Read bassa SHƐRỤKWỤKWỤ SHI HIIŊ 12 Bible Online

SHƐRỤKWỤKWỤ SHI HIIŊ 12 - bassa bible

SHƐRỤKWỤKWỤ SHI HIIŊ 12

¹Aka na ti ge Devid gezhigeni la Soul yɛu Kish, bee zhe baa namɛ ni Ziklag. Ejeshi ofwugwo a na 'yagawa ahaŋsa tuto nu ujasa a na du kaa shɛ ejeshi na bụtụ eri ba ta aba, zhajɛ aa namɛ nu bwa.

²A banɛ nụ ụlamụ Bɛnjamin na du go Soul shɛ. E 'yebi a'inla tɛkala keeni nkwolo tɛkala i'ɛlɛ hweehwe.

³Ga Ahiɛzɛ no Joash miaụŋ mi Shimea na banɛ ni Gibia aba shɛ ehiu aba. Ge Jiziel keeni Pilɛt miaụŋ mu Azimavɛt; gɛ Bɛraka keeni Jehu na banɛ na Anatot,

⁴ge Ishmaya na banɛ ni Gibion, bɛ shɛ bijeshi na beni urishi na ashashɛ atwa ata talacɛ. Baa shɛ du buhwuri-bu-umbe na amɛ atwa ata ikɛnyi talacɛ, nɛ Jɛrɛmia, na Jahaziɛl, no Johanan, no Jozabad, na banɛ ni Gɛdɛra

⁵gɛ Ɛluzai, nɛ Jɛrimot, na Bialia, ne Shimaria keeni Shɛfatia na banɛ nu Haruf;

⁶gɛ Ɛlkana, ne Ishia, na Azarɛl, no Joeze keeni Jashobiam na shɛ umwamwa Kora,

⁷go Joela keeni Zɛbadia, miaụŋ mi Jeroham na banɛ nu Gedo.

⁸Nzeci me ejeshi na beni urishi a na du kaa 'yajɛ ahaŋsa tuto nu ujasa, a na banɛ nụ ụlamụ Gad, togwu nu udungbe Devid aka na baa swacɛ la nụ ụshɛka. A shɛ egwoni na shabula shu ujasa keeni nsanu tu'waŋna, apɛshɛka aba a shɛ gana a na izeci, e vwegenji kaa nu usumwa gana ɛgwɛɛgwɛ.

⁹Gana shihwolu sha aba shɛ namɛ la na: ge Ezɛ, ubwa shɛ uhiiŋ, go Obadia shɛ uyebi, gɛ Ɛliab shɛ ụtatụ,

¹⁰ge Mishmana shɛ uneshi gɛ Jɛrɛmia shɛ utana,

¹¹ga Atai shɛ ucihiŋ, gɛ Ɛliel shɛ ucenje,

¹²go Johanan shɛ ụtụndatụ, gɛ Ɛlizabad shɛ ucinjishi,

¹³gɛ Jɛrɛmia shɛ u'umpwa nazhɛ ga Makbana shɛ u'umpwa-nu-boo-ko.

¹⁴Atwa ga a na banɛ nụ ụlamụ Gad, atwa na gwumwa a shɛ eberezhe ejeshi dipi-yebi (100), atwa na gembi a shɛ eberezhe ejeshi akpakwụ-a-ta (1,000).

¹⁵Atwa ga aba keshi la Urefu Jodan ne Bihiiŋ bu uywa ata, aka ata du Urefu Jodan shini waa bwadụ, ee zhe ee gereteji atwa na ga jɛjɛ na ahwacɛ ubwa, tu uwaŋna-banụ tu uwaŋna-twonuo.

¹⁶Aka oko atwa beni nụ ụlamụ Bɛnjamin keeni una Juda, ee ci Devid no ofwo ikepi ɛtɛ baa swacɛ.

