, baa 'yacɛ agwuma Ahab.

³⁹Gana na ta agwuma zhɛ tɛkashɛka, baa uganɛ, bɛɛ hiɛŋ agwuma, Yɛu-ugondu bu ge zhe ujasa, ibɛ bụtụ bu ko m peni bụtụ na ujasa yɛ igbɛtɛtɛ, baa n tɛtaganɛ-unu, bɛɛ hiɛŋ, Ngbaraka bụtụ ga tebiye. Yaa shɛ bee bi benengeni, asha N zhɛ ma bụ kwụna tụlụkpashɛ, shibwonu asha bi zhɛ ba tụpa ụzụrụfa urinya uko.

⁴⁰Ama aka na Ama nda inyɛwɛŋ, baa n inanjɛ. Nazhɛ agwuma jishijɛ bụ, bɛɛ hiɛŋ, Asha gabụ du bu sweji n-ndumwa ta tụwụma tụ bụ hwɛɛ ya, asha gana ulwapɛ bụ zhɛ wa sha ta ya.

⁴¹Te bigesere ata tufwurinji buzuzu ebe ne eshe ubwa kakayɛ, agwuma kwụbɛ bụ, nazhɛ bee mepi bu ya maa bɛ shɛ bụtụ bu ko na amɛ egesere.

⁴²Bigesere ata hiɛŋ agwuma, AGWANGWAMA hiɛŋ, Ɛ zhɛ ma bụ kwụna tụlụkpashɛ ta bụtụ ata Ngɛɛ bi hiɛŋ kwụna, abụ kwụnɛ shɛ. Atwa bụ du kaa zhɛ o 'wo tụlụkpashɛ ta atwa ubwa.

⁴³Nazhɛ agwuma Isrɛl ji ni ihwɛ ibwɛ nu Samaria saiiŋ na amɛ-tụhaŋtụ a'wụtụ.