Read bassa 2 SHƐGWUMA SHI YEBI 14 Bible Online

2 SHƐGWUMA SHI YEBI 14 - bassa bible

2 SHƐGWUMA SHI YEBI 14

¹Tu go Joash yɛu Joahaz yɛ tugwama ti Isrɛl, yaa namɛ shiywa shi yebi, nazhɛ ga Amazia yɛu Joash yɛ tugwama tu Juda.

²Bu namɛ shiywa umpwa-na-shɛba-shɛ-ta, te e meci bu, nazhɛ bee kwuni tugwama tiya. Baa yɛ tugwama tu Jɛrusalɛm shiywa woshi-na-shɛba-shi-cinjishi. Ɛ hiɛŋ izeci bino bwa ge Jehoadin, na shɛ yɛu ya atwa Jɛrusalɛm.

³Bɛ njɛ iyi nɛ kwụlanɛ AGWANGWAMA, ama bɛ njɛ shɛ kaa i ci gana na ugwunukwoshi ubwa ge Devid njɛ la o. Ama bu 'wa ụpapụ bishi bwa go Joash gom gom.

⁴Bi genji du ofwo ata zeteji tuhwuŋzotongo gana na te bishi bwa genji la. Ibɛ po atwa ata uranjɛ arụpɛ tuta, oo hwoŋzhingo iturɛre ne tikpekwu ta ata.

⁵Gunu ata tu baa yɛ tugwama hwɛɛ, baa kwụnɛ ehiu anjɛ-ugondu ubwa a na kwụnɛ la bishi bwa.

⁶Ama bụ kwụnɛ shɛ miaụŋ ma aba o, gana na ti yee 'nyeci nu utakada undwa Moses. Apata AGWANGWAMA tɛtaganɛ aŋ la unu, bɛɛ hiɛŋ, Eshi zha shɛ o 'wo tu'wo ta miaụŋ ma aba o, miaụŋ kaa du mi zha shɛ mo 'wo tu'wo te eshi aba o. Ama bụtụ bụtụ zhɛ bo 'wo tu'wo ti iwɛwɛ ikɛnyi ibwɛ.

⁷Ga Amazia kwụnɛ ejeshi atwa Idụm igbɛɛ-itɛ, (10,000) nu Ulomu Manɛ, bee leshiji du ụshɛpwụ ata ɛɛ hiɛŋ, Sɛla nu ujasa ata. Boo po uŋ ya izeci maa Joktiɛl, gana ata aa ta suyana uŋ taa hwayɛ.

⁸Nazhɛ ga Amazia tumwanɛ atwa no ofwo Jehoash yɛu Jehoahaz bụjalụ Jehu, na shɛ agwuma Isrɛl, bɛɛ hiɛŋ, Hwure tu momo ponu agba.

⁹Ama ge Jehoash agwuma Isrɛl jishijɛ bụ, bɛɛ hiɛŋ, Tụka ta ata tu namɛ ni Lebanon, tu tumwanɛ butumwa no ofwo usobu ata namɛ du ni Lebanon, tɛ ɛ hiɛŋ uŋ, Pana yɛu mi ye eyi yɛu bu yo o maa zana. Ama usunda ehilo uko na namɛ du ni Lebanon ata zhɛ tɛkashɛka, wee rikeci tụka ta ata.

¹⁰Amazia, asha iwɛnɛ abụ lasụ ya atwa Idụm hwuwayɛ go, ibɛ po aba busa ya gana na ụbụ kwụlanɛ. Ga ụjɛrụma ata abụ 'yagawa ubu gwumwa maa gɛga ya saiiŋ ni ihwɛ bụ. Iwembe po aba bizhanjɛ uwuru iwɛ maa ebe bi meni ta atwa Juda hwɛɛɛ?

¹¹Ama ga Amazia hwụjɛ shɛ iwɛ ɛtɛ ge Jehoash agwuma Isrɛl mbishi bu o. Ge Jehoash agwuma Isrɛl munji, bee tefuleji Amazia agwuma Juda nu ujasa, ni Bɛt-shɛmɛsh na namɛ nu Juda.

¹²Nazhɛ atwa Isrɛl lasụ atwa Juda, atwa Juda gezhiji, bụtụ bụtụ ji ni ihwɛ ibwɛ.

¹³Ama ge Jehoash agwuma Isrɛl 'imɛ Amazia, boo to tuhwulo bee hwuŋzhi uba Jɛrusalɛm te kwune no Odubo Ifrem uuwa i ci Odubo tiringeni. Ụnjɛswa ibɛ shɛ gana avwụna akpakwụ-atatụ (600).

¹⁴Bee suji azhɛnarɛya keeni azụrụfa elele keeni i'wɛŋnɛ uhwara ye elele nɛ namɛ nu umwono wa AGWANGWAMA, keeni iyi ibiye ye elele nɛ zweni nu umwono wa agwuma, bee suji du atwa oko bee hwuri nu Samaria.

