Read bassa 1 SHƐGWUMA SHI HIIŊ 22 Bible Online

1 SHƐGWUMA SHI HIIŊ 22 - bassa bible

1 SHƐGWUMA SHI HIIŊ 22

¹I ulwa shiywa shɛ tatụ ta atwa Siria njɛ shɛ ujasa na atwa Isrɛl.

²Ama nu uywa ata ụtatụ, ibɛ ge Jehoshafat agwuma Juda zhajɛ maa kwụba agwuma Isrɛl.

³Nazhɛ agwuma Isrɛl heŋteni atwa ubwa ugondu, bɛɛ hiɛŋ, Hi mepi hŋ maa atuba ti 'yajɛ Ramot-giliad? Atu namɛ bana saiiŋ eti leshiji shi uŋ ni i'ɛlɛ ya agwuma Siria.

⁴Ibɛ po agwuma Ahab heŋteni Jehoshafat, bɛɛ hiɛŋ bụ, Bi zhɛ bi me n she hŋ maa ti zhe ujasa nu Ramot-giliad? Ge Jehoshafat jishijɛ agwuma Isrɛl, bɛɛ hiɛŋ, Gana na abɛ shɛ, ibɛ du Ngaa shɛ. Atwa mi kaa a shɛ gana atwa bụ, idɛkwɛ mi i shɛ gana idɛkwɛ bụ.

⁵Ama ge Jehoshafat hiɛŋ agwuma Isrɛl, Mizha ti heŋteni tugwo AGWANGWAMA hiiŋ.

⁶Ibɛ po agwuma Isrɛl sotulonu ga egesere ubwa hwɛɛ, ufwugwo wa aba ụ shɛ gana akpakwụ-eyebi (400). Bee heŋteni aŋ, bɛɛ hiɛŋ, Ma zha suu ma sukakana Ramot-giliad nu ujasa, okwo Ma gangaa? Ɛɛ jishijɛ bụ, ɛɛ hiɛŋ, Zhaga AGWANGWAMA zhɛ mo bu utogo ụshɛpwụ ata.

⁷Ama ge Jehoshafat hiɛŋ bụ, Bigesere ba AGWANGWAMA bi nya zasaba ya suu epe maa ta kaana iwɛ tuhwoyigono nu bwa?

⁸Agwuma Isrɛl jishijɛ Jehoshafat, bɛɛ hiɛŋ, Bu ko ta namba, ɛɛ hiɛŋ ga Maikaya yɛu Imla. Ama iwɛ ubwa n kwụlanɛ shɛ o, iwɛnɛ tu baa jɛmɛ shɛ tigesere ti biye nu uhiuhiu mu kwukwuŋ, semi ma tụ tụ wɛ. Ge Jehoshafat hiɛŋ bụ, agwuma, tɛ hiɛŋ gana ata o!

⁹Nazhɛ agwuma Isrɛl suyanɛ yɛu ibwɛ ugondu ike, bɛɛ hiɛŋ bụ, Zhaga n suyananɛ Maikaya yɛu Imla kakayɛ.

¹⁰Na aka ata ibɛ agwuma Isrɛl na agwuma Juda ge Jehoshafat gɛgajɛ ya nu n-ndwụtwụ ma aba na akpakpata ata namɛ no odubo Samaria, ee uregeni otogwo aba tugwama. Egesere vwɛ hwɛɛ a dumangana aŋ tigesere.

¹¹Bu na bu ko na ɛɛ hiɛŋ gɛ Zɛdɛkia yɛu Kenaana njɛ shihiuaŋ nụ ụshɛmbɛrɛ ni ikɛnyi ibwɛ, bɛɛ hiɛŋ, AGWANGWAMA hiɛŋ, Ni ijɛ ibɛ ɛhi zhɛ hia gwucanga atwa Siria uuwa i ci aka na ahiɛ kwụnɛ aŋ hwɛɛ.

¹²Egesere ata hwɛɛ a dumanga tigesere, ɛɛ hiɛŋ, Zhaga sukakana Ramot-giliad, i zhɛ kaa ma bụ zhɛmana. Iwɛnɛ po AGWANGWAMA zhɛ a nda maa eri ụshɛpwụ ata.

