Read bassa 2 SHƐGWUMA SHI YEBI 9 Bible Online

2 SHƐGWUMA SHI YEBI 9 - bassa bible

2 SHƐGWUMA SHI YEBI 9

¹Ge Elaisha bigesere ata suyanɛ bụtụ bu ko na amɛ esemberi ata shɛ egesere, bɛɛ hiɛŋ bụ, Urugono tugwuno tụ bụ maa shepi ikeke gɛ manɛbɛ mu zweni maa zhe Ramot-giliad.

²Ebi ci hwayɛ apata, rungo iwɛ Jehu yɛu Jehoshafat ata shɛ bụjalụ Nimshi. Mbiso bu maa gɛ gɛnjɛ miaụŋ-mo-bino bwa, zarɛga bụ maa hi teni taa na amɛ umwono ubwa.

³Nazhɛ dudugeni bu manɛbɛ. Nazhɛ hiɛŋ bụ, AGWANGWAMA hiɛŋ, M bu dudugeni manɛbɛ mu ga maa shɛ agwuma Isrɛl. Aka na ebu hwuwi, nazhɛ kapɛshɛnga ya odubo maa banɛ, gezhije, ta nda ti'insu o.

⁴Ibɛ po usemberi ata na shɛ bigesere[15] zhe ga Ramot-giliad.

⁵Aka na ti bee ci apata, baa kwụbɛ te ehiu ejeshi gɛgajɛ. Bɛɛ hiɛŋ aŋ, Ahiɛba eberezhe ejeshi, N 'yajɛ iwe ike Ama jala maa mo hi mbiso. Ge Jehu heŋteni bu, bɛɛ hiɛŋ, Gaaba aba jala na amɛ tuu? Butumwa ata jishijɛ bụ, bɛɛ hiɛŋ, Iyɛri, gabụ ga bɛ shɛ uberezhe we ejeshi.

⁶Ge Jehu ishijɛ ga, bee teni taa na amɛ umwono ubwa, bigesere ata 'wa bụ bee dudugeni bu manɛbɛ. Bɛɛ hiɛŋ bụ, AGWANGWAMA na shɛ Agwatana Isrɛl hiɛŋ, M bu dudugeni manɛbɛ mu ga maa shɛ agwuma atwa ubwa a na shɛ atwa Isrɛl.

⁷Gabụ bi zhɛ be iricingo ihwɛ Ahab agwuma-ihwɛ ɛtɛ bụ hwɛɛ, maa Ma nda itɛpwɛ miaụŋ mi mi mu ugondu mu na mɛ shɛ egesere mi a na ge Jɛzɛbɛl kwụnɛ la keeni miaụŋ mi mi mu ugondu mi nya mu na baa kwụnananɛ.

⁸Ihwɛ Ahab zhɛ yo ilono hwɛɛ. N zhɛ ma kwụna butubwenyi be elele na namɛ ni ihwɛ Ahab ni Isrɛl, ta ajama, ta amamata.

⁹Ngɛɛ zhɛ kaa du ma nda ihwɛ Ahab gana na Ngaa njɛ ihwɛ Jɛroboam yɛu Nebat, keeni gana na Ngaa njɛ ihwɛ Beasha yɛu Ahija.

¹⁰Shɛwawa shɛ ba shi zhɛ sha ya Jɛzɛbɛl ni Jɛzrɛl. Bi zha shɛ ba 'yaga bụtụ na zhɛ bo no bu o. Aka na ti yɛu gɛ tisemberi hwuwi utumwa ubwa tụdụma, bee kepishinji odubo baa banɛ bee gezhiji.

¹¹Aka na ti ge Jehu banɛ, bee ci anjɛ-ugondu ubwa avwɛ, bụtụ bu ko na amɛ aba heŋteni bu, bɛɛ hiɛŋ, I te lemi hŋ baa ga bụ suyanɛ? Imbe bwa bụsụmɛ-bụ-ụmpɛ ata zhajɛ pụ bụ bɛɛ hiɛɛŋ? Ge Jehu jishijɛ aŋ, bɛɛ hiɛŋ, Hi mepi bu du ya kaa tu n-ndumwa mu bwa.

¹²Atwa vwɛ ubwa hiɛŋ bụ, Ụzagwụ, iti mbishi iwɛ nɛ bee bi mbishe! Ge Jehu mbishi aŋ; bɛɛ hiɛŋ, Bi hiɛŋ AGWANGWAMA ubu dudugeni manɛbɛ maa shɛ agwuma Isrɛl.

¹³Gunu ata bụtụ bụtụ aba suji utogwo ubwa ee beri aŋ no ogbudu ata ge Jehu zhɛ bo mungo,[16] ee hwuri ukakacɛ, ɛɛ hiɛŋ, Ge Jehu shɛ ya agwuma oo!

