Read bassa 2 SHƐGWUMA SHI YEBI 16 Bible Online

2 SHƐGWUMA SHI YEBI 16 - bassa bible

2 SHƐGWUMA SHI YEBI 16

¹Aka na ti gɛ Pɛka yɛu Remalia ulwa shiywa umpwa-na-shɛba-shi-cenje tu baa yɛ tugwama ti Isrɛl, nazhɛ ga Ahaz yɛu Jotam yɛ tugwama tu Juda.

²Ga Ahaz namɛ shiywa woshi te e meci bu, nazhɛ bee kwuni tugwama tiya. Baa yɛ tugwama tu Juda shiywa umpwa-na-shɛba-shi-cihiŋ nu Jɛrusalɛm. Bu ndanɛ shɛ AGWANGWAMA na shɛ Agwatana ubwa iyi nɛ teni cɛŋ, gana na tu ugwunukwoshi ubwa ge Devid njɛ la o.

³Ama bɛ njɛ gana na ta shɛgwuma shi Isrɛl shɛ vwɛ shɛ njɛ. Boo to ụrụpɛ tuhwoŋzhingo ni yɛu ibwɛ ye eyi.[32] Iyi-tupwaŋ ɛtɛ kaa edenji ata Agwatana unzenji la miaụŋ mi Isrɛl a nda ta.

⁴Ba ta arụpɛ keeni iturɛre tuhwoŋzhingo ne ehiŋhiŋ tikpekwu, keeni ecilo i'wɛ'wɛ nɛ namanjɛ rumo rumo.

⁵Na aka ata ibɛ ge Rezin agwuma Siria keeni Pɛka yɛu Remalia, agwuma Isrɛl munji, ee zhe Jɛrusalɛm maa a njɛ ujasa na aba. Aa sukakanɛ Ahaz, ama e eri shi bu o.

⁶Aka ata tobwolo ge Rezin[33] agwuma Siria loshigwonuo atwa Siria ụshɛpwụ ata ɛɛ hiɛŋ, Elat, bee unzhi atwa Juda a na ga namɛ la apata hwɛɛ. Ibɛ po atwa Siria teni ụshɛpwụ ata aa jɛjɛ, a ta namaba apata taa hwayɛ.

⁷Ga Ahaz tumwanɛ Tiglat-pilɛsa, na shɛ agwuma Asiria, bɛɛ hiɛŋ bụ, N shɛ yɛu bu ugondu keeni yɛu bụ. Munje maa n lesheji ni i'ɛlɛ ya agwuma Siria keeni agwuma Isrɛl, a mbana ma n sukakana.

⁸Ga Ahaz sugeneni azụrụfa keeni azhɛnarɛya na namɛ nu umwono wa AGWANGWAMA, keeni anaa na namɛ ni i'wɛŋnɛ ibiye nɛ namɛ nu umwono wa agwuma, baa njɛ agwuma Asiria upwaŋ.

⁹Ibɛ po agwuma Siria leni n-ndumwa mu Ahaz. Nazhɛ agwuma Asiria sukakanɛ Damaskos, baa lasụ aŋ. Bee suji atwa Damaskos bee zhe Ki, nazhɛ baa kwụnɛ agwuma Rezin apata.

¹⁰Agwuma Ahaz zhe Damaskos pi Tiglat-pilɛsa agwuma Asiria, baa kwụbɛ utukwu-ụrụpɛ ata namɛ nu Damaskos, ga Ahaz tumwananɛ aŋ bunongbo, na ɛɛ hiɛŋ go Uria. ụsụbwa utukwu-ụrụpɛ ata keeni bimenji bu bwa keeni iyi ibwɛ ye elele i shɛ gana na aa nanganganɛ uŋ keeni gana na to o mo uŋ.

¹¹Nazhɛ bunongbo ata go Uria mo utukwu-ụrụpɛ ata te teni cɛŋ gana na tu ga Ahaz panɛ bụ ufwoto ubwa nu Damaskos, gana ata go Uria mo uŋ, nazhɛ ga Ahaz gɛnjɛ Damaskos bee gwure.

¹²Aka na ta agwuma ga Ahaz banɛ nu Damaskos, baa kwụbɛ utukwu ata ụrụpɛ, bee zhe boo dongonu uŋ, bee munji uŋ.

¹³Nazhɛ boo to ụrụpɛ tuhwoŋzhingo keeni ụrụpɛ tuswa nu bwa. Baa 'wɛŋ ụrụpɛ ata tuswa nu bwa, bee zhizhenji mehieŋ mụ ụrụpɛ wa amɛ-olom nu utukwu ata.

¹⁴Nazhɛ bee shepi utukwu-ụrụpɛ utumburɛ na ga namɛ no ofwo AGWANGWAMA, ugata ga namɛ nu umwono wa Agwatana na ashashɛ utukwu-ụrụpɛ ubwa nu umwono wa AGWANGWAMA; bee shiri uŋ tuzuba tu utukwu-ụrụpɛ ubwa.

¹⁵Nazhɛ agwuma Ahaz peni bunongbo ata go Uria unu, bɛɛ hiɛŋ bụ, Na ta ụrụpɛ tuhwoŋzhingo uvwungwa keeni ụrụpɛ tiya ụrụmɛ keeni ụrụpɛ tuhwoŋzhingo wa agwuma keeni ụrụpɛ ubwa u tiya keeni ụrụpɛ tuhwoŋzhingo wa atwa cɛnjɛ ta ata kpaaŋ, keeni una tiya, keeni una tuswa wa aba nu utukwu ata ụ'wụtụ. Nazhɛ zhizhongo mehieŋ mụ ụrụpɛ tuhwoŋzhingo kpaaŋ keeni mehieŋ ma arụpɛ vwɛ kpaaŋ ni ihiŋhiŋ utukwu ata. Ama utukwu ga utumburɛ, ụ shɛ unoo mu maa mu no hwoyigono iwɛ nu bwa.

¹⁶Go Uria bunongbo ata njɛ gana na ta agwuma Ahaz peni bu unu hwɛɛ.

¹⁷Ibɛ po agwuma Ahaz mushenji ikɛgbɛ ɛtɛ shikekeni nụ ụzalụ umwono wa Agwatana baa 'wɛŋ, bee suji agbamgbam ata i'ɛlɛ tusukwutwo, a na ga patanganɛ ni ikɛgbɛ ɛtɛ. Bee peshinji okwokwo ata a'wụtụ, ga patanɛ na aba inɛ ɛtɛ aa njɛ nɛ ɛtumburɛ, bee peteni nu utayɛ-tubala.

¹⁸Bee hwuŋzhi idwɛtwɛ ɛtɛ aa ga njɛ tuzuba[34] tu uhwaŋna umwono wa AGWANGWAMA, iwɛ Ụjita-ụhinjanụ, bee kepi odubo ata ge beni ni ihwɛ ya agwuma i ci umwono wa AGWANGWAMA, iwɛ maa amɛ agwuma Asiria lemi nu bwa.

¹⁹Iyi elele nɛ ga Ahaz ndanjɛ na tugwama tu bwa hwɛɛ i 'nyeci nu utakada Shɛ rụkwụkwụ shɛ shɛgwuma shɛ Juda.

²⁰Ga Ahaz 'wi ee ni bu ne e'uye shɛgwuma nụ ụshɛpwụ Devid, nazhɛ yɛu ibwɛ gɛ Hɛzɛkia yɛ tugwama tu bwɛ.