Read bassa 1 SHƐGWUMA SHI HIIŊ 21 Bible Online

1 SHƐGWUMA SHI HIIŊ 21 - bassa bible

1 SHƐGWUMA SHI HIIŊ 21

¹Bụtụ bu ko namba la ni Jɛzrɛl, ɛɛ hiɛŋ izeci ibwɛ ga Nabot. Bi 'yajɛ itimɛ ya afwafwa ike nɛ dongonu ụdatụ ihwɛ ya agwuma Samaria ga Ahab, na namɛ ni Jɛzrɛl.

²Ga Ahab hiɛŋ Nabot, M peni kaa itimɛ ɛtɛ bu ya afwafwa maa mu na hwaŋ uvwanga, iwɛnɛ ti yoo dongonu ihwɛ mi, maa tuba Ma bụ pana itimɛ ya afwafwa inyɛ, nɛ i zhɛmɛ uhwuri inɛ gɛ bu. Yaa shɛ kaa ukwuribi aba jala, N zhɛ ma bụ tụpa.

³Ama ga Nabot jishijɛ bụ, bɛɛ hiɛŋ, Kede AGWANGWAMA leni maa Ma bụ pana cɛnjɛ to ogwu ogwunukwoshi mi o!

⁴Iwɛ ɛtɛ gwumanɛ Ahab tebiye, bee gwuri ni ihwɛ ibwɛ saiiŋ iwɛ ajɛshɛgwa ata ga Nabot peni bu, bɛɛ hiɛŋ, N zha shɛ ma bụ pana cɛnjɛ to ogwu ogwunukwoshi mi o. Ga Ahab weci no ogodo ubwa, bee peni eshe geri bụ ụdatụ, baa lacɛ iyimɛyɛ tiya iwɛnɛ tu baa nda isɛbwɛ.

⁵Gɛ Jɛzɛbɛl biyikwo bwa zhegeni bu, bee heŋteni bu, bɛɛ hiɛŋ, Imbe kwuuŋ i bụ kwụshɛ u'waba upo abụ lacɛ ti iyi tiyaa?

⁶Ga Ahab jishijɛ bụ, bɛɛ hiɛŋ, Iwɛnɛ Ngɛɛ hiɛŋ Nabot, ga ma m pana itimɛ ɛtɛ ibwɛ ya afwafwa maa mo sheyingono bu ni inyɛ, kwo kaa maa Ma pana bụ ukwuribi. Bɛɛ n jishijɛ, bɛɛ hiɛŋ, N zha shɛ ma bụ pana itimɛ ya afwafwa mi o.

⁷Biyikwo ata bwa gɛ Jɛzɛbɛl hiɛŋ bụ, Shɛ gabụ suu bɛ shɛ agwuma Isrɛl? Kede amɛ bụ hashɛganụ o. Ishijɛ maa yɛ iyimɛyɛ, N zhɛ ma bụ pana itimɛ ɛtɛ ya afwafwa Nabot bụtụ ata bi Jɛzrɛl!

⁸Gɛ Jɛzɛbɛl 'nyeci atakada ni izeci Ahab, bee peteni iŋ useyida Ahab, bee penenji n-nyarɛ mụ ụshɛpwụ ata keeni atwa na 'yajɛ ụjɛrụma na amɛ aba.

⁹Iyi nɛ bee 'nyeci na atakada ata hiɛŋ, Sotulonu ma atwa, maa hi shiri ụjita we ezumi tɛnda. Gɛgɛcɛnga ma Nabot no ohwolu ụjɛrụma.

¹⁰Jalakaka ma atwa oko tugbom eyebi maa hi shanɛ Nabot iwɛ. Hiɛŋ ma, Bu twajɛ Agwatana keeni agwuma. Nazhɛ hi becinji bu nụ ụshɛpwụ, hi tegeni bu atayɛ maa bo 'wo.

¹¹Ibɛ po atwa ụshɛpwụ ata keeni n-nyarɛ ma aba, ta atwa na 'yajɛ ụjɛrụma njɛ ga gana na ti gɛ Jɛzɛbɛl hiɛŋ aŋ na atakada na bee ge 'nyeci gom.

¹²Ee jwe ga ụjita we ezumi tɛnda, aa gɛgɛcɛnjɛ Nabot no ohwolu ụjɛrụma.

¹³Nazhɛ atwa ebe tugbom eyebi zhajɛ ga, aa shanɛ bụ iwɛ ne eshe atwa ata, ɛɛ hiɛŋ, Ga Nabot twajɛ Agwatana keeni agwuma. Ee becinji bu ga nụ ụshɛpwụ ata, ee tegeni bu atayɛ aa kwụnɛ.

