Read bassa 2 SHƐGWUMA SHI YEBI 6 Bible Online

2 SHƐGWUMA SHI YEBI 6 - bassa bible

2 SHƐGWUMA SHI YEBI 6

¹Jitoo ko esemberi egesere a na ge Elaisha untanganɛ hiɛŋ bụ, Kwụba, ofwo ga atu namɛ na bụ a tu twa sụ o.

²Lono ma ta zha nu Jodan, maa bụtụ bụtụ tu jajɛ ụ'wụ'wụ, maa ta ma ofwo na maa ta nama. Ge Elaisha jishijɛ aŋ, bɛɛ hiɛŋ, Zhaga ma.

³Ama bụtụ bu ko na amɛ aba uranjɛ bụ, bɛɛ hiɛŋ, Iti she kaa, atuba miaụŋ mu ga mụ bụ mu ugondu? Ge Elaisha jishijɛ aŋ, bɛɛ hiɛŋ, N zhɛ me hi she.

⁴Baa sanɛ ga na aba, ee ci Jodan, ee kwuni i'wɛ'wɛ tulogo.

⁵Ama gana na bụtụ bu ko bo lo ụ'wụ'wụ, ibɛ ukashɛmbɛrɛ wo ogwubo ubwa mushingwo wee leyi ne meni. Baa uganɛ, bɛɛ hiɛŋ, Iyɛri mi, Eye o! Tulupɛ Ngɛɛ ngɛ lupɛ ogwubo ga.

⁶Ge Elaisha heŋteni bu, bɛɛ hiɛŋ, Ce bwa ee leyii? Bụtụ ata mbiseni bu ofwo ata. Ge Elaisah jeji bungwzhɛ bu ko, bee keri bu ne meni ma ata. Nazhɛ ogwubo ata zhijɛ.

⁷Ge Elaisha hiɛŋ bụ, Shapa aŋ. Nazhɛ bụtụ ata mbo u'ala baa shapɛ aŋ.

⁸Aka na ta agwuma Siria a jala maa sukakana atwa Isrɛl nu ujasa; baa njɛ ushaura na anjɛ-ugondu ubwa, bɛɛ hiɛŋ aŋ, No ofwo kazabana kazabana Ngɛɛ zhɛ ma dwa ugba mu.

⁹Ama bụtụ ata ba Agwatana[12] tumwanɛ bụtụ no ofwo agwuma Isrɛl, bɛɛ hiɛŋ bụ, To dulo ma ofwo kazabana kazabana o, iwɛnɛ te ejeshi atwa Siria zhɛ a dwa ugba wa aba apata.

¹⁰Ibɛ po agwuma Isrɛl tumwanɛ atwa oko maa ɛ kwubɛ ofwo ata bụtụ ata ba Agwatana ge mbishi bu iwɛ aba. Ge Elaisha ga tutwagwanua bụ unu iwɛ ofwo ata cebe, i ci kpalụ ko kwo kaa kpalụ yebi, ibɛ po agwuma werinji ya apata.

¹¹Ibɛ po amɛ agwuma Siria hashɛganụ tebiye iwɛ ijɛ, baa suyanɛ ejeshi ubwa, bɛɛ hiɛŋ aŋ, Gaaba namɛ na agwuma atwa Isrɛl na amɛ hiin?

¹²Nazhɛ bɛnjɛ bwa bu ugondu bu ko jishijɛ bụ, bɛɛ hiɛŋ, agwuma, Zaaci! Bigesere ata ɛɛ hiɛŋ ge Elaisha, ubwa bo mbiso agwuma Isrɛl iyi elele nɛ aba duma taa na amɛ umwono bu ubuweci.

¹³Ibɛ po agwuma atwa Siria hiɛŋ aŋ, Zhaga dwalakacɛ ma ofwo na baa namɛ, maa Ma tumwana atwa maa ɛ imɛ bụ. Ee mbishi agwuma aba, ɛɛ hiɛ, Bu namɛ nu Dotan.

