Read bassa 2 SHƐGWUMA SHI YEBI 23 Bible Online

2 SHƐGWUMA SHI YEBI 23 - bassa bible

2 SHƐGWUMA SHI YEBI 23

¹Nazhɛ agwuma tumwanganɛ maa ga suyananɛ bụ n-nyarɛ mu Juda keeni mu na mu Jɛrusalɛm hwɛɛ pu bwa.

²Nazhɛ agwuma, na atwa Juda, na atwa Jɛrusalɛm, to onongbo, te egesere, ta atwa vwɛ, ta atwa na gwụmwatangwụ, ta atwa na gembenji, hwɛɛ aba munji ee zhe nu umwono wa AGWANGWAMA. Nazhɛ agwuma rɛtanjɛ aŋ utakada ata Unu-tutwa,[40] oo to ugbe swɛɛ, nu umwono wa AGWANGWAMA hwɛ hwɛɛ bwa.

³Agwuma shikeni to dongonu atukpa ata, bee shileni AGWANGWAMA unu, bɛɛ hiɛŋ, ubwa zhɛ ba 'wa AGWANGWAMA, ma untangana unu ubwa tụpana hwɛɛ, ti imbisegeni ibwɛ, tu unu ubwa tɛtɛgana, na amɛ ubwa hwɛɛ, to ohwulu ubwa hwɛɛ. Bɛɛ zhɛ du kaa ba nda gana na tu n-ndumwa mu unu ubwa tutwa mi 'nyeci nu utakada ata. Nazhɛ atwa ata hwɛɛ togwu nu bwa nu unu ata bee shiri.

⁴Nazhɛ agwuma peni Hilkia na shɛ uhiu wo onongbo unu, ta atwa na 'wa bụ, ta a'iywa odubo, maa gɛ vwɛ i'wɛŋnɛ ɛtɛ aa ndanɛ la tuwa ti Beal, ti inɛ ɛtɛ aa ndanɛ itɛtɛnuwɛŋ Ashɛra, ti inɛ ɛtɛ aa ndanɛ iyi tuswoswoswo nɛ namɛ na azuba, nɛ ge zweni nu umwono wa AGWANGWAMA. Nazhɛ agwuma go Josia hwoŋzhinji iŋ no tupohondo tu Jɛrusalɛm ne shihilo shɛ na shɛ namɛ nu Ulomu Kidron, ee suji ma'alụ mi ibɛ ee zhe Bɛtɛl.

⁵Nazhɛ agwuma bwajɛ onongbo ata a zhɛba tuwa, a gata shɛgwuma shi teri la maa o no hwoŋzhongo iturɛre ne tikpekwu tu Juda keeni tubabɛshɛ tu Jɛrusalɛm. Baa bwajɛ du ta atwa ata o hwoŋzhingono tuwa ti Beal keeni uwaŋna keeni upiana keeni mkpasu keeni iyi inyɛ ya azuba nɛ vwɛ iturɛre.

⁶Nazhɛ bee becinji itɛtɛnuwɛŋ Ashɛra nu umwono wa AGWANGWAMA, bee zhe nu Ulomu Kidron no tupohondo tu Jɛrusalɛm, bee hwoŋzhinji iŋ apata. Nazhɛ bee neci iŋ rukwurukwu gana upwupwutu, baa 'wɛŋ ma'alụ mi ibɛ ne e'uye atalaka.

⁷Bee hwoŋzhinji du nsumo mu tuwa te eyi,[41] ta ata tu namɛ nu umwono wa AGWANGWAMA, no ofwo ata eyikwo a ndana itɛtɛnuwɛŋ ɛtɛ Ashɛra i'wɛŋnɛ tuhwuŋtono.