¹³Butumwa na aa tumwanɛ maa suyanɛ Maikaya, hiɛŋ Maikaya, Egesere vwɛ hwɛɛ dumwa tigesere tu na ti lemicinji agwuma amɛ. Iwɛ ecilo ata, ma bụ tabwa du ma jɛmɛ hwayɛ tigesere ta amɛ-olom gana aba.

¹⁴Ama ga Maikaya jishijɛ bụ, bɛɛ hiɛŋ, N to AGWANGWAMA na shɛ buumwa maa, iyi elele nɛ AGWANGWAMA n hiɛŋ ma duma, ibɛ Ngɛɛ zhɛ Ma duma.

¹⁵Aka na ti bee ci ga pa agwuma, agwuma hiɛŋ bụ, A-Maikaya, ta zha suu ta sukakana Ramot-giliad nu ujasa okwo ta ganga? Ga Maikaya jishijɛ bụ, bɛɛ hiɛŋ, Zhaga ma, hi zhɛ hia lasụ aŋ, AGWANGWAMA zhɛ a nda maa hi eri ụshɛpwụ ata.

¹⁶Agwuma heŋteni Maikaya, bɛɛ hiɛŋ, Kpalụ mbaa Ngɛɛ zhɛ ma bụ ana tuwa-tuta, nazhɛ maa m mbishi iwɛ-tɛkana ni izeci ya AGWANGWAMAA?

¹⁷Nazhɛ ga Maikaya jishijɛ bụ, bɛɛ hiɛŋ, N kwụbɛ atwa Isrɛl hwɛɛ ta a garatagwụ nu nshama gana agwụdụ na zasa bi'iywa. Ibɛ po AGWANGWAMA hiɛŋ, Atwa ga zasa a'yagajɛ o, ge ji nu nhwan ma aba na amɛ-olom.

¹⁸Na aka ata ibɛ agwuma Isrɛl hiɛŋ Jehoshafat, N nge bi mbishi shi hŋ maa bu zha shɛ ma n dumangana tigesere ta amɛ-olom semi ma tụ tụ wɛ?

¹⁹Ga Maikaya hiɛŋ bụ, Shɛlaga ya iyi nɛ AGWANGWAMA jɛmɛ! Iwɛnɛ po N kwụbɛ AGWANGWAMA tu baa jɛjɛ ni idwɛtwɛ ibwɛ, atumwa-azuba hwɛɛ shikekeni oo rungwutwonu bu, tu u'ala ubiye, tu u'ala ugwulwo.

²⁰Nazhɛ AGWANGWAMA hiɛŋ, Gaaba zhɛ ba halakaka Ahab maa zha sukakana Ramot-giliad nu ujasa maa a kwụnɛ bụụ? Ibɛ po bụtụ bu ko jɛmɛ inee ye, binya bụtụ ba duma inɛɛ nɛ.

²¹Nazhɛ mpiala mu ko mu kaanɛ izhɛ mee shikeni nu umbe AGWANGWAMA, mɛɛ hiɛŋ, N zhɛ ma halakaka bụ.

²²AGWANGWAMA heŋteni bu, bɛɛ hiɛŋ, Gana naa ɛbi zhɛ ba nda iiŋ? Bɛɛ hiɛŋ, N zhɛ ma bana maa ma ana egesere ubwa ụzagwụ-tudwa hwɛɛ aba. AGWANGWAMA hiɛŋ mpiala ma ata, Zhaga halakaka bụ, i zhɛ kaa ma bụ 'yagana eshe.

²³Gana AGWANGWAMA eni egesere ga bụ ụzagwụ-tudwa ta. AGWANGWAMA kaa dumwa maa ehilo zhɛ mɛ bi yɛ!

²⁴Nazhɛ gɛ Zɛdɛkia yɛu Kenana keeni izhɛ, boo po Maikaya uwaŋpɛ nu upada, bɛɛ hiɛŋ bụ, Aka gana na bwa mpiala ma AGWANGWAMA mi beni no olugwo mi maa zhajɛ pụ bụ maa jɛmɛ iwɛ na bụụ?