¹⁴Nazhɛ agwuma ata tumwanɛ asụcɛ idɛkwɛ keeni ihɛntu ujasa, te ejeshi a na gembi ufwugwo apata, ee zhe nụ ụjita, ee hweri ụshɛpwụ ata.

¹⁵Aka na ti yɛu-ugondu Elaisha gbatụ ụzhɛngwa nu uvwungwa dididi, baa banɛ, baa kwụbɛ te ejeshi a na patanganɛ idɛkwɛ, ta anaa na a suka ihɛntu ujasa rungwutwonu ụshɛpwụ wa aba. Bɛɛ hiɛŋ agwuma-ihwɛ ibwɛ, Iyɛri mi, Ebe ti meni o! Gana na ɛti zhɛ ta ndaa?

¹⁶Ge Elaisha jishijɛ bụ, bɛɛ hiɛŋ, Ta nda inyɛsɛ o, atwa na namɛ geri tu e hwuri atwa na namɛ geri aba.

¹⁷Nazhɛ ge Elaisha njɛ adua, bɛɛ hiɛŋ, Oo AGWANGWAMA, Ma bụ tabwa ma kepishinji eshe ubwa maa kwụba! Nazhɛ AGWANGWAMA kepishinji ga eshe yɛu ibwɛ ugondu, nazhɛ yɛu ɛtɛ ugondu Elaisha mbiyanɛ ishɛmɛ ɛtɛ, baa kwụbɛ idɛkwɛ ulwa keeni ihɛntu ujasa ulwa ti yee tileni yoo rungwutwonu Elaisha.

¹⁸Aka na ta atwa Siria zwe no ofwo Elaisha, ge Elaisha njɛ adua, bɛɛ hiɛŋ, AGWANGWAMA, Ma bụ tabwa maa lubicinji atwa ga. AGWANGWAMA kaa hwụjɛ adua ata, bee lubicinji aŋ ga gana na ti ge Elaisha lụpɛ bụ.

¹⁹Nazhɛ ge Elaisha hiɛŋ atwa ata Siria, Shɛ uhwaŋna ata na o, shɛ ụshɛpwụ ata na kaa du o. Hwure ma N zhɛ mo hi sugo pa bụtụ ata ahia jala. Bee suji aŋ nu Samaria.

²⁰Gunu na te e teni Samaria, ge Elaisha hiɛŋ, Oo AGWANGWAMA, kɛpishinjɛ ya shishe sha atwa ga maa a kwụbɛ uhwaŋna. Nazhɛ AGWANGWAMA kɛpishinjɛ ga shishe sha aba, aa kwụbɛ uhwaŋna, nazhɛ ee mepi ya maa e zweni na ashashɛ Samaria.

²¹Aka na ta agwuma Isrɛl kwụbɛ aŋ, Bɛɛ hiɛŋ, Elaisha, Ada, Ma kwụna aŋ suu? Ma kwụna aŋ suu?

²²Ge Elaisha jishijɛ bụ, bɛɛ hiɛŋ, Ta kwụna aŋ o. Bi tɛ zhɛ suu ba kwụna waa atwa na ɛbi imɛ nu utokwobi bu kwo kaa nu uta bụ? Pana aŋ iyimɛyɛ maa a yɛ, te meni maa e swe maa e ji no ofwo agwuma-ihwɛ aba.

²³Nazhɛ agwuma 'imɛ aŋ ugain ni iyimɛyɛ i'wɛtwɛ. Aka na ta a yɛ iyimɛyɛ, ee swe meni, bee genji aŋ ee ji no ofwo agwuma-ihwɛ aba. Te kwuni na aka ata, ejeshi Siria gwuri shi ya maa e hweri cɛnjɛ ti Isrɛl kakayɛ o.