⁸Bee suje onongbo elele a na ga namanjɛ na ashɛpwụ Juda, baa njɛ tikpekwu ta ata onongbo ata go hwoŋzhongo la iturɛre ufwu, te kwuni nu Geba tutu i ci Biɛshiba. Nazhɛ bee hwuŋzetenji du tikpekwu ta ata tu namanjɛ no shidubo shụ ụswhɛpwụ, shɛ gata shi duri odubo Joshua na shɛ ugwomina ụshɛpwụ ata. Shidubo sha ata shɛ namɛ nu u'ala ugwulwo wo odubo na shɛ a na ụshɛpwụ ata.

⁹Ama onongbo na a nda la iyi ne tikpekwu ta ata, zhe shi nu utukwu-ụrụpɛ wa AGWANGWAMA na namɛ nu Jɛrusalɛm o, ama a ya du ibrɛd ɛtɛ zasa Ifucingɛ na miaụŋ-mo-bino ma aba.

¹⁰Bee bwereteji du ofwo ata oto-ụrụpɛ ga zhɛba tuwa ta aba, tu gata ɛɛ hiɛŋ Tofɛt tu na tu namɛ nu Ulomu Bɛn-hinom, iwɛ maa kede bụtụ be elele teji ya tuwa ta ata ɛɛ hiɛŋ Molɛk ụrụpɛ ni yɛu ibwɛ ye eyi kwo kaa inɛ yo o apata o.

¹¹Bee becinji du idɛkwɛ ɛtɛ shɛgwuma shu Juda shi suje la maa a na taga uwaŋna ụrụpɛ, igɛtɛ ee tileni to dongonu umwono uhiu uko ugondu na ɛɛ hiɛŋ ga Natan-mɛlɛk, bee hwoŋzhenji du ihɛŋtu ujasa nɛ ee ge peni aŋ iwɛ tɛzhɛba tu uwaŋna.

¹²Agwuma hwuŋzetenji otukwu-ụrụpɛ anaa na shɛgwuma shu Juda shi go mo la ni ihiŋhiŋ umwono Ahab, keeni otukwu-ụrụpɛ anaa na ga Manasɛ go mo la no okpogwu eyebi, a na namɛ nu umwono wa AGWANGWAMA. Bee neci aŋ apata gana upwupwutu, baa 'wɛ upwupwutu ata nu Ulomu Kidron.

¹³Nazhɛ agwuma hwuŋzetenji tikpekwu ta ata go Sụlụmụn mengeni la nu uwaŋna-banụ Jɛrusalɛm, tuta ti ishɛmɛ ɛtɛ ɛɛ hiɛŋ, Ishɛmɛ-tufwoso iwɛ tɛzhɛba ti itɛtɛnuwɛŋ ɛtɛ ɛɛ hiɛŋ Ashtorɛt, nɛ shɛ tuwa to o, nɛ kaa shɛ iyi-tupwaŋ, nɛ shɛ du tuwa ta Asaidụn, keeni iwɛ Kemosh, na shɛ tuwa tu tupwaŋ ta Amoab keeni iwɛ tuwa ta ata ɛɛ hiɛŋ Molɛk, tu na tɛ shɛ iyi-tupwaŋ ya A'amon.

¹⁴Agwuma bwereteji du iyi nɛ ee ge shikecenji aa zhɛba keeni itɛtɛnuwɛŋ Ashɛra, baa supacanjɛ apata no o'umpwo atwa.

¹⁵Agwuma go Josia bwereteji du otukwu-ụrụpɛ keeni nsumo ma ata mu ga namanjɛ ne tikpekwu ti Bɛtɛl, mu gata gɛ Jɛroboam yɛu Nebat ata njɛ la maa miaụŋ mi Isrɛl mɛ njɛ iwɛwɛ mo la. Bee bwereteji du utukwu-ụrụpɛ ata namɛ ne bikpekwu bi nya. Bee mushenji du atayɛ ibɛ, bee neci iŋ gana upwupwutu, nazhɛ bee hwoŋzhinji itɛtɛnuwɛŋ Ashɛra.

