Read bassa 1 SHƐGWUMA SHI HIIŊ 6 Bible Online

1 SHƐGWUMA SHI HIIŊ 6 - bassa bible

1 SHƐGWUMA SHI HIIŊ 6

¹Ta atwa Isrɛl ulwa shiywa akpakwụ-eyebi-nu-dupu-nu-talacɛ (480) ta a banɛ ni Ijipti, go Sụlụmụn du ulwa shiywa shi neshi tu baa yɛ tugwama ti Isrɛl. Nazhɛ bee kwuni Umwono ata wa AGWANGWAMA tuma nu upiana Biyebi na ɛɛ hiɛŋ, Ziv.

²Ụnjɛswa wa amɛ Umwono ata agwuma Sụlụmụn meni AGWANGWAMA ụ shɛ avwuna dipi-yebi-nu-woshi (120), uholo ubwa ụ shɛ avwuna buhanda (40) uzoto ubwa ụ shɛ imbele i'ɛlɛ talacɛ (30).

³Umwono ata 'yajɛ angba no odubo. Ụnjɛswa wa aba ụ shɛ avwuna buhanda (40), uholo wa aba nangwụ nu ụnjɛswa, me'ilwo ma aba mɛ shɛ imbele i'ɛlɛ umpwa.

⁴Bu ndanɛ umwono ata agbahwụ na namɛ mwee mwee no tupohondo.

⁵Bee swenenji shimwono sha azuba na apada umwono ata keeni aba umwono ata ohwolu tijilo. Shimwono sha ata sha azuba shɛ na shi rungwutwonu umwono ata, shɛ namɛ tusata tụ tatụ, uzoto una una ụ shɛ avwuna ecenje na ashashɛ.

⁶Uholo cɛnjɛ tu umwono ata no ofwo ata zwi uhwuri ofwo vwɛ hwɛɛ; namɛ avwuna ecinjishi, uholo anaa na namɛ na ashashɛ umwono ata no ofwo ata zwi uhwuri ofwo vwɛ hwɛɛ namɛ avwuna umpwa-na-ba-eyebi, anaa na 'wa aŋ shɛ avwuna umpwa-na-ba-eneshi. Gabata umwono ata momo hwulosu uholo te kwune nu una uhiiŋ tutu una ụtatụ, iwɛ maa una una cimi tupatana nu unya uzawa ezhibi elele tishikocongo tuta.

⁷A shabɛ atayɛ umwono ata no ofwo na aa shaba atayɛ nazhɛ ee suje aŋ. Ibɛ po rundu ra ashamụ keeni shigwubo keeni i'wɛŋnɛ ugondu wa ashɛmbɛrɛ zasaba no ofwo ata aa ma Umwono ata.

⁸Odubo umwono ata uhiiŋ namɛ tuta tu umwono ata. A ndanɛ umwono ata wa ashashɛ keeni una ụtatụ ogbudu maa o no mungo shu.

⁹Gabata boo mo umwono ata bee hwuwi. Boo to ukogo ubwa gana ikete ne ezhibi ogbogolo osobu.

¹⁰Bu swenenji shimwono sha ata sha azuba nụ ụdatụ umwono ata wa Agwatana. Uzoto shimwono sha ata shi rungwutwonu umwono ata hwɛɛ ụ shɛ avwuna umpwa.

¹¹Nazhɛ AGWANGWAMA mbishi Sụlụmụn, bɛɛ hiɛŋ,

¹²Yaa shɛ aba 'wa onu-tɛtɛtagana mi, aba hwuga-unu shikpogo shi mi, aba untangana kaa onu-tupana mi hwɛɛ, nazhɛ Ngɛɛ zhɛ ma bu ndana iyi nɛ Ngee shileni la bishi bu ge Devid unu iwɛ umwono ga aba ma.

¹³Nazhɛ Ngɛɛ zhɛ ma nama na ashashɛ miaụŋ mi Isrɛl, N zha shɛ kaa ma ganga atwa mi Isrɛl kwukwuŋ.

¹⁴Gana ata go Sụlụmụn hwuwi umwono ata wa Agwatana tuma.

¹⁵Bee sweni amɛ ụdatụ umwono ata ogbogolo osobu hwɛɛ ta cɛnjɛ tutu ikete ubwa. Nazhɛ bee tilegeni ogbogolo orokwo na cɛnjɛ ta amɛ umwono ata.

¹⁶No ogbogolo osobu bee jejeji shɛmɛ shi umwono ata nu ukwunanga ubwa te kwuni na cɛnjɛ uuwa munji i ci ikete ubwa.[7] Ụnjɛswa ubwa ụ shɛ avwuna buhanda, (40) apata aba shɛ umwono wa amɛ na shɛ Ohwolu Tijilo na hwuri una we elele.

¹⁷Ụnjɛswa wa angba na namɛ no odubo umwono ata wa amɛ ụ shɛ avwuna dupu-nu-talacɛ (80).

¹⁸E sweni umwono ata wa amɛ ogbogolo osobu, nazhɛ ee zwi ufwoto shikoko keeni modwodwo no ogbogolo ata, iwɛbɛ po utayɛ we elele hikeni shi nu umwono ata maa bụtụ kwụbɛ.

¹⁹Baa nanganɛ du ohwolu tijilo umwono ata wa amɛ umɛwɛɛ maa bo sho Ikpɛtɛ ɛtɛ Unu-tutwa ya AGWANGWAMA nu bwa.

