Read bassa 2 SHƐGWUMA SHI YEBI 12 Bible Online

2 SHƐGWUMA SHI YEBI 12 - bassa bible

2 SHƐGWUMA SHI YEBI 12

¹Aka na ti ge Jehu ulwa shiywa shi cenje tu baa yɛ tugwama ti Isrɛl, nazhɛ go Joash yɛ tugwama tu Juda. Go Joash yɛ tugwama nu Jɛrusalɛm shiywa buhanda. Ɛ hiɛŋ izeci bino bwa ge Zibia yɛu ya atwa Biɛshiba.

²Go Joash njɛ iyi nɛ kwụlanɛ AGWANGWAMA nu uraiŋ ubwa tiya hwɛɛ, gana na ge Jehoiyada bunongbo tɛtaganɛ bụ la unu.

³Ama okwo ti yaa shɛ gana ata, bu hwuŋzetenji shi ofwo ata wa atwa ata a ta arụpɛ nu nshama o. Ibɛ po atwa ata uranjɛ arụpɛ tuta keeni iturɛre tuhwoŋzhingo nu nshama ma ata.

⁴Nazhɛ go Joash hiɛŋ onongbo, Na lashɛga ma ukwuribi i'wɛŋnɛ tijilo, tu ukwuribi we elele na ee leshiji na tɛrɛcɛ, tu una Umwono wa AGWANGWAMA, tu una wa apalajɛma na bụtụ shiri-unu, keeni upwaŋ u tukwulangana.

⁵Go bunongbo be elele na lashɛga una wa atwa na baa namanɛ maa bu na intana iwɛ maa a nanganɛ umwono wa Agwatana nu bwa no ofwo elele na umwono ata njɛ ufwu.

⁶Ama go Joash ulwa shiywa woshi-na-shɛba-shɛ-tatụ tu baa yɛ tugwama, onongbo ta nanganɛ shɛ waa umwono ata wa Agwatana no ofwo na waa njɛ ufwu o.

⁷Go Joash suyanɛ Jehoiyada bunongbo keeni onongbo na vwɛ, bɛɛ hiɛŋ aŋ, Imbe bwa po ahiɛ ta nanganɛ shɛ umwono wa Agwatana no ofwo ata waa njɛ ufwuu? Bɛɛ hiɛŋ aŋ, Ta lashɛga ma ya ukwuribi na atwa o, ama sugo uŋ ma hi peni atwa na zhɛ a nangana umwono ata wa Agwatana no ofwo ata waa njɛ ufwu.

⁸Onongbo ata leni maa a zha shɛ na swaka ya ukwuribi ni ikɛnyi aba o, a zha shɛ du kaa a nangana ya umwono ata ni ikɛnyi aba o.

⁹Ge Jehoiyada na shɛ bunongbo ata shepi ikpɛtɛ, bee beji azuba ibɛ, bee shi iŋ zalụ bu utukwu-ụrụpɛ nu u'ala ubiye odubo umwono ata wa AGWANGWAMA. Onongbo na a 'yaka odubo ata o zwono ukwuribi we elele na ee lesheji nu umwono wa AGWANGWAMA ni ikpɛtɛ ɛtɛ.

¹⁰Aka elele aa kwụbɛ maa ukwuribi zweni ba ni ikpɛtɛ ɛtɛ duwa, bi'nyeci ba agwuma keeni uhiu wo onongbo, a bwa uŋ a rɛta nazhɛ o zwogono uŋ na azhɛka.

¹¹Nazhɛ a pana atwa na untanganɛ iwɛ ugondu umwono ata wa AGWANGWAMA tunangangana nu ukwuribi ata aa rɛcɛ. Ubwa aa tụpa eshebi i'wɛ'wɛ keeni omo tuma a na a nda ugondu nu umwono ata wa AGWANGWAMA,

¹²keeni atwa na a ma na atayɛ keeni eshebi atayɛ, nazhɛ aa sa i'wɛ'wɛ keeni atayɛ iwɛ umwono ata wa AGWANGWAMA tunangangana.

¹³A njɛ shɛ uhwara nu ukwuribi ata umwono wa AGWANGWAMA iwɛ maa o so agbamgbamụ ticwɛŋ cwɛŋ, ne shilumekeshi, na azụrụfa, na agbamgabam na gembenji, na akakacɛ okwo i'wɛŋnɛ ya azhɛnarɛya kwo kaa azụrụfa na namɛ nu umwono ata wa AGWANGWAMA o.

¹⁴Ukwuribi ata ubwa aa tụpa anjɛ-ugondu umwono ata wa AGWANGWAMA tunangangana.

¹⁵E heŋteni shi atwa na untanganɛ iwɛ ugondu ata maa a imanganjɛ gana na aa tụpa anjɛ-ugondu ukwuribi o, iwɛnɛ ta a shɛ atwa tɛcara.

¹⁶A njɛ shɛ ugondu ata nu ukwuribi na shɛ una ụrụpɛ tụwụma keeni una ụrụpɛ iwɛwɛ nu umwono wa AGWANGWAMA o, onongbo aba 'yajɛ una ata.

¹⁷Ga Hazaɛl agwuma Siria sukakanɛ ụshɛpwụ ata ɛɛ hiɛŋ Gat nu ujasa, bee leshiji uŋ ni i'ɛlɛ ya Afilistia, baa mama 'imɛ maa sukakana du Jɛrusalɛm nu ujasa.

¹⁸Go Joash agwuma Juda suji i'wɛŋnɛ tijilo ye elele nɛ ge Jehoshafat, ne Jehoram keeni Ahazia shɛgwuma sha ata baa 'wa na tugwama tiya, shi tileni la nu umwono wa AGWANGWAMA keeni inɛɛ nɛ du bee tileni keeni i'wɛŋnɛ ya azhɛnarɛya elele nɛ namɛ ni i'wɛŋnɛ ibiye nɛ namɛ nu umwono ata wa AGWANGWAMA; baa tumwanɛ maa e peni Ahazɛl na shɛ agwuma Siria. Ibɛ po ga Ahazɛl genji ya Jɛrusalɛm tusukakana.

¹⁹Iyi nɛ ta vwɛ ni iyi elele nɛ go Joash ndanjɛ na tugwama tu bwa hwɛɛ, i 'nyeci shi suu nu utakada shɛrụkwụkwụ shɛ shɛgwuma shi Juda.

²⁰Ehiu anjɛ-ugondu ubwa sukakanɛ bụ aa kwụnɛ bụ ni ihwɛ ibwɛ nɛ namɛ ni Milo nu uhwaŋna ata zhɛ Sila.

²¹Atwa na kwụnɛ bụ na: go Jozaka,[23] yɛu Shimiɛt ne Jehozabad yɛu Shomɛ, a na shɛ anjɛ-ugondu ubwa. Go Joash 'wi, ee ni bu ne eshi ubwa nụ ụshɛpwụ wa agwuma Devid. Nazhɛ yɛu ibwɛ ga Amazia yɛ tugwama no ohwolu ubwa.