²⁴Na aba inɛ gɛ, nazhɛ gɛ Bɛn-hadad na shɛ agwuma Siria sotulonu ejeshi ubwa kpaaŋ, bee zhe bee hweri Samaria maa sukakana uŋ.

²⁵Iwɛbɛ po imunɛ i'wɛtwɛ layɛ nu Samaria, iwɛnɛ ta atwa Siria hweri Samaria, imunɛ ɛtɛ kaa wumanjɛ duwa, harɛ aa sanga uhiuhiu budakwa uko azụrụfa arinya dupu-nu-talacɛ. Aa sanga tuwiŋ ti ikwerikwe tu na ti shini ukwoto i'ɛlɛ iyebi kwo kaa itɛtu, azụrụfa arinya a ta.

²⁶Aka na ta agwuma Isrɛl zhɛ tɛkashɛka tu baa patanɛ nu uba ụshɛpwụ ata, biyikwo bu ko keleni bu n'ungwa, bɛɛ hiɛŋ, Oo Agwuma, Zaacɛ, m mbiyeni Kaa!

²⁷Agwuma jishijɛ bụ, bɛɛ hiɛŋ, Yaa shɛ AGWANGWAMA ubi mbiyeni shi, asha imbe Ngɛɛ zhɛ ma nda maa Mo bi mbiyonoo? Ni iyimɛyɛ suu, okwo ne meni mu tụ'walụ ta afwafwa?

²⁸Agwuma hiɛŋ bụ sasana, Imbe kwuŋ ubu namanɛɛ? Biyikwo ata jishijɛ bụ, bɛɛ hiɛŋ, Biyikwo ga ubwa n hiɛŋ la, Shapɛ yɛu bụ maa tɛ yɛ, beyi tuba ta ya inee mi.

²⁹Eti shiteji ga yɛu mi ye eyi atɛ yɛ. Iyi heri Ngɛɛ hiɛŋ bụ, Shapɛ ya yɛu bụ ye eyi maa tɛ yɛ, bee shepi ya inɛ ibwɛ baa intanɛ!

³⁰Aka na ta agwuma hwụjɛ unu biyikwo ga, bee dwetweji i'wɛŋnɛ ibwɛ nɛ bee ge urigeni na amɛ-tụhwaŋtụ, ti bɛɛ zhɛ nu uba ata, ibɛ po atwamwa ngbarakacɛ bụ ti bee urigeni tugwuno tụ ụcɛnjɛ tɛnda, ti tee hikeni.

³¹Ibɛ po agwuma hiɛŋ, Yaa shɛ Ngee mushinji shi hwayɛ ga uhiuhiu Elaisha yɛu Shafat, asha ga Agwatana n kwụnɛ.

³²Aka na ti ge Elaisha jɛjɛ ni ihwɛ ibwɛ, nu n-nyarɛ mu ko. Nazhɛ agwuma tumwanɛ bụtụ bu ko maa gɛ imɛ Elaisha. Ama ge Elaisha mbishi n-nyarɛ ma ata tobwolo butumwa ata te ci shi o, bɛɛ hiɛŋ aŋ, Hiɛ kwụbɛ kaa ta bụkwụnɛ[13] ga ba atwa tumwanɛ bụtụ maa ge e mwe uhiuhiu mu. Yaa shɛ butumwa ata ci hwayɛ epe, kapa ma odubo maa kede teni o! E'inji agwuma ubwa nu Ngaa hwụjɛ a 'wa bụ ne ekwunyi.

³³Bi te hwuwi shi okwo n-ndumwa ma ata tụdụma hwɛɛ na aba o, ta butumwa[14] ba agwuma zweni pu bwa. Bɛɛ hiɛŋ, Agwuma hiɛŋ, Kwụba ma, AGWANGWAMA ubwa po ụbaụta ga kpaaŋ iti jiteni, iwembe po Ngɛɛ tɛ zhɛ ma shɛlana waa AGWANGWAMA iwɛ maa nda iyi elelee?