²⁰Ụnjɛswa umwono ata wa amɛ ụ shɛ avwuna buhanda, (40) uholo ubwa ụ shɛ avwuna buhanda, (40) uzoto ubwa ụ shɛ imbele i'ɛlɛ woshi (20). Bee sweni amɛ ubwa azhɛnarɛya tụrụmbɛɛ hwɛɛ, nazhɛ boo mo utukwu-ụrụpɛ no ogbogolo osobu.

²¹Bee sweni ohwolu tijilo umwono ata wa amɛ azhɛnarɛya tụrụmbɛɛ, nazhɛ bee beci shɛgba sha azhɛnarɛya no odubo umwono ata wa amɛ.

²²Gana ata ee sweni umwono ata wa amɛ azhɛnarɛya hwɛɛ. Bee sweni du utukwu-ụrụpɛ na namɛ no ohwolu ata tijilo azhɛnarɛya.

²³Bee shebi ụsụbwa iyi-uumwa nɛ 'yajɛ apiambɛ iyebi nụ ụ'wụ'wụ buta, bee shikecenji iŋ no ohwolu tijilo umwono ata wa amɛ. Uzoto ibɛ shɛ imbele i'ɛlɛ umpwa.

²⁴Apiambɛ inɛ inɛ i shɛ imbele i'ɛlɛ itɛ itɛ, te beni ni ihiŋhiŋ upiambɛ inɛ ike i ci ihiŋhiŋ upiambɛ inɛ iyebi i shɛ imbele i'ɛlɛ umpwa.

²⁵Uzoto inɛ ike ụ shɛ imbele i'ɛlɛ umpwa, a nangwụ ni iyi elele.

²⁶Iyi ya aba ye elele i shɛ ike ike hwɛɛ tu uzoto ibɛ, ụ shɛ imbele i'ɛlɛ umpwa umpwa.

²⁷Bee shikecenji ụsụbwa ijɛ ɛtɛ uumwa nu umwono ata wa amɛ, ike namɛ zalụ ye, inɛ iyebi namɛ zalụ na. Inɛ ike berishiji upiambɛ ibɛ woo to ụdatụ, inɛ iyebi berishiji upiambɛ ibɛ woo to ụdatụ. Inee ye bɛrishijɛ upiambɛ ibɛ uyebi na azuba, inɛɛ nɛ bɛrishijɛ upiambɛ ibɛ uyebi na azuba, apiambɛ ata twa ya na ashashɛ umwono ata wa amɛ.

²⁸Bee sweni iyi-uumwa ɛtɛ hwɛɛ bɛ iyebi azhɛnarɛya.

²⁹Baa ndanjɛ ofwoto iyi-uumwa nɛ 'yagajɛ apiambɛ keeni ishiwɛ keeni modwodwo na adatụ umwono ata wa amɛ hwɛɛ, tu na tupohondo.

³⁰Bee sweni ta cɛnjɛ tu umwono ata wa amɛ, tu una tupohondo azhɛnarɛya.

³¹Bee shebi ukpa na 'yajɛ tɛkapɛshɛnga ti yebi nụ ụ'wụ'wụ buta, bee shiyeni uŋ no odubo umwono ata wa amɛ na shɛ Ohwolu Tijilo na Hwuri hwɛɛ. Ogbogolo akpa ata 'yajɛ ogongo a ta.

³²Baa njɛ ofwoto iyi-uumwa ɛtɛ 'yajɛ apiambɛ, ti ishiwɛ keeni modwodwo. Bee sweni iyi-uumwa ɛtɛ azhɛnarɛya, ti i'wɛ'wɛ ɛtɛ, to modwodwo ma ata hwɛɛ.

³³Bee shebi ukpa na 'yajɛ ogongo eneshi nụ ụ'wụ'wụ buta, bee shiyeni uŋ no odubo umwono ata ụ'wụtụ.

³⁴Bee shebi du akpa eyebi a na 'yajɛ tɛkapɛshɛnga ti yebi nụ ụ'wụ'wụ buta.

³⁵Baa njɛ ofwoto iyi-uumwa ɛtɛ 'yajɛ apiambɛ keeni ishiwɛ keeni modwodwo na akpa ata, bee sweni iŋ azhɛnarɛya ta nangwụ hwɛɛ ibɛ.

³⁶Bee jwe ukpogwu nu umbe umwono ata, bo rungwutwonu uŋ na tuma tu na ti shiyegeni ezhibi i'wɛ'wɛ yo osobu keeni atayɛ na ee shebi na ashashɛ tusata ta ata tụ tatụ te elele.

³⁷E shiri ukoshilo umwono ata wa AGWANGWAMA nu upiana Biyebi na ɛɛ hiɛŋ Ziv, na aba na tu go Sụlụmụn yɛ tugwama yaa namɛ shiywa shi neshi.

³⁸Tu go Sụlụmụn ulwa shiywa umpwa-nu-boo-ko tu baa yɛ tugwama, nu upiana Bụtụndatụ na ɛɛ hiɛŋ, Bul, ibɛ umwono ata hwuwowu tuma nu gana na ta ti'imanganga tu bwa tu namɛ hwɛɛ. Shiywa shi cenje go Sụlụmụn mo umwono ata nazhɛ bee hwuwi uŋ tuma hwɛɛ.