¹⁴Ge Jehu yɛu Jehoshafat ata shɛ bụjalụ Nimshi imanganɛ Joram maa kwụna bụ. Aka ata go Joram na atwa Isrɛl hwɛɛ a nda ujasa na Hazaɛl agwuma Siria nu Ramot-giliad.

¹⁵Aka ata agwuma Joram gwure ya ni Jɛzrɛl, iwɛnɛ ti bee beni la tugwumashɛ na tụgwụcanga tu na atwa Siria gwụcanjɛ bụ na aka na ta a nda la ujasa na agwuma Siria ga Hazaɛl nu Ramot. Ge Jehu hiɛŋ atwa vwɛ ubwa, Yaa shɛ yaa hiɛ kwụlanɛ asha kede bụtụ be elele benengeni kwo kaa beni nụ ụshɛpwụ ga Ramot maa zha Jɛzrɛl maa mbishe aŋ unabarɛ ga o.

¹⁶Ge Jehu teni ụhaŋtụ ubwa ujasa, bee zhe Jɛzrɛl, iwɛnɛ ti yaa shɛ apata go Joram weci na tugwumashɛ tu bwa. Ga Ahazia agwuma Juda zhe maa kwubɛ Joram.

¹⁷Aka na ta bi'iywa na ba ngbaraka ụshɛpwụ ata Jɛzrɛl patanɛ na ashɛkpa, baa kwụbɛ ti ge Jehu be ci, medenji atwa vwɛ ubwa, bee keri ụhiɛŋshɛ, bɛɛ hiɛŋ, Udungbe wa atwa oko ye we ci. Go Joram hiɛŋ bụ, Tumwana bụsụcɛ ba budakwa bu ko maa taga aŋ uhwaŋna, go hoŋtono aŋ, maa, I te lemi hŋ?

¹⁸Ibɛ po bụsụcɛ ba budakwa ata to ga uhwaŋna baa twa na aba, bɛɛ hiɛŋ aŋ, agwuma hiɛŋ, I te lemi hŋ? Ge Jehu jishijɛ bụ, bɛɛ hiɛŋ, Imbe bwa ɛbi zhɛ ba nda na amɛ-olomm? N 'wa na aba. Nazhɛ bi'iywa ata bo odubo jɛmɛ, bɛɛ hiɛŋ, Butumwa ata ci aŋ, ama bi ci shi ba ya tuba ugwulwo.

¹⁹Ibɛ po agwuma tumwanɛ bụsụcɛ ba budakwa bi yebi, bee ci pa aba, bɛɛ hiɛŋ aŋ, agwuma hiɛŋ, I te lemi hŋ? Ge Jehu jishijɛ bụ, bɛɛ hiɛŋ, Imbe bwa ɛbi zhɛ ba nda na amɛ-olomm? N 'wa na aba.

²⁰Bi'iywa ata bo odubo mbiseneni atwa vwɛ, bɛɛ hiɛŋ, Butumwa ata ci aŋ, ama tuba bi ci shi ba ya ugwulwo. Bụtụ na ba suka ụhantụ ata sụbɛ Jehu yɛu Nimshi. Ubwa ba suka ụhaŋtụ gana ata nu usumwa gana bụsụmɛ-bụ-ụmpɛ.

²¹Go Jorama hiɛŋ atwa ubwa, Imanganga ma ụhaŋtụ mu ujasa. Aa imanganjɛ uŋ ga. Nazhɛ go Jorama agwuma ata isrɛl keeni Ahazia agwuma Juda beni, bụtụ bụtụ shepi ụhaŋtụ ubwa ujasa, ee beni maa e teji Jehu uhwaŋna, aa twa nu bwa, na cɛnjɛ tu Nabot bụtụ ata bi Jezriɛl.

²²Aka na go Joram kwụbɛ Jehu, bɛɛ hiɛŋ bụ, E-Jehu, I te lemi hŋ? Ge Jehu jishijɛ bụ, bɛɛ hiɛŋ, Amɛ-olom imbe bwaa obu to hoŋtono iwɛ abaa? Te ekwupenyi keeni tuwa tɛzhɛba tu na bino bu ge Jɛzɛbɛl suje hwɛɛ tu ta barɛɛ!

²³Go Joram jɛshɛrɛjɛ ụhaŋtụ ubwa mabaaba, baa uganɛ, bɛɛ hiɛŋ, Oo Ahazia, ebe ti meni o!

²⁴Ge Jehu mbo uta ubwa gana na tu ukpahiɛŋ ubwa namɛ hwɛɛ, bee keri i'ilɛ, boo to Joram na ashashɛ shitutu shɛ bwa. Ibɛ po i'ilɛ ɛtɛ teni tutu ihiulwe mehieŋ, bee zwi na amɛ ụhaŋtụ ubwa wɛɛ bee 'wi.