¹⁷Ge Devid beni bee zhegeni aŋ, bɛ hiɛŋ, Yaa shɛ na amɛ-olom ahiɛ zhajɛ maa hi m mbiyeni, asha hwure ma no ofwo na Ngaa namɛ maa hi nama no tu! Ama yaa shɛ ahiɛ zhajɛ maa hi n senji no ofwo atwa i'ime mi, okwo ti Ngee hi timengeni shi, Agwatana ogwunukwoshi tu tuba zhɛ a mapa iŋ, bɛɛ zhɛ kaa ba duma ụshɛrɛya hiŋ.

¹⁸Nazhɛ Mpiala mi kezhe nu uhiuhiu Amasai na shɛ uhiu wa atwa ata talacɛ, bɛɛ hiɛŋ, E-Devid, atwa bụ atɛ shɛ! Ɛ-yɛu Jesi, tu namɛ na bụ! Ge iyi ibi 'yagana eshe; ge iyi ibi 'yagana eshe, Ge iyi 'yagana atwa na mo bu mbiyono eshe! Iwɛnɛ po Agwatana bụ mo bu mbiyono ba. Nazhɛ ge Devid leshiji aŋ nu unyasa, bee peni aŋ shihwolu na amɛ ejeshi ubwa.

¹⁹Emeseyi etwenyi oko banɛ nụ ụlamụ Manasɛ, ee ci Devid, na aka ata, ibɛ bɛɛ zhɛ ne ejeshi Afilistia maa e jeshi agwuma Soul. (Bi mbiyeni shi kaa ga Afilistia gom, iwɛnɛ ta shɛgwuma sha aba shɛ njɛ inyɛsɛ maa ba sanga aŋ hwayɛ no ofwo agwuma-ihwɛ ɛlɛ ibwɛ go Soul, iwɛbɛ po ee gwuricinji bu la.)

²⁰Ejeshi na banɛ nụ ụlamụ Manasɛ a na togwu ne Devid ni Ziklag, aka na ti bee ci ugwulwo na: ga Adna, no Jozabad, ne Jediayɛl, na Maikɛl, no Jozabad, nɛ Ɛlihu, keeni Zeletai. Ụlamụ Manasɛ 'yajɛ eberezhe a na untanganɛ udungbe we ejeshi akpakwụ-a-ta a-ta (1,000).

²¹E mbiyeni Devid edingbe ejeshi ubwa tu'untangana iwɛ atwa na a sukakana edingbe ejeshi ubwa. Iwɛnɛ po a shɛ ejeshi na eri a nda teleyi. Nu ukwunanga ibɛ aa shɛ ya eberezhe na amɛ ejeshi ubwa.

²²Iyi-heri ejeshi anya a banɛ aa kaana ejeshi Devid, ibɛ po aa shɛ ya ejeshi ofwugwo, aa 'yajɛ tu ukpahiɛŋ ụ'wụtụ gana ejeshi Agwatana.[27]

²³Aka na ti ge Devid namɛ ni Hibron, ufwugwo we ejeshi na ee mbisegeni ujasa a na ci bu maa e mbiyeni bu maa ya tugwama no ohwolu Soul, gana na ta AGWANGWAMA shilwo la unu na:

²⁴Etwenyi Juda, a na 'yebi taa 'waŋna shabula shu ujasa nu nsanụ tɛkala, a shɛ igbɛɛ-itɛtu-na-akpakwụ-eneshi (6,800).

²⁵Etwenyi Simion, a na seshi ujasa tebiye a shɛ igbɛɛ-itɛtu-na-akpakwụ-ata-ni-dipi-yebi (7,100).

²⁶Etwenyi Livai, a shɛ igbɛɛ-iyebi-na-akpakwụ-atatụ (4,600).

²⁷Keeni atwa na 'wa Jehoiyada a na shɛ ehiu umwamwa Aron, a shɛ ugbaa-na-akpakwụ-atụndatụ-ni-dipi-yebi (3,700).

²⁸Ejeshi na banɛ nu umwamwa Zadok, a na du eri a nda teleyi nu ujasa tebiye, a shɛ atwa woshi-na-ba-eyebi (22), atwa ga du kaa shɛ eberezhe ujasa hwɛɛ aba.