¹⁶Aka na go Josia mbiyanɛ, baa kwụbɛ e'uye na namɛ ne embi ishɛmɛ ɛtɛ, baa tumwanɛ atwa, ɛɛ vwɛ o'umpwo ne e'uye ata, bee hwoŋzhinji o'umpwo ata nu utukwu-ụrụpɛ. Nazhɛ baa njɛ utukwu ata ụrụpɛ te teni cɛŋ nu n-ndumwa mu na AGWANGWAMA dumwa la tedure nu unu bụtụ bwa na jɛmɛ la iwɛ ɛtɛ.

¹⁷Nazhɛ agwuma heŋteni atwa oko, bɛɛ hiɛŋ, Atayɛ u'uye aba ta bwa Ngɛɛ kwubɛɛ? Atwa ata jishijɛ bụ, ɛɛ hiɛŋ, Atayɛ u'uye bụtụ ata ba Agwatana banɛ la nu Juda, bu gata jɛmɛ la tigesere ti iyi nɛ abɛ njɛ utukwu-ụrụpɛ ata namɛ ni Bɛtɛl.

¹⁸Nazhɛ bɛɛ hiɛŋ, Ganga bụ ma; kede bụtụ be elele timengeni o'umpwo ubwa o. Ibɛ po ee genji o'mpwo ubwa keeni o'umpwo bigesere ata banɛ la nu Samaria.

¹⁹Go Josia du hwuŋzetenji nsumo ma ata shɛgwuma shi Isrɛl shi mengeni la ne tikpekwu ta ashɛpwụ Samaria, mu gata mi ishicinjɛ isɛbwɛ ya AGWANGWAMA. Bɛ njɛ mụ du gana ata baa njɛ mu na mi Bɛtɛl kpaaŋ.

²⁰Nazhɛ baa kwụnɛ onongbo ata a nda la ugondu no otukwu ata ụrụpɛ namɛ ne tikpekwu ta ata, bee hwoŋzhenji aŋ no o'umpwo atwa. Nazhɛ bee gwuri nu Jɛrusalɛm.

²¹Nazhɛ agwuma peni atwa ubwa hwɛɛ unu, bɛɛ hiɛŋ, Ndana ma AGWANGWAMA na shɛ Agwatana hiŋ Isene Tɛkashɛka gana na ti yee 'nyeci nu utakada ga unu-tutwa.

²²Te kwuni na aka ajɛmɛ-ụshɛrɛya na untanganɛ la atwa Isrɛl, uuwa i ci aka shɛgwuma shi Isrɛl keeni shɛgwuma shu Juda, a ta njɛ shɛ ya Isene Tɛkashɛka gana ata o.

²³Ama aka na tu go Josia namɛ shiywa umpwa-na-shɛba-shɛ-tụndatụ tu baa yɛ tugwama, Nazhɛ aa ndanɛ AGWANGWAMA Isene ɛtɛ itɛkashɛka nu Jɛrusalɛm.

²⁴Shɛ inɛ ɛtɛ kiri o, go Josia unzeneni ashɛjɛ, na anjɛ-tishino keeni anjɛ-tuwa tu tuswoswoswo keeni iyi-tupwaŋ ye elele nɛ ga namɛ nu Juda keeni Jɛrusalɛm. Bɛ njɛ ijɛ ɛtɛ hwɛɛ iwɛ maa ụrɛcɛnga iyi elele nɛ 'nyeci nu utakada ata ge Hilkia na shɛ bunongbo to ugbe nu umwono wa AGWANGWAMA.

²⁵I zasa agwuma na 'wa wa AGWANGWAMA gana Josia o, ta shɛgwuma shɛ na shi hwuri umbe nu bwa, ta ma shɛ na shi lɛ ekwunyi nu bwa o. Bu 'wa AGWANGWAMA na ahaŋsa ubwa oko hwɛɛ, tu ukpahiŋ ubwa hwɛɛ; na tunama tu bwa hwɛɛ, gana na tu undwa Moses 'nyeci.

²⁶Ama okwo ti yaa shɛ gana ata, AGWANGWAMA kaa te genji shi isɛbwɛ ɛtɛ ibwɛ i'wɛtwɛ nɛ ga Manasɛ ishicinjɛ la, nɛ kaa yo gorogo nu Juda o.