²⁵Ge Jehu hiɛŋ Bidka, na ba suka bụ nụ ụhaŋtụ ubwa ujasa, Shapa bụ maa keri na cɛnjɛ ti itimɛ Nabot bụtụ ata bi Jezriɛl. Iwɛnɛ po N teyinje, maa aka na atụ 'wa la bishi bwa ga Nabot nụ ụhaŋtụ, AGWANGWAMA mbishi Ahab, bɛɛ hiɛŋ,

²⁶Gana na Ngaa Kwụbɛ mehieŋ mu Nabot keeni mu na mu miaụŋ mu bwa wenebe, gana ata du Ngɛɛ zhɛ ma bụ tụpana, na cɛnjɛ tu ga gom. Iwɛbɛ po shapa bụ ma hi keri na cɛnjɛ ta ata tu Nabot iwɛ maa iwɛ nɛ AGWANGWAMA dumwa la sɛ.

²⁷Aka na tu ga Ahazia agwuma Juda kwụbɛ maa eshe vwi, bee gezhiji nụ ụhaŋtụ ubwa, boo to geri bụ ụshɛpwụ ata ɛɛ hiɛŋ, Bɛt-hagan.[17] Ge Jehu urigeni bu, bɛɛ hiɛŋ, Ta bụ ma du i'ilɛ nụ ụhaŋtụ ata ubwa. Oo to bu ga i'ilɛ no tumungo to ofwo ata ɛɛ hiɛŋ izeci ya aba Gu, ata namɛ ni Ibleam. Ama ga Ahazia gezhiji bee ci Migido, apata nazhɛ bee 'wi.

²⁸Nazhɛ anjɛ-ugondu ubwa shepi bu nụ ụhaŋtụ ujasa, ee zhe Jɛrusalɛm, ee ni bu nu u'uye we eshi ubwa ata namɛ nụ ụshɛpwụ wa agwuma Devid.

²⁹Tu ga Ahazia yɛ tugwama tu Juda yaa namɛ shiywa umpwa-nu-boo-ko, nazhɛ go Joram yɛu Ahab Yɛ tugwama tu Juda.

³⁰Aka na ge Jehu ci Jɛzrɛl, gɛ Jɛzɛbɛl hwụjɛ maa bu namba, bee shiyegeni eshe ubwa itezere, baa nanganɛ bihiŋzhe bwa, baa tapalajɛ ya eshe nụ ụgbahwụ ubwa, baa ngbarakacɛ uhwaŋna ụshɛpwụ ata.

³¹Aka na ti ge Jehu teni odubo ụshɛpwụ ata, gɛ Jɛzɛbɛl hiɛŋ bụ, Gabụ ge Zimri, gabụ ga bụ kwụnɛ agwuma-ihwɛ bụ, ulapiya hŋ abụ 'waŋnɛ?

³²Ge Jehu mbiyanɛ azuba, bɛɛ hiɛŋ, Gaaba namɛ ne mii? Gaaba namɛ ne mii? Nazhɛ nvwala mu ko mi yebi kwo kaa mu tatụ mu na ma nda ugondu nu ukpogwu wa agwuma mu zucinje eshe aba aa kwụbɛ bụ.

³³Ge Jehu hiɛŋ aŋ, Karɛ ma biyikwo ata, aa karɛ bụ ga. Ibɛ po mehieŋ mu bwa mu zwegegeni uba ata keeni idɛkwɛ ɛtɛ. Ge Jehu mungenji ru'wo ru bwa.

³⁴Aka na ti ge Jehu teni ni ihwɛ ɛtɛ, baa yɛ iyimɛyɛ, bee swe meni, nazhɛ bee peni atwa ubwa unu, bɛɛ hiɛŋ, Zhaga shapa ma biyikwo ata unu-tukalana 'imɛ, hi ni, iwɛnɛ tu baa shɛ yɛu ya agwuma.

³⁵Ama aka na te e zhe apata, semi ukokolo uhiuhiu ubwa, nɛ ɛvwɛvwɛjɛ ubwa keeni ababasụ i'ɛlɛ ibwɛ kiri ee jiteni.

³⁶Aka na ee gwuri, ee mbishi Jehu. Ge Jehu hiɛŋ aŋ, AGWANGWAMA dumwa la tedure nu unu bigesere bwa ge Elaija bụtụ ata bi Tishbi, bɛɛ hiɛŋ, Na cɛnjɛ ta ata ti Jɛzrɛl apata shiwawa shi zhɛ sha ya ru'wo ri Jɛzɛbɛl.

³⁷Apata du kaa ru'wo ri Jɛzɛbɛl ri zhɛ ra sha ubizo, na cɛnjɛ ti Jɛzrɛl. A zha shɛ kaa ɛ hiɛŋ, Gɛ Jɛzɛbɛl na o. Iwɛnɛ ta a zha shɛ a mapa bụ ya.