²⁵Ga Maikaya hiɛŋ bụ, Jita na ɛbi zhɛ bo gozhigo maa swaka taa na amɛ umwono, nazhɛ ɛbi zhɛ ba kwụba ijɛ.

²⁶Nazhɛ agwuma Isrɛl hiɛŋ bɛnjɛ-bu-ugondu bwa bu ko, Ima ma Maikaya, hi gwuricinji bu pa Amon na shɛ ugwomina ụshɛpwụ ga keeni Joash yɛu ya agwuma.

²⁷Hiɛŋ aŋ, agwuma hiɛŋ, Shiyono ma bụtụ ga nu umwono-tishi, ga shɛ akara keeni meni kiri ahia pana bụ uuwa i ci aka na Ngee gwure lapiya.

²⁸Ga Maikaya hiɛŋ bụ, Yaa shɛ ebi jiye lapiya, asha shɛ AGWANGWAMA n tumwanɛ utumwa maa Ma duma iwɛ gɛ o! Bee keeni, bɛɛ hiɛŋ, Ahiɛba na hi namɛ epe hwɛɛ, no shiyono ma iwɛ gɛ eshe tebiye.

²⁹Ibɛ po agwuma Isrɛl, na agwuma Juda ge Jehoshafat sanɛ ujasa nu Ramot-giliad.

³⁰Nazhɛ agwuma Isrɛl, hiɛŋ Jehoshafat, N zhɛ mo sheyingo i'wɛŋnɛ mi maa mo urugono inyɛ, nazhɛ mo tono nu ujasa. Ama urugono tuba i'wɛŋnɛ bu tugwama. Ibɛ agwuma Isrɛl sheyinji ga i'wɛŋnɛ ibwɛ, bee teni nu ujasa.

³¹Ama agwuma Siria go mbiswo eberezhe na a suka ihɛŋtu ibwɛ ujasa atwa talacɛ-na-ba-eyebi, bɛɛ hiɛŋ aŋ, To tumongono ma hwayɛ bụtụ be elele o, okwo baa gwumwa kwo kaa bee gembi o, semi ga shɛ agwuma Isrɛl kiri.

³²Ama aka na te ehiu ihɛŋtu ɛtɛ ujasa kwụbɛ Jehoshafat, ɛɛ hiɛŋ, agwuma Isrɛl na caakwụ. Aa 'wa bụ, ge Jehoshafat uganɛ.

³³Nazhɛ ee mepi ya maa shɛ agwuma Isrɛl ta o, ee genji bu tu'urugono.

³⁴Aka na ta bụtụ bu ko keri i'ilɛ ibwɛ gana tukalanga, yaa njɛ ikpɛsu yee duri na agbahwụ i'wɛŋnɛ ujasa ya agwuma Isrɛl, yoo to bu na bụ'aŋbụ. Bɛɛ hiɛŋ bụtụ na ba suka bụ nụ ụhaŋtụ ubwa ujasa, Vwula nụ ụzalụ maa m becinji nu ujasa ga, N eri ụngwụ duwa.

³⁵Ujasa kaa vwi eshe jita ata tebiye, gana agwuma Isrɛl shiyeni nụ ụhaŋtụ ubwa ujasa, baa ngbarakacɛ atwa Siria ta. Mehieŋ mu bwa mo zwo tuta tụ ụhaŋtụ ubwa ujasa, maa uuwa ụrụmɛ shɛ, bee 'wi.

³⁶Aka na tu uwaŋna zhɛ utwonuo, aa njɛ okowuya, ɛɛ hiɛŋ, Bụtụ bụtụ go jiyo nụ ụshɛpwụ ubwa keeni cɛnjɛ tu bwa.

³⁷Aka na ta agwuma 'wi, ee jicinje bu nu Samaria, ee ni bu apata.

³⁸Nazhɛ aa nyashɛnjɛ ụhaŋtụ ubwa ujasa nu ukwokwo Samaria, no ofwo ata awale na aa tụpa ukwuribi a dula meni,[37] shiwawa shi senji mehieŋ mu bwa, gana na ta AGWANGWAMA dumwa la.