²⁷Nazhɛ AGWANGWAMA hiɛŋ, N zhɛ ma bacɛnga atwa Juda na agba mi gana na Ngee becinji la atwa Isrɛl, maa kede ma kwụuba aŋ ya ne eshe mi o. N zhɛ mo jinoko Jɛrusalɛm, ụshɛpwụ ata Ngee teri la keeni umwono ata mu Ngɛɛ hiɛŋ la apata ɛɛ zhɛ na ma zhɛba.

²⁸Iyi elele nɛ ta vwɛ, ni iyi nɛ go Josia ndanjɛ na tugwama tu bwa hwɛɛ, i 'nyeci shi suu nu utakada shɛrụkwụkwụ shɛ shɛgwuma shu Juda?

²⁹Aka na go Josia shɛ agwuma, nazhɛ ga Faro Niko na shɛ agwuma Ijipti munji maa mbiyono agwuma Asiria nu ujasa nu Urefu ata Yufretis. Aka na tu go Josia zhe maa twa nu bwa, nu ujasa ata, ga Faro Niko kwụbɛ Josia, ni Migido baa kwụnɛ bụ.

³⁰Nazhɛ anjɛ-ugondu bwa shepi ru'wo ru bwa ee shiyeni ru nụ ụhaŋtụ ujasa, ee jicinji ru nu Jɛrusalɛm, ee ni bu nu u'uye ubwa u tugwama. Nazhɛ atwa cɛnjɛ ta ata teri Jehoahaz yɛu ibwɛ, ee peni bu tugwama tu bwa.

³¹Ge Jehoahaz namɛ shiywa woshi-na-shɛba-shɛ-tatụ te e meci bu, nazhɛ baa yɛ tugwama. Baa yɛ tugwama nu Jɛrusalɛm ipiɛnɛ itɛtu. Ɛ hiɛŋ izeci bino bwa ga Hamutal yɛu Jɛrɛmia bụtụ bu Libna.

³²Bɛ njɛ AGWANGWAMA iwɛwɛ gana na ogwunukwoshi ubwa njɛ la hwɛɛ.

³³Nazhɛ ga Faro Niko shiyeni Jehoahaz nu umwono-tishi na namɛ ni Ribla na cɛnjɛ tu Hamat maa kede sha ya agwuma Jɛrusalɛm o. Nazhɛ baa mụnɛ atwa Juda ụdalụ na maa a na tụpa bụ azụrụfa atalɛnt dipi-yebi keeni azhɛnarɛya utalɛnt uko.

³⁴Ga Faro Niko agwuma ata Ijipti peni Eliakim yɛu Josia tugwama te bishi bwa go Josia, bee sheyinji izeci Eliakim ti ga Jehoiyakim. Ama tuba bi shepi Jehoahaz bee hwuri Ijipti, apata bee 'wi.

³⁵Ge Jehoiyakim ba tụpa Faro ụdalụ na azụrụfa keeni azhɛnarɛya. Ge Jehoiyakim lesheji ụdalụ na cɛnjɛ ta ata maa tụpa Faro, gana na ga Faro peni bu unu. Bee leshiji azụrụfa keeni azhɛnarɛya na atwa ata te teni cɛŋ gana na ta bụtụ bụtụ shɛ bɛzhɛgba iwɛ maa pana Faro.

³⁶Ge Jehoiyakim namɛ shiywa woshi-na-shɛba-shɛ-ta te e meci bu, nazhɛ baa yɛ tugwama, Baa yɛ tugwama nu Jɛrusalɛm shiywa umpwa-nu-boo-ko. Ɛ hiɛŋ izeci bino bwa ge Zebida yɛu Pɛdaya bụtụ bu Ruma.

³⁷Bɛ njɛ AGWANGWAMA iwɛwɛ gana na ogwunukwoshi ubwa njɛ la hwɛɛ.