²⁹Etwenyi na banɛ nụ ụlamụ Bɛnjamin, na shɛ ụlamụ ebe Soul gbaa, a shɛ ejeshi ugbaa-na-akpakwụ-a-ta (3,000), Pa'ụtụ aba a shɛ la atwa na namɛ ni ihwɛ Soul na tɛcara, nazhɛ aa banɛ.

³⁰Etwenyi na banɛ nụ ụlamụ Ifrem, a shɛ ejeshi na beni urishi ne teleyi tɛnda nụ ụlamụ wa aba, a shɛ igbɛɛ-umpwa-na-akpakwụ-eneshi (20,800).

³¹Atwa na banɛ na ashashɛ ụlamụ Manasɛ, a na ee teri maa e zhe e peni Devid tugwama, a shɛ igbɛɛ-cinjishi (18,000).

³²Etwenyi na banɛ nụ ụlamụ Isaka, a na mepi iyi nɛ atwa Isrɛl shɛ a nda na aka ibɛ, a shɛ eberezhe kpakwụ (200), a zhagajɛ na atwa aba na aa untanganɛ.

³³Etwenyi na banɛ nụ ụlamụ Zɛbulon, a shɛ igbɛɛ-woshi-ni-bɛ-itɛ (50,000), a na shɛ ejeshi na 'yajɛ ahaŋsa tuto nu ujasa. Ɛ mɛmɛ imɛ maa a njɛ ujasa ni i'wɛŋnɛ ujasa ye elele maa e mbiyeni Devid[28] na ahaŋsa oko.

³⁴Etwenyi na banɛ nụ ụlamụ Naftali 'waŋnɛ eberezhe akpakwụ-a-ta (1,000), aa 'waŋnɛ ejeshi na 'yebi ta a 'waŋna shabula shu ujasa, a na 'yebi du ta a kala nsanụ, a namɛ igbɛɛ-umpwa-ni-bɛ-tindɛtu-na-akpakwụ-a-ta (37,000).

³⁵Etwenyi na mɛmɛ imɛ iwɛ ujasa a na banɛ nụ ụlamụ Dan, a shɛ igbɛɛ-umpwa-ni-bɛneshi-na-akpakwụ-atatụ (28,600).

³⁶Etwenyi na banɛ nụ ụlamụ Ashɛ a na shɛ ejeshi a na ahaŋsa tuwo nu ujasa, a shɛ igbɛɛ-woshi (40,000).

³⁷Etwenyi na banɛ geri bu uwaŋna-banụ bu Jodan, nụ ụlamụ Rubɛn, nụ ụlamụ Gad keeni ashashɛ ụlamụ Manasɛ, a na mɛmɛ imɛ ni i'wɛŋnɛ ujasa iyiri ye elele a shɛ igbɛɛ-dupu-ne-eshe-umpwa (120,000).

³⁸Ejeshi ga mama imanjɛ iwɛ ujasa hwɛɛ aba, ibɛ po ee zhe Hibron, na tumama imanga maa e peni Devid tugwama ti Isrɛl. Atwa Isrɛl a na ta vwɛ du, a mama 'imɛ iwɛ ecilo ata gbaa.

³⁹A namɛ apata ne Devid ijitɛ itɛtu, aa ya aa swa iyi nɛ atwa vwɛ aba imanganɛ aŋ.

⁴⁰Atwa bananjɛ taa tuzuba, na alamụ ata Isaka, nɛ Zɛbulon keeni Naftali, aa 'waŋnɛ iyimɛyɛ ni Idɛkwɛ, tu Nzhinyacɛ, tu nruhondo, ti inɛ, aa 'wananjɛ ti inɛmɛ nɛ oo nokwo, to owowo, ta tụ'walụ ta afwafwa tu hwoo, ta mayaga, ta manɛbɛ ma buta. A 'waŋnanɛ aŋ du inɛ, na agwụdụ maa a kwụnɛ a yɛ. A njɛ ijɛ iwɛ maa e mbiseni unyasa na aa 'yajɛ nu u'una ata hwɛ hwɛɛ.