³⁹Iyi nɛ ta vwɛ ni iyi elele nɛ ga Ahab ndanjɛ hwɛɛ, tu gana na tu boo mo umwono ne ene udagba, keeni ashɛpwụ na bee mengeni hwɛɛ, i 'nyeci shi suu nu utakada Shɛrụkeụkwụ shɛ shɛgwuma shi Isrɛl?

⁴⁰Gana ga Ahab 'wi gana eshi ubwa ta, nazhɛ yɛu ibwɛ ga Ahazia yɛ tugwama no ohwolu ubwa.

⁴¹Ga Ahab yɛ tugwama ti Isrɛl, yaa namɛ shiywa shi neshi, nazhɛ ge Jehoshafat yɛu Asa yɛ tugwama tu Juda.

⁴²Ge Jehoshafat namɛ shiywa talacɛ-na-shɛba-shɛ-ta te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm shiywa woshi-na-shɛba-shɛ-ta. Ɛ hiɛŋ izeci bino bwa ga Azuba yɛu Shilihi.

⁴³Ge Jehoshafat 'wa ụpapụ bishi bwa ga Asa ni iyi elele nɛ baa njɛ hwɛɛ, bụ vwụrɛ shɛ maa ganga ụŋ o. Bɛ njɛ iyi nɛ kwụlanɛ AGWANGWAMA, ama tuba bu hwuŋzetenji shi tikpekwu ta ata atwa a zhɛba tuwa ta aba o, apata oo hwoŋzhingo iturɛre.

⁴⁴Ge Jehoshafat 'yajɛ amɛ-olom na agwuma Isrɛl.

⁴⁵Iyi nɛ ta vwɛ ni iyi elele nɛ ge Jehoshafat ndanjɛ hwɛɛ, tu ukpahiŋ na baa 'yajɛ, ta ajasa na baa ndanjɛ hwɛɛ, i 'nyeci shi suu nu utakada Shɛrụkwụkwụ shɛ shɛgwuma shu Juda?

⁴⁶Bee unzhi awale eyi keeni a na o o hwɛɛ, a na a pana tuwa ta aba arụpɛ no otukwu na ee genji tuhwuŋzotongo taa na aka na bishi bwa ga Asa ta namɛ la.

⁴⁷Agwuma elele zasaba la ni Idụm, ama umadanga wa agwuma ubwa la untanganɛ cɛnjɛ ta ata.

⁴⁸Agwuma ge Jehoshafat shebi ihɛŋtu tinyakpa nyakpa maa bi ne suje azhɛnarɛya na namɛ no Ofi, ama ihɛŋtu ɛtɛ tuba bwaratagwụ ni Ezion-gɛbɛ.

⁴⁹Na aka ata ga Ahazia, yɛu Ahab, hiɛŋ Jehoshafat, Ga miaụŋ mi mi mu ugondu mi zhe tahaŋnụ na miaụŋ mụ bụ mu ugondu na amɛ ihɛŋtu. Ama ge Jehoshafat tuba lacɛ.

⁵⁰Ge Jehoshafat 'wi gana eshi ubwa, ee ni bu nụ ụshɛpwụ bishi bwa ge Devid. Nazhɛ yɛu ibwɛ ge Jehoram yɛ tugwama no ohwolu ubwa.

⁵¹Ge Jehoshafat yɛ tugwama tu Juda, yaa namɛ shiywa umpwa-na-shɛba-shi-cenje, nazhɛ ga Ahazia yɛu Ahab yɛ tugwama ti Isrɛl nu Samaria shiywa shi yebi.

⁵²Ga Ahazia njɛ AGWANGWAMA iwɛwɛ, gana bishi bwa keeni bino bwa keeni gana Jɛroboam yɛu Nebat na njɛ maa atwa Isrɛl njɛ iwɛwɛ.

⁵³Bu to ụrụpɛ na tuwa ta ata ɛɛ hiɛŋ Beal, baa zhɛbɛ tụ, bɛɛ ishicinjɛ isɛbwɛ ya AGWANGWAMA na shɛ Agwatana Isrɛl gana na te bishi bwa njɛ la du gom gom.