Read bassa 1 SHƐGWUMA SHI HIIŊ 5 Bible Online

1 SHƐGWUMA SHI HIIŊ 5 - bassa bible

1 SHƐGWUMA SHI HIIŊ 5

¹Aka na ti ge Hiram ata shɛ agwuma Taya hwụjɛ maa e dudugeni Sụlụmụn manɛbɛ maa ya tugwama te bishi bwa ge Devid, baa tumwanɛ miaụŋ mu bwa mu ugondu pu Sụlụmụn, iwɛnɛ tu baa shɛ la biyejilo Devid.

²Go Sụlụmụn tumwanɛ utumwa pi Hiram, bɛɛ hiɛŋ bụ,

³Bi mepi du maa iwɛ tusukakana tu na atwa i'ime a na rungwutwonu bishi mi a sukakana bu la nu ujasa, iwɛbɛ po bee eri shi ba ma Umwono wa AGWANGWAMA na shɛ Agwatana ubwa, uuwa i ci aka na Agwatana lasagwụ bụ atwa i'ime ibwɛ.

⁴Ama AGWANGWAMA na shɛ Agwatana mi m peni amɛ-olom na atwa elele, i zasa bụtụ bi i'ime kwo kaa bụtụ na zhɛ ma n sukakana o.

⁵Ibɛ po Ngaa njɛ ahaŋsa maa Ma ma Umwono wa AGWANGWAMA na shɛ Agwatana mi, gana na ti bee mbishi la bishi mi ge Devid, bɛɛ hiɛŋ bụ, Yɛu ɛtɛ bu Ngɛɛ zhɛ ma pana tugwama tụ bụ, ubwa zhɛ ma m mana umwono.

⁶Iwɛbɛ po Ama jala maa ɛ n dwɛjɛ osobu ata namɛ ni Lebanon. Atwa mi zhɛ a nda ugondu ata na atwa bụ, gana elele na ebi shikicinji ulumo, N zhɛ ma tụpa atwa bụ. Gabụ du bi mepi maa tu zasa atwa na 'yebi i'wɛ'wɛ tubagaga epe gana atwa Saidụn.

⁷Aka na ge Hiram hwụjɛ utumwa Sụlụmụn, amɛ ubwa lemi tebiye, bɛɛ hiɛŋ, Ge Zhemonjino AGWANGWAMA hwayɛ ga, gana na bee peni Devid yɛu nɛ incɛ maa ya tugwama tu bwa maa untangana kaa atwa na gembi ufwugwo i ci gana ga.

⁸Ge Hiram tumwanɛ utumwa no ofwo Sụlụmụn, bɛɛ hiɛŋ bụ, N hwụjɛ utumwa bụ, M mama 'imɛ maa ma nda iyi nɛ ɛbi n hiɛŋ, N zhɛ ma bu dwɛjɛ osobu keeni orokwo gana elele na aba jala.

⁹Miaụŋ mi mi mu ugondu mi zhɛ me suje iŋ a banɛ ni Lebanon o to itekwu, N zhɛ tuba mɛ cɛ iŋ ihwehwe me zweni iŋ ni itekwu maa ufwunga meni suje iŋ maa i ci ofwo na aba jala. Apata ɛbi zhɛ bo tufwurungo iŋ nazhɛ a 'wananjɛ iŋ. Iyi nɛ kiri n kwụlanɛ maa m panɛ, i shɛ iyimɛyɛ nɛ maa atwa ihwɛ mi yɛ.

¹⁰Gana ge Hiram ba pana Sụlụmụn osobu keeni orokwo gana na tu baa jala ta.

¹¹Go Sụlụmụn peni Hiram azhɛka ohiu igbɛɛ-umpwa (20,000) iwɛ atwa ihwɛ ibwɛ keeni manɛbɛ ma buta gana agaruwa kpakwụ-nu-dupu-nu-woshi-na-ba-a-ta (275). Gana ata baa uranga Hiram i'wɛŋnɛ ɛtɛ tụpana uywa uywa.

¹²AGWANGWAMA peni Sụlụmụn ti'inta gana na ti bee shileni bu la unu. Go Sụlụmụn 'yajɛ amɛ-olom ne Hiram tebiye, ibɛ po aa twa-unu hwɛɛ aba ebeyebi.

¹³Nazhɛ agwuma Sụlụmụn zenji atwa igbɛɛ-umpwa-ni-bɛ-tɛ (30,000) na ashashɛ atwa Isrɛl hwɛɛ maa a na ndana bụ ugondu ukpahiŋ.

¹⁴Boo dwotwogonu aŋ orubwo atatụ, ibɛ po aa namɛ igbɛɛ-itɛ itɛ (10,000). A palaga tunama ni Lebanon, upiana uko atwa igbɛɛ-itɛ a nama ni Lebanon, nazhɛ a nama ni ihwɛ ipiɛnɛ iyebi. Ga Adoniram, ubwa shɛ uhiu wa atwa ata ugondu ukpahiŋ.

¹⁵Go Sụlụmụn 'yajɛ du atwa na namɛ igbɛɛ-buhanda (80,000) a na a shaba atayɛ na cɛnjɛ ti ishɛmɛ, nazhɛ atwa igbɛɛ-talacɛ-ni-bɛ-tɛ (70,000) tuba a 'wananga atayɛ ata.

¹⁶Baa 'Yajɛ atwa ugbaa-na-akpakwụ-ecihiŋ-ni-dipi-yebi (3,300) a na shɛ ehiu maa a na ngbaraka atwa ata a nda ugondu ata.

¹⁷Agwuma peni-unu maa ge suje atayɛ a'wụtụ a'wụtụ, a na zhanganjɛ, a na ee shebi, maa e shiri ukoshilo umwono ata.

¹⁸Omo-tuma Sụlụmụn, no omo-tuma Hiram, keeni atwa na namɛ nụ ụshɛpwụ ata ɛɛ hiɛŋ Gibal, aba a bagaga i'wɛ'wɛ keeni atayɛ iwɛ umwono ata tuma.