¹⁵Iyi nɛ ta vwɛ ni iyi elele nɛ ge Jehoash ndanjɛ na tugwama tu bwa hwɛɛ, tu ukpahiŋ ubwa keeni ujasa na baa njɛ na Amazia agwuma Juda, i 'nyeci shi suu nu utakada shɛrụkwụkwụ shɛ shɛgwuma shi Isrɛl.

¹⁶Ti ge Jehoash 'wi gana eshi ubwa, ee ni bu nu Samaria no ofwo shɛgwuma shi Isrɛl. Nazhɛ yɛu ibwɛ ge Jɛroboam yɛ tugwama no ohwolu ubwa.

¹⁷Ga Amazia yɛu Joash agwuma Juda, bu ta yɛ uraiŋ shiywa umpwa-na-shɛba-shɛ-ta, na aba na ti ge Jehoash yɛu Jehoahaz agwuma Isrɛl 'wi.

¹⁸Iyi nɛ ta vwɛ, ni iyi elele nɛ ga Amazia ndanjɛ na tugwama tu bwa hwɛɛ, i 'nyeci shi suu nu utakada shɛrụkwụkwụ shɛ shɛgwuma shu Juda.

¹⁹A shɛka Amazia maa a sukakanɛ bụ nu Jɛrusalɛm. Bee gezhiji bee zhe Lakish; ama a 'wa bụ nu Lakish aa kwụnɛ bụ apata.

²⁰Aa 'waŋnɛ ru'wo ru bwa na budakwa, ee jicinje ru nu Jɛrusalɛm, ee ni ru no ofwo eshi ubwa nụ ụshɛpwụ Devid.

²¹Nazhɛ atwa ata Juda hwɛɛ teri yɛu ibwɛ ga Azaria[27] na namɛ shiywa umpwa-na-shɛba-shi-cihiŋ, te e meci bu, maa ya tugwama no ohwolu bishi bwa ga Amazia.

²²Ga Azaria, ubwa meeneni ụshɛpwụ ata ɛɛ hiɛŋ Ɛlat, bee gwuricinje uŋ, waa namɛ sasana na cɛnjɛ tu Juda na aba na te bishi bwa 'wi gana eshi ubwa.

²³Ga Amazia yɛu ɛtɛ Joash yɛ tugwama tu Juda, yaa namɛ shiywa umpwa-na-shɛba-shɛ-ta, nazhɛ gɛ Jɛroboam yɛu Jehoash agwuma Isrɛl kwuni tugwama tiya nu Samaria, baa yɛ tụ shiywa buhanda-nu-boo-ko.

²⁴Bɛ njɛ AGWANGWAMA iwɛwɛ; bi genji shi iwɛwɛ ɛtɛ gɛ Jɛroboam yɛu Nebat njɛ la, igɛtɛ zeriji atwa Isrɛl ni iwɛwɛ tɛnda du o.

²⁵Bee leshiji cɛnjɛ ta atwa Isrɛl tutu i ci Odubo Hamat, tutu Itekwu Araba. Gana na ta AGWANGWAMA na shɛ Agwatana Isrɛl dumwa la tedure nu unu yɛu ibwɛ ugondu go Jona, yɛu Amitai na shɛ bigesere na banɛ Gat-hɛfɛ.

²⁶AGWANGWAMA kwụbɛ gana na te tiriri ta atwa Isrɛl ti gembi, iwɛnɛ ti yaa zasa bụtụ ta vwɛ ya, ta bujama, tu umamata. I zasa bụtụ ta namba ya maa mbiyono atwa Isrɛl o.

²⁷AGWANGWAMA kaa Jɛmɛ shɛ maa bi zhɛ bo 'woricingo izeci ya atwa Isrɛl nu unyizo ga o, ibɛ po bee bicinji aŋ tedure nɛ Jɛroboam yɛu ɛtɛ Joash.

²⁸Iyi nɛ ta vwɛ, ni iyi elele nɛ gɛ Jɛroboam ndanjɛ na tugwama tu bwa, keeni ukpahiŋ ubwa hwɛɛ, tu gana na baa njɛ ujasa, tu gana na bee gwuricingeni atwa Isrɛl cɛnjɛ ta aba tu Damaskos, keeni Hamat ata namɛ la ni i'ɛlɛ ya atwa Juda, hwɛɛ ibɛ 'nyeci shi suu nu utakada shɛrụkwụkwụ shɛ shɛgwuma shi Isrɛl?

²⁹Ti gɛ Jɛroboam 'wi gana eshi ubwa, a na shɛ shɛgwuma shi Isrɛl, nazhɛ gɛ Zɛkaria yɛu ibwɛ yɛ tugwama no ohwolu ubwa.