¹⁴Nazhɛ aa tumwanɛ Jɛzɛbɛl, ɛɛ hiɛŋ bụ, A kwụnua ya Nabot na atayɛ oo.

¹⁵Aka na ti gɛ Jɛzɛbɛl hwụjɛ maa a kwụnua Nabot na atayɛ. Bɛɛ hiɛŋ bwolo bwa ga Ahab, Zhaga sugo ya itimɛ ɛtɛ ya afwafwa Nabot, igɛtɛ baa ga lacɛ la maa ma bụ sangana. Ga Nabot zasaba ya o, bu uwo.

¹⁶Ga Ahab ishijɛ ga gunu ata maa lashɛga itimɛ ɛtɛ Nabot na aa kwụnɛ maa 'yaga iŋ.

¹⁷Ibɛ po AGWANGWAMA hiɛŋ Elaija, bụtụ ata bi Tishib.

¹⁸Ishijɛ maa zhe nu Samaria pa agwuma Ahab. Kwụba, bwee ye shiyeni ni itimɛ ya afwafwa Nabot igɛtɛ bee leshiji maa i shɛ inɛ ibwɛ.

¹⁹Hiɛŋ bụ, AGWANGWAMA hiɛŋ, Bụ kwụnɛ bụ ree ebi shepeneni ti iyi nɛ baa ga 'yajɛ? Mbiso Ahab maa, AGWANGWAMA hiɛŋ, Ofwo ata shiwawa shi senji mehieŋ mu Nabot, apata du gom shiwawa shi zhɛ sho songo hwuŋ mehieŋ mụ bụ!

²⁰Ga Ahab hiɛŋ Elaija, A-bụtụ mi bi i'ime, bu n teeneni ree ugbe? Ge Elaija jishijɛ bụ, bɛɛ hiɛŋ, M bi teeneni ga kaa ugbe, iwɛnɛ ebi meme senji maa na nda AGWANGWAMA iwɛwɛ kiri.

²¹Kwụba, N zhɛ maa bụ shapɛrɛganɛ Abara-ne-ebe, N zhɛ ma bụ kwụna, nazhɛ mo iricingo etwenyi elele ni ihwɛ bu ni Isrɛl, ta ajama, ta amamata.

²²N zhɛ ma nda ihwɛ bu gana ihwɛ Jɛroboam yɛu ɛtɛ Nebat keeni gana ihwɛ Beasha yɛu ɛtɛ Ahija, iwɛnɛ tɛ ɛbi ishicinjɛ isɛbwɛ mi, abɛ njɛ maa ga atwa Isrɛl njɛ iwɛwɛ.

²³Inɛ Jɛzɛbɛl i shɛ AGWANGWAMA hiɛŋ, Shiwawa, shɛ ba shi zhɛ sha ya bụ ni Jɛzrɛl[36] ata.

²⁴Bụtụ Ahab be elele na 'wi na amɛ ụshɛpwụ, shiwawa shɛ ba shi zhɛ sha ya bụ, bụtụ bwa be elele na kaa 'wi na ambɛ, ogwulu aba zhɛ a ya bụ!

²⁵I ta zasa binya bụtụ na meme sengeni iyi iwɛ tɛnda AGWANGWAMA gana Ahab kwukwuŋ, ubwa ata na biyikwo bwa gɛ Jɛzɛbɛl shishingeni maa nda iyi iwɛ.

²⁶Bɛ njɛ iyi-tupwaŋ tedure na tuwa ta ata baa zhɛba gana na ta A'amon a na AGWANGWAMA unzenji la atwa isrɛl a zhɛba.

²⁷Aka na ti ga Ahab hwụjɛ n-ndumwa mu ga hwɛɛ, bee dwetweji i'wɛŋnɛ nɛ bee ge urigeni, bee urigeni ya tugwuno tụ ụcɛnjɛ tɛnda ta amɛ-tuhaŋtụ, baa njɛ ezumi, boo rungo ya saiiŋ saiiŋ.

²⁸Nazhɛ AGWANGWAMA mbishi Elaija Bitishib ata n-ndumwa, bɛɛ hiɛŋ,

²⁹Bụ kwụbɛ hŋ gana na ga Ahab meme zucinje no ofwo mi? N zha shɛ ma nda ya iyi nɛ Ngee nge heŋshi maa ma nda na aka ubwa o, iwɛnɛ ti bee meme zucinje no ofwo mi, ama iyi iwɛ ɛtɛ hwɛɛ zhɛ ya nda ya na aka yɛu ibwɛ. Atwa ihwɛ ibwɛ aba Ngɛɛ zhɛ ma nda ijɛ ɛtɛ iwɛ hwɛɛ.